故周示先生
Kò͘ Chiu Sī Sian-siⁿ
文獻資訊
| 項目 | 資料 |
|---|---|
| 作者 | 潘道榮 Phoaⁿ Tō-êng |
| 卷期 | 台灣教會公報 |
| 卷期 | 第646號 |
| 日期 | 1939/1 |
| 頁數 | 13-14 |
白話字（原文數位化）
Kò͘ Chiu Sī Sian-siⁿ
Phoaⁿ Tō-êng
1939.01 646 kî 13-14
Sian-siⁿ sī Tâi-tiong chiu Lo̍k-káng lâng; chhut-sì tī Bêng-tī 25 nî 8 goe̍h 2 ji̍t. Pē-bó chá koè-sì, khah bô thang siū kàu-io̍k. Sè-hàn ê sî, ū ji̍p chu-pâng gián-kiù Hàn-ha̍k, put-chí gâu chò Hàn-si. Chheng-liân sî-tāi ū o̍h tām-po̍h Kok-gú; soà chì-goān chò Sûn-cha kuí-nā tang kú. Lī-khui koaⁿ-kài liáu-āu, chiū ji̍p tī siong-kài, khui Iûⁿ-chhâi-tiàm chin kú. Put-hēng i ê goân-phoè pia̍t-sè tī hit chi̍t sî. Ū lâu chi̍t ê cha-bó͘-kiáⁿ, chi̍t ê hāu-seⁿ. Tī che sî-chūn, cheng-sîn chin siū táⁿ-kek; kai-chài ū tit-tio̍h Ki-tok Hok-im ê kà-sī, chiū hoán-hoé lâi sìn Chú. Sìn Chú liáu-āu, chiū koat-sim beh hiàn hō͘ Chú, chiah chì-goān ji̍p Tâi-lâm Sîn Ha̍k-hāu. Só͘-í tī 1918 nî, chiū ji̍p Sîn Ha̍k-hāu. Sì nî kú, siū Hāu-tiúⁿ kò͘ Sòng Tiong-kian bo̍k-su, Kàu-su kò͘ N̂g Sìn-kî Sian-siⁿ, Bo̍k-su kò͘ Hô-iá Sian-siⁿ ê chai-poê; tī o̍h-tiong in-khîn bián-kióng, hó phín-hēng, chhin-chhiat hó kau-poê. I ê sèng-chit khah tiām, chóng-sī pêng-iú tāi-ke lóng chun-kèng--i. Chāi hāu tiong, bat tàu pang-chān Thài-pêng-kéng kap Khoàⁿ-sai-ke ê Ji̍t-iāu-ha̍k-hāu ê kang. Kàu 1922 nî 3 goe̍h chiū chut-gia̍p. Hit nî ê tâng-kî-seng: Tân Lo̍k, Lô͘ Sióng, Gô͘ Thian-sù, Peng Bêng-chhiong, Lîm Tiâu-khun.
Tī 1922 nî 4 goe̍h chhe, chiū siū Thoân-tō-kio̍k phài i khì toà Phêⁿ-ô͘ Toā-sū kàu-hoē. Siāng hit sî, i ū koh chhoā Kong-á-nâ kàu-hoē ê chí-moē Siau--sī Phoê; Sian-siⁿ-niû chiū kap i khì toà tī Toā-sū chò-kang 3 nî goā kú. Toā-sū ê pài-tn̂g, sī i kó͘-bú lâi sin kiàn-tiok--ê. （Tī 1924 nî 3 goe̍h, Kàu-hoē-pò tē 12 bīn Chiu Sian-siⁿ ū siá chi̍t phiⁿ Toā-sū Kàu-hoē ê siau-sit án-ni kóng: Kám-siā Siōng-tè khui-lō͘, ū Boán Bo̍k-su thè goán tuì Sin-lâu ê Bo̍k-su kap Sian-siⁿ, Ko͘-niû, í ki̍p Tâi-oân ê Kàu-hoē tê 5 pah kho͘ lâi pang-chān goán koh khì sin pài-tn̂g）. Kàu 1925 nî chiū choán-jīm koè-lâi Tâi-oân, toà tī Chheng-chuí kàu-hoē chi̍t-nî, Toā-siā kàu-hoē chi̍t-nî, Ba̍k-sa kàu-hoē chi̍t nî kú. Tī 1928 nî oāⁿ khì toà Ka-gī Tiong-hoē-lāi ê Sin-hāng kàu-hoē; iā tī 1929 nî choán khì Tâi-tiong chiu ê Tek-san kàu-hoē. Kàu 1930 nî oāⁿ khì tī Chiang-hoà I-koán toà 4 nî kú. Chiū koh choán-khîn khì taò Pó-táu kàu-hoē nn̄g nî kú. Kàu 1936 nî, Toân-tō-kio̍k ū kā i oāⁿ lâi toà tī Tâi-lâm Tiong-hoē ê Kong-á-nâ kàu-hoē, kàu i pia̍t-sè.
Toà Kong-á-nâ kàu-hoē khiok chí-ū 3 nî kú, chóng-sī put-chí chīn pún-hūn liāu-lí kàu-hoē. Chāi-chit-tiong, bat chhiú-su̍t bông-tn̂g-iām. Kàu hó, chiū koh-khah chhut-la̍t tī i ê chit-bū. Kin-nî in-uī thé-tiap Kong-á-nâ kàu-hoē châi-chèng khah khùn-lân, ū khì kiam Lâm-hoà kàu-hoē. Chāi-lâi i ê sin-thé bô kàu loā ióng, iáu-kú uī-tio̍h kàu-hoē hoaⁿ-hí án-ni hi-seng. Choè-kīn siông-siông hoat koâⁿ-jia̍t ê pēⁿ. Tī 12 goe̍h 7 ji̍t, ū chhut-lâi Tâi-lâm beh siat-hoat kā i ê hāu-siⁿ kiat-hun ê sū, kap beh chham-siâng mê-nî-tō͘ kàu-hoē chìn-hêng ê iàu-bū, bô phah-sǹg chhut lâi kàu lō͘-tiong sin-thé bô sóng-khoài, kàu uī suî-sî ji̍p Sin-lô͘ I-īⁿ, i ê tē-jī cha-bó͘-kiáⁿ tī-hia chò khàn-hō͘-hū, lī-piān thang chiàu-kò͘. I-īⁿ ê I-seng, khàn-hō͘ chīn-la̍t lâi kā i liâu-tī, put-liāu Siōng-tè ê chí-ì í-keng chiâⁿ, chiū 12 ji̍t ē-tàu oá chi̍t tiám, hō͘ Siōng-tè kéng-tiàu tńg-khì thiⁿ-téng, hióng-siū 48 hoè.
I ê toā cha-bó͘-kiáⁿ, ū chhut-kè, tī 2 nî chêng koè-óng. Hiān-chāi iáu chhun i ê Sian-siⁿ-niû kap 4 ê hāu-siⁿ, 4 ê cha-bó͘-kiáⁿ, khah chē iáu sè-hàn. ǹg-bāng lia̍t-uī hiaⁿ-ché thè i ê uî-cho̍k kî-tó. Chhú-khì Sian-siⁿ-niû ê seng-oa̍h sī kan-lân; Kàu-hoē só͘ ū thang pang-chān--i ê, sī sió-khoá nā-tiāⁿ.
Tī 12 goe̍h 13 ji̍t ē-po͘ 5 tiám, ū tī Tâi-lâm chhī Tang-mn̂g Ki-tok kàu-hoē kú-hêng chòng-sek.
Hit ji̍t (tú-hó Lâm Tāi Siông-tì Uí-oân-hoè chū-chi̍p) chòng-sek êsūn-sū:
Su-hoē-chiá: Chiu En̂g-an Bo̍k-su.
-
Chàu-ga̍k: Loā Lú Thoân-tō
-
Sèng Si: (138)
-
Sèng-chheh (2 Thê 4 :1-7): N̂g Chú-gī Kàu-su
-
Kî-tó: Ông oá Bo̍k-su
-
Kò͘ jîn lí-le̍k: Si khun-phêng Bo̍k-su
-
Soat-kàu: Phoaⁿ Tō-êng Bo̍k-su
7.Tiàu-sû tiàu-tiān: Lâm Tāi: Lâu Chín-hong Bo̍k-su
Ko Tiong: Tiuⁿ Sûn-in Bo̍k-su
Ka Tiong: Lîm Kín-sīn Bo̍k-su
Tiong: Ông Siú-ióng Bo̍k-su
Kî-thaⁿ: Tè Hoán Bo̍k-su
Lâu Tiong-kian Bo̍k-su
Sîn Ha̍k-hāu tāi-piáu
-
Tiàu-koa: Sîn Ha̍k-hāu pêng-iú
-
uî-cho̍k tap-sû
-
Sèng-si: (133)
-
Chiok-tó: Lâu Chín-hong Bo̍k-su
Lūn Sian-seⁿ ê chò lâng ū 3 tiám, thang chò hó ê bô͘-hoān:
(1) Phoh-si̍t: I it-seng ê seng-oa̍h, ta̍k hāng to sī phoh-si̍t. Tuì siā-hoē, tuì kàu-hoē, tuì ka-têng, lóng sī siāng chi̍t-iūⁿ ê phoh-si̍t seng-oa̍h. Tī hiān-tāi ho̍k-cha̍p ê siā-hoē, ē thang keng-koè chit khoán seng-oa̍h, m̄-sī iông-īⁿ. Thang kóng sī tuì téng-bīnsó͘ siúⁿ-sù i ê te̍k-chit.
(2) Tiong-si̍t: Sian-siⁿ khiok m̄-sī toā phok-ha̍k, iáu-kú tuì i ê chit-bū ū tiong-si̍t. I bat tuì kì-chiá chioh chū-pī soat-kàu ê chhâi-liāu khì chham-khó, jiân-āu kóng i ū tit-tio̍h hui-siông ê kà-sī; thang chai i tuì thoân Siōng-tè ê oē, m̄-káⁿ suî-piān, in-uī ài chò Chú tiong-si̍t ê lô͘-po̍k. Thoân-kàu-chiá tuì soat-kàu nā sit-pāi, chiū sui-jiân kî-thaⁿ chhin-chhiūⁿ sêng-kong, iā boē thang kóng sī sêng-kong, koh-khah bē thang kóng ū tiong-si̍t tī i ê chit-bū. Sian-siⁿ sui-jiân seng-khu bô kàu loā kiāⁿ, iáu-kú it-chhè siū kau-thok ê kàu-bū, m̄-káⁿ bô tiong-si̍t khì chò.
(3) Chhiat-si̍t: Tuì sim-té sī sêng-si̍t, só͘-í hoān-sū chiū ū chhiat-si̍t tī-teh. I ê sèng-chit sī un-sûn tiām-tiām, chóng-sī bān hāng sī tuì-tiōng si̍t-chè koh sek-chhiat. In-khîn gián-kiù, chhiat-si̍t hōng-sū; che sī Sian-seⁿ ê te̍k-tiông.
Siá kàu chia beh soah ê sî, ài koh kóng kuí kù lâi chò kiat-lūn. Sian-siⁿ it-seng sui-jiân bô chò siáⁿ toā chhut-tioh ê tāi-chì, iā bô siáⁿ chhut-miâ, iáu-kú phí-jîn hó-táⁿ kóng i sī chi̍t ê toè Chú kàu sí, Siōng-tè ê lô͘-po̍k. Si̍t-chāi i ē kham-tit chhin-chhiūⁿ Pó-lô Sian-siⁿ chhiùⁿ tek-sèng ê koa tńg-khì thiⁿ-téng kóng:” Guá í-keng cheng-chiàn hó ê cheng-chiàn, í-keng chīn pháu-cháu ê lō͘-chām, í-keng siú só͘ sìn ê tō-lí.”
漢羅（Ùi原文改寫）
故周示先生
潘道榮
1939.01 646期 13-14頁
先生是台中州鹿港人；出世佇明治25年8月2日。爸母早過世，較無通受教育。細漢的時，有入書房研究漢學，不止gâu做漢詩。青年時代有學淡薄國語；紲志願做巡查幾若冬久。離開官界了後，就入佇商界，開洋裁店真久。不幸伊的元配別世佇彼一時。有留一个查某囝，一个後生。佇這時陣，精神真受打擊；佳哉有得著基督福音的教示，就反悔來信主。信主了後，就決心欲獻予主，才志願入台南神學校。所以佇1918年，就入神學校。四年久，受校長故宋中堅牧師，教師故黃信期先生，牧師故和野先生的栽培；佇學中慇勤勉強，好品行，親切好交陪。伊的性質較恬，總是朋友大家攏尊敬--伊。在校中，捌鬥幫贊太平境佮看西街日曜學校的工。到1922年3月就卒業。彼年的同期生：陳鹿，盧賞，吳天賜，兵明昌，林朝坤。
佇1922年4月初，就受傳道局派伊去蹛澎湖大事教會。Siāng彼時，伊有閣娶崗仔林教會的姊妹蕭--氏皮；先生娘就佮伊去蹛佇大事做工3年外久。大事的拜堂，是伊鼓舞來新建築--的。（佇1924年3月，教會報第 12面周先生有寫一篇大事教會的消息按呢講：感謝上帝開路，有滿牧師替阮對新樓的牧師佮先生，姑娘，以及台灣的教會茶5百箍來幫贊阮閣去新拜堂）。到1925年就轉任過來台灣，蹛佇清水教會一年，大社教會一年，木柵教會一年久。佇1928年換去蹛嘉義中會內的Sin-hāng教會；也佇1929年轉去台中州的竹山教會。到1930年換去佇彰化醫館蹛4年久。就閣轉勤去蹛寶斗教會兩年久。到1936年，傳道局有共伊換來蹛佇台南中會的崗仔林教會，到伊別世。
蹛崗仔林教會卻只有3年久，總是不只盡本份料理教會。在職中，捌手術盲腸炎。到好，就閣較出力佇伊的職務。今年因為體貼崗仔林教會財政較困難，有去兼南化教會。再來伊的身體無夠偌勇，猶久為著教會歡喜按呢犧牲。最近常常發寒熱的病。佇12月7日，有出來台南欲設法共伊的後生結婚的事，佮欲參詳明年度教會進行的要務，無拍算出來到路中身體無爽快，到位隨時入新樓醫院，伊的第二查某囝佇遐做看護婦，利便通照顧。醫院的醫生，看護盡力來共伊療治(liâu-tī)，不料上帝的旨意已經成，就12日ē-晝倚一點，予上帝揀召轉去天頂，享壽48 歲。
伊的大查某囝，有出嫁，佇2年前過往。現在猶偆伊的先生娘佮4个後生，4个查某囝，較濟猶細漢。向望列位兄姊替伊个遺族祈禱。此去先生娘个生活是艱難；教會所有通幫贊--伊的，是小可nā定。
佇12月13日下晡5點，有佇台南市東門基督教會舉行葬式。
彼日(拄好南大常治委員會聚集)葬式的順序：
司會者：周榮安牧師。
-
奏樂：賴女傳道
-
聖詩：(138)
-
聖冊(2提4：1-7)：黃主義教師
-
祈禱：王倚牧師
-
故人履歷：施鯤鵬牧師
-
說教：潘道榮牧師
-
弔辭弔奠：南大：劉振芳牧師
高中：張純恩牧師
嘉中：林謹慎牧師
中中：王守勇牧師
其他：戴反牧師
劉忠堅牧師
神學校代表
-
弔歌：神學校朋友
-
遺族答詞
10.聖詩：(133)
11.祝禱：劉振芳牧師
論先生的做人有3點，通做好的模範：
(1)樸實：伊一生的生活，逐項都是樸實。對社會，對教會，對家庭，攏是siāng一樣的樸實生活。佇現代複雜的社會，會通經過這款生活，毋是容易。通講是對頂面所賞賜伊的特質。
(2)忠實：先生卻毋是大博學，猶久對伊的職務有忠實。伊捌對記者借自備說教的材料去參考，然後講伊有得著非常的教示；通知伊對傳上帝的話，毋敢隨便，因為愛做主忠實的奴僕。傳教者對說教若失敗，就雖然其他親像成功，也袂通講是成功，閣較袂通講有忠實佇伊的職務。先生雖然身軀無夠偌健，猶久一切受交託的教務,毋敢無忠實去做。
(3)切實：對心底是誠實，所以凡事就有切實佇咧。伊的性質是溫純恬恬，總是萬項是對重實際閣適切。殷勤研究，切實奉事；這是先生的特長。
寫到遮欲煞的時，愛閣講幾句來做結論。先生一生雖然無做啥大出擢的代誌，也無啥出名，猶久鄙人好膽講伊是一个綴主到死，上帝的奴僕。實在伊會堪得親像保羅先生唱德行的歌轉去天頂講：「我已經征戰好的征戰，已經盡跑走的路站，已經守所信的道理。」