這片的雲
Chit phìⁿ ê hûn
文獻資訊
| 項目 | 資料 |
|---|---|
| 作者 | 劉約翰 Lâu Iok-hān |
| 卷期 | 台灣教會公報/北部教會 |
| 卷期 | 第660號 |
| 日期 | 1940/3 |
| 頁數 | 23 |
白話字（原文數位化）
Chit phìⁿ ê hûn
Lâu Iok-hān
194003 170號 p.23-23
-
Chá-sî Cheng-chú kóng, “Ngô-ji̍t sam-séng ngô-sin”, chiū-sī goá chi̍t ji̍t saⁿ pái séng-chhat goá ê sin-khu. Nā-sīトルストイkóng, “Lí tī chi̍t ji̍t nā oē kan-ta ēng chi̍t tiám cheng kú lâi choè lí ê só͘ siūⁿ, chiū lí beh chiâⁿ-choè chi̍t ê su-sióng-ka. Siat-sú lán nā iû-goân tī chi̍t ji̍t oē kan-ta ēng chi̍t tiám cheng kú lâi siūⁿ Chú ê sū kap Chú lêng-kau, chiū lán oē chiâⁿ-choè chi̍t ê sìn-gióng ê jia̍t-sim-ka.
-
Hiān-tāi lâng sī siuⁿ bô êng, iā-sī siuⁿ pîn-toāⁿ. Só͘ m̄ eng-kai choè--ê… jia̍t-kông teh choè, nā-sī só͘ eng-kai choè--ê…chiū pîn-toāⁿ ià-siān.
-
Kàu-hoē nā beh heng-khí tio̍h khiàm-ēng sûn-kàu-chiá, á-sī hi-seng-chiá. Kàu-hoē ná jú siū pek-hāi, chiū jú koh tit-tio̍h chìn-pō͘. Chhiū-á jú siū toā-hong iô-sak, chiū i ê kun jú chhim.
-
Sè-kài chhiong-moá pe̍h-chha̍t, hu-guî, put-sìn, poē-iok. Nā-sī Siōng-tè ê un-tián thiàⁿ-thàng it-hoat chhiong-moá.
-
Chhiⁿ-mî ê lâng m̄ kiaⁿ choâ. Lâng jú tha̍k chheh chiū jú chai bô ha̍k-būn, jú gián-kiù chiū jú boē hiáu siá, jú tha̍k chiū jú kiaⁿ. Chóng-sī lán nā jú sìn-gióng Ki-tok, chiū jú chai lán ê choē.
-
Jîn-kang ê suí, m̄ ta̍t-tio̍h chū-jiân ê suí. Só͘-lô-bûn ke̍k êng-hoâ ê sî…… m̄ ta̍t-tio̍h khòng-iá chi̍t-luí ê pek-ha̍p-hoe. Kin-á-ji̍t ê sè-kài sī khò ka-kī ê sî-tāi. Chóng-sī lâng ê khuì-la̍t koat-toàn sī boē iâⁿ-kè Siōng-tè ê khuì-la̍t.
-
Sè-kài ê khuì-la̍t oē hō͘ lâng boē kì-tit Siōng-tè, koh oē hō͘ lâng kū-choa̍t Siōng-tè. Lâng nā kó-jiân uī-tio̍h sè-kài lâi boē kì-tit, á-sī kū-choa̍t Siōng-tè, chiū-sī choè thau-the̍h Siōng-tè ê lâng.
-
Chū-sī kiau-ngō͘ ê lâng chiū-sī kàu tī chiong-kio̍k; in-uī i ê tì-huī kap sìn-tek ê la̍t, boē-oē koh ke-thiⁿ chìn-pō͘. Tuī-á ê suī nā iáu-bē ji̍p chiuⁿ chiâⁿ bí ê sî, sī thêng-thêng khiā teh, nā ji̍p chiuⁿ chiâⁿ bí ê sî, i ê thâu-khak chiū kau--lo̍h-khì. Khiam-pi ê lâng iā-sī án-ni. Iâ-so͘ kóng, “Khiam-hu-sim ê lâng ū hok-khì, in-uī Thian-kok sī i ê”.
漢羅（Ùi原文改寫）
這片的雲
劉約翰
194003 170號 p.23-23
1. 早時曾子講，「吾日三省吾身」，就是我一日三擺省察我的身軀。若是トルストイ講，「你佇一日若會干焦用一點鐘久來做你的所想，就你欲成做一个思想家。設使咱若猶原佇一日會干焦用一點鐘久來想主的事佮主靈交，就咱會成做一个信仰的熱心家。
2. 現代人是傷無閒，也是傷貧惰。所毋應該做的…熱狂咧做，若是所應該做的…就貧惰厭siān。
3. 教會若欲興起著欠用殉教者，抑是犧牲者。教會若愈受迫害，就愈閣得著進步。樹仔愈受大風搖捒，就伊的根愈深。
4. 世界充滿白賊，虛guî，不信，背約。若是上帝的恩典疼痛益發充滿。
5. 青盲的人毋驚蛇。人愈讀冊就愈知無學問，愈研究就愈袂曉寫，愈讀就愈驚。總是咱若愈信仰基督，就愈知咱的罪。
6. 人工的媠，毋達著自然的媠。所羅門極榮華的時……毋達著曠野一蕊的百合花。今仔日的世界是靠家己的時代。總是人的氣力決斷是袂贏過上帝的氣力。
7. 世界的氣力會予人袂記得上帝，閣會予人拒絕上帝。人若果然為著世界來袂記得，抑是拒絕上帝，就是做偷提上帝的人。
8. 自恃驕傲的人就是到佇終局；因為伊的智慧佮信德的力，袂會閣加添進步。稻仔的穗若猶袂入chiuⁿ成米的時，是亭亭徛咧，若入chiuⁿ成米的時，伊的頭殼就交落去。謙卑的人也是按呢。耶穌講，「謙虛心的人有福氣，因為天國是伊的」。