宗教教育講座
Chong-kàu Kàu-io̍k Káng-chō
文獻資訊
| 項目 | 資料 |
|---|---|
| 作者 | 王守勇 Ông Siú-ióng |
| 卷期 | 台灣教會公報 |
| 卷期 | 第646號 |
| 日期 | 1939/1 |
| 頁數 | 11-13 |
白話字（原文數位化）
Chong-kàu Kàu-io̍k Káng-chō
Tiong Tiong: Ông Siú-ióng
Tē 6 káng: Koàn-thiat-hoat
1939.01 646 kî 11-13
Chú Iâ-so͘ put-sî liû sim tī I ê kà-sī, tio̍h koàn-thiat chiah ē ēng-tit. Kàu-io̍k m̄-sī it-sî-tek ê kang, sī choân seng-gâi ê tāi-chì; só͘-í só͘ ha̍k-si̍p--ê tio̍h ài koàn-thiat kàu chi̍t-sì-lâng. Lán chai, I ê bo̍k-tek m̄-sī kan-ta beh chhián-bêng tō-lí nā-tiāⁿ, chiū-sī si̍t-hiān tī seng-oa̍h, kàu thiat-té chiah ē ēng-tit. Tī-chia lán ài khoàⁿ, Iâ-so͘ ài koàn-thiat I ê kà-sī, só͘ chhú ê hong-hoat sī sím-mi̍h?
(1) Kau-poê
Iâ-so͘ huì-liáu chin choē sî-kan kap ha̍k-seng kau-poê, kap in saⁿ-kap seng-oa̍h. Ha̍k-seng put-sî tī Iâ-so͘ ê sin-piⁿ, kap I kau-poê, lâi thiaⁿ I ê kà-sī, in ê seng-oa̍h siū I ê kám-hoà chin toā. Iâ-so͘ khah-siông kap ha̍k-seng saⁿ-kap toà, khì ha̍k-seng ê chhù, á-sī chhoā in khì siok-chēng ê só͘-chāi, á-sī ji̍p hoē-tn̂g saⁿ-kap lé-pài, put-lūn sím-mi̍h sî, I to kap ha̍k-seng saⁿ-kap tī-teh. án-ni, Iâ-so͘ put-sî chiap-chhiok tī ha̍k-seng ê seng-oa̍h. Tuì chit ê chiap-chhiok, tī put-ti put-kak ê tiong-kan, I jîn-keh ê kám-hoà put-chí toā.
án-ni, chit khoán ê chiap-chhiok, tī kàu-io̍k-chiūⁿ ū toā ê khuì-la̍t tī-teh. Chú-ji̍t-o̍h ê Kàu-su tek-khak tio̍h hùn-liān chit khoán ê si̍p-koàn. Lán chai, chē-chē lâng sui-bóng khoài boē kì-tit I ê lāu-bó ê kà-sī, iáu-kú ē kì-tit I ê lāu-bó ê chò lâng; tuì pêng-iú ia̍h sī án-ni, sui-jiân pêng-iú ê hó-oē bē kì-tit, iáu-kú pêng-iú ê kám-hoà, hit ê jîn-keh ê phang iáu-kú tī-teh. Chhin-chhiūⁿ án-ni, lán chò kàu-su, tio̍h put-sî chiap-chhiok tī seng-tô͘ ê seng-oa̍h, ēng lán ê sìn-gióng, lán ê jîn-keh lâi kám-hoà seng-tô͘ sī choè iàu-kín.
(2) Kian-kò͘ hit ê kà-sī
Chú Iâ-so͘ tī sek-lāi kà-sī ê, siông-siông tī saⁿ kau-poê ê tâm-oā tiong, lâi kian-kò͘ I ê kà-sī. Lán khoàⁿ ha̍k-seng, khah siông tī kò-jîn chiap-chhiok ê sî, koh mn̄g hit ê kà-sī phì-jū, á sī kiû soat-bêng hit ê chin-lí. Ū-sî tī chē toh, tī sàn-pō͘, tī khòng-iá, tī hái-piⁿ. Put-lūn tī sím-mi̍h só͘-chāi, tī hui-kong-sek ê tâm-oā-tiong ū chhián-bêng I ê kà-sī, só͘-í ha̍k-seng sî-siông koh kiû I ê kà-sī ê kái-bêng; tuì án-ni thang kian-kò͘ hit-ê kà-sī, hō͘ khah thiat-té.
Taⁿ Chú-ji̍t-oh ê Kàu-su, lán nā ū chhin-chhiūⁿ Chú chit khoán ê thài-tō͘, tī la̍k-ji̍t ê tiong-kan ū ki-hoē thang chiap-chhiok lí ê seng-tô͘, hō͘ in thang kap lí tâm-lūn, tī lé-pài-ji̍t só͘ kà--ê, sī chin ē thang thiat-té hit ê kà-sī. Nā án-ni seng-tô͘ beh hoan-gêng lí ê oē, iā put-sî beh chhin-kīn lí, lâi kap lí tâm-lūn, Chú Iâ-so͘ ê tāi-chì. Lán put-sî tio̍h liû-sim tī chit tiám.
(3) Saⁿ-kap thit-thô
Chú Iâ-so͘ ê ha̍k-seng khiok lóng sī sêng-jîn, nā kóng saⁿ-kap thit-thô,kiám-chhái… ū gú-pè iā bô tiāⁿ-tio̍h, chóng-sī lán chai, Iâ-so͘ nā-sī tī hioh-khùn ê sî, ū chhoā kuí-nā-ê kap I khì khah an-chēng ê só͘-chāi; ū-sî ha̍k-seng teh chē chûn, I chiū khì chhoē in. Tī chit khoán ê sî-chūn, ha̍k-seng put-sî, tuì I ū tit-tio̍h hó ê kà-sī. án-ni Iâ-so͘, bô-lūn sî teh hiok-khùn, á-sī teh kiâⁿ-iû, put-sî chhoē ki-hoē lâi kà-sī ha̍k-seng.
Kin-á-ji̍t ê Chú-ji̍t-o̍h Kàu-su, ia̍h tio̍h án-ni si̍t-hêng. Lán tī kong-hn̂g, tī ūn-tōng-tiûⁿ, tī sàn-pō͘, tī thit-thô ê sî, nā ē thang kà-sī in, sī chin sêng-kong ê Kàu-su. Put-kò ài chù-ì ê, chiū-sī kóng, m̄-thang put-lūn sím-mi̍h sî-chūn to beh kî-tó, beh lé-pài; lán só͘ hi-bāng ê, sī seng-tô͘ ē chiàu só͘ ha̍k-sip ê kà-sī, tī put-lūn só͘-chāi, put-lūn sî, ē chiàu Ki-tok ê kà-sī lâi seng-oa̍h chò iàu-kín. Só͘-í kàu-su tio̍h chīn-la̍t koàn-ji̍p Siōng-tè tiong-sim ê seng-oa̍h tī seng-tô͘, chiah ē ēng-tit.
(4) Saⁿ-kap chò-kang
Chú Iâ-so͘ put-chí ū tì-ì tī ha̍k-seng ê seng-oa̍h. Ū-sî kap in saⁿ-kap thó hî, iā pang-chān in lia̍h chin chē hî. I m̄-sī ka-kī chò kang nā-tiāⁿ, ū sî phài in khì thoân hok-im, i-pīⁿ, koáⁿ-kuí lâi saⁿ-kap chò kang. Chhin-chhiuⁿ Siōng-tè kok ê kiàn-siat, sī Sian-siⁿ kap ha̍k-seng kiōng-chok ê kang-tiâⁿ.
Chhin-chhiūⁿ chit khoán, saⁿ-kap chò kang ê hong-hoat, ē thang koàn-thiat seng-tô͘ ê kàu-io̍k. Tio̍h hō͘ seng-tô͘ hun-tam lí ê kang-chok, tuì Ki-tok-kàu ê sū-gia̍p, á-sī hōng-sū ê seng-oa̍h. Ha̍k-seng sui-jiân bô chhin-chhiūⁿ Sian-siⁿ, hiah-nih gâu-chò, iáu-kú hoaⁿ-hí siū Chú ê bēng-lēng khì chò kang. Só͘-í lán, iû-goân tio̍h hō͘ seng-tô͘ ū hūn tī Sèng ê kang lâi saⁿ-kap tio̍h-boâ, sī choè iàu-kín.
漢羅（Ùi原文改寫）
宗教教育講座
中中：王守勇
第6講：貫徹法
1939.01 646期 11-13頁
主耶穌不時留心佇伊的教示，著貫徹才會用得。教育毋是一時的的工，是全生涯的代誌；所以所學習--的著愛貫徹到一世人。咱知，伊的目的毋是干焦欲闡明道理nā定，就是實現佇生活，到徹底才會用得。佇遮咱愛看，耶穌愛貫徹伊的教示，所取的方法是甚物？
(1) 交陪
耶穌費了真濟時間佮學生交陪，佮in相佮生活。學生不時佇耶穌的身邊，佮伊交陪，來聽伊的教示，in的生活受伊的感化真大。耶穌較常佮學生相佮蹛，去學生的厝，抑是chhoā in去肅靜的所在，抑是入會堂相佮禮拜，不論甚物時，伊都佮學生相佮佇咧。按呢，耶穌不時接觸佇學生的生活。對這个接觸，佇不知不覺的中間，伊人格的感化不止大。
按呢，這款的接觸，佇教育上有大的氣力佇咧。主日學的教師的確著訓練這款的習慣。咱知，濟濟人雖罔快袂記得伊的老母的教示，猶久會記得伊的老母的做人；對朋友亦是按呢，雖然朋友的好話袂記得，猶久朋友的感化，彼个人格的芳猶久佇咧。親像按呢，咱做教師，著不時接觸佇生徒的生活，用咱的信仰，咱的人格來感化生徒是做要緊。
(2) 堅固彼个教示
主耶穌佇室內教示的，常常佇相交陪的談話中，來堅固伊的教示。咱看學生，較常佇個人接觸的時，閣問彼个教示譬喻，抑是求說明彼个真理。有時佇坐桌，佇散步，佇曠野，佇海邊。不論佇甚物所在，佇非公式的談話中有闡明伊的教示，所以學生時常閣求伊的教示的解明；對按呢通堅固彼个教示，予較徹底。
Taⁿ主日學的教師，咱若有親像主這款的態度，佇六日的中間有機會通接觸你的生徒，予in通佮你談論，佇禮拜日所教--的，是真會通徹底彼个教示。若按呢生徒欲歡迎你的話，也不時欲親近你，來佮你談論，主耶穌的代誌。咱不時著留心佇這點。
(3) 相佮thit迌
主耶穌的學生卻攏是成人，若講相佮thit迌，檢采…有語弊也無定著，總是咱知，耶穌若是佇歇睏的時，有chhoā幾若个佮伊去較安靜的所在；有時學生咧坐船，伊就去揣in。佇這款的時陣，學生不時，對伊有得著好的教示。按呢耶穌，無論時咧歇睏，抑是咧行遊，不時揣機會來教示學生。
今仔日的主日學教師，亦著按呢實行。咱佇公園，佇運動場，佇散步，佇thit迌的時，若會通教示in，是真成功的教師。不過愛注意的，就是講，毋通不論甚物時陣都欲祈禱，欲禮拜；咱所希望的，是生徒會照所學習的教示，佇不論所在，不論時，會照基督的教示來生活做要緊。所以教師著盡力灌入上帝中心的生活佇生徒，才會用-。
(4) 相佮做工
主耶穌不止有致意佇學生的生活。有時佮in相佮討魚，也幫贊in掠真濟魚。伊毋是家己做工nā定，有時派in去傳福音，醫病，趕鬼來相佮做工。親像上帝國的建設，是先生佮學生共作的工程。
親像這款，相佮做工的方法，會通貫徹生徒的教育。著予生徒分擔你的工作，對基督教的事業，抑是奉事的生活。學生雖然無親像先生，遐爾gâu做，猶久歡喜受主的命令去做工。所以咱，猶原著予生徒有份佇聖的工來相佮著磨，是最要緊。