頭一个閣活節
Thâu-chi̍t ê Koh-oa̍h-choeh
文獻資訊
| 項目 | 資料 |
|---|---|
| 作者 | 柯設偕 Koa Siat-kai |
| 卷期 | 台灣教會公報 |
| 卷期 | 第673期 |
| 日期 | 1941/4 |
| 頁數 | 22 |
白話字（原文數位化）
Thâu-chi̍t ê Koh-oa̍h-choeh
Koa Siat-kai
1941年4月673期 22-24
[Pún-nî ê Koh-oa̍h-choeh sī 4 ge̍h 13 ji̍t ê lé-pài-ji̍t. Siá chit-tè kò͘-sū, lâi saⁿ-kap koh-chài siūⁿ-khí lán ê Chú ê koh-oa̍h.]
[Iû-thài lâng, choē-choē hō Kū-io̍k ê lâng-miâ, tī-chia só͘ siá chi̍t ê “Lō͘-tek” m̄-sī Lō͘-tek-kì hit ê “Lō͘-tek.”]
Lō͘-tek sī 12 hè ê cha-bó͘-gín-á.
I ê lāu-pē sī hō͘ chi̍t ê hó-gia̍h lâng A-lī-má-thài ê Iok-sek chhiàⁿ choè kò͘ hoe-hn̂g--ê.
Iok-sek ê hoe-hn̂g sī tī Iâ-lō͘-sat-léng siâⁿ-goā. Hn̂g-lāi ū choē-choē châng toā chhiū, ia̍h ū chin-choē ê hoe.
Lō͘-tek ka pi ê pē-bú tiàm tī hoe-hn̂g-lāi ê chi̍t keng soè-keng chhù, i chin ài khì hoe-hn̂g--nih thit-thô, ta̍k-ji̍t iáu-bē khì o̍h-tn̂g ê í-chêng, i tiāⁿ-tio̍h tāi-seng khì khoàⁿ i só͘ ài ê hoe.
Ū chi̍t nî chhun-thiⁿ, pài-gō͘, i ê lāu-bú kā i kóng, “Lō͘-tek! goá hoan-hù lí kin-á-ji̍t m̄-bián khì hoe-hn̂g--nih.”
Lō͘-tek chin kî-koài, mn̄g kóng, “Sī cháiⁿ-iūⁿ neh?”
I ê lāu-bú chiū tuì i kóng, “Lán ê Sian-siⁿ, lán ê Kiù-chú Iâ-so͘ siū-khó͘ lah. I iā sī gín-á ê pêng-iú, lín kiám m̄-sī chin thiàⁿ I mah? Hiān-chāi I siū lâng tèng tī si̍p-jī-kè téng, tn̄g-khuì lah!
“Ah! Lāu-bú! 4,5 ji̍t chêng goá ū khoàⁿ-kìⁿ I khiâ lû-á lâi kàu Iâ-sō͘-sat-léng . Chin-choē lâng kap gín-á teh hoan-gêng I ê sî, I chin chû-ài, tuì chèng-lâng bî-chhiò. Ah! hiān-chāi I sí lah mah! Goá chin kan-khó͘, uī-tio̍h hāi-sí I hiah ê lâng. Lāu-bú , lí chai I bâi-chòng tī sím-mi̍h só͘-chāi?” Lō͘-tek chin chhiat teh mn̄g.
Lō͘-tek , tú-chiah lí ê lāu-pē chiap-tio̍h chú-lâng ê siau-sit , kóng beh chiong i ka-kī pī-pān piān-piān tī hoe-hn̂g--nih ê sin ê bō͘, beh hiàn hō͘ Iâ-so͘ . In beh chiong Iâ-so͘ bâi-chòng tī-hia, só͘-í goá hoan-hù lí kin-á-ji̍t m̄-thang khì hoe-hn̂g--nih, bián-tit chó͘-gāi-tio̍h in ê kang.” Lō͘-tek ê lāu-bú án-ni kóng.
Hit-àm, Lō͘-tek khùn tī chhn̂g--nih, siūⁿ-tio̍h lāu-bú kā i kóng ê sū, i sim lāi siūⁿ, tek-khak beh khì bán kuí-nā luí tē-it suí ê hoe hē tī Iâ-so͘ ê bō͘-chêng, piáu-sī i thiàⁿ Iâ-so͘ ê sim. “Chóng-sī goá tio̍h tán kàu bîn-á-ji̍t kè, chiah thang bán,” i ka-tī teh kóng, “In-uī bîn-á-ji̍t sī an-hioh-ji̍t(pài-la̍k), sian-siⁿ kóng, m̄-thang tī an-hioh-ji̍t bán hoe.”
Keh-ji̍t ,hit-ji̍t(pài-la̍k), Lō͘-tek kám-kak te̍k-pia̍t khah-tn̂g, āu-lâi ji̍t àm , i chá-chá chiū khùn, pī-pān keh-ji̍t beh chin chá chiū beh khí-lâi bán-hoe.
Tē 3 ji̍t(lé-pài-ji̍t) , cheng-sîn ê sî, thiⁿ iáu-bē kng, i koáⁿ-kín peh--khí-lâi, chhēng hó ê saⁿ, khin-khin kiâⁿ khì hoe-hn̂g--nih, bán choē-choē tē-it phang, tē-it suí ê hoe.
Tú-tio̍h i kiâⁿ-oá Iâ-so͘ ê bō͘ ê sî, i khoàⁿ-kìⁿ í-keng ū lâng pí i khah tāi-seng kàu uī, i thiaⁿ-kìⁿ kuí-nā ê hū-jîn-lâng khin-khin teh kóng-oē ê siaⁿ, āu-lâi i thin-kìⁿ chi̍t ê hū-jîn-lâng kóng, “A! In chiong I ê sin-si soá--khì lah!” iáu koh chi̍t ê hū-jîn-lâng ìn kóng, “Lán tò-tńg lâi khì kā Pí-tek kap i ê tâng-phoāⁿ kóng.” Kóng liáu, in chiū lī-khui khì.
Lō͘-tek chiū tio̍h-kip, siūⁿ beh tò-tńg khì, chóng-sī iū-koh m̄-kam-sim, in-uī i iáu-bē ū chiong hoe hē tī Iâ-so͘ ê bō͘-chêng. I siám tī chi̍t-châng toā-châng chhiū āu, bô hō͘ pa̍t-lâng khoàⁿ-kìⁿ--i.
Koh tiap-á-kú , i thiaⁿ-kìⁿ nn̄g ê lâng cháu chin kín ê kha-pō͘ siaⁿ. Tāi-seng cháu kàu ê lâng àⁿ-thâu khoàⁿ bō͘-lāi, āu-lâi oa̍t-thâu tán hit ê khah bān kàu ê lâng, hit ê cháu kàu uī--ê, iā siâng-khoán àⁿ-thâu khoàⁿ bō͘-lāi, nn̄g, saⁿ hun āu, Lō͘-tek thiaⁿ-kìⁿ in nn̄g lâng kóng-oē ê siaⁿ, chóng-sī in nn̄g lâng teh kóng sím-mi̍h , thiaⁿ boē bêng.
Koh tiap-á-kú , hit nn̄g lâng oa̍t-tńg-sin, ná kóng-oē ná cháu tuì siâⁿ--nih khì.
Hit-sî Lō͘-tek khah hó-táⁿ, i chiū pī-pān chiong hoe beh hē tī Iâ-so͘ ê bō͘-chêng. Chóng-sī i tú-tú tuì toā-châng chhiū āu chhut--lâi ê sî, khoàⁿ-kìⁿ ū lâng lâi lah. Hit ê sī thâu-tú-á chiah lâi ê hū-jîn-lâng tiong ê chi̍t-ê, i bīn--nih ū chin iu-siong ê khoán-sit, in-uī i chin siong-pi thî-khàu.
Lō͘-tek tú-tú siūⁿ-tiāⁿ beh kiâⁿ chìn-chêng khì an-uì hit ê hū-jîn-lâng ê sî, khoàⁿ-kìⁿ hū-jîn-lâng ê āu-bīn ū chi̍t ê lâng khiā-teh, chóng-sī hū-jîn-lâng iáu m̄-chai-iáⁿ, tú-tú hū-jîn-lâng oa̍t-tńg-sin ê sî, Lō͘-tek bêng-bêng thiaⁿ-kìⁿ hit ê lâng tuì hū-jîn-lâng kóng, “Hū-jîn-lâng ah, siáⁿ-sū thî-khàu? Lí chhē chī-chuī?” Hū-jîn-lâng ê ba̍k-chiu moá-moá ba̍k-sái , só͘-í iáu boē-oē jīn-tio̍h I sī chī-chuī, chí-ū kóng, “Thâu-ke ah, chhiáⁿ kā goá kóng hē I tī sím-mi̍h só͘-chāi……” Hit ê lâng chí-ū kóng, “ Má-lī-á ah.”
Lō͘-tek kàu-taⁿ iāu-bē-bat thiaⁿ-tio̍h chiah-nih hó-thiaⁿ ê siaⁿ-im.
Hit ê hū-jîn-lâng chiū oa̍t-tńg-sin kā I kóng, “Sian-siⁿ,” iā kuī tī I ê bīn-chêng.
Lō͘-tek bô koh iân-chhiân tiap-á-kú, i cháu tò-khì i ê chhù, chiong Iâ-so͘ koh-oa̍h ê siau-sit kā i ê lāu-bó kóng.
In-uī i chhin-ba̍k khoàⁿ-kìⁿ Iâ-so͘ , iā chhin-hī thiaⁿ-kìⁿ I ê kóng-oē.
漢羅（Ùi原文改寫）
頭一个閣活節
柯設偕
1941年4月673期 22-24
[本年的閣活節是4月13日的禮拜日。寫這tè故事，來相佮閣再想起咱的主的閣活。]
[猶太人，濟濟號舊約的人名，佇遮所寫一个「路得」毋是路得記彼个「路得。」]
路得是12歲的查某囡仔。
伊的老父是予一个好額人A-lī-má-thài的約瑟倩做顧花園--ê。
約瑟的花園是佇耶路撒冷城外。園內有濟濟叢大樹，亦有真濟的花。
路得佮伊的父母tiàm佇花園內的一間細間厝，伊真愛去花園裡thit-thô，逐日猶未去學-長的以前，伊定著代先去看伊所愛的花。
有一年春天，拜五，伊的老母共伊講，「路得！我吩咐你今仔日毋免去花園裡。」
路得真奇怪，問講，「是怎樣neh？」
伊的老母就對伊講，「咱的先生，咱的救主耶穌受苦lah。伊也是囡仔的朋友，恁kiám毋是真疼伊mah？現在伊受人釘佇十字架頂，斷氣lah！
「Ah！老母！4，5日前我有看見伊騎驢仔來到耶路撒冷。真濟人佮囡仔teh歡迎伊的時，伊真慈愛，對眾人微笑。Ah！現在伊死lah mah！我真艱苦，為著害死伊遐的人。老母，你知伊埋葬佇甚物所在？」路得真切teh問。
路得，拄chiah你的老父接著主人的消息，講欲將伊家己備辦便便佇花園裡的新的墓，欲獻予耶穌。In欲將耶穌埋葬佇遐，所以我吩咐你今仔日毋通去花園裡，免得阻礙著in 的工。」路得的老母按呢講。
彼暗，路得睏佇床裡，想著老母共伊講的事，伊心內想，的確欲去挽幾偌蕊第一媠的花hē佇耶穌的墓前，表示伊疼耶穌的心。「總是我著等到明仔日過，才通挽，」伊家己teh講，「因為明仔日是安息日(拜六)，先生講，毋通佇安息日挽花。」
隔日，彼日(拜六)，路得感覺特別較長，後來日暗，伊早早就睏，備辦隔日欲真早就欲起來挽花。
第3日(禮拜日) ，精神的時，天猶未光，伊趕緊peh--起來，穿好的衫，輕輕行去花園裡，挽濟濟第一芳，第一媠的花。
拄著伊行倚耶穌的墓的時，伊看見已經有人比伊較代先到位，伊聽見幾若个婦人人輕輕teh講話的聲，後來伊聽見一个婦人人講，「A！In將伊的身屍徙--去lah！」猶閣一个婦人人應講，「咱倒轉來去共彼得佮伊的同伴講。」講了，in就離開去。
路得就著急，想欲倒轉去，總是又閣毋甘心，因為伊猶未有將花hē佇耶穌的墓前。伊閃佇一叢大叢樹後，無予別人看見--伊。
閣霎仔久，伊聽見兩个人走真緊的腳步聲。代先走到的人àⁿ頭看墓內，後來越頭等彼个較慢到的人，彼个走到位--ê，也siâng款àⁿ頭看墓內，兩，三分後，路得聽見in兩人講話的聲，總是in兩人teh講甚物，聽袂明。
閣霎仔久，彼兩人越轉身，ná講話ná走對城裡去。
彼時路得較好膽，伊就備辦將花欲hē佇耶穌的墓前。總是伊tú-tú對大叢樹後出來的時，看見有人來lah。彼个是頭tú-á才來的婦人人中的一个，伊面裡有真憂傷的款式，因為伊真傷悲啼哭。
路得tú-tú想定欲行進前去安慰彼个婦人人的時，看見婦人人的後面有一个人徛teh，總是婦人人猶毋知影，tú-tú婦人人越轉身的時，路得明明聽見彼个人對婦人人講，「婦人人ah，啥事啼哭？你揣chī-chuī？」婦人人的目睭滿滿目屎，所以猶未會認著伊是chī-chuī，只有講，「頭家ah，請共我講hē伊佇甚物所在……」彼个人只有講，「馬利亞ah。」
路得到taⁿ猶未捌聽著chiah-nih好聽的聲音。
彼个婦人人就越轉身共伊講，「先生，」也跪佇伊的面前。
路得無閣iân-chhiân霎仔久，伊走倒去伊的厝，將耶穌閣活的消息共伊的老母講。
因為伊親目看見耶穌，也親耳聽見伊的講話。