主日學聲
Chú-ji̍t-o̍h Siaⁿ
文獻資訊
| 項目 | 資料 |
|---|---|
| 作者 | 黃俟命 N̂g Sū-bēng |
| 卷期 | 台灣教會公報 |
| 卷期 | 第633號 |
| 日期 | 1937/12 |
| 頁數 | 8 |
白話字（原文數位化）
Chú-ji̍t-o̍h Siaⁿ
1937年12月633期 8
Tâng tio̍h-boâ tī Chú-ji̍t-o̍h ê hiaⁿ-tī chí-moāi pêng-an.
Lâm-pō͘ Tāi-hoē siông-siông siàu-liām lín lia̍t-uī tī ta̍k só͘-chāi, nî, goe̍h, lé-pài koè lé-pài, put-hiu teh chò-kang, thok Chú-ji̍t-o̍h Pō͘-hoē lâi chò lín ê pêng-iú, lâi pang-chān lín. Khó-sioh chiah ê Pō͘-hoē-oân ham-bān, tuì lín bē thang kòng-hiàn sím-mi̍h , chóng-sī goán thé Tāi-hoē ê ì-sù, siàu-liām lín put-hiu ê kang-chok. Siông-siông thè lín kî-tó, goān Chú si-in chān lín, hō͘ lín tī lâu ba̍k-sái ê iā-chéng, tit-tio̍h hoaⁿ-hí ê siu-sêng.
Tī 10 goe̍h hō Kong-pò teh phêng-lūn Chú-ji̍t-o̍h ê sū, chē-chē iú-sim tī Chú-ji̍t-o̍h ê lâng, tha̍k-liáu thó͘-khuì loé-chì, giâu-gî só͘ chò ê kang. Goán Pō͘-hoē ê ū chū-chi̍p gián-kiù chit ê būn-tê, kàu boé chiū chai hit ê kì-chiá sī khoàⁿ chheh tha̍k pa̍t só͘-chāi ê kám-sióng, soà khioh lâi kóng lán Tâi-oân ê sū.
Chhiáⁿ lín m̄-thang uī-tio̍h án-ni chò that-gāi: (1) Ū lī-ek. Sui-jiân lán hiān-sî bô hit hō sū , iáu-kú sī chhin-chhiūⁿ sio̍k-gú kóng, Chiân-ki kì-hok, hō͘-ki tong kàm(chêng tiuⁿ chhia poa̍h-tó, āu tiuⁿ chhia tio̍h chù-ì). (2) Bián sit-chì; goán Pō͘-hoē ū siông-sè kiám-thó, chiàu Pō͘-hoē ê sêng-jīn, hiān-sî lán bô hām-ji̍p tī siâ-tō(邪道), chóng-sī siâ-tō(邪道) sī chin lī-hāi, tek-khak m̄-thang chi̍t-sut-á iông-ún.
In-uī chē-chē lâng tuì khoàⁿ hit ê pò teh thó͘-khuì, sim kan-khó͘. Só͘-í goán Pō͘-hoē chhut-thâu siá chiah ê tuì lín lia̍t-uī seng-bêng, bāng lín pêng-an, sim koh ti̍t-ti̍t chìn-chêng chò Chú ê kang.
Lám Tāi Chú-ji̍t-o̍h Pō͘-hoē:
Pō͘-tiúⁿ : N̂g Sū-bēng,
Su-kì: Lîm Chiàu, khé.
漢羅（Ùi原文改寫）
主日學聲
1937年12月633期 8
同著磨佇主日學的兄弟姊妹平安。
南部大會常常數念恁列位佇逐所在，年，月，禮拜過禮拜，不休咧做工，託主日學部會來做恁的朋友，來幫贊恁。可惜遮的部會員頇顢，對恁袂通貢獻甚物，總是阮體大會的意思，數念恁不休的工作。常常替恁祈禱，願主施恩贊恁，予恁佇流目屎的掖種，得著歡喜的收成。
佇10月號公報咧評論主日學的事，濟濟有心佇主日學的人，讀了吐氣餒志，僥疑所做的工。阮部會的有聚集研究這个問題，到尾就知彼个記者是看冊讀別所在的感想，紲抾來講咱台灣的事。
請恁毋通為著按呢做窒礙：(1)有利益。雖然咱現時無彼號事，猶過是親像俗語講，前車既覆，後車當鑑 (前張車跋倒，後張車著注意)。(2)免失志；阮部會有詳細檢討，照部會的承認，現時咱無陷入佇邪道，總是邪道是真厲害，的確毋通一屑仔容允。
因為濟濟人對看彼个報咧吐氣，心艱苦。所以阮部會出頭寫遮的對恁列位聲明，望恁平安，心閣直直進前做主的工。
南大主日學部會：
部長：黃俟命，
書記：林昭， 啟。