Am-sū tek-lám的消息

Am-sū tek-lám ê siau-sit

文獻資訊

項目	資料
作者	無lo̍h名
卷期	台灣教會公報
卷期	第658號
日期	1940/1
頁數	27

白話字（原文數位化）

Am-sū-tek-lám ê siau-sit (3)

(Sè-kài Ki-tok-kàu Chheng-liân Tāi-hoē)

(S. L. S.)

1940.01 658 hō p.27

1.  Chí-tō-chiá ê chún-pī-hoē. uī-tio̍h chit ê Tāi-hoē ū ēng choē-choē sî-kan lâi chún-pī. Tāi-hoē ê 2 ji̍t chêng ū khui chí-tō chiá-hoē tī Wo͘dschoten. Ū nn̄g pah miâ chū-chi̍p, sī kok thoân ê chō-tiúⁿ, su-kì kap chō͘-chhiú. Netherland Ki-tok-kàu Ha̍k-seng ūn-tōng ê ia̍h-oân, iā tuì chin chá chiū pī-pān in só͘ beh choè ê kang. Hiah ê chí-tō-chiá oá 90% sī tī chi̍t nî chêng chiū thok hó-sè. Thang chai in ū ēng choē-choē sî-kan, ēng kî-tó lâi chún-pī Tāi-hoē ê kang-chok.

2.  Tāi-hoē mō͘-hiám ê tiám. Tuì choân sè-kài chū-chi̍p 1600 miâ ê tāi-piáu-chiá, m̄-sī iông-īⁿ ê sū. Tio̍h mō͘-hiám lâi khui chit ê hoē; in-uī hiān-chāi kok-chè kan sī tī kín-tiong ê sî. Nā m̄-sī Ki-tok-kàu ê hoē tek-khak boē-oē khui, tī chit ê sî-chūn. Koh ta̍k lâng sī siūⁿ in ka-kī só͘ sio̍k ê thoân-thé- sio̍k kàu-hoē, á-sī chheng-liân-hoē, iā chit ê Tāi-hoē m̄-sī chhin-chhiūⁿ phó͘-thong ê hoē ê cho͘-chit, sī Ki-tok-tô͘ ê Tāi-hoē, tāi-ke saⁿ-kap ū hūn ê hoē. Nā m̄-sī án-ni, chit ê hoē sī oh tit chìn-hêng.

Kap phó͘-thong ê hoē bô saⁿ-tâng ê Tāi-hoē, chha-put-to chi̍t poàⁿ m̄-sī tuì kàu-hoē phài--ê, sī tuì Lú-chú Chheng-liân-hoē, á-sī Lâm-chú Chheng-liân-hoē. Choē-choē lâng siūⁿ kàu-hoē m̄-sī kap phó͘-thong ê hoē, á-sī ha̍k-seng ūn-tōng ê cho͘-chit siāng khoán. Tī hia oh-tit ū it-tì. Koh-chài hia̍p-gī oh ê būn-toê, in lóng lia̍h Tāi-hoē ê cheng-sîn lâi chū-chi̍p, lâi gī-lūn. Chit ê hoē sī Sè-kài Ki-tok-tô͘ ê hoē; nā m̄-sī án-ni chin oh-tit khoàⁿ-kìⁿ sím-mi̍h hián-tù ê hāu-kó.

(Soà-chiap)

漢羅（Ùi原文改寫）

Am-sū-tek-lám 的消息(3)

(世界基督教青年大會)

(S.L.S.)

1940.01 658號 p.27

1.指導者的準備會。為著這个大會有用濟濟時間來準備。大會的 2日前有開指導者會佇Wo͘dschoten。有兩百名聚集，是各團的 chō長，書記佮助手。Netherland基督教學生運動的役員，也對真早就備辦in所欲做的工。遐的指導者倚90%是佇一年前就託好勢。通知in有用濟濟時間，用祈禱來準備大會的工作。

2.大會冒險的點。對全世界聚集1600名的代表者，毋是容易的事。著冒險來開這个會；因為現在國際間是佇緊張的時。若毋是基督教的會的確袂會開，佇這个時陣。閣逐人是想in家己所屬的團體-屬教會，抑是青年會，也這个大會毋是親像普通的會的組織，是基督徒的大會，大家相佮有份的會。若毋是按呢，這个會是oh得進行。

佮普通的會無相同的大會，差不多一半毋是對教會派--ê，是對女子青年會，抑是男子青年會。濟濟人想教會毋是佮普通的會，抑是學生運動的組織siāng款。佇遐oh得有一致。閣再協議oh 的問題，in攏掠大會的精神來聚集，來議論。這个會是世界基督徒的會；若毋是按呢真oh得看見啥物顯著的效果。

(續接)