台北神學校現況

Tâi-pak Sîn-ha̍k-hāu hiān-hóng

文獻資訊

項目	資料
作者	無lo̍h名
卷期	台灣教會公報
卷期	第675期
日期	1941/6
頁數	20

白話字（原文數位化）

Tâi-pak Sîn-ha̍k-hāu hiān-hóng

1941年6月675期      20-21

Tuì Soan-kàu-sū ín-iông kui-kok liáu-āu, Tâi-pak Sîn-ha̍k-hāu bêng-si̍t chiâⁿ-choè Pak-pō͘ Tāi-hoē î-it ê kàu-io̍k ki-koan. Tuì kū-nî 9 ge̍h oāⁿ lán pún-kok ê lâng choè hāu-tiúⁿ í-lâi, Sîn-ha̍k-hāu ê keng-êng hong-chiam ū chiām-chiām kái-siān. Hiān-sî ê chè-tō͘ sī 5 nî chè. Ū-kho 2 nî. Pún-kho 3 nî. Beh ji̍p ū-kho chi̍t nî ê tio̍h ū Tiong-téng ha̍k-hāu chut-gia̍p ê thêng-tō͘ chiah oē tit ji̍p. Hiān-chāi ê sian-siⁿ: Hāu-tiúⁿ chi̍t miâ kàu-siū 4 miâ, káng-su 6 miâ, kiōng 11 miâ. Hiān-chāi ê ha̍k-seng 5 ha̍k-kip, kiōng 17 miâ. Sian-siⁿ só͘ tam-tng ê kho-bo̍k chiàu ē-toé:-

Hāu-tiúⁿ Tāi-chhoan Chèng--sī, tam-tng Hē-thóng Sîn-ha̍k. Kàu-siū Gô͘ Thian-bēng--sī, tam-tng Le̍k-sú-ha̍k. Ô͘ Mô͘-se--sī, tam-tng Sin-iok-ha̍k. N̂g Chú-gī--sī, tam-tng Hē-thóng Sîn-ha̍k. Gô͘ Chheng-ek--sī, tam-tng Kū-iok-ha̍k. Káng-su Chio̍k-pún Gâm-kin--sī(Ko-hāu kàu-siū) tam-tng To̍k-e̍k-gú. Kim-kiā Siù-it--sī(Ko-hāu kàu-siū), tam-tng Sim-lí-ha̍k, Lûn-lí-ha̍k, Lūn-lí-ha̍k, Tia̍t-ha̍k khài-lūn, Kok-bîn tō-tek. Lêng-bo̍k Goân-ngó͘--sī(Ko-siong kàu-siū), tam-tng Eng-gú. Chio̍h-pún Hu-jîn, tam-tng Eng-gú. Lîm-sî(té-kî)káng-su Chó-pán It-lông--sī(Tè Tāi kàu-siū ), tam-tng Chū-jiân kho-ha̍k. Khut Hong-gān--sī(Tè Tāi kàu-siū), tam-tng Siā-hoē-ha̍k , Ki-tok-kàu su-sióng-sú.

Tuì kin-nî 4 ge̍h khí, ū sin-siat Lú-chú Sîn-ha̍k-pō͘, kap Ko-téng Lú-ha̍k-pō͘. Ko-téng lú-ha̍k-pō͘ sī 4 nî chè, thêng-tō͘ kap Ko-téng Lú-ha̍k-hāu siâng-khoán. Hiān-chāi ha̍k-seng chóng-sò͘ iok 50 miâ. Sian-siⁿ kiōng 14 miâ. Sian-siⁿ só͘ tam-tng ê ha̍k-khò chiàu ē-toé:-

Tāi-chhoan Hāu-tiúⁿ tam-tng Siu-sin. Choan-jīm Sian-siⁿ 齊藤ミヨ tam-tng Thé-chho, Kok-gú. 大久保シヅエtam-tng Kok-gú. Chong-kàu kàu-io̍k 白方フミ, tam-tng Tē-lí, Le̍k-sú, Kok-gú. Káng-su I-li̍p Chùn lâm--sī(Lí lông-ha̍k-pō͘ chō͘ kàu-siū). Sò͘-ha̍k , Bu̍t-lí Hoà-ha̍k. Lô͘ Bān-tit--sī(I ha̍k-sū). Seng-lí, oē-seng, Tōng-bu̍t-ha̍k Chio̍h-chhoan--sī(Tē-jī ko-lú sian-siⁿ) oē-tô͘. Keh Hô-lia̍t--sī(Bo̍k-su), Sèng-keng. Kim-chhoan Hu-jîn--sī, Seng-hoà, Tê-tō, Chok-hoat. Chio̍h-pún Hu-jîn--sī, Eng-gú. 荒井チエヱ Sian-siⁿ Siaⁿ-ga̍k. Lí Tô͘-bî Sian-siⁿ , Chhâi-hông. Chiok-thok:Ô͘ Jîn ài Sian-siⁿ, Khì-ga̍k; Siau Bí-oân Sian-siⁿ, Khì-ga̍k.

Í-siōng, kán-tan siāu-kài lán kàu-hoē î-it ê kàu-io̍k ki-koan hō͘ lia̍t-uī hiaⁿ-chí chai-iáⁿ. ǹg-bāng lia̍t-uī siông-siông thoè Sîn-ha̍k-hāu kî-tó , tàu-oān-chō͘; in-uī chit keng ha̍k-hāu sī lán--ê, lán tāi-ke lóng ū hūn.

(Gô͘ Chheng-ek pò)

漢羅（Ùi原文改寫）

台北神學校現況

吳清鎰 報

1941年6月675期      20-21

對宣教師引揚歸國了後，台北神學校名實成做北部大會唯一的教育機關。對舊年9月換咱本國的人做校長以來，神學校的經營方針有漸漸改善。現時的制度是5年制。預科2年。本科3年。欲入預科一年的著有中等學校卒業的程度才會得入。現在的先生：校長一名教授4名，講師6名，共11名。現在的學生5學級，共17名。先生所擔當的科目照下底：-

校長大川正--氏，擔當系統神學。教授吳天命--氏，擔當歷史學。胡摩西--氏，擔當新約學。黃主義--氏，擔當系統神學。吳清鎰--氏，擔當舊約學。講師足本岩津--氏(高校教授)擔當獨譯語。金崎秀一--氏(高校教授)，擔當心理學，倫理學，論理學，哲學概論，國民道德。鈴木Goân-ngó͘--氏(高商教授)，擔當英語。石本夫人，擔當英語。臨時(短期)講師佐阪It-lông--氏(帝大教授)，擔當自然科學。屈Hong-gān--氏(帝大教授)，擔當社會學，基督教思想史。

對今年4月起，有新設女子神學部，佮高等女學部。高等女學部是4年制，程度佮高等女學校siâng款。現在學生總數約50名。先生共14名。先生所擔當的學課照下底：-

大川校長擔當修身。專任先生齊藤ミヨ擔當體操，國語。大久保シヅエ擔當國語。宗教教育白方フミ，擔當地理，歷史，國語。講師伊立Chùn lâm--氏(理農學部助教授)。數學，物理化學。盧萬德--氏(醫學士)。生理，衛生，動物學石川--氏(第二高女先生)畫圖。郭和烈--氏(牧師)，聖經。金村夫人--氏，生化，茶道，作法。石本夫人--氏，英語。荒井チエヱ先生聲樂。李Tô͘-bî先生，裁縫。祝託：胡仁愛先生，器樂；蕭Bí-oân先生，器樂。

以上，簡單紹介咱教會唯一的教育機關予列位兄姊知影。向望列位常常替神學校祈禱，鬥援助；因為這間學校是咱--ê，咱大家攏有份。

(吳清鎰報)