迎接新年
Ngiâ-chih Sin-nî
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第646號 |
| 日期 | 1939/1 |
| 頁數 | 1-2 |
白話字（原文數位化）
Ngiâ-chih Sin-nî
1939.01. 646 kî 1-2
Chiāu-hô 13 nî taⁿ í-keng koè-khì lah! Eńg-oán koè-khì lah!!Ná chhin-chhiūⁿ bîn-bāng chò i koé-khì lah!!!Tiat-ha̍k-chiá Se-nî-ka án-ni kóng:” Lán lóng sī teh thó͘-khuì sî-kan chin té; chóng-sī lán ū chin chē ê sî-kan, iā lán lóng bē-hiáu ēng--i. Tī lán ê seng-gâi tiong choân-jiân bô lī-ek; á-sī lóng bô ì bô sù; iū-koh eng-kai chò--ê m̄ khì chò; án-ni teh keng-koè. Sui-jiân ta̍uh-ta̍uh teh thó͘-khuì sî-kan chin té, iáu-kú ta̍k ji̍t teh chò tāi-chì, sī chhin-chiūⁿ sî-kan bô hān-liōng chi̍t-iūⁿ.”
Chiah ê oē, kiám m̄-sī hō͘ lán chin thang chhim-siūⁿ--i mah? Tī Sin-nî, lán ná chhin-chhiūⁿ peh-chiūⁿ koân-soaⁿ teh khoàⁿ thâu-chêng ê lō͘-tô͘; ū suí-suí hi-bāng ê kng teh chiò, iā ū moá-moá ê hoaⁿ-hí kap chìn-chhú ê cheng-sîn teh chhèng-khí-lâi; chóng-sī it-tàn oa̍t-thâu chi̍t-ē khoàⁿ, chiah chai tiat-ha̍k-chiá Se-nî-ka só͘ kóng--ê sī sū-si̍t, bē-bián-tit siⁿ-chhut chi̍t chióng pi-siong tī-teh.
Chi̍t nî kú, sī chhin-chiūⁿ chin tn̂g; kì-jiân koè-liáu, bô koh-iūⁿ cha-bō͘-ji̍t nā-tiāⁿ. Teh siūⁿ, teh kè-e̍k chē-chē hāng tāi-chì; tī put-ti put-kak ê tiong-kan, sî-ji̍t chò i koè-khì lah!
Ah! Chiah-nih té ê chi̍t nî kú: Nā ēng ji̍t lâi sǹg--i, chiū ū 365 ji̍t tī-teh. Nā ēng tiám-cheng lâi sǹg--i, chiū ū 8640 tiám cheng kú lah.
Ū chiah-nih chē ê sî-kan, lán pàng án-ni hō͘ i koè-khì; chi̍t-ē kā siūⁿ khí-lâi, sī chin khó-sioh, koh chin chân-liām! Taⁿ chit ê koè-liáu ê 8640 tiám cheng, éng-oán bô koh tò-tńg-lâi lah! Bô-lūn cháiⁿ-iūⁿ thó͘-khuì, hoán-hoé, to bô lō͘-ēng.
“Goá hoaⁿ-hí ēng kuí-nā pah bān kho͘, lâi bé chi̍t-chhùn ê kong-im”: Chit kù, sī Eng-kok ê lú-ông I-lī-sa-pek beh koè-sin ê sî, só͘ kóng--ê. Lú-ông 50 nî kú, koán-lí ji̍t-thâu bô lo̍h-khì ê Tāi Eng-kok, chiàu i só͘ ài--ê lâi hióng-siū it-chhè ê êng-hoâ, khoài-lo̍k. Chiah-nih tn̂g ê 50 nî, ná bîn-bāng án-ni koè-khì. Kàu teh-beh lī-khui sè-kan hit sî, chiah chai kong-im ê pó-poè. Siat-sú nā ū lâng, ē thang hō͘ i ê sèⁿ-miā ke chia̍h khah kú, chiū sui-jiân chi̍t chhùn ê kong-im, i hoaⁿ-hí ēng kuí-nā pah bān kho͘, lâi kā bé--i.
uī-tio̍h chi̍t chhùn kong-im, hoaⁿ-hí huì kuí-nā pah bān kho͘. Ah! Sî-kan chin-chiàⁿ pó-poè! Khó-sioh sè-kan lâng, sò͘-sî lóng bô lia̍h-chò iàu-kín, pàng hō͘ i khang-khang koè-khì. Só͘-í muí pái kàu sin-nî, oa̍t-thâu chi̍t-ē khoàⁿ, chiū chai ū phah-sńg chē-chē ê kong-im, teh hoán-hoé kóng, Khó-sioh ah! Siáⁿ-sū m̄-chai thang chò khah ū lī-ek, khah ū ì-gī, lâi keng-koè it-seng leh!
Ū chi̍t ê chun-kuì ê hū-jîn-lâng, chē tī sè-chiah chûn-á teh tuh-ku. I ê ām-kún ū koà chi̍t tiâu chu-liān; hut-jiân chu-liān ê soàⁿ tn̄g-khì, chiū chin-chu chi̍t-lia̍p, chi̍t-lia̍p ka-la̍uh lo̍h hái-nih. Hū-jîn-lâng chhéⁿ-khí-lâi, chiū tio̍h-kiaⁿ; khoàⁿ i suí-suí ê chin-chu án-ni ka-la̍uh lo̍h hái. Chí-ū iáu chhun kuí-nā lia̍p, chiū ēng chhiú khì kā sîn-teh. Ah!Chi̍t ê hū-jîn-lâng in-uī ài-khùn, tì-kàu suí ê chin-chu sit-lo̍h-khì. Taⁿ bô hoat-tō͘, chí-ū lâu ba̍k-sái hoán-hoé nā-tiāⁿ.
Che thang chò lán chin hó ê kà-sī. Chi̍t nî 365 ji̍t, ná chi̍t-koāⁿ suí-suí ê chin-chu, lán in-uī pîn-toāⁿ ài-khùn soà sit-lo̍h-khi, éng-oán bē thang koh tit-tio̍h, kan-ta khang-khang hoán-hoé nā-tiāⁿ.
Chóng-sī kám-siā Siōng-tè, kai-chài I sī chû-ài ê Thiⁿ Pē, ū koh ēng kin-nî sin ê nîsiúⁿ-sù lán, ná chi̍t-koāⁿ suí-suí ê chu-liān. Tī che sin-nî, taⁿ tio̍h pó-sioh kong-im, tio̍h gâu lī-iōng--i, chò ū lī-ek, ū ì-gī ê jîn-seng. Kin-nî, tio̍h chò m̄-bián koh thó͘-khuì, hō͘-hoé lâi kám-siā ê nî, chiah hó. Sèng-keng kà-sī lán kóng,” Tio̍h ēng sim-chì oāⁿ sin, lâi piàn-hoà ka-kī.” Sím-mi̍h ì-sù? Chiū-sī tī lán ê seng-oa̍h, kin-pún-tek oāⁿ-sin. Bô-lūn tōng-ki, bo̍k-tek, chhù-bī, it-chhè tio̍h oāⁿ-sin. Chí-ū sìn-khò Ki-tok, chiū ē.
漢羅（Ùi原文改寫）
迎接新年
1939.01 646 期 1-2頁
昭和13年taⁿ已經過去啦！永遠過去啦！！若親像眠夢做伊過去啦！！！哲學家Se-nî-ka按呢講：「咱攏是咧吐氣時間真短；總是咱有真濟的時間，也咱攏袂曉用--伊。佇咱的生涯中全然無利益；抑是攏無意無思；又閣應該做--的毋去做；按呢咧經過。雖然沓沓咧吐氣時間真短，猶久逐日咧做代誌，是親像時間無限量一樣。」
遮的話，敢毋是予咱真通深想--伊嗎？佇新年，咱若親像peh上懸山咧看頭前的路途；有媠媠希望的光咧照，也有滿滿的歡喜佮進取的精神咧衝起來；總是一旦越頭一下看，才知哲學者Se-nî-ka所講--的是事實，未免得生出一種悲傷佇咧。
一年久，是親像真長；既然過了，無各樣昨暮日nā-tiāⁿ。咧想，咧計劃濟濟項代誌；佇不知不覺的中間，時日做伊過去啦！
啊！遮爾短的一年久：若用日來算--伊，就有365日佇咧。若用點鐘來算--伊，就有8640點鐘久啦。
有遮爾濟的時間，咱放按呢予伊過去；一下共想起來，是真可惜，閣真殘念！今這个過了的8640點鐘，永遠無閣倒轉來啦！無論怎樣吐氣，反悔，都無路用。
「我歡喜用幾若百萬箍，來買一寸的光陰」這句，是英國的女王伊莉莎白欲過身的時，所講--的。女王50年久，管理日頭無落去的大英國，照伊所愛--的來享受一切的榮華，快樂。遮爾長的50年，若眠夢按呢過去。到咧欲離開世間彼時，才知光陰的寶貝。設使若有人，會通予伊的性命加食較久，就雖然一寸的光陰，伊歡喜用幾若百萬箍，來共買--伊。
為著一寸光陰，歡喜費幾若百萬箍。啊！時間真正寶貝！可惜世間人，素時攏無掠做要緊，放予伊空空過去。所以每擺到新年，越頭一下看，就知有拍損濟濟的光陰，咧反悔講，可惜啊！啥事毋知通做較有利益，較有意義，來經過一生哩！
有一个尊貴的婦人人，坐佇細隻船仔咧盹龜。伊的頷頸有掛一條珠鍊；忽然珠鍊的線斷去，就珍珠一粒，一粒交落落海裡。婦人人醒起來，就著驚；看伊媠媠的珍珠按呢交落落海。只有猶偆幾若粒，就用手去共承咧。啊！這个婦人人因為愛睏，致到水的珍珠失落去。今無法度，只有流目屎反悔nā-tiāⁿ。
這通做咱真好的教示。一年365日，若一捾媠媠的珍珠，咱因為貧惰愛睏紲失落去，永遠袂通閣得著，干焦空空反悔nā-tiāⁿ。
總是感謝上帝，佳哉伊是慈愛的天父，有閣用今年新的年賞賜咱，若一捾媠媠的珠鍊。佇這新年，taⁿ著保惜光陰，著gâu利用--伊，做有利益，有意義的人生。今年，著做毋免閣吐氣，後悔來感謝的年，才好。聖經教示咱講，「著用心志換新，來變化家己。」甚物意思？就是佇咱的生活，根本tek換新。無論動機，目的，趣味，一切著換新。只有信靠基督，就會。