路得記的研究
Lō͘-tek-kì ê Gián-kiù
文獻資訊
| 項目 | 資料 |
|---|---|
| 作者 | 雪峰逸嵐 Soat-hong Iat-lâm |
| 卷期 | 台灣教會公報 |
| 卷期 | 第631號 |
| 日期 | 1937/10 |
| 頁數 | 8-10 |
白話字（原文數位化）
Lō͘-tek-kì ê Gián-kiù
Soat-hong ia̍t-lâm
(Chiap 9 goe̍h tē 5 bīn)
1937年10月631期 8-10
- Tit-tio̍h sio̍k Lêng ê thiàⁿ-thàng
14 chat :Chia̍h ê sî, Pho-a-su kā i kóng, Lí lâi chia chia̍h-piáⁿ……chia̍h-pá iáu ū chhun, koh khí-lâi-khì khioh be̍h-seh.” Lō͘-tek m̄-nā tit-tio̍h Sèng Sîn ê ín-chhoā, koh tit-tio̍h Sèng Sîn ê thiàⁿ-thàng, m̄-nā ū chū-iû ê koân thang khioh be̍h-suī, iā ū thang chia̍h, chia̍h kàu ū chhun, chia̍h-pá iū thang koh khioh. Lán tī Chú ê hn̂g-lāi éng bô khiàm-khoeh, m̄-tān-nā ū oa̍h-miā chuí thang chí chhuì-ta, iā ū oa̍h-miā piáⁿ thang moá-chiok kàu pá koh ū chhun. Siōng-tè bô hān-liōng ê thiàⁿ-thàng, si̍t-chāi lán sī bē kham-tit hióng-siū, chóng-sī lán ē tit bô tiâu-kiāⁿ lâi hióng-siū chit khoán ê in-huī, chiū-sī in-uī Siōng-tè thiàⁿ lán, só͘-í lán tio̍h hó-táⁿ chìn-chêng lâi hióng-siū, chhin-chhiūⁿ Lō͘-tek bô the-sî, chia̍h kàu pá koh ū chhun. Chia̍h-pá-liáu koh chò-kang, ná chò-kang, chiū-sī ka-tī ná tit-tio̍h, in-uī Siōng-tè ê in-sù, jīm the̍h sī bē liáu--ê. Chhiáⁿ khoàⁿ─
15─16 chat: “Pho-a-su hoan-hù siàu-liân lâng kóng……m̄-thang hoah--i.” Che sī ì-goā ê thiàⁿ-thàng, te̍k-sû ê koân-lī, chiū-sī pa̍t-lâng só͘ tio̍h-boâ--ê, lí ē thang pe̍h-pe̍h hióng-siū hit ê koân-lī(Iok-hān 4:31). Chiū-sī tuì kui-khún--ê, tiâu-kang thiu khí-lâi hō͘ lí khioh. Siōng-tè ê in-sù, iā siông-siông chiong pa̍t-lâng só͘ choè ê kang, lâi sǹg-chò sī lán ê, hō͘ lán iā ū hūn hit ê bô hiâm chē, ná chē ná hó, Siōng-tè ê in-sù lâng sī bē moá-chiok, ná chhiong-sēng, ná hó, ná hoaⁿ-hí.
- Poē Si̍p-jī-kè ê hoaⁿ-hí.
Poē si̍p-jī-kè chò khit-chia̍h sui-jiân sī lô-khó͘, iáu kú sī chin hoaⁿ-hí, chit-chām sī ta-ke sim-pū teh kóng ti-sim-oē ê hoaⁿ-hí.
17 chat: “án-ni tī hn̂g-nih khioh be̍h-seh kàu ê hng…..iok ū chi̍t i-hoat ê toā-be̍h”(chi̍t i-hoat, chham-khoàⁿ Chhut Ai-ki̍p-kì 16:36 ê chù-kha). Lō͘-tek ti̍t-ti̍t khioh, khioh kàu ê-hng, tit-tio̍h loā chē? Chi̍t i-hoat; só͘ tit-tio̍h--ê beh chò sím-mi̍h? Chi̍t-poàⁿ chò ka-tī ê sai-khia, kang-chîⁿ; chi̍t-poàⁿ hiàn hō͘ ta-ke sī bô?
18 chat : “I toà só͘ khioh--ê ji̍p-siâⁿ, hō͘ ta-ke khoàⁿ, iā chiong chia̍h-pá só͘ chhun--ê, iā lóng the̍h-chhut lâi hō͘--i.” M̄-nā bô am-khàm, liân só͘ chia̍h chhun ê, iā lóng hiàn hō͘ ta-ke; it-chhè ê êng-kng lóng kui hō͘ Chú . Chhin-ài ê hiaⁿ-tī chí-moē! Hoān-sū lán lóng bô kong-lô; só͘ ū ê êng-iāu, lóng sī kui tī Sèng ê Pē. Lō͘-tek só͘ tit-tio̍h--ê, bô chi̍t si-hô sio̍k ka-tī, sī oân-choân hiàn hō͘ ta-ke, lán iā tio̍h án-ni, só͘ chò lóng hiàn hō͘ Chú.
19─22 chat: Chit chām sī ta-ke sim-pū chhin-bi̍t saⁿ-thiàⁿ kóng-oē ê hêng-chōng, thang khoàⁿ-chhut in ê hoaⁿ-hí, chi̍t ê mn̄g, chi̍t ê ìn. Ná-o-bí mn̄g, “Sim-pū ah! Lí kin-á-ji̍t tī tá-lo̍h chò kang khioh be̍h-seh? Goá tī chhù-nih thè lí kî-tó, hō͘ lí tit-tio̍h lâng ê khoàⁿ-kò͘, lí chai mah?” Lō͘-tek kóng, “Ta-ke ah! Goá kin-á-ji̍t tī hit ê miâ kiò Pho-a-su ê hn̂g chò-kang, tit-tio̍h i ê khoàⁿ-kò͘, an-uì, thé-thiap……sī chin hó ê lâng……” Ná-o-bí chin hoaⁿ-hí kóng, “án-ni chin hó, hit ê lâng sī lán ê kai-chhin ê chi̍t-ê, iā ē thang thè lán sio̍k-hoê sán-gia̍p--ê.” Lō͘-tek koh kóng, “I iā hoan-hù goá tio̍h tiàm i ê hn̂g khioh kàu in koah bêng-pe̍k”. Ná-o-bí koh kóng, “án-ni chin hó, lí m̄-thang khì pa̍t lâng ê hn̂g khioh lah.” Nn̄g ê lâng, chi̍t kù ta-ke, chi̍t kù sim-pū, thn̂g tiⁿ bi̍t tiⁿ, teh kóng chi̍t ji̍t ê keng-koè. Lia̍t-uī kèng-ài chò ta-ke sim-pū ê chí-moē ah! Chit khoán ka-têng ê chhù-bī, lín ū him-soān á bô ah? Goá káng-kiù kàu chit chām, tuì sim-koaⁿ-té ti̍t-ti̍t hoaⁿ-hí khí-lâi, soà bē hiáu án-choáⁿ siá lâi hêng-iông, chhin-chhiūⁿ pún-sin tī chit khoán ê ka-têng-lāi, hoaⁿ-hí kàu lâu-noā chhut-lâi, khoàⁿ-tio̍h ta-ke sim-pū ê chhin-bi̍t kàu án-ni, goá iā put-chí him-soān chit khoán khoài-lo̍k ê ka-têng, lán nā ài chit khoán khoài-lo̍k ê ka-têng, lán nā ài chit khoán ê ka-têng, chiū tio̍h lóng khoàⁿ bô ka-tī, ta̍k ê lóng lia̍h Ki-tok chò tiong-sim, chiàu Sèng Sîn ê ké-chí lâi kiâⁿ, chiū ē sêng-kong(Ka-lia̍p-thài 5:22,23).
Chhin-ài ê hiaⁿ-tī chí-moē! Lán ta̍k-ji̍t só͘ chò ê kang, lóng tio̍h hiàn hō͘ Chú, pò-kò hō͘ Chú chai-iáⁿ; chiū lí ka-tī ê sim ē chin hoaⁿ-hí, Chú iā ē chin hoaⁿ-hí lí. Lán sui-jiân uī Chú chò khit-chia̍h, chóng-sī ē thang ná bat Sèng Sîn ê ín-chhoā kap thiàⁿ-thàng, só͘ ū ê bí-niû, jīm lán the̍h, to bē liáu.
Tī chit chām koh hō͘ lán gián-kiù chi̍t phiⁿ ê chiok-sû(=tē gō͘ phiⁿ). 19 chat “Goān hit ê khoàⁿ-kò͘ lîn-bín lí--ê tit-tio̍h hok-khì.” 20 chat, “Goān i tit-tio̍h Iâ-hô-hoa sù-hok, chiū-sī si-in hō͘ oa̍h-lâng sí-lâng bô soah--ê”. Chit phiⁿ ê chiok-sû, khoàⁿ-chhut lîn-bín lâng ê lâng ū hok-khì, in-uī iā ē tit-tio̍h lîn-bín(Má-thài 5:7). Koh hō͘ lán khoàⁿ chhut Pho-a-su ê chò lâng. (1) hoaⁿ-hí hó khoán-thāi lâng,(2) siông-siông hó khoán-thāi lâng(=bô soah), (3) khoán-thāi sí-lâng, koh khoán-thāi oa̍h-lâng, (4) uī-tio̍h sí-lâng lâi khoán-thāi oa̍h-lâng, iā khoán-thāi oa̍h-lâng, chiū-sī khoán-thāi sí-lâng. Lán khoàⁿ Pho-a-su ê chò lâng, hui-siông thàu-thiat, hui-siông bêng-pe̍k, bô phah-tn̄g i ê thiàⁿ (Ka-lia̍p-thài 6:9).
Lán koh lâi siūⁿ chit phiⁿ chiok-sû ū èng-giām á bô? Siōng-tè ū sù-hok hō͘ Pho-a-su á bô? Ū, Siōng-tè sī oa̍h-oa̍h ê Siōng-tè (Pho-a-su ê hok-khì, tē sì chiuⁿ chiū lóng bêng-pe̍k).
23 chat: “Tuì án-ni i kap Pho-a-su ê lú-pī chò-tīn……siu-sêng bêng-pe̍k, i iû-goân kap ta-ke saⁿ-kap toà”. Chit chat sī pún chiuⁿ ê kiat-boé, iā sī tē-jī pō͘ ê lêng-thêng. Lí tiàm tá-lo̍h, goá iā tiàm tá- lo̍h. Lō͘-tek hoān-sū sūn-ho̍k Ná-o-bí, thiaⁿ i ê oē, in-khîn chò-kang, kàu toā sió be̍h siu bêng-pe̍k, chiū iû-goân kap ta-ke tiàm. Ta-ke sim-pū, sim-pū ta-ke, saⁿ-kap chia̍h-khó͘, tāi-ke saⁿ-thiàⁿ, kin-toè Sèng Sîn lâi chhin-kīn Chú.
Pún chiuⁿ ê kà-sī: Ji̍t-ji̍t toè Sèng Sîn ê ín-chhoā, kap Sèng Sîn tiàm, hō͘ Sèng Sîn hoaⁿ-hí.
Chhin-ài ê hiaⁿ-tī chí-moē! Tī sè-kan bô khoàⁿ-oa̍h, lóng sī kan-khó͘, kan-ta tit-tio̍h Sèng Sîn tiàm tī lán, ín-chhoā lán, lán chiah ū pêng-an, hoaⁿ-hí, khoài-lo̍k, tio̍h kiû Chú kap lán tiàm, chiah ū pêng-an.
Tē 3 chiuⁿ: Hōng-hiàn.
Lâng têng-thâu-siⁿ liáu-āu, tio̍h kin-toè Sèng Sîn, siū Sèng Sîn ê ín-chhoā, chai-bat Sèng Sîn, chiū tio̍h hōng-hiàn hō͘ Chú. Pún chiuⁿ sī chún-pī hōng-hiàn ê pì-koat; chhiáⁿ lán ēng Sîn-sèng ê sim seng kî-tó, chiah lâi gián-kiù, chiū ê chai-bat lêng-thêng siōng chhim-chhim ê ò-biāu. Chhiáⁿ lâi khoàⁿ tē-it chat:─
- Hōng-hiàn ê chún-pī.
1 chat: “Ná-o-bí kóng……goá kiám m̄-tio̍h kā lí chhoē chi̍t uī an-sim ê só͘-chāi hō͘ lí hióng-hok mah?” Ná-o-bí khoàⁿ Lō͘-tek ê ū-hàu; uī-tio̍h i siū-khó͘ khioh be̍h-seh; taⁿ kang-sū í-keng liáu, só͘ khioh ê be̍h iā sī chia̍h ē liáu, siūⁿ ka-tī í-keng lāu, kiat-kio̍k m̄-sī hō͘ Lō͘-tek éng-oán ē oá-khò--tit. Só͘-í chiū thè i siūⁿ an-tēng éng-oán ê só͘-chāi, kóng lí ji̍t-ji̍t uī goá siū-khó͘, goá kám m̄-tio̍h thè lí phah-sǹg an-hioh ê só͘-chāi mah? O-ló Chú! Lán ta̍k ji̍t uī Chú chò-kang, Chú tek-khak m̄-kam lán ta̍k-ji̍t tiàm khòng-iá phiau-liû. Si̍t-chāi thiàⁿ Chú ê lâng, Chú m̄-kam lán tiāⁿ-tiāⁿ keng-koè khòng-iá ê seng-oa̍h, tek-khak beh hō͘ lán kàu an-hioh ê só͘-chāi. Ná-o-bí m̄-sī kan-ta chhoā Lō͘-tek kàu ka-tī ê sin-piⁿ nā-tiāⁿ, sī tio̍h chhoā kàu hō͘ i an-sim ê só͘-chāi, m̄-sī éng-oán kap i chia̍h-khó͘. Sio-siāng án-ni, thoân-kàu-chiá iā tio̍h án-ni, khó-sioh chē-chē thoân-kàu-chiá, sī chhoā lâng kàu ka-tī ê bīn-chêng, che sī ke̍k toā ê sit-pāi; nā bô chhoā lâng ji̍p Chú ê an-hioh, hit ê lâng sī boē pêng-an; i ê sìn-sim iā sī khiā bē chāi, só͘-í thoân-kàu-chiá m̄-sī kan-ta thoân tō-lí nā-tiāⁿ. Choè iàu-kín, sī tio̍h chhoā ta̍k lâng ji̍p tī Chú ê thiàⁿ kàu an-hioh ê tē-pō͘, chóng-sī beh ji̍p tī Chú ê thiàⁿ, tio̍h ū siong-tong ê chhiú-sio̍k kap chún-pī(3,4 chat).
漢羅（Ùi原文改寫）
路得記的研究
雪峰逸嵐
(接9月第5面)
1937年10月631期 8-10
- 得著屬靈的疼痛
14節：食的時，波阿斯共伊講，你來遮食餅……食飽猶有賰，閣起來去抾麥屑。」路得毋但得著聖神的引chhoā，閣得著聖神的疼痛，毋但有自由的權通抾麥穗，也有通食，食到有賰，食飽又通閣抾。咱佇主的園內永無欠缺，毋但nā有活命水通止喙焦，也有活命餅通滿足到飽閣有賰。上帝無限量的疼痛，實在咱是袂堪得享受，總是咱會得無條件來享受這款的恩惠，就是因為上帝疼咱，所以咱著好膽進前來享受，親像路得無推辭，食到飽閣有賰。食飽了閣做工，那做工，就是家己那得著，因為上帝的恩賜，任提是袂了--的。請看─
15─16節：「波阿斯吩咐少年人講……毋通喝--伊。」這是意外的疼痛，特殊的權利，就是別人所著磨--的，你會通白白享受彼个權利(約翰4：31)。就是對規綑--的，刁工抽起來予你抾。上帝的恩賜，也常常將別人所做的工，來算做是咱的，予咱也有份彼个無嫌濟，那濟那好，上帝的恩賜人是袂滿足，那昌盛，那好，那歡喜。
- 背十字架的歡喜。
背十字架做乞食雖然是勞苦，猶久是真歡喜，這站是大家新婦咧講知心話的歡喜。
17節：「按呢佇園裡抾麥屑到ê昏…約有一伊法的大麥」(一伊法，參看出埃及記16：36的註跤)。路得直直抾，抾到ê昏，得著偌濟？一伊法；所得著--的欲做甚物？一半做家己的私奇，工錢；一半獻予大家是無？
18節：「伊帶所抾--的入城，予大家看，也將食飽所賰--的，也攏提出來予--伊。」毋但無掩蓋，連所食賰的，也攏獻予大家；一切的榮光攏歸予主。親愛的兄弟姊妹！凡事咱攏無功勞；所有的榮耀，攏是歸佇聖的爸。路得所得著--的，無一絲毫屬家己，是完全獻予大家，咱也著按呢，所做攏獻予主。
19─22節：這站是大家新婦親密相疼講話的形狀，通看出in的歡喜，一个問，一个應。拿俄米問，「新婦啊！你今仔日佇tá落做工抾麥屑？我佇厝裡替你祈禱，予你得著人的看顧，你知mah？」路得講，「大家啊！我今仔日佇彼个名叫波阿斯的園做工，得著伊的看顧，安慰，體貼……是真好的人……」拿俄米真歡喜講，「按呢真好，彼个人是咱的該親的一个，也會通替咱贖回產業--的。」路得閣講，「伊也吩咐我著踮伊的園抾到in割明白」。拿俄米閣講，「按呢真好，你毋通去別人的園抾啦。」兩个人，一句大家，一句新婦，糖甜蜜甜，咧講一日的經過。列位敬愛做大家新婦的姊妹啊！這款家庭的趣味，恁有欣羨抑無啊？我講究到這站，對心肝底直直歡喜起來，紲袂曉按怎寫來形容，親像本身佇這款的家庭內，歡喜到流瀾出來，看著大家新婦的親密到按呢，我也不止欣羨這款快樂的家庭，咱若愛這款快樂的家庭，咱若愛這款的家庭，就著攏看無家己，逐个攏掠基督做中心，照聖神的果子來行，就會成功(加拉太5：22，23)。
親愛的兄弟姊妹！咱逐日所做的工，攏著獻予主，報告予主知影；就你家己的心會真歡喜，主也會真歡喜你。咱雖然為主做乞食，總是會通那捌聖神的引chhoā佮疼痛，所有的米糧，任咱提，都袂了。
佇這站閣予咱研究一篇的祝詞(=第五篇)。19節「願彼个看顧憐憫你--的得著福氣。」20節，「願伊得著耶和華賜福，就是施恩予活人死人無煞--的」。這篇的祝詞，看出憐憫人的人有福氣，因為也會得著憐憫(馬太5：7)。閣予咱看出波阿斯的做人。(1)歡喜好款待人，(2)常常好款待人(=無煞)，(3)款待死人，閣款待活人，(4)為著死人來款待活人，也款待活人，就是款待死人。咱看波阿斯的做人，非常透徹，非常明白，無拍斷伊的疼(加拉太6：9)。
咱閣來想這篇祝詞有應驗抑無？上帝有賜福予波阿斯抑無？有，上帝是活活的上帝(波阿斯的福氣，第四章就攏明白)。
23節：「對按呢伊佮波阿斯的女婢做陣……收成明白，伊猶原佮大家相佮蹛」。這節是本章的結尾，也是第二步的靈程。你踮tá-lo̍h，我也踮tá-lo̍h。路得凡事順服拿俄米，聽伊的話，殷勤做工，到大小麥收明白，就猶原佮大家踮。大家新婦，新婦大家，相佮食苦，大家相疼，跟綴聖神來親近主。
本章的教示：日日綴聖神的引chhoā，佮聖神踮，予聖神歡喜。
親愛的兄弟姊妹！佇世間無看活，攏是艱苦，干焦得著聖神踮佇咱，引chhoā咱，咱才有平安，歡喜，快樂，著求主佮咱踮，才有平安。
第三章：奉獻。
人重頭生了後，著跟綴聖神，受聖神的引chhoā，知捌聖神，就著奉獻予主。本章是準備奉獻的祕訣；請咱用神性的心先祈禱，才來研究，就的知捌靈程上深深的奧妙。請來看第一節：─
- 奉獻的準備。
1節：「拿俄米講……我敢毋著共你揣一位安心的所在予你享福mah？」拿俄米看路得的有孝；為著伊受苦抾麥屑；taⁿ工事已經了，所抾的麥也是食會了，想家己已經老，結局毋是予路得永遠會倚靠--得。所以就替伊想安定永遠的所在，講你日日為我受苦，我敢毋著替你拍算安歇的所在mah？呵咾主！咱逐日為主做工，主的確毋甘咱逐日踮曠野漂流。實在疼主的人，主毋甘咱定定經過曠野的生活，的確欲予咱到安歇的所在。拿俄米毋是干焦chhoā路得到家己的身邊nā-tiāⁿ，是著chhoā到予伊安心的所在，毋是永遠佮伊食苦。相siāng按呢，傳教者也著按呢，可惜濟濟傳教者，是chhoā人到家己的面前，這是極大的失敗；若無chhoā人入主的安歇，彼个人是袂平安；伊的信心也是徛袂在，所以傳教者毋是干焦傳道理nā-tiāⁿ。最要緊，是著chhoā逐人入佇主的疼到安歇的地步，總是欲入佇主的疼，著有相當的手續佮準備(3，4節)。