嘉中傳教師送別會
Ka-tiong Thoân-kàu-su Sòng-pia̍t-hoē
文獻資訊
| 項目 | 資料 |
|---|---|
| 作者 | 梁秀德 Niû Siù-tek |
| 卷期 | 台灣教會公報 |
| 卷期 | 第660號 |
| 日期 | 1940/3 |
| 頁數 | 16-17 |
白話字（原文數位化）
II. Ka-tiong Thoân-kàu-su Sòng-pia̍t-hoē
Niû Siù-tek pò.
194003 660 hō p.16-17
Tī Sin-le̍k 2 goe̍h 9 hō, (Kū-le̍k 1 goe̍h 2 ji̍t téng-po͘ 11 tiám khí, ū khui Thoân-kàu-su Sòng-pia̍t-hoē tī Táu-la̍k Lé-pài-tn̂g. In-uī ū 4 miâ sian-siⁿ beh lī-khui Ka-gī Tiong-hoē, chiū-sī Phoaⁿ kim-seng, Lâu Hoa-gī, Gô͘ Tek-goân, Khó͘ Ek-chhiau. Chin khó-sioh Phoaⁿ Bo̍k-su kap khó͘ Sian-siⁿ, in-uī to͘-ha̍p-siōng, hit ji̍t bô chhut-se̍k. Chit 4 ê sian-siⁿ toà tī Ka-gī Tiong-hoē ê siāng-kú ê, chiū-sī Gô͘ Sian-siⁿ, ū 15 nî kú, tuì boē hun Tiong-hoē í-lâi, chiū saⁿ-kap phah-piàⁿ, uī-tio̍h Siōng-tè ê kàu-hoē, Nā lūn i ê kong-lô, si̍t-chāi tio̍h toā-toā kā i siúⁿ. I beh lī-khui, goán ê sim chin m̄-kam. Chóng-sī uī-tio̍h i ê to͘-ha̍p, ko͘-put-chiong m̄-káⁿ bán-liû. Lâu Sian-siⁿ toà 5 nî, i iā-sī chin oa̍h-tāng, bô lūn i toà ê kàu-hoē á-sī kong ê khang-khoè, i bô the-sî, chin hoaⁿ-hí chò. Te̍k-pia̍t tuì Chú-ji̍t-o̍h, i chin ū si̍t-tē-tek ê te̍k-tiông, i beh lī-khui, hō͘ goán kám-kak khah bô phoāⁿ, si̍t-chāi chin m̄-ài. Phoaⁿ Bo̍k-su kap Khó͘ Sian-siⁿ, sui-jiân toà bô loā-kú, iáu-kú iā-sī chhut-la̍t chò kang ê sian-siⁿ, lóng sī iú-uî ê jîn-bu̍t, taⁿ beh lī-khui, boē bián-tit lâu m̄-kam ê ba̍k-sái. Tī hit chi̍t-ji̍t m̄ ēng tām-po̍h tê-piáⁿ, lâi kóng-khí lī-pia̍t ê oē. Taⁿ goán tāi-ke tâng-sim thiàⁿ in, khún-kiû Chú chiok-hok in ê chiân-tô͘, hō͘ in thiat-thâu thiat-bí uī Chú hi-seng, soà goān in ta̍k lâng ê sim-sîn kap jio̍k-thé tit Chú ê si-in ióng-kiāⁿ. Soah-boé tāi-ke gîm Sòng-pia̍t-si, chhiáⁿ Iûⁿ Chiau-gī Bo̍k-su kî-tó soàⁿ-hoē.
Chēng ū Ka-gī Tiong-hoē í-lâi, m̄-bat khui chit ê hoē, che sī thâu-chi̍t-pái, goá kám-kak chin ū ì-gī. Só͘-í kèng-pit siá kuí kù, lâi pò tāi-ke chai.
漢羅（Ùi原文改寫）
II. 嘉中傳教師送別會
梁秀德報。
194003 660號 p.16-17
佇新曆2月9號，(舊曆1月2日頂晡11點起，有開傳教師送別會佇斗六禮拜堂。因為有4名先生欲離開嘉義中會，就是潘金聲，劉華義，吳德元，許益超。真可惜潘牧師佮許先生，因為都合上，彼日無出席。這4个先生蹛佇嘉義中會的上久的，就是吳先生，有15年久，對袂分中會以來，就相佮拍拚，為著上帝的教會，若論伊的功勞，實在著大大共伊賞。伊欲離開，阮的心真毋甘。總是為著伊的都合，姑不將毋敢挽留。劉先生蹛5年，伊也是真活動，無論伊蹛的教會抑是公的空課，伊無推辭，真歡喜做。特別對主日學，伊真有實地tek的特長，伊欲離開，予阮感覺較無伴，實在真毋愛。潘牧師佮許先生，雖然蹛3無偌久，猶過也是出力做工的先生，攏是有為的人物，今欲離開，袂免得流毋甘的目屎。佇彼一日毋用淡薄茶餅，來講起離別的話。今阮大家同心疼in，懇求主祝福in的前途，予in徹頭徹尾為主犧牲，紲願in逐人的心神佮肉體得主的施恩勇健。煞尾大家吟送別詩，請楊招義牧師祈禱散會。
從有嘉義中會以來，毋捌開這个會，這是頭一擺，我感覺真有意義。所以敬筆寫幾句，來報大家知。