新體制下的日曜學校
Sin-thé-chè ē ê Ji̍t-iāu Ha̍k-hāu
文獻資訊
| 項目 | 資料 |
|---|---|
| 作者 | 潘道榮 Phoaⁿ Tō-êng |
| 卷期 | 台灣教會公報 |
| 卷期 | 第674期 |
| 日期 | 1941/5 |
| 頁數 | 18 |
白話字（原文數位化）
Sin Thé-chè ē ê Ji̍t-iāu Ha̍k-hāu
Phoaⁿ Tō-êng
1941年5月674期 18-19
Chek-èng sin sî-tāi, chiū lán kàu-hoē Ji̍t-iāu Ha̍k-hāu ê sin thé-chè, m̄-sī kan-ta tong-jiân tio̍h siūⁿ ê būn-toê, iā ài tio̍h chek-khek lâi chìn-hêng--ê. Ji̍t-iāu Ha̍k-hāu kì-jiân sī Kàu-hoē ê oa̍h-miā soàⁿ, chiū eng-kai chek-èng sin thé-chè, lâi hoat-hui Ji̍t-iāu Ha̍k-hāu ê kàu-io̍k. In-uī choá-bīn ê koan-hē , ài seng kú-khí kuí-nā hāng khah kín-iàu--ê, choè tho̍k-chiá chu-kun ê chham-khó:-
I. Khak-li̍p S.S. chū-thé ê pún-chit.
-
S.S. sī ti̍t-sio̍k tī kàu-hoē chi̍t ê tiōng-iàu kàu-io̍k-tek ê thoân-tō ki-koan.
-
In-uī ài ióng-sêng tiong-sit2 ê Ki-tok-tô͘ , siān-liông ê kok-bîn, chiū S.S. tio̍h ēng Lé-pài, Kàu-io̍k , Hùn-liān saⁿ têng liân-lo̍k ê hong-hoat.
-
Ji̍t-iāu Ha̍k-hāu ê sêng-kong , sī chāi tī tú-hó ê kàu-oân. Kàu-oân sī chú-thé ; chóng-sī kàu-oân kap seng-tô͘ tio̍h chiâⁿ-choè chi̍t thé.
II. Ha̍k-khò sin phian-sêng.
Chāi-lâi lán ê S.S. Ha̍k-khò, sī chhái-ēng Bān-kok kiōng-thong ê Ha̍k-khò.
Tī chit ê sin sî-tāi, nā chin-chiàⁿ iú-sim ài hoat-hui S.S. ê Kàu-io̍k, khah hó, tio̍h sin phian-sêng ha̍h tī Tâi-oân S.S. ê lō͘-ēng--ê. Khiok sī ū uî-lân ê só͘-chāi, chóng-sī tio̍h khoàⁿ khah nn̄g lâi siūⁿ, chiah bián lâu sit-chhek ê thó͘-khuì.
Ji̍t Ki ê S.S. í-keng chá-chá ū siat-hoat, kàu chit-tia̍p suī-jiân ū Kok-bîn Ha̍k-hāu-chè ê si̍t-si, iáu-kú khoài-khoài thang sin phian-sêng ha̍h tī hiān-tāi S.S. ê iau-kiû. Chì-chió, tio̍h chhái-chhú Ji̍t Ki S.S. kio̍k só͘ sin phian-sêng--ê. Ji̍t Ki ê S.S. thang kóng hiān-tāi tī Loē-tē ê Kàu-hoē bô lūn liōng á chit sī tē-it chìn-pō͘-tek--ê.
Tuì 4 ge̍h khí, in só͘ sin phian-sêng Ha̍k-khò ê chóng-tê chhin-chhiūⁿ án-ni:
-
Chho͘-téng-kho tē-it kip: Un-tián ê Siōng-tè.
-
Chho͘-téng tē-jī kip: Lán ê bô͘-hoān.
-
Chho͘-téng-kho tē-saⁿ kip: Tek-sèng ê Iâ-so͘.
-
Ko-téng-kho: Ki-tok ê it-seng-gâi.
-
Chheng-liân-kho: Sù-tô͘ Sìn-tiâu kap kàu-hoē seng-oa̍h ê sim-tek.
Chiàu chit ê phiau-chún lâi phian-sêng, chiū chai hit ê loē-iông sī chhiong-si̍t, koh ha̍p tī seng-tô͘ hiān-tāi ê khiàm-kheh. Khiok pîⁿ-pîⁿ sī ēng Sèng-chheh choè tiong-sim. Chāi-lâi lán S.S. só͘ ēng ê Ha̍k-khò, chún-pī ê kang choē, si̍t-chit ê lī-ek chió. Só͘-í tio̍h ài kái-sin, m̄-thang kò͘-chip.
III. Kip-piat sin cho͘-chit.
Ji̍t Ki ê S.S. tuì 4 ge̍h khí, iû-goân ài chún-kù Kok-bîn Ha̍k-hāu ê chè-tō͘ lâi thóng-it Kip-piat sin cho͘-chit. Só͘-í lán iā tio̍h kín tio̍k-chhiú khah hó. Í-āu ê S.S. Kàu-io̍k sī Sèng-chheh pún-uī, m̄-thang koh ēng pe̍h-oē-jī choè pún-uī. Bô-lūn Ha̍k-khò á Kàu-siū, chū-jiân sī lóng tio̍h ēng Kok-gú chiah ha̍p-lí.
Kip-piat sin cho͘-chit sī án-ni:
Eng-jî-kho: Tī ka-têng--nih.
Iù-tī-kho:(Moá 3-6 hè).
Chho͘-téng-kho tē 1 kip (moá 7-8 hè)
〃 〃 tē 2 kip(moá 9-10 hè)
〃 〃 tē 3 kip(moá 11-12 hè)
Ko-téng-kho(moá 13-14 hè)
Chheng-liân-kho(moá 15 hè í-siōng)
IV. Hoat-hui S.S. Kàu-io̍k ê to̍k-chú-sèng(獨自性)
-
Ki-pún-tek ê siu-liān(修練)
-
Kin-pún lí-liām(理念): Chí-tō in sêng-tióng tī tuì Sîn ì-sek ê sim; choē-khó͘ ê sim(罪苦); hiàn-sin ê sim hit hō.
-
Sìn-gióng tì-sek ê thiat-tí. Kàu-oân pún-sin tuì Ki-tok ū thiat-tí ê khak-sìn, chiah oē ín-chhoā gín-ná sìn-gióng tì-sek kàu thiat-tí. Só͘-í seng-tô͘ siông-siông ū chhì-giām, hoat-piáu kám-sióng kap phoe-phoàⁿ , sī chin iáu-kín.
-
Si̍t-chián ê chí-tō. Kàu-io̍k, chiū-sī seng-oa̍h. Tuì sìn-gióng kàu Jîn-keh, tuì Jîn-keh kàu tī siā-hoē ê hōng-sū, che sī lán S.S. si̍t-chián ê chí-tō, á-sī kóng èng-iōng ê siu-liān ê tek-chit.
Pí-phêng kà seng-tô͘ kî-tó, m̄-sī ta̍k lâng oē-hiáu kî-tó nā-tiāⁿ tio̍h khui kî-tó-hoē, Se̍k-iông-hoē(夕陽會) hit hō lâi hùn-liān--in.
漢羅（Ùi原文改寫）
新體制下的日曜學校
潘道榮
1941年5月674期 18-19
Chek-èng新時代，就咱教會日曜學校的 新體制，毋是kan-ta當然著想的問題，也愛著即刻來進行--ê。日曜學校既然是教會的活命線，就應該chek-èng新體制，來發揮日曜學校的教育。因為紙面的關係，愛先舉起幾若項較緊要--ê，做讀者諸君的參考：-
I. 確立S. S. 自體的本質。
-
S. S. 是直屬佇教會一个重要教育的的傳道機關。
-
因為愛養成忠實的基督徒，善良的國民，就S. S. 著用禮拜，教育，訓練三重連絡的方法。
-
日曜學校的成功，是在佇拄好的教員。教員是主體；總是教員佮生徒著成做一體。
II. 學課新編成。
再來咱的 S. S. 學課，是採用萬國共通的學課。
佇這个新時代，若真正有心愛發揮S. S.的教育，較好，著新編成合佇台灣S. S.的路用--ê。卻是有為難的所在，總是著看較兩來想，才免留失策的吐氣。
日Ki 的 S. S. 已經早早有設法，到這tia̍p雖然有國民學校制的實施，iáu-kú快快通新編成合佇現代S. S.的要求。至少，著採取日Ki S. S.局所新編成--ê。日Ki 的 S. S.通講現代佇內地的教會無論量抑質是第一進步的--ê。
對4月起，in所新編成學課的總題親像按呢：
-
初等科第一級：恩典的上帝。
-
初等第二級：咱的模範。
-
初等科第三級：得勝的耶穌。
-
高等科：基督的一生涯。
-
青年科：使徒信條佮教會生活的心得。
照這?標準來編成，就知彼?內容是充實，閣合佇生徒現代的欠缺。卻平平是用聖冊做中心。再來咱S. S.所用的學課，準備的工濟，實質的利益少。所以著愛改新，毋通固執。
III.級別新組織。
日Ki 的 S. S.對4月起，猶原愛準據國民學校的制度來統一級別新組織。所以咱也著緊著手較好。以後的 S. S. 教育是聖冊本位，毋通閣用白話字做本位。無論學課抑教授，自然是攏著用國語才合理。
級別新組織是按呢：
嬰兒科：佇家庭裡。
幼稚科：(滿3-6歲)。
初等科第1級 (滿7-8歲)
〃 〃第2級(滿9-10歲)
〃 〃第3級(滿11-12歲)
高等科(滿13-14歲)
青年科(滿15歲以上)
IV. 發揮S. S. 教育的 獨自性(獨自性)
-
基本的的修練(修練)
-
根本理念(理念)：指導in成長佇對神意識的心；罪苦的心(罪苦)；獻身的心彼號。
-
信仰智識的徹底。教員本身對基督有徹底的確信，才會引chhoā囡仔信仰智識到徹底。所以生徒常常有試驗，發表感想佮批判，是真猶緊。
-
Si̍t-chián 的指導。教育，就是生活。對信仰到人格，對人格到佇社會的奉事，這是咱S. S. si̍t-chián 的指導，抑是講應用的修練的特質。
比評教生徒祈禱，毋是逐人會曉祈禱nā-tiāⁿ著開祈禱會，夕陽會(夕陽會)彼號來訓練--in。