信仰美談
Sìn-gióng Bí-tâm
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第658號 |
| 日期 | 1940/1 |
| 頁數 | 5-6 |
白話字（原文數位化）
Sín-gióng Bí-tâm
Chhiah-bé chek
(An-pîn-seng ki)
194001 658 hō p.5-6
(Chiap 11 goe̍h hō 8 bīn)
7.Ji̍p Sîn Ha̍k-hāu. Kiù-chú 1887 nî, Chhiah-bé chek tú 30 hoè, Gô͘ Bûn-pin Thoân-tō-su, khoàⁿ-kiⁿ i jia̍t-sim kèng Siōng-tè, pek-chhiat kî-tó, koan-sim tī kàu-hoē, it-chhè ê kang-chok, teh siūⁿ i chiong-lâi sī hui-siông-jîn. Chiū ke̍k-le̍k chhui-chiàn i, ji̍p Tâi-lâm Sîn Ha̍k-hāu. I tī Sîn-ha̍k-hāu, le̍k-jīm ê Hāu-tiúⁿ chiū-sī Pa Khek-lé, Kam uî-lîm, Thô͘ uî-lîm；Hàn-bûn ê Kàu-su, chiū-sī Lîm Siong-hûn, Khó͘ Têng-hong.
Hit-sî Sîn-ha̍k-hāu ê seng-oa̍h, muí-goe̍h niá kim 3 kho͘, hoé-si̍t goā iáu-kú chhun 3 kak gîn. Lé-pài-ji̍t chiū chhut-goā pò͘-tō, á-sī lûm-liû khì-hiong-chhoan kàu-hoē chú-lí lé-pài, kàu pài 2 chiū pò-kò siau-sit.
8.Hoàn-bē Sèng-chheh. Tha̍k kàu 3 nî seng ê sî, Kàu-sū-hoē gī-lūn, tio̍h phài chi̍t miâ ha̍k-seng khì hoàn-bē Sèng-chhek. Kiat-kio̍k Chhiah-bé chek tiòng-soán, muí-goe̍h sin-kim 4 kho͘. Chhiah-bé chek chiū chhut-hoat. Bó͘ ji̍t kàu Pang-liâu, ji̍p bó͘ Hàn-io̍h-tiàm chio bé, Lîm Jū Sian-seⁿ chin hoan-gêng, chiong só͘ ū chheh choân-pō͘ bé liáu, chîⁿ iā kau chheng-chhó. Hut-jiân khoàⁿ-tio̍h lâ-so͘ ê miâ-jī, chek-sî piⁿ-bīn toā siū-khì, toa̍t-hoê bé chheh ê chîⁿ, chiong chheh hiat tī thô͘-kha, kha-chiⁿ ti̍t that, kûn-thâu-bó ti̍t cheng, ti̍t mē, ti̍t chhoh, bû só͘ put-chì. Ah! Chhiah-bé chek chit sî siū chit khoán ê toā lêng-jio̍k, m̄-nā bô kap i kè-kàu, soà pek-chhiat kiû Chú kám-hoà chit khoán ê lâng. Hit mê tī kheh-koán tâu-hioh, thiⁿ-kng lâng chiū kóng, chin-kî, Lîm Jū ióng-ióng kiāⁿ-kiāⁿ, cha-mê hut-jiân sí--khì.
āu-lâi chiū lâi Kheh-chng bē, ki-hoē chin hó, iân-lō͘ kàu Tō͘-kun-eng, tâu-hioh tī pài-tn̂g. Hit-mê thiⁿ-khì chin joa̍h, chiū thng8-pak-then teh khùn. Kàu poàⁿ-mê cheng-sîn, kám-kak pak-tó téng tāng-tāng, to sī chi̍t boé toā choâ, khûn tī pak-tó͘-téng teh khùn.
Chhiah-bé chek toā kiaⁿ, koáⁿ-kín ēng chhiú la̍k choâ hiat lo̍h tē, kai-chài lóng bô siū-siong, kám-siā Thiⁿ-pē.
Bó͘ ji̍t tuì Kong-san beh chiuⁿ-pak, toā hō ti̍t lo̍h, keh-chuí chin toā, theⁿ pâi ê sit chhiú, pâi-ko tuī-lo̍h khe tiong, piâ hō͘ chuí ti̍t-ti̍t lâu khì, choân pâi ê lâng chin toā guî-hiám. Chhiah-bé chek chiū pek-chhiat kî-tó, kiû Chú chín-kiù choân kûn ê láng. Hut-jiân khí toā lâm-hong, chiong tek-pâi chhui-oá pak hoāⁿ, tāi-ke tit2-kiù.
Bó͘ ji̍t khì Kî-āu bē Sèng-chheh, bó͘ lia̍h hî ê lâng, chèng-bêng ngó-siōng bô iáⁿ. I kóng, bó͘ sî i tī hái-tiong khioh chi̍t kha ê toā siuⁿ, lāi-té ū 49 sian ê put-á, lâng ēng chē-chē chîⁿ beh kā bé, i m̄-chún; chiū chiong chiah ê sîn-chhiōng sàng pêng-iú ho̍k-sāi. Hit nî ke-têng chin kāu sū-lō͘, goá kiù i soà tú-tio̍h chai-hō, thái ū sîn neh?
Bó͘ ji̍t kàu Kiâm-chuí bē Sèng-chheh, pò͘-tō, í-keng soah, bó͘ tiàm-chú chhiáⁿ ji̍p tiàm-lāi, hó-lé khoán-thāi kóng, “Sian-seⁿ lí thè thiⁿ kàu-hùn lâng,chin kám-siā.” Chit7 the̍h 4 pah chîⁿ, kiong-kèng lâi sàng Chhiah-bé chek thang chò lō͘-huì. Hit lâng ho͘N3 siān ê sim chin toā.
Bó͘ ji̍t kàu Chheng-chuí bē Sèng-chheh kiam pò͘-tō, hit mê tâu-hioh tī kheh-tiàm, poàⁿ-mê hut-jiân chi̍t ê îm-hū giâ mn̂g ji̍p-lâi, ēng îm-sû, îm-gú, îm ê kú-tōng teh ín-iú. Chhiah-bé chek chit-sî chòng-liân, hiat-khì hong-kong, koh sī toaⁿ-sin tī kheh-tiàm, kiám m̄-sī chin chū-iû thang thàn su-lo̍k mah? Nā-sī i moá-sim chhiong-moá Sèng Sîn, chhut-la̍t ap-chè su-io̍k, kiat-kio̍k iâⁿ koè îm-hū, kā i koáⁿ-tio̍k mn̂g-goā, chiong mn̂g koaiⁿ khah hó-sè, sim-koaⁿ-kó͘ pho̍k-pho̍k-chhéng, kám-siā Thiⁿ-pē ê thiàⁿ, bô tuī-lo̍h tī îm-hū ê chhiú. Soà siuⁿ-tio̍h tong-sî Iok-sek siū chú-bó ín-iú ê chong-hóng, chin guî-hiám.
Bó͘ ji̍t kàu Tām-chuí bē Sèng-chheh kiam pò͘-tō, tit-tio̍h Kai Bo̍k-su hó-ì, chhiáⁿ i toà tī i ê só͘-chāi, chham-koan i só͘ pâi-lia̍t--ê, tit-tio̍h lī-ek chin toā. Koh tit-tio̍h Kai Bo̍k-su hó-lé khoán-thāi, chò it-seng ê kì-liām. Chit pái chiūⁿ Pak-pō͘, thâu-chi̍t pái chē hoé-chhia chin sim-sek, chhia-chu chin sio̍k,chi̍t-pò͘ lō͘ chiàⁿ 5 sián chîⁿ.
Chhiah-bé chek bē Sèng-chheh kiam pò͘-tō iok chi̍t nî kú, pō͘ kiâⁿ pah-goā phò͘, le̍k chīn ti--ê, khó--ê. Pang-liâu siū phah, siū lêng-jio̍k ê chhi-chhám, Kiâm-chuí siū hō͘-thāi ê hoaⁿ-hí, Kong-san koè pâi ê guî-hiám, Chheng-chuí îm-hū ê khó͘-chiàn, Tām-chuí Kai Bo̍k-su hō͘-thāi ê hoaⁿ-hí. Sî-kau sui-sī chi̍t nî kú, sióng chīn Tâi-oân ê jîn-sim, tō-tek, hong-sio̍k sī chin-chē, chō-chiū i chiong-lâi tī kàu-kài ū hó ê tē-ki. Chhiah-bé chek be chheh í-keng moá chi̍t-nî kú, chiū koh khì Tâi-lâm Sîn-ha̍k-hāu tha̍k sì nî kip.
(Boē-oân)
漢羅（Ùi原文改寫）
信仰美談
赤馬叔
(An-pîn-seng 記)
194001 658號 p.5-6
(接11月號8面)
- 入神學校。救主1887年，赤馬叔拄30歲，吳文彬傳道師，看見一熱心敬上帝，迫切祈禱，關心佇教會，一切的工作，咧想伊將來是非常人。就極力推薦伊，入台南神學校。伊佇神學校，歷任的校長就是巴克禮，甘為霖，涂為霖；漢文的教師，就是林湘雲，許廷芳。
彼時神學校的生活，每月領金3箍，伙食外猶過賰3角銀。禮拜日就出外佈道，抑是輪流去鄉村教會主理禮拜，到拜2就報告消息。
- 販賣聖冊。讀到3年生的時，教士會議論，著派一名學生去販賣聖書。結局赤馬叔中選，每月薪金4箍。赤馬叔就出發。某日到枋寮，入某漢藥店招買，Lîm Jū先生真歡迎，將所有冊全部買了，錢也交清楚。忽然看著耶穌的名字，即時變面大受氣，奪回買冊的錢，將冊hiat佇塗跤，跤chiⁿ直踢，拳頭母直舂，直罵，直chhoh，無所不至。啊！赤馬叔這時受這款的大凌辱，毋若無佮伊計較，紲迫切求主感化這款的人。彼暝佇客館投歇，天光人就講，真奇，Lîm Jū勇勇健健，昨暝忽然死去。
後來就來客莊賣，機會真好，沿路到Tō͘-kun-eng，投歇佇拜堂。彼暝天氣真熱，就褪腹裼咧睏。到半暝精神，感覺腹肚頂重重，都是一尾大蛇，khûn佇腹肚頂咧睏。赤馬叔大驚，趕緊用手la̍k蛇hiat落地，佳哉攏無受傷，感謝天爸。
某日對岡山欲上北，大雨直落，溪水真大，theⁿ排的失手，排篙墮落溪中，排予水直直流去，全排的人真大危險。赤馬叔就迫切祈禱，求主拯救全群的人。忽然起大南風，將竹排推倚北岸，大家得救。
某日去旗後賣聖冊，某掠魚的人，證明偶像無影。伊講，某時伊佇海中抾一跤的大箱，內底有49仙的佛仔，人用濟濟錢欲共買，伊毋准；就將遮的神chhiōng送朋友服侍。彼年家庭真厚事路，我救伊紲拄著災禍，thài有神neh？
某日到鹹水賣聖冊，佈道，已經煞，某店主請入店內，好禮款待講，「先生你替天教訓人，真感謝。」就提4百錢，恭敬來送赤馬叔通做路費。彼人好善的心真大。
某日到清水賣聖冊兼佈道，彼暝投歇佇客店，半暝忽然一個淫婦giâ門入來，用淫詞，淫語，淫的舉動咧引誘。赤馬叔這時壯年，血氣風光，閣是單身佇客店，káim毋是真自由通趁私慾嘛？若是伊滿心充滿聖神，出力壓制私慾，結局贏過淫婦，共伊趕逐門外，將門關較好勢，心肝鼓pho̍k-pho̍k-chhéng，感謝天爸的疼，無墮落佇淫婦的手。紲想著當時約瑟受主母引誘的狀況，真危險。
某日到淡水賣聖冊兼佈道，得著偕牧師好意，請伊蹛佇伊的所在，參觀伊所排列的，得著利益真大。閣得著偕牧師好禮款待，做一生的記念。這擺上北部，頭一擺坐火車真心適，車租真俗，一舖路正5仙(sián)錢。
赤馬叔賣聖冊兼佈道約一年久，步行百外舖，歷盡甜的，苦的。枋寮受拍，受凌辱的悽慘，鹹水受厚待的歡喜，岡山過排的危險，清水淫婦的苦戰，淡水偕牧師厚待的歡喜。時間雖是一年久，賞盡台灣的人心，道德，風俗是真濟，造就伊將來佇教界有好的地基。赤馬叔賣冊已經滿一年久，就閣去台南神學校讀四年級。
未完