世界一週
Sè-kài It-chiu
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第632號 |
| 日期 | 1937/11 |
| 頁數 | 7 |
白話字（原文數位化）
Sè-kài It-chiu
1937年11月632期 7
-
Chiàu choè-kīn Kok-chè liân-bêng thóng-kè-kio̍k ê tiāu-cha: Sè-kài chóng-jîn-kháu ū 20 ek; nî-nî ke-thiⁿ ū 1800 bān.
-
Sè-kan ê Thian-kok. Tī Bí-kokテキサスchiu, kiò-chò キーンê hiuⁿ-siā, chí-ū 6 pah goā lâng khiā-khí. Tī-hia m̄-bat ū chi̍t ê hoān-lâng, chū-jiân bô hêng-bū-só͘, iā bô chhâi-phoàⁿ-koaⁿ. Bô toā hó-gia̍h lâng, iā bô sàn-hiong lâng. Bô chu pún-ka kap lô-tōng-chiá ê tò͘-cheng. Bô hó-gia̍h kap sàn-hiong ê khī-khek. In bô chia̍h-bah, bô chia̍h hun kap chiú. It-chhè ko-phi[sic.] âng-tê ê chhì-kek ê chia̍h-mi̍h lóng bô ēng.Bô ū poa̍h-kiáu, á-sī sio̍k poa̍h-kiáu tàu su-iâⁿ hit hō. iā bô ūn-tōng-hoē. In ê gû-lo̍k, sī tha̍k ko-siōng ê chheh, kap thiaⁿ hó ê im-ga̍k. In kui siā lóng sī saⁿ-hô, saⁿ-thiàⁿ sìn Chú jia̍t-sim ê Ki-tok-tô͘.
-
Choè-kīn hoat-piáu tī Bí-kok ê oē-seng kong-pò kóng: Lâng it-seng tē-it an-choân ê sî-kî, sī 11 hoè. In-uī sī koè-liáu Iù-liân guî-hiám-kî(幼年危險期)ê nî-hoè; iā sī ji̍p tī sêng-liân(成年) guî-hiám kî ê chìn-chêng. Só͘-í chit ê kî-kan pēⁿ sí--ê ke̍k chió.
-
Tē-it tāi-seng hoat-kiàn-tio̍h Thn̂g(砂糖), sī Chú-chêng 300 nî ベンカルtē-hng ê chi̍t ê ìn-tō͘ lâng. Pe̍h-chéng lâng khí-thâu kā kiò-chò ìn-tō͘-iâm.
-
Ji̍t-pún kok, Chiau-hô 8 nî tō͘ ê tiau-cha, hoān-tio̍h hì kiat-hu̍t lâi sí--ê, ū 12 bān 6 chheng 7 pah liân 3 miâ. Tī kok-lāi chí-ū siat 46 uī ê kiān-khong siong-tâm-só͘(健康相談所). Kiat-hu̍t hoān-chiá choan-mn̂g liâu-ióng-só͘(療養所), chiah ū chi̍t-bān chi̍t-chheng 7 pah 27 tiuⁿ bîn-chhn̂g nā-tiāⁿ.
-
Sè-kài ê khiuⁿ-kháu ū 5 chheng khoán; lán ê Sèng-chheh ū hoan-e̍k 991 khoán ê khiuⁿ-kháu.
-
Lán lâng ê uī(胃袋), nā chhòng hō͘ i phòng siāng toā, sī chhin-chhiūⁿ that kha-kiû hit khoán kiû(フートホール)ê toā; nā hō͘ i kiu kàu siāng sè, sī chhin-chhiūⁿ toā-ku-bó toā án-ni.
-
Be̍k-se-ko hiān-sî ê Tāi-thóng-léng カーゲナス, choè-kīn ū giâm-giâm bēng-lēng thong-kok ê peh-sìⁿ muí lé-pài, 3 ji̍t kú kiò-chò “Bô chiú ji̍t”, choa̍t-tuì hoè-chí アルコールsèng ê chia̍h-mi̍h.
-
bûn-bêng kok ê lâng, 100 lâng lâng, 80 lâng ê chhuì-khí sī chiù-khí liáu-liáu.
-
Lō͘-se-a, tī tē-hng só͘ siat 5 uī hoán-tuì chong-kàu ê Phok-bu̍t-koán; ū hō͘ chèng-hú Kàu-io̍k uí-oân kā koaiⁿ--khí-lâi.
-
バストールkóng, “Kho-ha̍k bô kok-kéng(國境), chóng-sī kho-ha̍k-chiá ū i ê pún-kok”.
San-pún (山本) Phok-sū kóng, “Ki-tok-kàu bô kok-kéng, chóng-sī Ki-tok-tô͘ ū i ê pún-kok.”
- Sèng-chheh kong-hoē pò-kò, 1936 nî tō͘ ū bē chhut Sin Kū-iok choân-su 7,6740 pún; Sin-iok choân-su 8,7417 pún; toaⁿ-pún ê hok-im-toān 902 bān 6 chheng pún.
漢羅（Ùi原文改寫）
世界一周
1937年11月632期 7
-
照最近國際聯盟統計局的調查：世界總人口有20億；年年加添有1800萬。
-
世間的天國。佇美國テキサス州，叫做キーン的鄉社，只有6百外人徛起。佇遐毋捌有一个犯人，自然無刑務所，也無裁判官。無大好額人，也無散凶人。無資本家佮勞動者的鬥爭。無好額佮散凶的忌剋，in無食肉，無食薰佮酒。一切咖啡紅茶的刺激的食物攏無用。無有跋筊，抑是屬跋筊鬥輸贏彼號。也無運動會。In的娛樂，是讀高尚的冊，佮聽好的音樂。In規社攏是相和，相疼信主熱心的基督徒。
-
最近發表佇美國的衛生公報講：人一生第一安全的時期，是11歲。因為是過了幼年危險期的年歲；也是入佇成年危險期的進前。所以這个期間病死--的極少。
-
第一代先發見著糖(砂糖)，是主前300年ベンカル地方的一个印度人。白種人起頭共叫做印度鹽。
-
日本國，昭和8年度的調查，患著肺結核來死--的，有12萬6千7百連3名。佇國內只有設46位的健康相談所(健康相談所)。結核患者專門療養所，才有一萬一千7百27張眠床nā-tiāⁿ。
-
世界的腔口有5千款；咱的聖冊有翻譯991款的腔口。
-
咱人的胃(胃袋)，若創予伊膨上大，是親像踢跤球彼款球(フートホール)的大；若予伊勼到上細，是親像大ku姆大按呢。
-
墨西哥現時的大統領カーゲナス，最近有嚴嚴命令通國的百姓每禮拜，3日久叫做「無酒日」，絕對廢止アルコール性的食物。
-
文明國的人，100人人，80人的喙齒是蛀齒了了。
-
露西亞，佇地方所設5位反對宗教的博物館；有予政府教育委員共關--起來。
-
バストール講，「科學無國境(國境)，總是科學者有伊的本國」。
山本博士講，「基督教無國境，總是基督徒有伊的本國。」
- 聖冊公會報告，1936年度有賣出新舊約全書7,6740本；新約全書8,7417本；單本的福音傳902萬6千本。