福音社啟事
Hok-im-siā Khé-sū
文獻資訊
| 項目 | 資料 |
|---|---|
| 作者 | 黃六點 N̂g La̍k-tiám |
| 卷期 | 台灣教會公報/北部教會 |
| 卷期 | 第670期 |
| 日期 | 1941/1 |
| 頁數 | 21-22 |
白話字（原文數位化）
Hok-im-siā Khé-sū
{Su-kì : N̂g La̍k-tiám
Koè-kè : Gô͘ Thian-bēng}
1941年1月 670期 21-22
[Chit-phiⁿ tī kū-nî 11 ge̍h tiong chiū kià kàu Pún-siā, uī-tio̍h chim-chok , bô seng lo̍h tī 12 ge̍h hō--ê. Kong-pò-siā.]
-
Téng-pang só͘ kè-e̍k Khîm-phó͘ sin Sèng-si ê chhut-pán, tit-tio̍h tāi-ke ê ū-iok chin to-siā. Hit-sî ū àn-sǹg 10 ge̍h boē beh hoat-hêng , nā-sī chiàu lán só͘ chai, chhut-pán sū-gia̍p ū choē-choē ê sū-chêng boē thang chiàu só͘ ū-tēng lâi hoat-hêng, chin uî-hām. Sī in-uī chè-pán-chiá tām-po̍h ê to͘-ha̍p lâi iân-chhiân, chóng-sī ū àn-sǹg Kiù-chú Sèng-tàn hit-sî oē hoat-hêng. Tì-ì siá kuí jī kiû tāi-ke ê liōng-kái.
-
Koh chi̍t hāng sī toā-jī Hàn jī si tī 11 ge̍h 10 ji̍t í-keng chhut-pán, chiàu chêng só͘ thong-ti sī ēng hó ê choá 50 pong ê iûⁿ-choá, chè-pún put-chí kian-kò͘, só͘ ìn chin bêng, lāu-toā lâng, á-sī kàu-hoē kong-iōng sī put-chí ha̍h. Pak Tāi Siông Uí ài kok kàu-hoē tuì mê-nî khí, lóng oāⁿ sin ê Sèng-si, ū koh kap Hok-im-siā chham-siông ēng te̍k-kè thê-kióng, hō͘ khah choē lâng thang tī chit sî lâi boé. Tēng-kè chi̍t pún 60, nā tī kin-nî tiong lâi boé--ê, sī te̍k-kè chha-put-to si̍t-huì ê. 50 nā-tiāⁿ, iû-huì .09. Hok-im-siā sī beh hōng-sū kok kàu-hoē, só͘-í èng Siông Uí ê chham-siông, ēng chit ê te̍k-kè chhiáⁿ tāi-ke m̄-thang sit-lo̍h hó ki-hoē.
-
Siāu-kài 2 pún hó chheh , chiū-sī Ji̍t Ki ê hoē-oân sim-tek(會員心得) kap Ki-tok-kàu ê seng-oa̍h(基督教ノ生活).Chit 2 pún lóng sī tuì Ji̍t Ki ti̍t-chiap hoat-khan teh hō͘ hoē-iú tha̍k--ê, lán nā boé lâi tha̍k put-chí ū lī-ek.
會員心得 ū hun choè la̍k chiuⁿ. Thâu-chi̍t chiuⁿ sī Ki-tok-chiá ê ì-gī, tē 2 chiuⁿ Kàu-hoē ì-gī, Sèng-ji̍t lé-pài, Sèng lé-tián. Kî-tó-hoē , chu chi̍p hoē, thoân-tō, lé-gî, hiàn-kim , tuì kàu-chit ê chek-jīm kap lé-gî,kàu-hoē ê kau-poê, ia̍h-oân , î tōng kî-thaⁿ ; tē 3 chiuⁿ , Sìn-chiá ê su-seng-oa̍h; tē 4 chiuⁿ, Ka-têng seng-oa̍h; tē 5 chiuⁿ, Koh bīn seng-oa̍h. Siā-hoē seng-oa̍h; tē 6 chiuⁿ, Ji̍t-pún Ki-tok Kàu-hoē kàu-thoân téng.
Sui-jiân sī 60 bīn ê soè pún chheh, iáu-k2 thang hó-táⁿ chhui-chiàn sī hó chheh, chhiáⁿ khoàⁿ Pò ê hiaⁿ-chí, á-sī ta̍k ê sìn-tô͘ lóng oē tuì Hok-im-siā lâi boé khì tha̍k, tēng-kè liân sàng-liāu chi̍t pún 23. iáu chi̍t pún Ki-tok-kàu ê seng-oa̍h, in-uī choá-bīn ê koan-hē bē thang siāu-kài lāi-iông, chi̍t pún 13, chhiáⁿ tāi-ke lâi boé khì tha̍k.
-
Hok-im-siā ài hōng-sū kàu-hoē, iā ài chhiáⁿ kok kàu-hoē lâi oān-chō͘ Hok-im-siā khah ū thang hōng-sū. Só͘-í nā ū beh boé chheh, bô lūn sím-mi̍h khoán, chhiáⁿ lín tek-khak tuì Hok-im-siā lâi chù-bûn, chóng-sī ài hiān-kim.
-
Nî-boé í-keng kàu, khiàm téng-chhiú ê siàu siông-siông lâi teh pek, só͘-í nā ū khiàm Hok-im-siā ê siàu-hāng--ê, pài-thok lín ná siat-hoat lâi hêng , khah choē sī thoân-kàu-chiá, á-sī kàu-hoē ū khiàm chin choē , chhiáⁿ tāi ke khah tông-chêng , tuì sim-toé chhim-chhim kā lín pài-thok. Lēng-goā oē le̍k-toaⁿ hō͘ tāi-ke , ǹg-bāng tāi-ke lâi thé-thiap koè-kè ê khó͘-chêng, iā tuì lín ê la̍p-kim, oē thang hō͘ lín ê koè-kè khah bián sit-lo̍h sìn-iōng, hō͘ Hok-im-siā khah ū êng-kng ê só͘-chāi.
-
Pak-pō͘ Kàu-hoē châi-bū-kio̍k ū-tēng chiaⁿ-ge̍h thâu lé-pài-ji̍t choè Hok-im-siā hiàn-kim-ji̍t. Chiū-sī choè Hok-im-siā ê sū-gia̍p , siu put ki̍p huì, ta̍k nî ū khoat-sún; m̄-sī boē liáu, liáu chîⁿ, sī thàn bô kàu só͘-huì, in-uī chi̍t nî hām thiap Kàu-hoē-pò tio̍h 6,7 pah kho͘.Taⁿ beh thàn 6,7 pah kho͘, tio̍h boē 7 chheng kho͘ ê chu-chheh. Lán boē thang boē hiah choē, siōng hó sī 3 chheng goā kho͘ nā-tiaⁿ. Só͘-í tek-khak sī bô kàu. uī-tio̍h án-ni châi-bū-kio̍k ū tēng chit ê ji̍t beh hō͘ tāi-ke hiàn-kim, lâi î-chhî chit ê bûn-su sū-gia̍p. ǹg-bāng chit pang oē tit-tio̍h chin-choē ê oān-chō͘, tuì sim-toé lâi pài-thok.
漢羅（Ùi原文改寫）
福音社啟事
{書記：黃六點
會計：吳天命}
1941年1月 670期 21-22
[這篇佇舊年11月中就寄到本社，為著斟酌，無先落佇12月號--ê。公報社。]
-
頂pang所計畫琴譜新聖詩的出版，得著大家的預約真多謝。彼時有按算10月袂欲發行，若是照咱所知，出版事業有濟濟的事情袂通照所預定來發行，真遺憾。是因為製版者淡薄的都合來iân-chhiân，總是有按算救主聖誕彼時會發行。致意寫幾字求大家的諒解。
-
閣一項是大字漢字詩佇11月10日已經出版，照前所通知是用好的紙50 pong 的羊紙，製本不止堅固，所印真明，老大人，抑是教會功用是不止合。北台常委愛各教會對明年起，攏換新的聖詩，有閣佮福音社參詳用特價提供，予較濟人通佇這時來買。定價一本60，若佇今年中來買--ê，是特價差不多實惠的。 50 nā-tiāⁿ，郵費 .09。福音社是欲奉事各教會，所以應常委的參詳，用這个特價請大家毋通失落好機會。
-
紹介2本好冊，就是日Ki 的會員心得會員心得佮基督教的生活(基督教ノ生活)。這2本攏是對日Ki直接發刊teh予會友讀--ê，咱若買來讀不止有利益。
會員心得有分做六章。頭一章是基督者的意義，第2章教會意義，聖日禮拜，聖禮典。祈禱會，chu集會，傳道，禮儀，獻金 ，對教職的責任佮禮儀，教會的交陪，役員，î tōng其他；第三章，信者的私生活；第4章，家庭生活；第5章，各面生活。社會生活；第6章，日本基督教會教傳等。
雖然是60面的細本冊，iáu-kú通好膽推薦是好冊，請看報的兄姊，抑是逐个信徒攏會對福音社來買去讀，定價連送料一本23。iáu一本基督教的生活，因為紙面的關係袂通紹介內容，一本13，請大家來買去讀。
-
福音社愛奉事教會，也愛請各教會來援助福音社較有通奉事。所以若有欲買冊，無論甚物款，請恁的確對福音社來注文，總是愛現金。
-
年尾已經到，欠頂手的數常常來teh逼，所以若有欠福音社的數項--ê，拜託恁ná設法來還，較濟是傳教者，抑是教會有欠真濟，請大家較同情，對心底深深共恁拜託。另外會le̍k-toaⁿ予大家，向望大家來體貼會計的苦情，也對恁的la̍p金，會通予恁的會計較免失落信用，予福音社較有榮光的所在。
-
北部教會財務局預定正月頭禮拜日做福音社獻金日。就是做福音社的事業，收不及付，逐年有缺損；毋是賣了，了錢，是趁無夠所費，因為一年hām貼教會報著6，7 百箍。Taⁿ欲趁6，7 百箍，著袂7千箍的書冊。咱袂通賣hiah濟，上好是3千外箍nā-tiaⁿ。所以的確是無夠。為著按呢財務局有訂這个日欲予大家獻金，來維持這个文書事業。向望這pang會得著真濟的援助，對心底來拜託。