會友對傳教者
Hoē-iú tuì Thoân-kàu-chiá
文獻資訊
| 項目 | 資料 |
|---|---|
| 作者 | 郭朝成 Koeh Tiâu-sêng |
| 卷期 | 台灣教會公報 |
| 卷期 | 第660號 |
| 日期 | 1940/3 |
| 頁數 | 18 |
白話字（原文數位化）
I. Hoē-iú tuì Thoân-kàu-chiá
Koeh Tiâu-sêng
194003 660 hō p.18-18
Tiong-hoē ê sî, goá khoàⁿ-tio̍h Chiang-hoà ê sèng-bêng-phō͘, kì put-bêng. Goá mn̄g Ông Bo̍k-su, i kóng, “kuí-nā nî kú, m̄-chai in poaⁿ tuì tó-uī khì, tiau-cha bô? Hit ê Loā--sī Kim-liân, chêng sī Chháu-tun ê hoē-oân, taⁿ poaⁿ khì Tâi-tiong, hit ê Lí--sī Khá, káⁿ sī Tek-san ê lâng, tńg-khì Tek-san. Ông Bo̍k-su thiaⁿ-liáu chin hoaⁿ-hí.”
Siāng chit khoán, m̄-nā Chiang-hoà kàu-hoē ū, phah-sǹg pa̍t-uī ê kàu-hoē iā ū, goá só͘ hi-bāng--ê.
-
Ji̍p Sèng-hoē ê hoē-oân, nā poaⁿ khì pa̍t-uī, koat-tēng m̄ koh poaⁿ tò-tńg, tio̍h tuì bó-hoē thó î-ku-chiàu, thang sio̍k tī só͘ toà ê kàu-hoē.
-
Hoē-iú nā beh poaⁿ soá khì pa̍t-uī, tī choè-hō͘ ê lé-pài-ji̍t, tio̍h kap thoân-kàu-chiá, tióng-chip, hoē-iú saⁿ-sî. Nā to͘-ha̍p bē tit kap chèng-lâng saⁿ-sî, iā tio̍h kap thoân-kàu-chiá saⁿ-sî, kóng-bêng beh khì ê só͘-chāi, chiàⁿ ū chīn hoē-iú ê Ié-sò͘. Thiaⁿ-kìⁿ Loē-tē chi̍t-pō͘-hūn ê kàu-hoē, kap lán chia chin cheng-chha. Lán chia sī thoân-kàu-chiá hóng-būn hoē-iú, in sī hoē-iú hóng-būn thoân-kàu-chiá. Lán sī ná bo̍k-chiá khì soaⁿ-kan chhoē-iûⁿ, in sī ná hoān-chiá khì I-īⁿ chhoē i-seng.
Chá-nî Loē-tē bó͘ kàu-hoē, chhut chi̍t ê toā jîn-bu̍t, sī chò chiòng-gī-īⁿ ê gī-tiúⁿ, chin chun-kèng in ê bo̍k-su. I nā beh khì khui kok-hoē, á-sī beh khì goā-uī sī-chhat, chiū khì kap bo̍k-su saⁿ-sî, nā tńg-lâi, seng kàu bo̍k-su ê siok-sià, kā bo̍k-su chhéng-an, pò-kò siau-sit, āu-lâi chiàⁿ tńg-khì in chhù. Tuì án-nī, hoē-lāi hoē-goā ê lâng chin chun-kèng in ê bo̍k-su. Hit keng kàu-hoē, hiān-sî chò thong Ji̍t-pún kok siāng iu-liông ê kàu-hoē. iā ū Tāi-ha̍k Kàu-siū chò Chú-ji̍t-o̍h ê Hāu-tiúⁿ, chò Chú-ji̍t-o̍h ê kàu-oân, teh hōng-sū kàu-hoē, si̍t-chāi chin kám-sim.
Lán chia ū lâng put-sî teh phoe-phêng, khoàⁿ-khin in ê sian-seⁿ. Khiok sian-seⁿ iā sio̍k A-tong ê hō͘-è, bē bô koè-sit, tio̍h ài ēng àm-chēⁿ ê tiong-khok, hō͘ i hoán-séng, chiàⁿ bē chó͘-tòng I ê sèng-kang. Koh ū chi̍t koá ha̍p-ēng ê jîn-bu̍t, in m̄ kam-goān hi-seng lâi pang-chān kàu-hoē. Ah! án-ni kàu-hoē thài ē heng neh?
ǹg-bāng tāi-ke hùn-khí, lâi poē Si̍p-jī-kè, kap thoân-kàu-chiá saⁿ-kap chò-kang.
漢羅（Ùi原文改寫）
I.會友對傳教者
郭朝成
194003 660號 p.18-18
中會的時，我看著彰化的姓名簿，記不明。我問王牧師，伊講，「幾若年久，毋知in搬對佗位去，調查無？彼个賴--氏金蓮，前是草屯的會員，今搬去台中，彼个李--氏巧，敢是竹山的人，轉去竹山。王牧師聽了真歡喜。」
Siāng這款，毋但彰化教會有，拍算別位的教會也有，我所希望的。
-
入聖會的會員，若搬去別位，決定毋閣搬倒轉，著對母會討移居照，通屬佇所蹛的教會。
-
會友若欲搬徙去別位，佇最後的禮拜日，著佮傳教者，長執，會友相辭。若都合袂得佮眾人相辭，也著佮傳教者相辭，講明欲去的所在，正有盡會友的禮數。聽見內地一部分的教會，佮咱遮真精差。咱遮是傳教者訪問會友，in是會友訪問傳教者。咱是若牧者去山間揣羊，in是若患者去醫院揣醫生。
早年內地某教會，出一个大人物，是做眾議院的議長，真尊敬in的牧師。伊若欲去開國會，抑是欲去外位視察，就去佮牧師相辭，若轉來，先到牧師的宿舍，共牧師請安，報告消息，後來正轉去in厝。對按呢，會內會外的人真尊敬in的牧師。彼間教會，現時做通日本國上優良的教會。也有大學教授做主日學的校長，做主日學的教員，咧奉仕教會，實在真感心。
咱遮有人不時咧批評，看輕in的先生。卻先生也屬亞當的後裔，袂無過失，著愛用暗靜的忠告，予伊反省，chiàⁿ袂阻擋伊的聖工。閣有一寡合用的人物，in毋甘願犧牲來幫贊教會。啊！按呢教會thài會興neh？
向望大家奮起，來背十字架，佮傳教者相佮做工。