福音的使命
Hok-im ê Sù-bēng
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第671期 |
| 日期 | 1941/2 |
| 頁數 | 1-3 |
白話字（原文數位化）
Hok-im ê Sù-bēng
1941年2月671期 1-3
Kim gûn-goá lóng bô , to̍k-to̍k goá só͘-ū--ê hō͘ lí. Tī Ná-sak-le̍k Iâ-so͘ Ki-tok ê miâ, lí khí--lâi kiâⁿ (Hēng-toān 3:6)
Tī Hēng-toān ê thâu-chām ū kóng sù-tô͘ kiâⁿ chē-chē kî-sū kap sîn-jiah (2:4). Sím-mi̍h sîn-jiah, lán m̄-chai. Chit-tia̍p lán chiah khí-thâu tha̍k-tio̍h sù-tô͘ ū i-hó chi̍t ê nńg-kha--ê, kiám-chhái sī uī-tio̍h chit chân ū hián-chhut toā ê kiat-kó-chiū-sī chi̍t-bīn kàu-hoē heng-ōng, lâng-gia̍h ke-thiⁿ; koh chi̍t-bīn, kàu-hoē ia̍h siū-tio̍h hām-hāi-tuì án-ni tù-chiá Lō͘-ka chiah te̍k-pia̍t kì-bêng chit-ê.
Sū-kiāⁿ ê hoat-seng, sī tī Iâ-lō-sat-léng, tú sī Sèng-tiān kî-tó-hoē ê sî-kan. Ē-po͘ 3 tiám, mńg-loán ê kng-soàⁿ ū chiò tī suí-suí ê Sèng-siâⁿ, tī hit-sî Pí-tek, Iok-hān nn̄g-lâng tâng-sim saⁿ-kap kiâⁿ, beh khì hù kî-tó-hoē. In kiâⁿ kàu tī tiān-mn̂g, chiū-sī kiò-chò “Suí-mn̂g” ê só͘-chāi , tī-hia khoàⁿ-kìⁿ chi̍t ê nńg-kha--ê teh kiù siá-si. In bô hiâm sî-kan iân-chhiân, chiū khui lîn-bín tông-chêng ê sim, “chú-ba̍k khoàⁿ--i.” Bí-sut-ka chiūⁿ tiān só͘ chù-ba̍k--ê sī Sèng-tiān ê bí-su̍t, Kho-ha̍k-ka sī Sèng-tiān ê chhâi-liāu, nā-sī Ki-tok-tô͘ sī chù-ba̍k tī jîn-luī ê khó͘-thàng ,khoàⁿ cháiⁿ-iūⁿ thang kiù--i. Tuì án-ni Pí-tek, Iok-hān chiū ēng Iâ-so͘ Ki-tok ê miâ lâi chín-kiù i thoat-lī 40 goā nî ê pēⁿ-thiàⁿ , hō͘ i ji̍p tī sin ê seng-oa̍h.
Lán tuì chit-chân, ài lâi siūⁿ nn̄g, saⁿ hāng:-
I. Hok-im ê sù-bāng sī siúⁿ-sù lâng ū sin ê hi-bōng kap oa̍h-miā.
Chit ê lâng tuì chhut-sì chiū nńg-kha, í-keng keng-koè 40 goā nî. án-ni chit ê pēⁿ ū tuì i chhiúⁿ-toa̍t jîn-seng it-chhè ê hi-bōng, ta̍k-ji̍t bû-kò sī tuì hó-sim-lâng ê siá-sì lâi bóng-bóng koè-ji̍t.
I khoàⁿ-kìⁿ Pí-tek, Iok-hān teh lâi, chiū chiàu kui-cha̍p nî ê khoán, chhun tn̂g chhiú kiû siá-sì. Hit-sî Pí-tek chò tāi-piáu tuì i kóng, “ Khoàⁿ goán.” Hok-im ê siaⁿ ū siúⁿ-sù lâng hi-bōng kap khuì-la̍t. Chit ê nńg-kha--ê, io̍k-bōng iáu kē, thiaⁿ-liáu hoaⁿ-hí, àn-sǹg ū só͘ tit-tio̍h . Chē-chē lâng sī chhin-chhiūⁿ i, sī siūⁿ beh tit-tio̍h kim-gûn, tē-chiūⁿ ê êng-hoâ hù-kuì.
Pí-tek sī sêng-si̍t, bô ún-moâ , iā bô kiàn-siàu, tuì i kóng, “Kim kap gûn, goá lóng bô.” I í-keng pàng-sak it-chhè lâi toè Iâ-so͘. M̄-kú Pí-tek ū ēng koh-khah hó--ê lâi hō͘--i, kóng, “To̍k-to̍k goá só͘-ū--ê hō͘ lí, Tī Ná-sat-le̍k Iâ-so͘ Ki-tok ê miâ, hō͘ lí khí-lâi kiâⁿ.” Hok-im só͘ beh siúⁿ-sù lâng--ê, kin-pún-tek, m̄-sī bu̍t-chit, sī sîn-lêng ê in-sù, sī beh siúⁿ-sù lâng tī sim-lāi ū tit-tio̍h sin ê khuì-la̍t, ióng-chòng ê sim-sîn, kian-tēng ê chì-khì lâi chiâⁿ-chò oa̍h-miā moá-moá ê lâng.
Bu̍t-chit-tek ê oān-chō͘ sī iàu-kín, chóng-sī sī chiām-sî ê lō͘-ēng, chí-ū sim-lāi ū tit-tio̍h sin ê oa̍h-miā ê khuì-la̍t sī choè tē-it. Chit ê nńg-kha--ê, tī i ê sim-lāi ū tit-tio̍h sin ê oa̍h-miā ê khuì-la̍t, tì-kàu i ê kha kap kha-ba̍k khiā-chāi, chiū ē peh--khí-lâi thiàu.
II. Hok-im ê khuì-la̍t sī chāi-tī Iâ-so͘ Ki-tok.
Pí-tek, Iok-hān khiā tī chè-si-thâu kap tiúⁿ-ló ê bīn-chêng ê sî, in ū mn̄g kóng, “Lín ēng sím-mi̍h koân-lêng, ēng sím-mi̍h miâ, kiâⁿ chit ê tāi-chì ah?” Hit-sî Pí-tek hó-táⁿ tuì in kóng, “Lín chèng-lâng kap thong Í-sek-lia̍t peh-sèⁿ tio̍h chai, sī tī Ná-sat-le̍k lâng Iâ-so͘ Ki-tok ê miâ, lín só͘ tèng tī si̍p-jī-kè, Siōng-tè hō͘ I tuì sí-lâng tiong koh-oa̍h--ê, chiū-sī tī I ê miâ, chit ê lâng hó-hó, khiā tī lín ê bīn-chêng(Hēng-toān 4:9).”
Hok-im ê khuì-la̍t sī chāi-tī Iâ-so͘ Ki-tok. Iâ-so͘ Ki-tok sī lán ê sìn-gióng ê tuì-siōng, sī lán tit-kiù ê goân-thâu. Chú Iâ-so͘ bat pún-sin tì-ì mn̄g kóng, “Lâng kóng goá sī chī-chuī?” án-ni thang chai I sī Hok-im ê tiong-sim. Jī-hō͘ kàu-hoē iā ū tì-ì thoân kóng, “ Lín tio̍h hoán-hoé, ta̍k-lâng tī Iâ-so͘ Ki-tok ê miâ siū sé-lé, kàu hō͘ lín ê choē sià-bián.” “Koh tī pa̍t ê pèng bô chín-kiù, in-uī tī thiⁿ-ē, bô siúⁿ-sù pa̍t ê miâ tī lâng ê tiong-kan, hō͘ lán tiàm tī i lâi tit-kiù”(Hēng-toān 4:12). ia̍h kóng, “Siōng-tè í-keng chiong éng-oa̍h hō͘ lán, iā chit ê oa̍h sī chāi-tī I ê Kiáⁿ”(I Hān 5:11).
Chí-ū tī Iâ-so͘ Ki-tok ê miâ, hiah ê sim-sîn nńg-chiáⁿ, loán-jio̍k, pê tī tē-bīn--ê, chiah ē thang tit-tio̍h sin ê khuì-la̍t, ē thang koh peh--khí-lâi, ia̍h kiâⁿ, ia̍h thiàu, ia̍h o-ló Siōng-tè.
III. Hok-im ê hāu-le̍k sī pit-iàu lâng ê sìn.
Tī chit ê kì-sū khiok bô bêng-kì chit ê nńg-kha--ê ū sìn, chóng-sī tuì i ê kiâⁿ-ta̍h, lán ē chai. “I thiàu--khí-lâi khiā-teh koh kiâⁿ, kap in ji̍p tiān, ia̍h kiâⁿ, ia̍h thiàu , ia̍h o-ló Siōng-tè.”
In-uī i ū sìn, chiū ū thang tit-tio̍h choè-toā ê in-sù. Lâng nā bô sìn, chiū ē chó͘-tòng Hok-im ê khuì-la̍t. Lán ê Chú tī I ê pún-hiuⁿ “bô kiâⁿ chē-chē ê khoân-lêng, in-uī in bô sìn”
Si̍t-chāi Hok-im ê hāu-le̍k sī pit-iàu lâng ê sìn. Phì-jū hó io̍h, lán nā bô lim ji̍p pak-lāi, hit hāng io̍h bē hián-chhut hāu-le̍k. Lán ê ba̍k-chiu nā bô khui, chū-jiân bē thang khoàⁿ-tio̍h sím-mi̍h. Chhin-chhiūⁿ án-ni, siat-sú lán nā bô sìn, chiū bē thang thé-giām-tio̍h Iâ-so͘ Ki-tok só͘ beh siúⁿ-sù lán sin ê khuì-la̍t kap oa̍h-miā. Sìn, sī tit-tio̍h oa̍h-miā ê mn̂g-hō͘. Chú ū khiā tī goā-bīn teh phah-mn̂g, lán nā ū khui lán ê sìn ê sim-mn̂g, I chek-sî ji̍p; ia̍h I ê chin-lí, I ê thiàⁿ-thàng, I ê Sîn suî-sî hián-chhut hāu-le̍k, pang-chān lán chiâⁿ-chò ū oa̍h-miā ê lâng. Iâ-so͘ Ki-tok ài siúⁿ-sù ché-iūⁿ ê in-tián hō͘ lán, m̄-kú lán nā chhin-chhiūⁿ Ná-sat-le̍k lâng bô sìn, I chiū bē-ē lah!
漢羅（Ùi原文改寫）
福音的使命
1941年2月671期 1-3
金銀我攏無，獨獨我所有--ê予你。佇Ná-sak-le̍k耶穌基督的名，你起來行(行傳3：6)
佇行傳的頭站有講使徒行濟濟奇事佮神跡(2：4)。甚物神跡，咱毋知。這霎咱才起頭讀著使徒有醫好一个軟腳--ê，kiám-chhái是為著這層有顯出大的結果-就是一面教會興旺，人額加添；閣一面，教會亦受著陷害-對按呢著者路加才特別記明這个。
事件的發生，是耶路撒冷，tú是聖殿祈禱會的時間。下晡3點，晚loán 的光線有照佇媠媠的聖城，佇彼時彼得，約翰兩人同心相佮行，欲去赴祈禱會。In行到佇殿門，就是叫做「媠門」的所在，佇遐看見一个軟腳--ê teh救捨施。In無嫌時間iân-chhiân，就開憐憫同情的心，「注目看--伊。」美術家上殿所注目--ê是聖殿的美術，科學家是聖殿的材料，若是基督徒是注目佇人類的苦痛，看怎樣通救--伊。對按呢彼得，約翰就用耶穌基督的名來拯救伊脫離40外年的病疼，予伊入佇新的生活。
咱對這層，愛來想兩，三項：-
伊. 福音的使命是賞賜人有新的希望佮活命。
這个人對出世就軟腳，已經經過40外年。按呢个病有對伊搶奪人生一切的希望，逐日無過是對好心人的捨施來bóng-bóng過日。
伊看見彼得，約翰teh來，就照規十年的款，chhun長手求捨施。彼時彼得做代表對伊講，「看阮。」福音的聲有賞賜人希望佮氣力。這个軟腳--ê，慾望猶低，聽了歡喜，按算有所得著。濟濟人是親像伊，是想欲得著金銀，地上的榮華富貴。
彼得是誠實，無隱瞞，也無見笑，對伊講，「金佮銀，我攏無。」伊已經放拺一切來綴耶穌。M̄-kú彼得有用閣較好--ê來予--伊，講，「獨獨我所有--ê予你，佇拿撒勒耶穌基督的名，予你起來行。」福音所欲賞賜人--ê，根本的，毋是物質，是神靈的恩賜，是欲賞賜人佇心內有得著新的氣力，勇壯的心神，堅定的 志氣來成做活命滿滿的人。
物質tek 的援助是要緊，總是是暫時的路用，只有心內有得著新的活命的氣力是做第一。這个軟腳--ê，佇伊的心內有得著新的活命的氣力，致到伊的腳佮腳目徛在，就會peh--起來跳。
II. 福音的氣力是在佇耶穌基督。
彼得，約翰徛佇祭司頭佮長老的面前的時，in有問講，「恁用甚物權能，用甚物名，行這个代誌ah？」彼時彼得好膽對in講，「恁眾人佮通以色列百姓著知，是佇拿撒勒人耶穌基督的名，恁所釘佇十字架，上帝予伊對死人中閣活--ê，就是佇伊的名，這个人好好，徛佇恁的面前(行傳4：9)。」
福音的氣力是在佇耶穌基督。耶穌基督是咱的信仰的對象，是咱得救的源頭。主耶穌捌本身致意問講，「人講我是chī-chuī？」按呢通知伊是福音的中心。Jī-hō͘教會也有致意傳講，「恁著反悔，逐人佇耶穌基督的名受洗禮，到予恁的罪赦免。」「閣佇別的 並無拯救，因為佇天下，無賞賜別的名佇人的中間，予咱tiàm佇伊來得救」(行傳4：12)。亦講，「上帝已經將永活予咱，也這个活是在佇伊的囝」(I翰5：11)。
只有佇耶穌基督的名，遐的心神軟chiáⁿ，軟弱，p的佇地面--ê，才會通得著新的氣力，會通閣peh--起來，亦行，亦跳，亦呵咾上帝。
III. 福音的效力是必要人的信。
佇這个記事卻無明記這个軟腳--ê有信，總是對伊的行踏，咱會知。「伊跳--起來徛teh閣行，佮in入殿，亦行，亦跳，亦呵咾上帝。」
因為伊有信，就有通得著做大的恩賜。人若無信，就ē阻擋福音的氣力。咱的主佇伊的本鄉「無行濟濟的權能，因為in無信」
實在福音的效力是必要人的信。譬喻好藥，咱若無啉入腹內，彼項藥袂顯出效力。咱的目睭若無開，自然袂通看著甚物。親像按呢，設使咱若無信，就袂通體驗著耶穌基督所欲賞賜咱新的氣力佮活命。信，是得著活命的門戶。主有徛佇外面teh拍門，咱若有開咱的信的心門，伊即時入；亦伊的真理，伊的疼痛，伊的神隨時顯出效力，幫贊咱成做有活命的人。耶穌基督愛賞賜ché樣的恩典予咱，m̄-kú咱若親像拿撒勒人無信，伊就袂會lah！