南中通訊 洪--氏真的小傳
Lâm Tiong Thong-sìn Âng--sī Chin ê Sió-toān
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第663號 |
| 日期 | 1940/6 |
| 頁數 | 16 |
白話字（原文數位化）
Lâm Tiong Thong-sìn
II. Âng--sī Chin ê Sió-toān
1940.06 tē 663 hō p.16
Âng--sī Chin khah siông kiò-chò Ho͘-ḿ , sī Tè Hoán Bo̍k-su ê lēng sian-bó. Chú-āu 1854 nî chhut-sì, kàu kin-nî ( = 1940 nî), tú hióng-siū 86 hoè. 46 hoè ê sî sìn Chú, kiōng 40 nî kú keng- koè sìn ê seng-oa̍h. Ē lâi chiū-kīn Chú ê tōng-ki, sī tuì tī tú-tio̍h pīⁿ-thiàⁿ, kám-kak pêng-sî só͘ chong-pài ê sîn- pu̍t, bē thang hō͘ i ê sim pêng-an, chiū siū khó͘-khǹg koat-sim chun-thàn tō-lí ji̍p sìn-gióng kèng-pài Siōng-tè. I chin chiàu pún-hūn ho̍k-sāi Siōng-tè, Siōng- tè si-in sù-hok hō͘ i, hō͘ i kiáⁿ-sun chin heng-ōng, kiáⁿ-jî sim-pū, lāi goā sun chóng sǹg chiâⁿ pah lâng. Lūn kàu i ê seng-pêng chin khó-chhú, ū chē-chē bí-tiám. Chit-tia̍p kì kuí-nā hāng hō͘ lán chò siàu-liām :—
-
Sìn-gióng kian-kò͘ : Sìn Chú liáu, sui siū lâng kong-kek, phí-po̍k, iàm-chiān, ki-chhì, í-ki̍p tú-tio̍h hoān- lān khùn-khó͘, iā-sī iú-chìn bô thè.
-
Tì ì ka-têng : Chin kî-biāu ! ! ! Kiáⁿ-sun toā to-sò͘ kap i tâng-sim kèng- pài Siōng-tè kiâⁿ thiⁿ-lō͘. Ē an-ni(sic.), cha- khó khí-lâi, bô m̄-sī tuì tī i ê sìn-sim kap sìn ê hó só͘ kiâⁿ só͘ kám-hoà lâi chiâⁿ--ê.
-
Gâu thiàⁿ Chú : Sî-siông chiàu só͘ ē hōng-sū kàu-hoē, koan-sim tī Chú. Te̍k-pia̍t thang hián-chhut i ê thiàⁿ--ê, chiū-sī hiàn kiáⁿ hō͘ Siōng-tè. Cha-bó͘ kiáⁿ hiàn chò Siōng-tè ê lú chhe-ēng, chiū-sī khng Hoán Sian-siⁿ-niû. Hāu- siⁿ hiàn chò Siōng-tè ê lô͘-po̍k, chiū-sī Tè Hoán Bo̍k-su.
-
Jîn-ài hô-pêng : I ê chò lâng, tuì lāi tuì goā chin oân-boán. Ta̍k-lâng to o-ló i ê hó lú-tek, hō͘ kiáⁿ-jî sim-pū chin hàu-sūn.
-
ài kî-tó : Hoān ū tú-tio̍h toā sió sū gâu oá-khò Siōng-tè, kau-hù I chhui-pâi. I tī 3 goe̍h chhe 8 ji̍t khí- pīⁿ ; tī 3 goe̍h 15 ji̍t chá-khí chiū siū Chú kéng-tiàu tńg-khì Thiⁿ Pē ê ke. Tng tī pēⁿ chin loán-jio̍k ê sî, iáu-kú kî-tó, kiû kóng “Chú ah kiù goá, Chú ah kiù goá.”
Phí-jîn chiàu só͘ chai kì chiah--ê, chin siū kám-kek. Chhim-bāng i ê uî- cho̍k kap lán tāi-ke ē o̍h i ê hó bô͘- hoān ! ! !
漢羅（Ùi原文改寫）
南中通訊
II.洪--氏真的小傳
1940.06 第663號 p.16
洪--氏真較常叫做Ho͘姆，是戴返牧師的令先母。主後1854年出世，到今年（＝1940年），拄享壽86歲。46歲的時信主，共40年久經過信的生活。會來就近主的動機，是對佇拄著病痛，感覺平時所崇拜的神佛，袂通予伊的心平安，就受苦勸決心尊趁道理入信仰敬拜上帝。伊真照本份服事上帝，上帝施恩賜福予伊，予伊子孫真興旺，子兒新婦，內外孫總算成百人。論到伊的生平真可取，有濟濟美點。這霎記幾若項予咱做數念：--
1、信仰堅固：信主了，隨受人攻擊，鄙薄，厭賤，譏刺，以及拄著患難困苦，也是有進無退。
2、致意家庭：真奇妙！！！子孫大多數佮伊同心敬拜上帝行天路。會按呢，查考起來，無毋是對佇伊的信心佮信的好所行所感化來成--的。
3、Gâu疼主：時常照所會奉事教會，關心佇主。特別通顯出伊的疼--的，就是獻子予上帝。查某囝獻做上帝的女差用，就是康返先生娘。後生獻做上帝的奴僕，就是戴返牧師。
4、仁愛和平：伊的做人，對內對外真圓滿。逐人都呵咾伊的好女德，予子兒新婦真孝順。
5、愛祈禱：凡有拄著大小事gâu倚靠上帝，交付伊推排。伊佇3月初8日起病；佇3月15日早起就受主揀召轉去天父的家。當佇病真軟弱的時，猶過祈禱，求講：「主ah救我，主ah救我。」
鄙人照所知記遮--的，真受感激。深望伊的遺族佮咱大家會學伊的好模範！！！