讀聖經的運動週
Tha̍k Sèng-keng ê ūn tōng Chiu
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第633號 |
| 日期 | 1937/12 |
| 頁數 | 2-3 |
白話字（原文數位化）
Tha̍k Sèng-keng ê ūn-tōng Chiu
1937年12月633期 2-3
Muí-nî 12 goe̍h tē-it Chú-ji̍t, chiū-sī Sè-kài kong tēng ê Sèng-keng kì-liām lé-pài-ji̍t. Tī chit ji̍t, Tāi-hoē ū koat-gī tio̍h kú-hêng Sèng-chheh Kì-liām lé-pài, kap hiàn-kim chò kì hù Sèng-chheh Kong-hoē ê lō͘-ēng. Sè-kài ê khiuⁿ-kháu ū 5 chheng khoán; Sèng-keng ū ēng 991 khoán ê khiuⁿ-kháu e̍k--i. Phí-jîn teh siūⁿ, tī pún-chiu tio̍h chò chèng sìn-tô͘ tha̍k Sèng-keng ê ūn-tōng chiu. Chì-chió tio̍h li̍p-chì beh chi̍t nî tha̍k Sèng-keng chi̍t piàn. Á-sī te̍k-pia̍t kó͘-bú hoē-iú koh chhut-la̍t lâi gián-kiù Sèng-keng ê chóng tāi-ì. Tuì Chú-ji̍t-o̍h ha̍k-seng, sàng in Sèng-keng lâi chióng-lē in tha̍k Sèng-keng. Chhì-siūⁿ chi̍t pún Sèng-chheh ū sím-mi̍h kè-ta̍t thang hō͘ lán put-sî tha̍k--i, éng-oán kì-liām--i?
- Sèng-keng lóng sī Siōng-tè só͘ khé-sī.
Sèng-keng choân-phō ū 66 pún: Kū-iok 39, Sin-iok 27. Tù-chok ê sian-siⁿ 3,4 cha̍p lâng: le̍k-koè ê sî-kan ū chheng-goā nî. Siá ê lâng, chhut-sin kap poē-kéng lóng bô saⁿ-tâng. Chóng-sī cheng-sîn, sí-chiong it-koàn. Che lóng sī ū chi̍t-uī Siōng-tè teh khé-sī hiah ê siá ê sian-siⁿ. Ah! Bo̍k-koài chit pún Sèng-chheh kám-hoà sè-kan lâng ê lêng-le̍k hiah-nih[sic.] uí-tāi!!!Si̍t-chāi ū put-khó-su-gī,bô hān-liōng ê kè-ta̍t tī-teh.
- Sèng-keng ū kà-sī tok-chek ê hong-hoat.
“Siōng-tè ê tō, sī oa̍h--ê, ū kong-hāu--ê……“(Hi 4:12). Moá-moá ū lêng-le̍k(靈力) tī-teh. Lán lóng sī Siōng-tè ê kiáⁿ-jî, tio̍h piàⁿ khang-hu sim chiap-la̍p Sèng-keng ê kà-sī, khiam-pi sêng-siū Sèng-keng ê tok-chek. In-uī Chú só͘ thiàⁿ--ê, sī lán jîn-luī; só͘-í tek-khak ēng siong-tong ê koán-kàu(管教) kap tok-chek, chóng-sī lán m̄-thang khoàⁿ-khin, m̄-thang sit-chì(Hi 12:5─8).
- Sèng-keng sī hō͘ lâng kui-chèng ê Kng.
Jîn-seng nā sió-khoá bô kín-sīn, chiū ta̍h-ji̍p bê-lō͘. Ū-sî m̄-nā sin-pāi miâ-li̍h(身敗名裂), sīm-chì liân-luī kàu sit-lo̍h sèⁿ-miā, che sī hô-téng ê guî-hiám leh! Pêng-iú ah! Sèng-keng ē chí-tō lí kiâⁿ só͘ tio̍h kiâⁿ ê lō͘(Si 32:8).
- Sèng-keng ê ín-chhoā lâng o̍h gī-lí.
“Kiàn-gī ióng uî”(見義勇為); che sī Sèng-jîn teh kà-sī lâng o̍h gī-lí ê hong-hoat. Chiū-sī khò ka-tī ê la̍t. Sèng-keng beh ín-chhoā lâng o̍h gī-lí sī tio̍h oá-khò Sîn ê lêng-le̍k. Lâng ê la̍t iú-hān, Sîn ê lêng-le̍k bô kiông-chīn. Só͘-í Sèng-keng kà-sī lâng o̍h gī-lí ê lêng-le̍k sī poâⁿ-koè kó͘-kim it-chhè ê lêng-le̍k.
- Sèng-keng sī chò jîn-luī ta̍k lâng ê lī-ek.
Chit pún Sèng-keng, bô sî-kan ê chè-hān, ha̍p tī kó͘-kim í-kim bān-kok ê jîn-luī(Sài 48:17,18). Hō͘ lâng tuì sìn Siōng-tè, tì-ì chò chiah ê hó ê sū-gia̍p(Thê-to 3:8).
- Sèng-keng ē oân-choân lí ê jîn-keh.
Kìⁿ-nā chhin-kīn Siōng-tè ê lâng, bô m̄ kín-sīn pó-siú chū-kí ê jîn-keh. ài lī-khui it-chhè ê choē-ok, chò oân-choân ê lâng. In-uī lâng kì-jiân sî-siông tha̍k Sèng-keng, chiū ē chun-siú Siōng-tè ê oē, it-chhè ê châi-lī kap chhì-iú, lóng bē-ē iô-tāng--i; án-ni i ê jîn-keh, chū-jiân toà tī oân-choân ê tē-uī lah!(2 Sat-bó-jíⁿ 22:31─34).
- Sèng-keng ê kám-hoà lâng chīn-la̍t tī chò hó-sū.
Siōng-tè ê oē, ē thang hō͘ lâng ti̍t-ti̍t siⁿ-chhut ài chò hó ê sim, ha̍k-si̍p khui-khoah khì kiâⁿ hó-sū. M̄-nā án-ni, ē hō͘ lâng tui-kiû kong-gī, chín-kiù siū ap-pek ê ko͘-jî koáⁿ-hū; hō͘ put pêng-téng ê siā-hoē, si-hêng kong-lí ê chè-chhâi. In-uī lâng chhut-la̍t ta̍k ji̍t tha̍k Sèng-keng, Siōng-tè tek-khak ē siúⁿ-sù i sin ê tì-huī, pang-chān i ná ū khuì-la̍t thang kiâⁿ hó-sū, kui êng-kng Siōng-tè. Tio̍h ē kì-tit: Jîn-seng ê bo̍k-tek, chiū-sī êng-kng Siōng-tè.
Kiat-lūn. Sèng-keng sī ū oa̍h-miā tī-teh, lán m̄-thang bô ēng khiam-pi ê sim lâi tha̍k. Tī Bí-kok Chi-ka-ko ê ke-chhī, ū chi̍t pái, ū chi̍t ê phiau-pún-ka(標本家) tuì chi̍t khám phiau-pún-tiàm keng-koè. I khoàⁿ só͘ pâi-lia̍t ê phiau-pún, bô-lūn poe-khîm cháu-siù, lóng chò khì chin sêng, chin hó. Chí-ū kî-tiong ū chi̍t chiah niau-thâu-eng, i khoàⁿ-liáu bô moá-ì, chiū khiā tī hia teh phoe-phêng hit chiah niau-thâu-eng ê thâu oai-oai, mn̂g bô chê-cháⁿ, kha iā bô tàu-tah; bô phah-sǹg hit chiah niau-thâu-eng tng i teh phoe-phêng ê sî, i ēng i ê ba̍k-chiu kā khoàⁿ chi̍t-ē, i chiah chai hit chiah niau-thâu-eng sī oa̍h--ê, m̄-sī ēng lâng ê khuì-la̍t chè-chō--ê. Lán teh tha̍k Sèng-keng iā sī án-ni, sui-jiân ēng lán ê ba̍k-chiu kā khoàⁿ, chhin-chhiūⁿ ū chē-chē khoat-tiám; chóng-sī Sèng-keng sī Siōng-tè ê oē,sī ū oa̍h-miā tī-teh, lán m̄-thang ēng khoàⁿ phó͘-thong chheh ê gán-kong khì tha̍k--i.
Kî-tó: Kám-siā Pē Siōng-tè, ēng chiâⁿ-chò jio̍k-thé ê Tō siúⁿ-sù goán, uī-tio̍h goán siū sí, lâi kiù goán. iū-koh ēng chiâⁿ-chò keng-tián ê Tō siúⁿ-sù goán, uī-tio̍h goán pó-chûn, chò goán kha-chêng ê teng, lō͘-nih ê kng, oa̍h-miā ê bí-niû, thâi-sí tuì-te̍k ê kiàm. Kiû Chú ê Sîn ūn-hêng tī goán ê sim-lāi, hō͘ goán ū suí-suí ê chì-hiòng, soà chiàu án-ni lâi si̍t-hêng. Só͘ kiû lóng sī hōng Chú ê miâ. Amen.
漢羅（Ùi原文改寫）
讀聖經的運動週
1937年12月633期 2-3
每年12月第一主日，就是世界公訂的聖經記念禮拜日。佇這日，大會有決議著舉行聖冊記念禮拜，佮獻金做寄付聖冊公會的路用。世界的腔口有5千款；聖經有用991款的腔口譯--伊。鄙人咧想，佇本週著做眾信徒讀聖經的運動週。至少著立志欲一年讀聖經一遍。抑是特別鼓舞會友閣出力來研究聖經的總大意。對主日學學生，送in聖經來獎勵in讀聖經。試想一本聖冊有甚物價值通予咱不時讀--伊，永遠記念--伊？
- 聖經攏是上帝所啟示。
聖經全部有66本：舊約39，新約27。著作的先生3、4十人：歷過的時間有千外年。寫的人，出身佮背景攏無相同。總是精神，始終一貫。這攏是有一位上帝咧啟示遐的寫的先生。啊！莫怪這本聖冊感化世間人的能力遐爾偉大！！！實在有不可思議，無限量的價值佇咧。
- 聖經有教示督責的方法。
「上帝的道，是活--的，有功效--的……」(希4：12)。滿滿有靈力佇咧。咱攏是上帝的囝兒，著摒空虛心接納聖經的教示，謙卑承受聖經的督責。因為主所疼--的，是咱人類；所以的確用相當的管教佮督責，總是咱毋通看輕，毋通失志(希12：5─8)。
- 聖經是予人歸正的光。
人生若小可無謹慎，就踏入迷路。有時毋但身敗名裂，甚至連累到失落性命，這是何等的危險咧！朋友啊！聖經會指導你行所著行的路(詩32：8)。
- 聖經的引chhoā人學義理。
「見義勇為」；這是聖人咧教示人學義理的方法。就是靠家己的力。聖經欲引chhoā人學義理是著倚靠神的能力。人的力有限，神的能力無窮盡。所以聖經教示人學義理的能力是盤過古今一切的能力。
- 聖經是做人類逐人的利益。
這本聖經，無時間的制限，合佇古今以今萬國的人類(賽48：17，18)。予人對信上帝，致意做遮的好的事業(提多3：8)。
- 聖經會完全你的人格。
見若親近上帝的人，無毋謹慎保守自己的人格。愛離開一切的罪惡，做完全的人。因為人既然時常讀聖經，就會遵守上帝的話，一切的財利佮試誘，攏袂會搖動--伊；按呢伊的人格，自然蹛佇完全的地位啦！(2撒母耳22：31─34)。
- 聖經的感化人盡力佇做好事。
上帝的話，會通予人直直生出愛做好的心，學習開闊去行好事。毋但按呢，會予人追求公義，拯救受壓迫的孤兒寡婦；予不平等的社會，施行公理的制裁。因為人出力逐日讀聖經，上帝的確會賞賜伊新的智慧，幫贊伊那有氣力通行好事，歸榮光上帝。著會記得：人生的目的，就是榮光上帝。
結論。聖經是有活命佇咧，咱毋通無用謙卑的心來讀。佇美國Chi-ka-ko的街市，有一擺，有一个標本家對一坎標本店經過。伊看所排列的標本，無論飛禽走獸，攏做去真成，真好。只有其中有一隻貓頭鷹，伊看了無滿意，就徛佇遐咧批評彼隻貓頭鷹的頭歪歪，毛無齊cháⁿ，跤也無鬥tah；無拍算彼隻貓頭鷹當伊咧批評的時，伊用伊的目睭共看一下，伊才知彼隻貓頭鷹是活--的，毋是用人的氣力製造--的。咱咧讀聖經也是按呢，雖然用咱的目睭共看，親像有濟濟缺點；總是聖經是上帝的話，是有活命佇咧，咱毋通用看普通冊的眼光去讀--伊。
祈禱：感謝爸上帝，用成做肉體的道賞賜阮，為著阮受死，來救阮。又閣用成做經典的道賞賜阮，為著阮保存，做阮跤前的燈，路裡的光，活命的米糧，刣死對敵的劍。求主的神運行佇阮的心內，予阮有媠媠的志向，紲照按呢來實行。所求攏是奉主的名。Amen。