牛津運動
Giû-tin ūn-tōng
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報/北部教會 |
| 卷期 | 第658號 |
| 日期 | 1940/1 |
| 頁數 | 31 |
白話字（原文數位化）
Giû-tin ūn-tōng
Tē 2 hoê Sè-kài Tāi-hoē
1940.01 658 hō p.31-31
Tī ta̍k sî-tāi Siōng-tè ū kéng-tiàu tú-hó ê lâng lâi chò I ê chhe-ēng. Tī hiān-tāi I ū kéng-tiàu ブックﾏソPhok-sū koh chi̍t pái lâi thoân ke̍k kán-tan, ia̍h sī ke̍k iàu-kín ê tō-lí, chiū-sī kó͘-bú ta̍k lâng ê seng-oa̍h tio̍h thiat-tí tī sêng-si̍t, sûn-kiat, bû-su kap thiàⁿ-thàng. Chit ê ūn-tōng í keng piàn-thoân tī choân sè-kài, chē-chē lâng ū tuì chit ê lâi thiaⁿ-tio̍h Siōng-tè ê siaⁿ.
Tī kū-nî chit ê ūn-tōng ū khui tē 2 hoê Sè-kài Tāi-hoē tī Bí-kok. Hit ê tāi-khài chhin-chhiūⁿ ē-bīn.
Chhit goe̍h 13-20 ji̍t, choân sè-kài ê tāi-piáu iok 1500 miâ, ū tī ロスアソゼルス kap パサデナ ê só͘-chāi tāi-seng pī-pān sim, hun-thoân hùn-liān, chiū-tiong tī 7 goe̍h 19 ji̍t àm, ū tī ホリウツトボールtoā hoē-tiûⁿ khui Kiàn-chèng-hoē. Ū 30000 lâng ji̍p-tiûⁿ, ia̍h iok 10000 lâng bē thang ji̍p. Tāi-piáu-chiá lóng chē tī tâi-téng, ia̍h cha̍p goā lâng kan-chèng Siōng-tè ū cháiⁿ-iūⁿ piàn-oāⁿ in ê seng-oa̍h. Hit ê chêng-kéng chin ē kám-tōng lâng.
Chhit goe̍h 21-31 ji̍t. Choân-oân ū soá khì hū kīn ê アツシリモア ê só͘-chāi, tī-hia 10 ji̍t kú lâi khui Sè-kài Tāi-hoē. Chit tiong-kan bô ū bîn-cho̍k, kai-kip, tē-uī, hong-sio̍k ê chha-piat, kó-jiân tiàm tī Ki-tok lâi chò chi̍t ê, saⁿ kau-poê, saⁿ kám-siā, saⁿ bián-lē.
Tī chit ê khùn-lân, put-an ê sî-tāi ē thang chū-chi̍p hiah chē ê lâng si̍t-chāi bô m̄-sī piáu-bêng Siōng-tè ê khuì-la̍t kó-jiân ū ūn-hêng tī lâng ê tiong-kan.
Peh goe̍h I ji̍t. Tī Song-káng toā Phok-lám-hoē-tiûⁿ-tiong, chèng tāi-piáu ū hêng-lia̍t lâi hoàn-khí chèng-lâng chò sin chhòng-chō--ê, lâi kiàn-siat sin ê kok-ka, sin ê sè-kài.
“Nā ū chi̍t lâng thiaⁿ-thàn Siōng-tè, chiū sè-kài ē thang tit-kiù.”In toà chit ê oē tńg-khì kàu tī choân sè-kài.
漢羅（Ùi原文改寫）
牛津運動
第2回世界大會
1940.01 658號 p.31
佇逐時代上帝有揀召拄好的人來做伊的差用。佇現代伊有揀召ブックﾏソ博士閣一擺來傳極簡單，亦是極要緊的道理，就是鼓舞逐人的生活著徹底佇誠實，純潔，無私佮疼痛。這个運動已經遍傳佇全世界，濟濟人有對這个來聽著上帝的聲。
佇舊年這个運動有開第2回世界大會佇美國。彼个大概親像下面。
七月13-20日，全世界的代表約1500名，有佇ロスアソゼルス佮パサデナ 的所在代先備辦心，分團訓練，就中佇7月19日暗，有佇ホリウツトボール大會場開見證會。有30000人入場，亦約10000人袂通入。代表者攏坐佇台頂，亦十外人干證上帝有怎樣變換in 的生活。彼个情境真會感動人。
七月21-31日。全員有徙去附近的 アツシリモア 的所在，佇遐10日久來開世界大會。這中間無有民族，階級，地位，風俗的差別，果然踮佇基督來做一个，saⁿ交陪，saⁿ感謝，saⁿ勉勵。
佇這个困難，不安的時代會通聚集hiah濟的人實在無毋是表明上帝的氣力果然有運行佇人的中間。
八月一日。佇Song-káng大博覽會場中，眾代表有hêng-lia̍t來喚起眾人做新創造--ê，來建設新的國家，新的世界。
「若有一人聽趁上帝，就世界會通得救。」In蹛這个話轉去到佇全世界。