路得記的研究
Lō͘-tek-kì ê Gián-kiù
文獻資訊
| 項目 | 資料 |
|---|---|
| 作者 | 雪峰逸嵐 Soat-hong Iat-lâm |
| 卷期 | 台灣教會公報 |
| 卷期 | 第632號 |
| 日期 | 1937/11 |
| 頁數 | 19-21 |
白話字（原文數位化）
Lō͘-tek-kì ê Gián-kiù
Soat-hong ia̍t-lâm
(Chiap 10 goe̍h tē 10 bīn)
1937年11月632期 19-21
2 chat: “Pho-a-su kiám m̄-sī lán ê kai-chhin mah? i kim-mî poà toā-be̍h tī gō͘-kak-tiûⁿ.” Lán beh chhoā lâng kui Chú, tio̍h jīn-bat toā koân-lêng ê chin sîn. Ná-o-bí kóng, “I sī lán ê kai-chhin”. Chiàu Iû-thài hong-sio̍k, nā beh sio̍k-hoê sán-gia̍p--ê, tio̍h chì-chhin chiah ē choè--tit(Lī-bī-kì 25:25). Lán ê Chú Iâ-so͘ chhut-sì tī lu̍t-hoat-ē(Ka-lia̍p-thài 4:4), lâi chiâⁿ-choè lán ê hiaⁿ-tī(Hi-pek-lâi 2:11), lán ū jio̍k-thé, Iâ-so͘ iā chiâⁿ-chò jio̍k-thé(Hi-pek-lâi 2:14), koh chiâⁿ-chò ū choē ê jio̍k-thé ê hêng-chōng(Lô-má 8:3), án-ni chiū chiâⁿ-chò lán chì-kīn ê chhin-chhek. Só͘-í chiah ū koân-lī thang chò lán ê kiù-sio̍k chiá, “I kim-mî poà toā-be̍h tī gō͘-kak-tiûⁿ”. Lán khoàⁿ Pho-a-su sui-sī toā hó-gia̍h-lâng, iáu-kú chin khîn-kín, pún-sin chò tāi-chì, chá-khí-sî kàu siâⁿ-mn̂g kháu, sī teh pān kong-àn, poàⁿ tàu kàu hn̂g-nih sûn-sī siu-koah ê kang; àm-sî chiū kàu gō͘-kak-tiûⁿ poà gō͘-kak, sui-jiân chun-kuì, iáu-kú mî-ji̍t khîn-kín chò kang; lán ê Chú Iâ-so͘ iā sī mê-ji̍t bô thêng, lâi chò kiù-sio̍k ê kang. Só͘-í Iâ-so͘ sī lán ê chin Sîn, ū chu-keh, ū koân-lêng thang sio̍k-hoê--lán.
Lán kap Chú kau-poê, ji̍t-sî tī khòng-iá chò-kang, iáu-kú sī tī lán ê sim-goā, boē chìn-ji̍p lán ê sim-lāi, Chú ài lán ê-hng-sî(=an-chēng ê sî) kap i kau-poê, Chú nā ji̍p lán ê sim-lāi chiū chin hó lah.
3,4 chat: “Lí tio̍h sé seng-khu, boah iû, oāⁿ-saⁿ……i beh kā lí kóng só͘ tio̍h kiâⁿ--ê”. Lâng beh tiàm tī Chú; hō͘ Chú lâi tiàm lán ê sim-lāi, tio̍h ū siong-tong ê ū-pī, tī chit chām ū kóng chhit hāng ê ū-pī, chiū-sī oân-choân ê ū-pī(chhit, chiū-sī oân-choân). Ū saⁿ hāng chong-sek-siōng ê ū-pī, chiū-sī(1) Sé seng-khu.(2) Boah-iû.(3) Oāⁿ-saⁿ. iā ū sì-hāng chhiú-sio̍k ê ū-pī, chiū-sī(4) Lo̍h-khì kàu gō͘-kak-tiûⁿ.(5) M̄-thang hō͘ hit lâng jīn-tio̍h lí.(6) Chim-chiok khoàⁿ i tó ê uī(7) Tó tī i ê kha-boé. Ná-o-bí kà Lō͘-tek chit chhit pō͘ ê chún-pī, chit 7 chéng pì-bi̍t ê Lêng-kau, m̄-sī sio̍k-sè ê lâng só͘ ē chai ê sū. Chhiáⁿ lán sió-sim chi̍t-pō͘ chi̍t-pō͘ lâi gián-kiù.
(1) Sé seng-khu: Chiū-sī sé-tû lóng-chóng ê ù-oè. Lō͘-tek beh chiū-kīn Pho-a-su tio̍h sé seng-khu, lán beh chhin-kīn Chú, iā tio̍h tī Tâng-phûn-lāi(Sèng-só͘ mn̂g-kháu ê tâng-phûn) sé-tû lóng-chóng ê ù-oè, chiū-sī tī Chú ê pó-hoeh ê lāi-bīn, sé-tû lán lóng-chóng ê choē-ok kap put-gī(I Iok-hān 1:9). Goá siūⁿ Lō͘-tek hiah sàn-hiong, bô hoa-lō͘-chuí thang hiù, sī si̍t-chāi sé kàu chheng-khì, m̄-sī khang-khak ê goā-phoê nā-tiāⁿ, lán iā tio̍h si̍t-chāi chheng-khì lán ê sim.
(2) Boah-iû: Iû, sī chí Sèng Sîn, “Lín tuì Sèng--ê siū boah-iû, chiū ē chai it-chhè ê sū”(I Iok-hān 2:20). Iâ-so͘ iā bat siū Sèng Sîn ê boah-iû kóng, “Chú ê Sîn lîm-kàu goá, I ēng iû boah goá”(Lō͘-ka 4:18). Lán beh kàu Chú ê bīn-chêng, m̄-nā sé-chheng choē-ok chiū kàu-gia̍h, iā tio̍h siū Sèng Sîn ê chhiong-moá, chiū-sī siū Sèng Sîn ê iû boah. Chhin-ài ê hiaⁿ-tī chí-moē! Lí ài chhin-kīn Chú mah? tio̍h siū Chú ê pó-hoeh sé-chheng choē-ok, iā tio̍h siū Sèng Sîn ê chhiong-moá. Koh lo̍h-khì chiū-sī.
(3) Oāⁿ-saⁿ: Oāⁿ-saⁿ, chiū-sī chí khì kū oāⁿ-sin, thǹg khì kū ê lâng, chhēng sin ê lêng. Lōng-tōng-chú tò-lâi ê sî, iā sī thǹg khì khit-chia̍h saⁿ, chhēng sin saⁿ; lán pêng-siông hō͘ sè-kài ê ok-chhok, ù-oè só͘ thoân-jiám, nā bô chhin-chhiūⁿ Iok-su-a thǹg khì ù-oè ê i-ho̍k, chhēng suí koh kng-bêng ê i-ho̍k(Sat-ka-lī-a 3:4). Beh cháiⁿ-iūⁿ kàu Chú ê bīn-chêng nih? Só͘-í lán beh chhin-kīn Chú, tāi-seng tio̍h ū chit saⁿ-pō͘. Lán koh lâi siūⁿ, Lō͘-tek sui-jiân sī oāⁿ sin-saⁿ, sui-sī thé-biān; chóng-sī thang siūⁿ-chhut m̄-sī sím-mi̍h tiû-toān, á-sī kuì-khì ê pò͘-liāu, sī chho͘, sī kāu, iā m̄-sī hiān-tāi mô͘-teng-hoà ê kî-phàu, sī khoah-sin koh toā-niá, kiám-chhái kap i ê seng-khu iā bô sù-phoè, nā m̄-sī án-ni, tek-khak bē thang pau la̍k pùn-ki ê toā-be̍h, koh poē ji̍p-siâⁿ. Thang chai Ki-tok-tô͘ tī Chú ê bīn-chêng, kan-ta kiû hō͘ Chú hoaⁿ-hí, m̄-sī kiû hō͘ sè-kan hoaⁿ-hí, só͘-í chhēng-chhah koat-toàn m̄-thang thàn sè-kài tiau-liû. Koh siūⁿ kó͘-chá Mô͘-se kā chè-si kiâⁿ hōng-hiàn lé, iā sī kà in sé seng-khu, boah-iû, oāⁿ-saⁿ. Só͘-í lán beh hōng-hiàn hō͘ Chú, iā tio̍h hoán-hoé ké-pìⁿ, têng-thâu-siⁿ(=sé seng-khu), siū Sèng Sîn chhiong-moá(=boan-iû), koh tio̍h chiâⁿ-sèng(=oāⁿ-saⁿ), chiàu án-ni chún-pī, bē thang ló-chhó--tit. Téng-bīn chiah-ê sī koan-hē goā-hêng ê chún-pī; ē-bīn sì hāng sī koan-hē chhiú-sio̍k ê chún-pī.
(4) Lo̍h-khì kàu gō͘-kak-tiûⁿ: Tī Sèng-keng lāi só͘ kì ê gō͘-kak-tiûⁿ, ū kuí-nā uī chhù-bī ê gián-kiù, iā ū le̍k-sú-siōng ê tiōng-iàu: (甲) A-ta̍t ê gō͘-kak-tiûⁿ, sī Í-sek-lia̍t chèng kiáⁿ khàu Ngá-kok ê só͘-chāi, che piáu-bêng gō͘-kak-tiûⁿ, sī uī choē pi-ai ê só͘-chāi (Chhòng 50:10). (乙) Ki-tiân hē iûⁿ-mn̂g ê gō͘-kak-tiûⁿ, chia sī piáu-bêng kiû Siōng-tè chí-sī ê só͘-chāi(Sū-su 6:37). (丙) Ná-kùn ê gō͘-kak-tiûⁿ, che sī kà lán tī Siōng-tè ê bēng-lēng, lóng m̄-thang uî-ke̍h (II Sat 6:6). (丁) A-lô-ná ê gō͘-kak-tiûⁿ: chiū-sī Tāi-pi̍t sit-pāi, ēng chîⁿ bé lâi khí chè-toâⁿ ê só͘-chāi, Siōng-tè tī-chia tuì Tāi-pi̍t chhut-hiān(II Sat 24;16,17). (戊) O-jíⁿ-lân ê gō͘-kak-tiûⁿ; Só͘-lô-bûn khí tiān ê só͘-chāi, iā sī A-lô-ná ê gō͘-kak-tiûⁿ(II Le̍k-tāi 3:1), iā sī A-pek-la̍h-hán beh thâi kiáⁿ hiàn-chè ê só͘-chāi (Chhòng 22:2). Chin kî-biāu! Chiàu án-ni gián-kiù gō͘-kak-tiûⁿ, chiâⁿ-chò(1) uī choē pi-ai, (2) kiû Siōng-tè chí-sī,(3) ha̍k-si̍p Siōng-tè ê chí-sī, (4) Siōng-tè chhut-hiān, (5) kèng-pài Siōng-tè kap Chú kau-thong ê só͘-chāi. O-ló Chú! Lō͘-tek beh kàu chit ê gō͘-kak-tiûⁿ, iā sī beh kap Chú kau-poê ê só͘-chāi. Lán beh hōng-hiàn, iā tio̍h kàu Chú ê gō͘-kak-tiûⁿ(=chò kang) chiah ē thang kap Chú chiap-kīn.
(5) M̄-thang hō͘ hit lâng jīn-tio̍h lí: Chiū-sī chiām-sî ún-ba̍t lâi thèng-hāu Lī-pek-ka khoàⁿ Í-sat beh lâi gêng-chiap--i ê sî, chiū chiong phè tà bīn, bô hō͘ i chi̍t sî jīn chhut-lâi. Ki-tok boē chài-lim[sic.] ê í-chêng, Ki-tok ê sin-niû sī ún-ba̍t--ê, m̄-sī hián-bêng--ê. Tio̍h kàu Ki-tok tuì teh thèng-hāu I ê lâng hián-hiān ê sî, chiah ē thang hián-bêng chò Ki-tok ê sin-niû. Lō͘-tek chiām-sî ún-ba̍t thèng-hāu, kàu Pho-a-su chhéⁿ ê sî chiah hō͘ i jīn-tio̍h, iā sī chit ê ì-sù. Che sī sîn-pì ê sū. Goān chhin-ài ê hiaⁿ-tī chí-moē! Ta̍k-lâng tio̍h chún-pī thèng-hāu kàu Ki-tok chài-lîm, thang hō͘ I jīn-bat lán.
(6) Tio̍h chim-chiok khoàⁿ i tó ê só͘-chāi: kóng khah bêng, chiū-sī tio̍h kéng-séng thèng-hāu, che sī kà-sī lán kì-jiân sé seng-khu, oāⁿ-saⁿ, lo̍h gō͘-kak-tiûⁿ, chiū tio̍h kéng-séng thèng-hāu, jīn-bêng Chú ê só͘-chāi, lán ji̍p Chú ê an-hioh ê só͘-chāi, tio̍h seng jīn-bêng, thèng-hāu, jiân-āu chiah ê piān-piān thang ji̍p Chú ê an-hioh.
(7) Ji̍p khì hian i ê kha só͘ kah--ê, tó tī hia, i beh kà lí kóng só͘ tio̍h kiâⁿ--ê. Kàu chia chiū-sī oân-choân hōng-hiàn, khoàⁿ bô ka-tī, khiam-pi lâi khùn tī Chú ê kha-ē, chhin-chhiūⁿ Má-lī-a chē tī Iâ-so͘ ê kha-ē, lâi thiaⁿ Iâ-so͘ ê kà-sī, Ná-o-bí kóng, Lí tio̍h khì tó i ê kha-boé, chiū lí só͘ tio̍h kiâⁿ--ê, i beh kā lí kóng. Chhin-ài ê hiaⁿ-tī chí-moē! Lán ài kap Chú kiat-liân, iā tio̍h khiam-pi lâi kuī tī Chú ê kha-ē, beh kuī tī Chú ê kha-a[sic.], tio̍h seng pī-pān sim thèng-hāu, beh pī-pān sim tio̍h seng kàu gō͘-kak-tiûⁿ lâi kiû Siōng-tè ê chí-sī, chiah-ê ê í-chêng, iā tio̍h sé seng-khu, boah-iû, oāⁿ-saⁿ, chiah ê 7 pō͘ ê lêng-thêng, lán tio̍h chiàu án-ni lâi kiâⁿ, chhin-kīn Chú.
5 chat: “Lō͘-tek kóng, lí só͘ hoan-hù--ê, goá lóng beh kiâⁿ--i”. Ná-o-bí kā Lō͘-tek kóng chiah ê oē, kiám-chhái Lō͘-tek beh siūⁿ kóng, lāu-lâng lāu hoan-tian; pêng-sî hiah sè-jī, chím-moá kà goá chò chit hō kiàu[sic.]-siàu ê sū, goá nā beh án-ni, iā m̄-bián toè i lâi kàu chia lah. O-ló Chú!! Kai-chài Lō͘-tek lóng bô án-ni siūⁿ, i chai ta-ke só͘ kā i kóng sī bô chhò-gō͘--ê, hoân-sū sūn-ho̍k, lóng bô giâu-gî. Lán siū Sèng Sîn ê ín-chhoā hoān-sū thang an-sim, oân-choân kau-thok chû-ài sèng-kiat ê Sîn, it-bī hâng-ho̍k oá-khò I. Sî-sî tī lán ê khoân-kéng tiong, siông-siông hō͘ lán giâu-gî ê só͘-chāi, lóng bē bêng-pe̍k, hō͘ lán tú-tio̍h ge̍k-kéng, khùn-khó͘, sí-sit, hō͘ lán pi-ai, iu-chhiû, seⁿ-chhut chē-chē giâu-gî oh-tit kái-koat. Chhin-ài ê hiaⁿ-tī chí-moē!!Lán tio̍h it-bī sūn-ho̍k; hiān-sî sui-sī m̄-chai, kàu pa̍t-ji̍t chiū ē lóng chai chheng-chhó, nā kap lán ê Chú kìⁿ-bīn ê sî, it-chhè ê lân-tê, chiū lóng ê kái-koat lah. Só͘-í iā tio̍h tuì Chú kóng, “Chú ah! Lí só͘ hoan-hù ê, goá lóng beh kiâⁿ--i.”
漢羅（Ùi原文改寫）
路得記的研究
雪峰逸嵐
(接10月第10面)
1937年11月632期 19-21
2節：「波阿斯敢毋是咱的該親mah？伊今暝簸大麥佇五穀場。」咱欲chhoā人歸主，著認識大權能的真神。Ná-o-bí講，「伊是咱的該親」。照猶太風俗，若欲贖回產業--的，著至親才會做--得(利未記25：25)。咱的主耶穌出世佇律法下(加拉太4：4)，來成做咱的兄弟(希伯來2：11)，咱有肉體，耶穌也成做肉體(希伯來2：14)，閣成做有罪的肉體的形狀(羅馬8：3)，按呢就成做咱至近的親戚。所以才有權利通做咱的救贖者，「伊今暝簸大麥佇五穀場」。咱看波阿斯雖是大好額人，猶過真勤緊，本身做代誌，早起時到城門口，是咧辦公案，半晝到園裡巡視收割的工；暗時就到五穀場簸五穀，雖然尊貴，猶過暝日勤緊做工；咱的主耶穌也是暝日無停，來做救贖的工。所以耶穌是咱的真神，有資格，有權能通贖回--咱。
咱佮主交陪，日時佇曠野做工，猶過是佇咱的心外，未進入咱的心內，主愛咱ê昏時(=安靜的時)佮伊交陪，主若入咱的心內就真好啦。
3，4節：「你著洗身軀，抹油，換衫……伊欲共你講所著行--的」。人欲踮佇主；予主來踮咱的心內，著有相當的預備，佇這站有講七項的預備，就是完全的預備(七，就是完全)。有三項裝飾上的預備，就是(1)洗身軀。(2)抹油。(3)換衫。也有四項手續的預備，就是(4)落去到五穀場。(5)毋通予彼人認著你。(6)斟酌看伊倒的位(7)倒佇伊的跤尾。拿俄米教路得這七步的準備，這7種祕密的靈交，毋是屬世的人所會知的事。請咱小心一步一步來研究。
(1)洗身軀：就是洗除攏總的污穢。路得欲就近波阿斯著洗身軀，咱欲親近主，也著佇銅盆內(聖所門口的銅盆)洗除攏總的污穢，就是佇主的寶血的內面，洗除咱攏總的罪惡佮不義(I約翰1：9)。我想路得遐散凶，無花露水通hiù，是實在洗到清氣，毋是空殼的外皮nā-tiāⁿ，咱也著實在清氣咱的心。
(2)抹油：油，是指聖神，「恁對聖--的受抹油，就會知一切的事」(I約翰2：20)。耶穌也捌受聖神的抹油講，「主的神臨到我，伊用油抹我」(路加4：18)。咱欲到主的面前，毋但洗清罪惡就夠額，也著受聖神的充滿，就是受聖神的油抹。親愛的兄弟姊妹！你愛親近主mah？著受主的寶血洗清罪惡，也著受聖神的充滿。閣落去就是。
(3)換衫：換衫，就是指去舊換新，褪去舊的人，穿新的靈。浪盪子倒來的時，也是褪去乞食衫，穿新衫；咱平常予世界的惡chhok，污穢所傳染，若無親像約書亞褪去污穢的衣服，穿媠閣光明的衣服(撒迦利亞3：4)。欲怎樣到主的面前nih？所以咱欲親近主，代先著有這三步。咱閣來想，路得雖然是換新衫，雖是體面；總是通想出毋是甚物綢緞，抑是貴氣的布料，是粗，是厚，也毋是現代摩登化的旗袍，是闊身閣大領，檢采佮伊的身軀也無四配，若毋是按呢，的確袂通包六畚箕的大麥，閣背入城。通知基督徒佇主的面前，干焦求予主歡喜，毋是求予世間歡喜，所以穿插決斷毋通趁世界潮流。閣想古早摩西共祭司行奉獻禮，也是教in洗身軀，抹油，換衫。所以咱欲奉獻予主，也著反悔改變，重頭生(=洗身軀)，受聖神充滿(=boan-iû)，閣著成聖(=換衫)，照按呢準備，袂通潦草--得。頂面遮的是關係外形的準備；下面四項是關係手續的準備。
(4)落去到五穀場：佇聖經內所記的五穀場，有幾若位趣味的研究，也有歷史上的重要：(甲) 亞達的五穀場，是以色列眾囝哭雅各的所在，這表明五穀場，是為罪悲哀的所在(創50：10)。(乙) 基甸下羊毛的五穀場，遮是表明求上帝指示的所在(士師6：37)。(丙) 拿艮的五穀場，這是教咱佇上帝的命令，攏毋通違ke̍h (II 撒 6：6)。(丁) 亞勞拿的五穀場：就是Tāi-pi̍t失敗，用錢買來起祭壇的所在，上帝佇遮對Tāi-pi̍t出現(Ii Sat 24；16，17)。(戊) O-jíⁿ-lân的五穀場；所羅門起殿的所在，也是亞勞拿的五穀場(II歷代3：1)，也是亞伯拉罕欲刣囝獻祭的所在(創22：2)。真奇妙！照按呢研究五穀場，成做(1) 為罪悲哀，(2)求上帝指示，(3)學習上帝的指示，(4)上帝出現，(5)敬拜上帝佮主交通的所在。呵咾主！路得欲到這个五穀場，也是欲佮主交陪的所在。咱欲奉獻，也著到主的五穀場(=做工)才會通佮主接近。
(5)毋通予彼人認著你：就是暫時隱密來聽候利百加看以撒欲來迎接--伊的時，就將帕罩面，無予伊一時認出來。基督未再臨的以前，基督的新娘是穩密--的，毋是顯明--的。著到基督對咧聽候伊的人顯現的時，才會通顯明做基督的新娘。路得暫時隱密聽候，到波阿斯醒的時才予伊認著，也是這个意思。這是神秘的事。願親愛的兄弟姊妹！逐人著準備聽候到基督再臨，通予伊認識咱。
(6)著斟酌看伊倒的所在：講較明，就是著警醒聽候，這是教示咱既然洗身軀，換衫，落五穀場，就著警醒聽候，認明主的所在，咱入主的安歇的所在，著先認明，聽候，然後遮的便便通入主的安歇。
(7)入去掀伊的跤所蓋--的，倒佇遐，伊欲教你講所著行--的。到遮就是完全奉獻，看無家己，謙卑來睏佇主的跤下，親像馬利亞坐佇耶穌的跤下，來聽耶穌的教示，Ná-o-bí講，你著去倒伊的跤尾，就你所著行--的，伊欲共你講。親愛的兄弟姊妹！咱愛佮主結聯，也著謙卑來跪佇主的跤下，欲跪佇主的跤下，著先備辦心聽候，欲備辦心著先到五穀場來求上帝的指示，遮的的以前，也著洗身軀，抹油，換衫，遮的7步的靈程，咱著照按呢來行，親近主。
5節：「路得講，你所吩咐--的，我攏欲行--伊」。拿俄米共路德講遮的話，檢采路得欲想講，老人老番顛；平時遐細膩，這滿教我做這號見笑的事，我若欲按呢，也毋免綴伊來到遮啦。呵咾主！！佳哉路得攏無按呢想，伊知大家所共伊講是無錯誤--的，凡事順服，攏無僥疑。咱受聖神的引chhoā凡事通安心，完全交託慈愛聖潔的神，一味降服倚靠伊。時時佇咱的環境中，常常予咱僥疑的所在，攏袂明白，予咱拄著逆境，困苦，死失，予咱悲哀，憂愁，生出濟濟僥疑僫得解決。親愛的兄弟姊妹！！咱著一味順服；現時雖是毋知，到別日就會攏知清楚，若佮咱的主見面的時，一切的難題，就攏的解決啦。所以也著對主講，「主啊！你所吩咐的，我攏欲行--伊。」