白話字文獻館

PE̍H-ŌE-JĪ BÛN-HIÀN KOÁN

Ná-hông ê chheh

文獻資訊

項目 資料
作者 陳金然 Tân Kim-jiân
卷期 台灣教會公報
卷期 第659號
日期 1940/2
頁數 3-6

白話字（原文數位化）

Ná-hông ê chheh

Tân Kim-jiân

194002 659 hō p.3-6

1.Ná-hông ì-sù sī an-uì ê lâng, i ê chheh sī sió sian-ti ê tē 7 pún, koan-hē i ê sū, Sèng-chheh lóng bô kì-chài, tī Kū-iok pa̍t-uī iā bô kì chit ê miâ, goā-tián II-su-la̍h 1:40 kap Iok-sek-hut ê chheh ū kì-chài. āu-lâi ê le̍k-sú-ka ū kóng-khí loā-chē lâng ū chit ê miâ, chhin-chhiūⁿ Iâ-so͘ ê iúⁿ-pē Iok-sek ê chó͘-sian iā ū chit ê miâ (Lō͘ 3:25). (Sin-iok sī chiàu kū hoan-e̍k--ê tha̍k chò Ná-ong) I sī I-le̍k-ko-su lâng, chit ê só͘-chāi sī tī toh-uī oh-tit chai, ū kuí-nā soat. 1) Cha̍p-la̍k sè kí í āu ū thoân-soat, kóng A-su̍t ê kéng-lāi ū Ki-tok-tô͘ teh toà ê chng-siā kiò-chò アルクス(Arukus), kóng tī hia ū Ná-hông ê bōng. 2) Tuì i siú siông-iōng ê tē-hng-miâ-Lī-pa-lùn, Ka-bi̍t, Pa-san 1:4-lâi khoàⁿ sī tī Pa-le̍k-su-thèng nih. a) Ka-pek-lông, in-uī ì-sù sī Ná-hông ê siâⁿ. b) Hiān-kim pak Ka li-li ê I-le̍k-ko-su. 3) Chóng-sī chiàu khoàⁿ Ná-hông ê ū-giân sī pak tiâu bia̍t-bô liáu-āu ê sū, koh iā ū hián-chhut Iû-thài lâng ê kháu-khì, 1:15 hoaⁿ-hí A-su̍t ê siū hêng-hoa̍t, uī-tio̍h Iû-tāi thò͘-chhut bān-tn̄g ê khì-iām 1:9-2:2. Só͘-í i sī lâm-pêng ê lâng, káⁿ sī tī Iû-tāi ê lâm-pō͘エリユチロポリス(Eleutheropolis).

  1. Pún-su sī lūn Nî-nî-bî ê tāng tàN (1:1”be̍k-sī”goân-bûn ê ì-sù sī “tâng-tàⁿ”). Nā khoàⁿ loē-iông koh-khah thang chai sī lūn-khí Nî-nî-bî ê soe-pāi kàu-ke̍k 2:10-13. Tuì án-ni lán sió-khoá thang chai pún-su ê sî-tāi, 2:1 “Phò-hoāi ê chiūⁿ kàu lí ê bīn-chêng.” Che tāi-khài sī chí ū cheng-joē ê kun-peng lâi uî-khùn Nî-nî-bî ê chêng-hêng, chiàu le̍k-sú lâi khoàⁿ, tng-sî Nî-nî-bî ū nn̄g pái siū kong-táⁿ. 1) Chú-chêng 625 nî Bí-thài lâi kong-kek, chóng-sī tú-tio̍h pak-hoan Se-kó͘-thê lâng ê chhim-ji̍p chiū thè peng. 2) Chú-chêng 613 nî, chiū-sī ナボポラサル(Nabopolassar) só͘ chhoā Bí-thài kap Ka-le̍k-tí cheng-joē ê tāi-kun lah, chit pái ê kong-táⁿ Nî-nî-bî siū bia̍t-bô 612 B.C., (chāi-lâi lóng sī kóng Nî-nî-bî ê bia̍t-bô sī 606 B.C., chóng-sī chiàu choè-kīn ê khó-kó͘ ha̍k hoat-ku̍t ê kiat-kó chiū khak-tēng sī 612 B.C.). Tuì án-ni thang chai 661 B.C. (chit ê lio̍k-jī chiū-sī Chú-chêng ê ì-sù, í-āu siông-siông ài ēng) アシユルバニパル(Assurbanipar) kong-chhú Lô-a-bûn, kàu Nî-nî-bî bia̍t-bô ê tiong-kan só͘ ū ê ū-giân lah. Ū sian-seⁿ kóng sī 614 B.C. sí--ê.

  2. Pún-su ê chú-tê chiū-sī Nî-nî-bî ê siū-bia̍t, ko-tiau Siōng-tè ê chèng-gī ê sèng-lī, kî-tiong 1:2-9 sī si, sī jī bó koa (tuì ァルタスtú sī Hi-pek-lâi jī-bó ê ê chi̍t poàⁿ), kî-û ê biô-siá iā chin hoa̍t-phoat. Só͘ ū sian-seⁿ kóng, “i ê oa̍h-tāng ê biô-siá, suí ê si ê piáu-hiān, tû Í-sài-a í-goā, bô lâng thang kap i saⁿ-pí.”  Taⁿ lán lâi khoàⁿ i ê loē-iông.

Tê-thâu 1:1.

I. Iâ-hô-hoa ê siū-khì kap pò-siû 1:2-9.

II. Ū-giân Iû-tāi ê chín-kiù 1:12-15, 2:2.

III. Ū-giân Nî-nî-bî ê bia̍t-bô 1:10-11, 2:1, 3-3:19.

  1. Ū chai-ē ah 1:10-11, 2:1, 3-13.

1) Siat pháiⁿ kè-bô͘ kong-kek Iâ-hô-hoa 1:10,11, (ū lâng kóng sī chí Se-ná-ki-li̍p II Ông 18:13; Sài 36:1 í-hā).

2) Cheng-joē ê toā-kun-tuī 2:1,3-5).

3)Siâⁿ-lāi ê chhám-chōng 2:6-9.

4) Kiông-béng ê sai taⁿ tī tah-lo̍h? -Nî-nî-bî hong-hoè lah 2:10-13.

  1. Ū chai-ē ah, hō͘ lâng lâu hoeh ê siâⁿ 3:1-7.

3.Thí-chhiò ê koa 3:8－17.

1) Lí kiám ū khah-iâⁿ Lô-a-bûn? 3:8－10.

2) Lí iā beh bia̍t-bô 3:11－13.

3) Lí tio̍h pī-pān siū uî-khùn 3:14－17.

  1. A-su̍t ông ah…… lí ê siong i bē hó 3:18,19. Si̍t-chāi ū piáu-hiān kuí 10 nî kan jîn-sim só͘ phāu ê gī-hún kap jia̍t-lia̍t chèng-gī pò-siû ê koan-liām lah. Lán m̄-thang khoàⁿ che chò iá-bân, in-uī chāi-tī in che sī chin ê Í-sek-lia̍t cheng-sîn.

  2. Chiàu í-siōng lán só͘ tha̍k ê loē-iông lâi khoàⁿ, Ná-hông hêng-iông soán-bîn ê te̍k-kok A-su̍t kap Nî-nî-bî ê pha-hng hiah jia̍t-lia̍t, soà ū sian-seⁿ kóng i sī hoán-tuì í-chêng ê sian-ti. In-uī chí-ū hiâm te̍k-kok, thán-hō͘ pún-kok. Nā-sī í-chêng ê sian-ti ū ēng chèng-gī lâi phoe-phoàⁿ pún-kok ê choē-ok, soà ū-giân pún-kok ê soe-pāi. Chhin-chhiūⁿ:

Siōng-tè bô beh khoan-sù Í-sek-lia̍t Mô͘ 8:2; Sài 9:12, 17, 21, 10:4.

Siōng-tè bô koh hō͘ Í-sek-lia̍t siū-khó͘ Hông 1:12. Í-hā chí-ū kì Sèng-keng chat, chhiáⁿ hian Sèng-keng lâi tuì-chiò.

Hông 3:19－Bī 1:9 (Sài 1:5, 6; Hô 5:13).

3:7－Hô 11:5, 6; Sài 6:11.

2:11, 12, 3:1－3－Sài 5:25－30.

3:3－Mô͘ 8:3.

2:7, 3:10, 18－Mô͘ 6:7; Sài 5:13, 8:15; Bí 1:16.

3:10－Hô 13:16.

3:5 －Hô 2:10.

3:15－Hô 8:14, Sài 1:7, 5:24.

3:15－Mô͘ 7:17, 9:1, 4; Hô 11:5,6,13:16.

2:2, 9－Mô͘ 3:11, Hô 13:15, Sài 8:1－4.

3:17, 18－Hô 7:16, 13:10, Sài 3:2, 10:6.

3:12－Sài 28:4.

1:15－Sài 22:5－8.

Chiàu khoàⁿ chit khoán thán-hō hián-iông pún-kok ê su-siúⁿ, khah ē gêng-ha̍p peh-sèⁿ ê sim. In-uī peh-sèⁿ lóng sī chū-sìn pún-kok ê heng-liông, khoa-iāu pún-kok ê khiā-chāi. (khoàⁿ Sài 28:15, 9:10). Só͘-í ū sian-seⁿ chheng i chò bîn-chiòng ê ū-giân-chiá. Sīm-chì ū lâng kóng i ê sù-bēng, chiū-sī Iâ-lī-bí só͘ kiò-chò ké sian-ti ê sù-bēng, chāi tī iu kok ê Iâ-lī-bí lâi khoàⁿ, kiám-chhái Ná-hông sī heng-kok ê ū-giân-chiá.

Hông 1:   12－Iâ 35:17.

2:   1 －   22:27.

2:   8－    21:14.

3:   7－    22:7.

1:12, 15－   23:16, 17.

Chóng-sī chāi tī Ná-hông sī iáu ū koh-khah ko-siōng ê sù-bēng tī-teh.

  1. Chit-tia̍p ài lâi siūⁿ i ê kà-sī.

1) A-su̍t sī Siōng-tè siū-khì ê thuî, thòng-hūn ê koáiⁿ (Sài 10:5), beh chhe i kong-kek siâ-ok ê pang-kok. Hit-sî Í-sek-lia̍t poē-ge̍k Siōng-tè, só͘-í Siōng-tè ū ēng chit ki koáiⁿ lâi phah, lâi kà-sī, chóng-sī khó-sioh chit ki koáiⁿ soà kiau-ngō͘ poâⁿ-koè chú-koân (Sài 10:15) hòng-chhiòng su-io̍k kiâⁿ kiông-pō, chū-jiân siū Siōng-tè ê khì-sak, bia̍t-bô. Só͘-í lán tit-tio̍h Siōng-tè hoaⁿ-hí ēng lán ê sî, koh-khah tio̍h khiam-pi lâi ho̍k-chiông I ê chí-ì.

2) Le̍k-sú tī Siōng-tè ê chhiú-tiong teh sûn-khoân. Sat-má-lī-a poē-ge̍k, Siōng-tè ēng koáiⁿ lâi phah-chhuì 722 B.C., koáiⁿ-á chū-ko, poâⁿ-koè chú-koân, Siōng-tè khì-sak 612 B.C., che sī Ná-hông só͘ kéng-kò--ê, sī beh kéng-kò Iû-tāi, in-uī Iû-tāi nā m̄ hoán-hoé, iû-goân ē kiâⁿ siāng tiâu lō͘, Iû-tāi kèng-jiân bô hoán-hoé, 586 B.C. chiū bia̍t-bô.

3) Siōng-tè bē bú-bān-tit (Ka 6:7).”Ū chi̍t-ê tuì lí hia (A-su̍t) chhut-lâi,tô͘-bô kan-ok, siat pháiⁿ kè-bô͘, kong-kek Iâ-hô-hoa” (1:11).Che sī chí Se-ná-ki-li̍p (Sài 36:1-), si̍t-chāi ū bú-bān Siōng-tè, Siōng-tè, Siōng-tè chek-sî chhe sù-chiá phah-sí in 18 bān 5000 lâng (II Ông 19:25), in iáu-kú m̄-chai thang hoán-hoé. Taⁿ chiū bia̍t-bô lah!

4) Iâ-hô-hoa sī tò͘-khī ê Siōng-tè, …sī pò-siû koh toā siū-khì(1:2). Koat-toàn bô lia̍h ū choē--ê chò bô choē, chóng-sī Iâ-hô-hoa ê siū-khì, sī bô khoài siū-khì ê siū-khì, in-uī I ēng jîn-chû beh chhoā lâng hoán-hoé (Lô 2:4). Chiū-sī khoan-iông, m̄-ài ū lâng tîm-lûn, sī ài lâng lóng hoán-hoé (II Pí 3:9). “Iâ-hô-hoa sī hó, tī hoān-lān ê ji̍t, I chò oē-só͘, koh bat hiah ê oá-khò I ê lâng” (Hông 1:7). án-ni Siōng-tè ê siū-khì sī chèng-gī ê siū-khì, só͘-í pún-su só͘ kóng ap-pek lâng--ê ê bia̍t-bô tuì Hap-pa-kok ê būn-tê ū thê-kiong it-sî-tek ê kái-koat (āu-goe̍h chiah gián-kiù Hap-pa-kok).

5) A-su̍t kú-kú chò Iâ-hô-hoa ê peh-sèⁿ ê chìn-lō͘ ê that-gāi, i khak-sìn A-su̍t ê tó-hoāi sī hō͘ soán-bîn kiâⁿ tī in pún-lâi ê sù-bēng ê lō͘, chit ê sìn-liām sī kin-kù tī Siōng-tè ê tō-tek sè-kài chi-phoè ê sìn-liām, sī ū chiong-boa̍t-lūn-tek ê kè-ta̍t tī-teh. Kiau-ngō͘ ê lâng bô kú tek-khak tio̍h lim Siōng-tè siū-khì ê chiú-poe, siū ap-pek ê lâng chū-jiân chin kî-thāi chit hō Siōng-tè chèng-gī ê hián-hiān, put-tàn sī chèng-gī koan, sī tio̍h chìn chi̍t-pō͘ kàu tī Si̍p-jī-kè ê cheng-sîn lah.

＊    ＊    ＊    ＊

Chho͘-tāi Kàu-hoē ū siū Lô-má chèng-hú hām-hāi, hit-sî ū chi̍t ê jia̍t-sim ê Ki-tok-tô͘ kiò-chò Hu-lân-se-su Noh-lah (Francis Nola), ū siū tong-kio̍k ê chù-ì, ko͘-put-chiong tio̍h siám-pī bih tī tōng-khang lāi, tī-hia thèng-hāu Siōng-tè an-pâi. I ji̍p-khì liáu-āu, ū chi̍t chiah ti-tu tī hit ê chhuì-kháu ti̍t-ti̍t keⁿ si, keⁿ kàu oân-choân pau-ba̍t hit ê chhuì-kháu. I tuì lāi-bīn khoàⁿ-liáu chin sim-sek. Kî-biāu ah! Chit chiah ti-tu ū chín-kiù i ê sèⁿ-miā. In-uī lâng chhoē kàu chia beh lia̍h i ê sî, khoàⁿ-kìⁿ tōng-mn̂g ū ti-tu bāng, chiū kóng, Hu-lân-se-su Noh-lah phah-sǹg bô bih tī chit-lāi-bīn, chiū tuì pa̍t-uī khì chhoē, tuì án-ni i ū thoat-lī tuì-te̍k ê chhiú. Kàu āu-lâi i hoê-kò͘ chit chân, chiū kóng, “Siōng-tè nā uī lán, chiū ti-tu-bāng ia̍h chhin-chhiūⁿ thih-mn̂g, siâⁿ-chhiûⁿ ê ióng-chòng.”

漢羅（Ùi原文改寫）

那鴻的冊

陳金然

194002 659號 p.3-6

  1. 那鴻意思是安慰的人，伊的冊是小先知的第7本，關係伊的事，聖冊攏無記載，佇舊約別位也無記這个名，外典II I-su-la̍h 1：40佮約瑟-hut的冊有記載。後來的歷史家有講起偌濟人有這个名，親像耶穌的養爸約瑟的祖先也有這个名(路3：25)。(新約是照舊翻譯的讀做Ná-ong(hông))伊是伊勒歌斯人，這个所在是佇佗位僫得知，有幾若說。 1)十六世紀以後有傳說，講亞述的境內有基督徒咧蹛的庄社叫做アルクス(Arukus)，講佇遐有那鴻的墓。2)對伊守賞用的地方名-黎巴嫩，迦密，巴珊1：4-來看是佇巴勒斯坦(Pa-le̍k-su-thèng)裡。a)迦百農，因為意思是那鴻的城。b)現今北Ka li-li的伊勒歌斯。3) 總是照看那鴻的預言是北朝滅無了後的事，閣也有顯出猶大人的口氣，1：15歡喜亞述的受刑罰，為著猶大吐出萬斷的氣焰1：9-2：2。所以伊是南爿的人，敢是猶大的南部エリユチロポリス(Eleutheropolis)。

  2. 本書是論尼尼微(Nî-nî-bî)的重擔(1：1「默示」原文的意思是「重擔」)。若看內容閣較通知是論起尼尼微的衰敗到極2：10-13。對按呢咱小可通知本書的時代，2：1 「破壞的上到你的面前。」這大概是指有精銳的軍兵來圍困尼尼微的情形，照歷史來看，當時尼尼微有兩擺受攻打。1)主前625年Bí-thài來攻擊，總是拄著北番西古提(Se-kó͘-thê)人的深入就退兵。2)主前613年，就是ナボポラサル(Nabopolassar)所chhoā Bí-thài佮迦勒底精銳的大軍啦，這擺的攻打尼尼微受滅無612 B.C.，(在來攏是講尼尼微的滅無是606 B.C.，總是照最近的考古學發掘的結果就確定是612 B.C.)。對按呢通知661 B.C.(這个lio̍k-jī就是主前的意思，以後常常愛用) アシユルバニパル(Assurbanipar)攻取挪亞們(Lô-a-bûn)，到尼尼微滅無的中間所有的預言啦。有先生講是614 B.C.死的。

  3. 本書的主題就是尼尼微的受滅，高調上帝的正義的勝利，其中1：2-9是詩，是字母歌，(對ァルタス抵是希伯來字母的一半)，其餘的描寫也真活潑。所有先生講，「伊的活動的描寫，媠的詩的表現，除以賽亞以外，無人通佮伊相比。」今咱來看伊的內容。

題頭1：1。

I. 耶和華的受氣佮報仇 1：2-9。

II. 預言猶大的拯救1：12-15，2：2。

III. 預言尼尼微的滅無1：10-11，2：1，3-3：19。

  1. 有災厄啊 1：10-11，2：1，3-13。

1) 設歹計謀攻擊耶和華 1：10，11，(有人講是指Se-ná-ki-li̍pII王18：13；賽 36：1以下)。

2) 精銳的大軍隊2：1，3-5)。

3) 城內的慘狀2：6-9。

4) 強猛的獅今佇佗落？-尼尼微荒廢啦2：10-13。

  1. 有災厄啊，予人流血的城3：1-7。

  2. 恥笑的歌3：8－17。

1) 你檢有較贏挪亞們？3：8－10。

2) 你也欲滅無3：11－13。

3) 你著備辦受圍困3：14－17。

  1. 亞述王啊……你的傷醫袂好3：18，19。實在有表現幾10年間仁心所抱的義忿佮熱烈正義報仇的觀念啦。咱毋通看這做野蠻，因為在佇in這是真的以色列精神。

  2. 照以上咱所讀的內容來看，那鴻形容選民的敵國亞述佮尼尼微的拋荒遐熱烈，紲有先生講伊是反對以前的先知。因為只有嫌敵國，袒護本國。若是以前的先知有用正義來批判本國的罪惡，紲預言本國的衰敗。親像：

上帝無欲寬恕以色列摩 8：2；賽 9：12，17，21，10：4。

上帝無閣予以色列受苦鴻1：12。以下只有記聖經節，請掀聖經來對照。

鴻3：19－未 1：9 (賽 1：5，6；何 5：13)。

3：7－何 11：5，6；賽 6：11。

2：11，12，3：1－3－賽 5：25－30。

3：3－摩 8：3。

2：7，3：10，18－Mô͘ 6：7；Sài 5：13，8：15；Bí 1：16。

3：10－Hô 13：16。

3：5 －Hô 2：10。

3：15－Hô 8：14，Sài 1：7，5：24。

3：15－Mô͘ 7：17，9：1，4；Hô 11：5，6，13：16。

2：2，9－Mô͘ 3：11，Hô 13：15，Sài 8：1－4。

3：17，18－Hô 7：16，13：10，Sài 3：2，10：6。

3：12－Sài 28：4。

1：15－Sài 22：5－8。

照看這款thán-hō顯揚本國的思想，較會迎合百姓的心。因為百姓攏是自信本國的興隆，誇耀本國的徛在。(看賽 28：15，9：10)。所以有先生稱伊做民眾的預言者。甚至有人講伊的使命，就是耶利米所叫做假先知的使命，在佇憂國的耶利米來看，檢采那鴻是興國的預言者。

鴻1：12－耶 35：17。

2：1 －   22：27。

2：8－    21：14。

3：7－    22：7。

1：12，15－   23：16，17。

總是在佇那鴻是猶有閣較高尚的使命佇咧。

  1. 這霎愛來想伊的教示。

1) 亞述是上帝受氣的槌，痛恨的柺(賽 10：5)，欲差伊攻擊邪惡的邦國。彼時以色列悖逆上帝，所以上帝有用這支枴來拍，來教示，總是可惜這支枴紲驕傲盤過主權(賽 10：15)放縱私慾行強暴，自然受上帝的棄捒，滅無。所以咱得著上帝歡喜用咱的時，閣較著謙卑來服從伊的旨意。

2)歷史佇上帝的手中咧循環。撒馬利亞悖逆，上帝用枴來拍碎722 B.C.，柺仔主權，盤過主權，上帝棄捒612 B.C.，這是那鴻所警告的，是欲警告猶大，因為猶大若毋反悔，猶原的行siāng條路，猶大竟然無反悔，586 B.C.就滅無。

3)上帝袂侮慢得(加 6：7)。「有一个對你遐(亞述)出來，徒無奸惡，設歹計謀，攻擊耶和華」(1：11)。這是指Se-ná-ki-li̍p(賽 36：1-)，實在有侮慢上帝，上帝，上帝即時差使者拍死in 18萬5000人(II王19：25)，in猶過毋知通反悔。今就滅無啦！

4)耶和華是妒忌的上帝，…是報仇閣大受氣(1：2)。決斷無掠有罪的做無罪，總是耶和華的受氣，是無快受氣的受氣，因為伊用仁慈欲chhoā人反悔(羅 2：4)。就是寬容，毋愛有人沉淪，是愛人攏反悔(II比3：9)。「耶和華是好，佇患難的日，伊做衛所，閣捌遐的倚靠伊的人」(鴻1：7)。按呢上帝的受氣是正義的受氣，所以本書所講壓迫人的的滅無對哈巴谷的問題有提供一時tek的解決(後月才研究哈巴谷)。

5)亞述久久做耶和華的百姓的進路的窒礙，伊確信亞述的倒壞是予選民行佇in本來的使命的路，這个信念是根據佇上帝的道德世界支配的信念，是有終末論tek的價值佇咧。驕傲的人無久的確著啉上帝受氣的酒杯，受壓迫的人自然真期待這號上帝正義的顯現，不但是正義觀，是著進一步到佇十字架的精神啦。

＊    ＊    ＊    ＊

初代教會有受羅馬政府陷害，彼時有一个熱心的基督徒叫做Hu-lân-se-su Noh-lah (Francis Nola)，有受當局的注意，孤不將著閃避覕佇洞空內，佇遐聽候上帝安排。伊入去了後，有一隻蜘蛛佇彼个喙口直直經絲，經到完全包密彼个喙口。伊對內面看了真心適。奇妙啊！這隻蜘蛛有拯救伊的性命。因為人揣到遮欲掠伊的時，看見洞門有蜘蛛網，就講，Hu-lân-se-su Noh-lah拍算無覕佇這內面，就對別位去揣，對按呢伊有脫離對敵的手。到後來伊回顧這層，就講，「上帝若為咱，就蜘蛛網亦親像鐵門，城牆的勇壯。」

可能mā有趣味：