言語的修養
Giân-gú ê siu-ióng
文獻資訊
| 項目 | 資料 |
|---|---|
| 作者 | 陳添旺 Tân Thiam-ōng |
| 卷期 | 台灣教會公報 |
| 卷期 | 第632號 |
| 日期 | 1937/11 |
| 頁數 | 29 |
白話字（原文數位化）
Giân-gú ê siu-ióng
Tân Thiam-ōng
1937年11月632期 29
Lán Ki-tok-kàu sī chong-kàu chiūⁿ ko-siōng ê chong-kàu, só͘-í tuì tī siu-ióng ê būn-toê, koh-khah iàu-kín m̄-thang chhin-chhiūⁿ pa̍t khoán bô siu-ióng.
Giân-gú ê siu-ióng. Ngá-kok kóng, Tī kóng-oē nā bô poa̍h-tó, sī choè ta̍k-hāng chiâu-pī ê lâng(3:2). Che sī chin iàu-kín, sî-siông thiaⁿ-tio̍h hoē-iú kóng-oē oan-oan khiau-khiau bô chèng-ti̍t. Khó͘-sī sim-hui, ū-ê pháiⁿ-chhuì, pē thâu bú-kut teh mā, ū-ê choè Tiúⁿ-ló Chip-sū mā-sī án-ni, tì-kàu siū-khì ê sî mā-mā chhut-lâi. Lòng-phoà toā sū pí hoē-goā iáu khah hāi, só͘-í tuì chit hāng chin ài chù-ì.
Hū-jîn-lâng ēng loé, ēng chiù-chó͘; tuì pa̍t-lâng, tuì kiáⁿ-jî mā-sī án-ni loé. Ū-sî tuì hoē-lāi hoē-goā, nā siū-khì chho͘-chhuì iá-táu, hō͘ lâng chin kan-khó͘; iā sî-siông hāi toā sū, bô siu-soaⁿ ê ji̍t. Só͘-í chhuì-chi̍h chhin-chhiūⁿ hé, oē tì-kàu sio-chhù, sio-soaⁿ, m̄-thang bô kéng-kài.
Tuì ka-têng ê bô͘-hoān, hó-pháiⁿ lóng ū in bô͘-hoān, sī toā-lâng nā soè-jī choan ēng hó oē lâi kóng, chiū in ke-lāi ê kiáⁿ-jî, sûn chuī[sic.] bô pháiⁿ oē thang thiaⁿ, thang o̍h. In-uī gín-ná ê hóng-hāu-sèng, ho͘N3-ki[sic.]-sim kài bín-chia̍t; thiaⁿ-tio̍h, khoàⁿ-tio̍h chiū ài o̍h, ài mn̄g. Ū-sî khì goā-bīn o̍h-tio̍h pháiⁿ-oē tńg-lâi, kín kā i chhiâu-chiàⁿ, soat-bêng hō͘ i chai m̄-tio̍h, āu-pái chiū oē kái-khì.
Kài koan-hē ê só͘-chāi, chiū-sī toā-lâng ka-kī sám-mā sám-kóng, tì-kàu boē kà sī-soè hun hó-pháiⁿ.
Chhin-chhiūⁿ mô͘-hē-bú kiâⁿ lō͘ sī thán-hoâiⁿ, chiū i ê kiáⁿ mā-sī án-ni. Só͘-í tuì tī siu-ióng ê só͘-chāi ài sió-sim chù-ì; nā bô, lóng oē hut-lio̍k-khì.
Lán tit-tio̍h hó ê chong-kàu nā boē siu-ióng, kap pa̍t-lâng chiū bô hun-pia̍t; nā si̍t-chāi ū siu-ióng, chiū lâng it-hoat oē chai tō-lí ê hó kà-sī.
漢羅（Ùi原文改寫）
言語的修養
陳添旺
1937年11月632期 29
咱基督教是宗教上高尚的宗教，所以對佇修養的問題，閣較要緊毋通親像別款無修養。
言語的修養。雅各講，佇講話若無跋倒，是最逐項齊備的人(3：2)。這是真要緊，時常聽著會友講話彎彎曲曲無正直。口是心非，有的歹喙，爸頭母骨咧罵，有的做長老執事嘛是按呢，致到受氣的時罵罵出來。挵破大事比會外猶較害，所以對這項真愛注意。
婦人人用詈，用咒詛；對別人，對囝兒嘛是按呢詈。有時對會內會外，若受氣粗喙iá-táu，予人真艱苦；也時常害大事，無收山的日。所以喙舌親像火，會致到燒厝，燒山，毋通無警戒。
對家庭的模範，好歹攏有in模範，是大人若細膩專用好話來講，就in家內的囝兒，純粹無歹話通聽，通學。因為囡仔的倣效性，好奇心蓋敏捷；聽著，看著就愛學，愛問。有時去外面學著歹話轉來，緊共伊撨正，說明予伊知毋著，後擺就會改去。
蓋關係的所在，就是大人家己糝罵糝講，致到袂教序細分好歹。
親像毛蟹母行路是坦橫，就伊的囝嘛是按呢。所以對佇修養的所在愛小心注意；若無，攏會忽略-去。
咱得著好的宗教若袂修養，佮別人就無分別；若實在有修養，就人益發會知道理的好教示。