宗教團體法解釋
Chong-kàu thoân-thé-hoat kái-sek
文獻資訊
| 項目 | 資料 |
|---|---|
| 作者 | 顏春和 Gân Chhun-hô |
| 卷期 | 台灣教會公報 |
| 卷期 | 第659號 |
| 日期 | 1940/2 |
| 頁數 | 10-11 |
白話字（原文數位化）
Chong-kàu thoân-thé-hoat kái-sek
(Chiap 1 goe̍h hō tē 7 bīn)
(Tâi-lâm: Gân Chhun-hô)
194002 659 hō p.10-11
[Téng hō tuì tē (7) hāng Kàm-tok kui-tēng ê D í-hā ū ìn chhò, só͘-í koh teng-chài chhut].
D. Koân-hān uí-jīm. Chú-bū tāi sîn chiàu bēng-lēng só͘ tiāⁿ-tio̍h ê hoān-uî, ē tit chiong i ê koân-hān ê chi̍t-pō͘ uí-jīm tē-hng tiúⁿ-koaⁿ (tē 19 tiâu). Bēng-lēng tāi-khài sī kóng, pún-hoat tē 16 tiâu 18 tiâu ê Bûn-pō͘ tāi-sîn tuì sī-īⁿ, kàu-hoē, á-sī kàu-su ê kàm-tok koân-hān thang uí-jīm tē-hng tiúⁿ-koaⁿ siat-hoat. In-uī Bûn-pō͘-séng khah bē thang chai ta̍k kàu-hoē, á-sī tē-hng kàu-su ê só͘ chò, tē-hng tiúⁿ-koaⁿ khah chai-iáⁿ. Chāi-lâi sī sûn-cha teh chhú-thê, taⁿ sī kui tī tē-hng tiúⁿ-koaⁿ.
(8) Pó-hō͘, te̍k-tián. A. Sò͘-goān. Tē 11 tiâu tē 2 hāng, tē 16 tiâu kap tē 17 tiâu ê chú-bū tāi-sîn, á-sī tē-hng tiúⁿ-koaⁿ ê chhú-hun ū put-ho̍k ê sî, ē tit sò͘-goān, uī-tio̍h siat-li̍p jīm-khó chhú-siau ê chhú-hun, nā ū lâng lia̍h án-ni chò uî-hoat siū-tio̍h sún-hāi ê, thang tuì hêng-chèng chhâi-phoàⁿ-só͘ chhut-sò͘; nā-sī ū chhut-sò͘ sī bē ēng tit koh sò͘-goān (tē 20 tiâu). Sò͘-goān, chiū-sī tuì Bûn-pō͘ tāi-sîn chhéng-kiû i koh têng sím-cha i só͘ chhú-hun ê, ǹg-bāng i chhú-siau, á-sī piàn-keng hit ê chhú-hun, he̍k-sī hoê-ho̍k goân-chōng ê chhiú-sio̍k. Hêng-chèng sò͘-siōng sī tuì hit ê chhú-hun ū siū sún-hāi ê, thang tuì hêng-chèng chhâi-phoàⁿ-só͘ thê-chhut sò͘-siōng ê chhiú-sio̍k, chit ê chhâi-phoàⁿ-só͘ kap phó͘-thong ê hoat-īⁿ bô tâng, sī uī-tio̍h hêng-chèng-siōng ê hun-cheng lâi siat--ê, chí-ū tī Tang-kiaⁿ chi̍t-keng nā-tiāⁿ.
B. Chhe-ah ê kìm-chí. Chong-kàu thoân-thé só͘ ū ê kong-chiòng lé-pài iōng ê chhù kap tē, chiàu bēng-lēng tiāⁿ-tio̍h ê hoān-uî; tû-khí ēng Tì-tng-koân (thai-koân), Chit-koân (tián-koân) kap tuì phò sán í-goā, chè-koân-chiá bē tit chhe-ah chiah ê mi̍h. Kàu-hoē châi-sán tâi-tiùⁿ só͘ teng-lio̍k ê pó-bu̍t iā-sī án-ni (tē 21 tiâu). Chāi-lâi bîn-hoat só͘ kìm-chí ê sī kan-ta lé-pài teh ēng ê mi̍h nā-tiāⁿ, chhù kap tē bô kìm-chí. Chit-tiâu sī beh khok-chhiong hit ê hoān-uî.
C. Cho͘-soè ê bián-tû. Chiàu bēng-lēng só͘ tiāⁿ ê hoān-uî,chong-kàu thoân-thé m̄-bián khioh soè, iā ū bián tû kàu-hoē kéng-lāi ê thó͘-tē ê tē-cho͘, chóng-sī ēng chîⁿ soè--ê bô chit ê te̍k-tián.
Chhī, ke, chng chiah ê kong-kiōng thoân-thé, bē ēng-tit tuì chong-kàu thoân-thé khò tē-hng-soè (tē 22 tiâu). Che sī keng-chè-siōng ê te̍k-tián, in-uī chiah-ê lóng m̄-sī êng-lī ê thoân-thé, siu-ji̍p sī tuì chēng-châi hiàn-kim, beh chò chong-kàu-siōng oa̍h-tāng ê chu-goân. iā bēng-lēng só͘ hān-tiāⁿ ê, chiū-sī kàu-hoē só͘ ū pit-iàu ê chhù kap tē, gî-sek-siōng tio̍h ēng ê thó͘-tē, tiâⁿ-hn̂g chiah ê it-chhè. Khiok chāi-lâi iā ū bián soè ê te̍k-tián, chóng-sī hoān-uî ū chám-jiân khah e̍h, tuì chit tiâu hō͘ i hoān-uī ke chin khoah.
Tē 2 chiuⁿ: Chong-kàu kiat-siā
(1) Ì-gī. Pún-hoat tē-it tiâu só͘ chí ê chong-kàu thoân-thé í-goā, uī-tio̍h chong-kàu ê kàu-gī soan-pò͘, gî-sek ê chip-hêng chiah ê bo̍k-tek lâi chū-chi̍p ê kè-sio̍k-tek thoân-thé, pún-hoat kā i khoàⁿ-chò chong-kàu kiat-siā, chāi-lâi sī kiò-chò luī-sū chong-kàu thoân-thé. Tuì si̍t-chit siōng lâi khoàⁿ, sī kap tē-it tiâu só͘ chí ê chong-kàu thoân-thé bô ū koh-iūⁿ ê só͘-chāi; nā-sī tuì hoat-lu̍t-siōng lâi khoàⁿ, ū kuí-nā tiám bô tâng, chiū-sī: (a) chong-kàu thoân-thé ê siat-li̍p sī jīm khó chú-gī, nā-sī chong-kàu kiat-siā sī kài-chhut chú-gī, (b) chong-kàu kiat-siā bē thang chò hoat-jîn, (c) chong-kàu kiat-siā bô bián-cho͘, bián soè kap kî-thaⁿ pó-hō͘ ê te̍k-tián.
(2) Siat-li̍p Chong-kàu thoân-thé í-goā, uī-tio̍h chong-kàu kàu-gī ê soan-pò͘ kap gî-sek chip-hêng ê bo̍k-tek lâi cho͘-chit kiat-siā ê sî, tāi-piáu-chiá tio̍h chè-tēng kui-chek, tī cha̍p-sì ji̍t lāi tio̍h tuì tē-hng tiúⁿ-koaⁿ kài-chhut; kài-chhut ê sū-hāng beh piàn-keng ê sî iā tio̍h án-ni. Kiat-siā ê kui-chek tio̍h kì-bêng chhit ê sū-hāng(siông-sè séng-lio̍k tē 23 tiâu). Chit tiâu sī í-keng siat-li̍p liáu-āu ê sū-bū-tek chhiú-sio̍k kui-tēng, siat-li̍p sī chū-iû m̄-bián siū jīm-khó, só͘-í iā bô siat-li̍p jīm-khó ê chhú-siau.
(3) Pò͘-kàu-chiá. Chong-kàu kiat-siā tio̍h suî-sî chiong só͘ sio̍k ê pò͘-kàu-chiá ê miâ, chū-só͘, tuì tē-hng tiúⁿ-koaⁿ kài-chhut; piàn-keng ê sî iā tio̍h án-ni (tē 24 tiâu). Chit tiâu sī uī-tio̍h chhú-thê ê pit-iàu lâi siat--ê.
(4) Kàm-tok kui-tēng. Koan-hē chong-kàu kiat-siā, tāi-piáu-chiá, á-sī pò͘-kàu-su chiah ê sū beh chún-ēng tē 16 kàu 18 tiâu kap tē 20 tiáu ê kui-tēng (tē 25 tiâu). Cha̍p kàu 18 tiâu sī kàm-tok ê kui-tēng, tē 20 tiâu sī hêng-chèng chhú-hun ê kui-tēng. Che sī in-uī chong-kàu kiat-siā, iû-goân tio̍h siū kàm-tok chhú-thê kap chong-kàu thoân-thé bô ū koh-iūⁿ ê só͘-chāi. Só͘-í tē-hng tiúⁿ-koaⁿ ē tit kā i chhú-hun, tuì chit ê chhú-bun ē-tit sò͘-goān kap thê-chhut hêng-chèng sò͘-siōng. Chóng-sī chong-kàu kiat-siā bô jīm-khó ê chhú-siau, só͘-í nā hoān-tio̍h an-lêng tia̍t-sū ê sî, sī chiàu tī-an kéng-chhat-hoat tē 8 tiâu Lāi-bū tāi-sîn kā i chhú-hun kìm-chí, tuì chit ê bô lō͘ thang sò͘-goān, á-sī hêng-chèng sò͘-siōng.
(Thāi-sio̍k)
漢羅（Ùi原文改寫）
宗教團體法解釋
(接1月號第7面)
(台南：顏春和)
194002 659號 p.10-11
[等號對第(7)項監督規定的D以下有印錯，所以閣登載出]。
D. 權限委任。主務代神照命令所定著的範圍，會得將伊的權限的一步委任地方長官(第19條)。命令大概是講，本法第16條18條的文部大臣對寺院，教會，抑是教師的監督權限通委任地方長官設法。因為文部省較袂通知逐教會，抑是地方教師的所做，地方長官較知影。在來是巡查咧chhú-thê，今是歸佇地方長官。
(8) 保護，特點（tián）。A. 訴願。第11條第2項，第16條佮第17條的主務大臣，抑是地方長官的處分有不服的時，會得訴願，為著設立認可取消的處分，若有人掠按呢做違法受著損害，通對行政裁判所出訴；若是有出訴是袂用得閣訴願(第20條)。訴願，就是對文部大臣請求伊閣重審查伊所處分的，向望伊取消，抑是變更彼個處分，或是回復原狀的手續。行政訴訟是對彼個處分有受損害的，通對行政裁判所提出訴訟的手續，這個裁判所佮普通的法院無同，是為著行政上的紛爭來設的，只有佇東京一間若定。
B. 差押的禁止。宗教團體所有的公眾禮拜用的厝佮地，照命令定著的範圍；除起用抵當權(胎權)，職權(典權)佮對破產以外，債權者袂得差押遮的物。教會財產tâi-tiùⁿ所登錄的寶物也是按呢(第21條)。在來民法所禁止的是干焦禮拜咧用的物若定，厝佮地無禁止。這條是欲擴充彼個範圍。
C. 租稅的免除。照命令所訂的範圍，宗教團體毋免抾稅，也有免除教會境內的土地的地租，總是用錢稅的無這個特點。
市，家，庄遮的公共團體，袂用得對宗教團體靠地方稅(第22條)。這是經濟上的特點，因為遮的攏毋是營利的團體，收入是對贈財獻金，欲做宗教上活動的資源。也命令所限定的，就是教會所有必要的厝佮地，儀式上著用的土地，埕園遮的一切。卻在來也有免稅的特點，總是範圍有嶄然較狹，對這條予伊範圍加真闊。
第2章：宗教結社
(1)意義。本法第一條所指的宗教團體以外，為著宗教的教義宣佈，儀式的執行遮的目的來聚集的繼續tek團體，本法共伊看做宗教結社，在來是叫做類似宗教團體。對實質上來看，是佮第一條所指的宗教團體無有各樣的所在；若是對法律上來看，有幾若點無同，就是：(a)宗教團體的設立是認可主義，若是宗教結社是kài-chhut主義，(b)宗教結社袂通做法人，(c)宗教結社無免租，免稅佮其他保護的特點。
(2)設立宗教團體以外，為著宗教教義的宣布佮儀式執行的目的來組織結社的時，代表者著制定規則，佇十四日內著對地方長官kài-chhut；kài-chhut的事項欲變更的時也著按呢。結社的規則著記明七個事項(詳細省略第23條)。這條是已經設立了後的事務tek手續規定，設立是自由毋免受認可，所以也無設立認可的取消。
(3) 佈教者。宗教結社著隨時將所屬的佈教者的名，住所，對地方長官kài-chhut；變更的時也著按呢(第24條)。這條是為著chhú-thê的必要來設的。
(4)監督規定。關係宗教結社，代表者，抑是佈教師遮的事欲准用第16到18條佮第20條的規定(第25條)。十到18條是監督的規定，第20條是行政處分的規定。這是因為宗教結社，猶原著受監督chhú-thê佮宗教團體無有各樣的所在。所以地方長官會得共伊處分，對這個處分會得訴願佮提出行政訴訟。總是宗教結社無認可的取消，所以若患著安寧秩序的時，是照治安警察法第8條內務大臣共伊處分禁止，對這個無路通訴願，抑是行政訴訟。
(待續)