So͘ Io̍k-châi ê Kám-siāPermalink

文獻資訊Permalink

白話字（原文數位化）Permalink

So͘ Io̍k-châi ê Kám-siā

1937年10月631期     4-6

In-uī goá ê kiáⁿ So͘ Chín-hui, jiám-tio̍h tāng ê pēⁿ, hō͘ i-seng 3 pái soan-giân kóng choa̍t-bāng. Taⁿ tī 9 goe̍h 11 ji̍t, tit-tio̍h pêng-an thè-īⁿ, che sī kiú-sú it-seng, bē kìm tit-tio̍h kám-siā.

1. Kám-siā Thiⁿ-pē ê lîn-bín chín-kiù.

2. Kám-siā chē-chē kàu-hoē ê kî-tó-thoân, í-ki̍p loā-chē kap goá tâng chò kang ê pêng-iú, kap Lâm Pak chē-chē thiàⁿ-thàng goá ê hiaⁿ-tī chí-moē, jia̍t-lia̍t thè kî-tó ê chêng, m̄-káⁿ bē kì-tit. Goá tú iok kuí-nā uī kàu-hoē beh khì mn̄g tō-lí boán-chhan, kap Ko Tiong kuí-nā hāng kang tio̍h chò; hut-jiân tī 6 goe̍h 12 hoat-jia̍t, giâu-gîチブス, ài goá tńg-lâi chham-siông. Ko͘-put-chiong tī 15 chá-khí, tuì Pîn-tong lâi Chiong-hoà, siāng ji̍t ē-po͘ 4 tiám goā cheng, goá chiū the̍h i ê hoeh khì Tâi-tiong thok Chiu ê oē-seng-khò kiám-cha, 18 ji̍t chá-khí, chiap oē-seng-khò tiān-oē, kóng sī chin-sèng ê チブス; tâng-ji̍t 12 tiám, chiū ji̍p Tâi-tiong Pēⁿ-īⁿ. Tuì 6 goe̍h 18 hō ji̍p-īⁿ kàu 9 goe̍h 4 ji̍t, kiōng 86 ji̍t-kan, thoat-chhut hit ê kan-lân khó͘-thàng ê kéng-tē, toā-toā kám-siā Chú.

Taⁿ chit-pang goá ê kiáⁿ Chín-huī, ē-thang tit-tio̍h pêng-an thè-īⁿ, oân-choân sī Siōng-tè ū thé-thiap goán; thiaⁿ Lâm Pak hiah chē thiàⁿ goán ê hiaⁿ-tī chí-moē thè goán teh ke̍k-le̍k tuì Chú kiû, Siōng-tè ū kiâⁿ kî-chek lâi chín-kiù. Koh chiong chêng lîn-bín Hi-se-ka ông ê lîn-bín, lâi lîn-bín goán, sǹg-sī pêng-siông-sū; ná ū sím-mi̍h kî-koài, mi̍h-sái siá lâi tìn pò-choá.

(a) Chóng-sī chit-pang só͘ tit-tio̍h chín-kiù ê kî-chek, sī tī choa̍t-bāng tiong tit-tio̍h chín-kiù, put-tek-í tio̍h siá lâi kám-siā kiàn-chèng; in-uī chiàu chú-tī-i 3 pái kā goán soan-giân kóng bô bāng. Goā-bīn ê i-seng lâi hóng-būn, khoàⁿ-liáu iā chin sit-bāng, in-uī i só͘ jiám-tio̍h ê チブスsī choè ok-sèng--ê, m̄-nā phó͘-thong sió-tn̂g, toā-tn̂g iā tio̍h; chiàu chú tī-i kóng i toà Tâi-tiong Pēⁿ-īⁿ 6 nî, só͘ tú-tio̍h ê チブス ū keng-koè 300 goā miâ, toā-tn̂g ū tio̍h--ê, liân Chín-hui chiah ū 4 ê lâng, tû Chín-hui í-goā, 3 ê lóng sí, to̍k-to̍k Chín-hui tit-tio̍h oa̍h, che bêng-bêng sī Siōng-tè ê kî-chek, tio̍h kám-siā. Koh chū khai Tâi-tiong Pēⁿ-īⁿ ê le̍k-sú, m̄-bat ū lâng chhin-chhiūⁿ Chín-hui chhut-hoeh hiah chē ji̍t. Chhut hiah chē hoeh, hoat jia̍t 12 ji̍t, chiū chhut hoeh; tuì 6 goe̍h 24 ji̍t, kàu 7 goe̍h 11 ji̍t, kiōng 18 ji̍t; tiong-kan nn̄g pái làng 4 ji̍t, kiōng chhut-hoeh 14 ji̍t, muí ji̍t chhut nn̄g-pái, saⁿ-pái; chi̍t-pái ū-sî chhut kui oáⁿ-thâu, ēng mî chū sò bē lī, lāu-bó tio̍h ēng thng-sî iúⁿ, in-uī bah phoà-khang, bē-thang ēng piān-khì; hit ê sim-kéng ê khó͘-thàng, bē thang hêng-iông--tit, koh thâu-boé 34 ji̍t choa̍t-si̍t, liân ám kap gû-leng lóng toān-choa̍t, kan-ta khò chù-siā, chu-ióng-che, chia̍h iâm-chuí, í-ki̍p cha̍p-goā ê chhin-chiâⁿ pêng-iú, kiōng hi-seng 2650 oá ê hoeh, su-ji̍p i ê seng-khu. Koh チブスāu, hoat-seⁿ kuí-nā khoán ê ha̍p-pèng pēⁿ, ū táⁿ-lông iām, táⁿ-lông-iām āu, chiū kip-sèng ê uī khóng[sic.]-tiong thò͘ chheⁿ-táⁿ chiâⁿ lé-pài, liáu-āu ok-sèng ê koâⁿ-jia̍t. Khàn-hō͘-hū chú-jīm kóng, So͘ Chín-hui Sian-siⁿ sī pēⁿ ê cha̍p-hoè-tiàm. Che nā m̄-sī Siōng-tè ê hû-chài, kiám ū ǹg-bāng kin-á-ji̍t thè-īⁿ ê kám-siā.

Koh tuì goán ji̍p-īⁿ, kàu goán thè-īⁿ, kiōng 86 ji̍t, kap goán siāng chú-tī-i só͘ siū chhî ê チブスhoān-chiá, iáu-boē ū chi̍t ê thè-īⁿ. Sí kuí-nā ê, hiah ê sí--ê, ū-ê ji̍p 4,5 ji̍t chiū sí, lóng sī pí goá ê kiáⁿ khah siàu-liân, khah ióng-chòng ê chheng-liân. Tuì í-siōng lâi siūⁿ, kiám m̄-sī Siōng-tè ê kî-chek. Chú-tī-i 3 pái kā goá kóng bô bāng, chhun--ê, chiū-sī lín ê Siōng-tè. Chin-chiàⁿ sī án-ni, Chiong-hoà tē-hng ê sio̍k-jîn iā loā-chē lâng tuì goá kóng, Chit pái So͘ Chín-hui Sian-siⁿ ê oa̍h, chin-chiàⁿ sī Siōng-tè ê kî-chek. Koh thiaⁿ sian-siⁿ kā goá kóng choa̍t-bāng ê oē, goán ê sim-kéng chhin-chhiūⁿ chông-ji̍p tī bông-bū ê tiong-kan, bong bô lō͘ ê sî, chí-ū chhoē Thiⁿ-pē kap Chú Iâ-so͘ . Goá it-seng m̄-káⁿ suî-piān tuì Siōng-tè kiû sîn-jiah, chit-pang uī-tio̍h bong bô lō͘ ê sî, 3 pái ke̍k-le̍k kiû Siōng-tè hián-chhut īⁿ-chek chí-sī, hō͘ goá khoàⁿ bêng goá ê kiáⁿ, si̍t-chāi sī chiàu sian-siⁿ só͘ toàn, ē sí, á-sī ē oa̍h; goá kî-tó kàu hun-bê 10 hun kan, khoàⁿ Siōng-tè só͘ hián-chhut ê tiāu-thâu(séng-lio̍k), sī oa̍h ê tiāu-thâu; chóng-sī i ê lāu-bó kiò goá tńg-lâi Chiong-hoà the̍h i ê i-chiûⁿ, chún-pī koè-sin thang chhēng, goá chiū tńg-lâi Chiong-hoà. Sim-koaⁿ siūⁿ, sui-jiân sian-siⁿ kóng choa̍t-bāng, nā-sī goá tuì Chú só͘ kiû ê chí-tiám, m̄-sī ē sí ê tiāu-thâu. Koh Chiong-hoà ê kî-tó-thoân, kuí-nā lé-pài, ta̍k chá-khí 5 tiám, choan-choan thè Chín-hui teh kiû, goá khì hù, khoàⁿ tāi-ke thè i teh kî-tó ê chêng-kéng, ū Sîn ê kàng-lo̍h kám-tio̍h goá ê sim. Koh Tâi-tiong kàu-hoē, lé-pài-ji̍t chhiàng, chhiáⁿ 4,5 pah miâ ê chèng hiaⁿ-tī chí-moē, nā thiaⁿ 12 tiám ê chuí-lê tân, tio̍h tâng-sim thè So͘ Chín-hui Sian-siⁿ tuì Siōng-tè kiû. Siāng hit sî ū chiap-tio̍h Pîn-tong, Bān-tan, Lâm-tâu Bo̍k-su ê phoe, kóng in kap choân kàu-hoē beh thè kî-tó. Koh Lâm Pak chin-chē kò-jîn siá phoe kóng in beh ke̍k-le̍k thè kî-tó. Koh choân Tâi Chheng-liân-hoē Hā-kî ha̍k-hāu tī Tâi-tiong, iā tâng-sim thè kî-tó. Lâu Tiong-kian Bo̍k-su iā tī Tâi-lâm chhián goā-kok Soan-kàu-su tâng-sim thè kî-tó, tuì án-ni khah chòng-táⁿ goá ê sí. Só͘-í goá chiū bô tuì i ê hū-jîn-lâng kóng beh the̍h saⁿ lâi chún-pī koè-sin thang chhēng. Tuì sìn-sim lâi tán-hāu kàu kin-á-ji̍t, oân-choân siū Chú kiù-chhut chit ê kiú-sú it-seng ê sí-soàⁿ, thái-thó ē kìm-tit goán ê sim kap chhuì tiām-tiām, goán beh chhut toā-siaⁿ o-ló kám-siā Chú kap thè goán kî-tó ê lâng.

(b) Koh tuì ji̍p-īⁿ thè-īⁿ, kiōng 86 ji̍t kan, chiah kú ê tiong-kan, ū tuì pak kàu Ko-hiông-chiu, thiàⁿ goán ê chhin-chiâⁿ, pêng-iú, hiaⁿ-tī, chí-moē, kàu goán chhù, á-sī kàu pēⁿ-īⁿ khì hóng-būn, koh chiap-tio̍h hóng-būn uì-an ê phoe, ū-ê kià tuì Tâi-tiong Pēⁿ-īⁿ khì, ū-ê kià tuì pè-sià lâi uì-būn. Tiong-kan goán ê sim tng hun-loān ê sî, chē-chē ū hun-sit, bē thang it-it siá-phoe kā tāi-ke tap-siā, só͘-í chioh chit-chām ê pò-choá, piáu goán pē-kiáⁿ kap choân-ke ê sêng-sim, kā lia̍t-uī seh-siā.

Koh chhim-chhim bāng lia̍t-uī soà-chiap thè goá ê kiáⁿ Chín-hui kî-tó, hō͘ i chit-pái ê oa̍h, m̄-sī uī-tio̍h ka-tī lâi oa̍h, chiū-sī uī-tio̍h Ki-tok lâi oa̍h, chiah ū ì-gī(Hui-li̍p-pí 21:22). In-uī i ka-tī chai tī toā guî-hiám tiong, A-tia ah, goá nā bē hó, lí tio̍h chiàu-kò͘ hō͘ ióng, thang khan goá ê gín-á; koh tuì Siōng-tè kóng, Pē ah, Lí nā beh hō͘ goá lī-khui sè-kan, tio̍h khah kín, in-uī goá ê kan-khó͘ tòng-bē-tiâu; nā beh hō͘ goá oa̍h, goá beh chīn goá ê khuì-la̍t, uī Lí ê kàu-hoē chò kang. Goá chit-tia̍p teh siá chiah ê, koh ēng si̍t-sim piáu-chhut tuì Chú kám-siā, tuì tông-chêng thiàⁿ-thàng thè goán kî-tó ê hiaⁿ-tī chí-moē kám-siā.

漢羅（Ùi原文改寫）Permalink

蘇育才的感謝

1937年10月631期     4-6

因為我的囝蘇Chín-hui，染著重的病，予醫生3擺宣言講絕望。Taⁿ佇9月11日，得著平安退院，這是九死一生，袂禁得著感謝。

1. 感謝天爸的憐憫拯救。

2. 感謝濟濟教會的祈禱團，以及偌濟佮我同做工的朋友，佮南北濟濟疼痛我的兄弟姊妹，熱烈替祈禱的前，毋敢袂記得。我拄約幾若位教會欲去問道理晚餐，佮高中幾若項工著做；忽然佇6月12發熱，僥疑チブス，愛我轉來參詳。孤不將佇15早起，對屏東來彰化，siāng日下晡4點外鐘，我就提伊的血去台中託州的衛生課檢查，18日早起，接衛生課電話，講是真性的チブス；同日12點，就入台中病院。對6月18號入院到9月4日，共86日間，脫出彼个艱難苦痛的境地，大大感謝主。

Taⁿ這pang我的囝Chín-huī，會通得著平安退院，完全是上帝有體貼阮；聽南北遐濟疼阮的兄弟姊妹替阮咧極力對主求，上帝有行奇蹟來拯救。閣將情憐憫希西家王的憐憫，來憐憫阮，算是平常事；ná有甚物奇怪，mi̍h-sái寫來鎮報紙。

(a)總是這pang所得著拯救的奇蹟，是佇絕望中得著拯救，不得以著寫來感謝見證；因為照主治醫3擺共阮宣言講無望。外面的醫生來訪問，看了也真失望，因為伊所染著的チブス是最惡性--的，毋但普通小腸，大腸也著；照主治醫講伊蹛台中病院6年，所拄著的チブス有經過300外名，大腸有著--的，連Chín-hui才有4个人，除Chín-hui以外，3个攏死，獨獨Chín-hui得著活，這明明是上帝的奇蹟，著感謝。閣自開台中病院的歷史，毋捌有人親像Chín-hui出血遐濟日。出遐濟血，發熱12日，就出血；對6月24日，到7月11日，共18日；中間兩擺閬4日，共出血14日，每日出兩擺，三擺；一擺有時出規碗頭，用綿苴燥袂離，老母著用湯匙舀，因為肉破孔，袂通用便器；彼个心境的苦痛，袂通形容--得，閣頭尾34日絕食，連泔佮牛奶攏斷絕，干焦靠注射，滋養劑，食鹽水，以及十外个親成朋友，共犧牲2650 oá的血，輸入伊的身軀。閣チブス後，發生幾若款的合併病，有膽囊炎，膽囊炎後，就急性的胃擴張吐青膽成禮拜，了後惡性的寒熱。看護婦主任講，蘇Chín-hui先生是病的雜燴點。這若毋是上帝的扶載，敢有向望今仔日退院的感謝。

閣對阮入院，到阮退院，共86日，佮阮siāng主治醫所受持的チブス患者，猶未有一个退院。死幾若个，遐的死--的，有的入4，5日就死，攏是比我的囝較少年，較勇壯的青年。對以上來想，敢毋是上帝的奇蹟。主治醫3擺共我講無望，賰--的，就是恁的上帝。真正是按呢，彰化地方的俗人也偌濟人對我講，這擺蘇Chín-hui先生的活，真正是上帝的奇蹟。閣聽先生共我講絕望的話，阮的心境親像傱入佇濛霧的中間，摸無路的時，只有揣天爸佮主耶穌。我一生毋敢隨便對上帝求神跡，這pang為著摸無路的時，3擺極力求上帝顯出異蹟指示，予我看明我的囝，實在是照先生所斷，會死，抑是會活；我祈禱到昏迷10分間，看上帝所顯出的兆頭(省略)，是活的兆頭；總是伊的老母叫我轉來彰化提伊的衣裳，準備過身通穿，我就轉來彰化。心肝想，雖然先生講絕望，若是我對主所求的指點，毋是會死的兆頭。閣彰化的祈禱團，幾若禮拜，逐早起5點，專專替Chín-hui 咧求，我去赴，看大家替伊咧祈禱的情境，有神的降落感著我的心。閣台中教會，禮拜日唱，請4，5百名的眾兄弟姊妹，若聽12點的水螺霆，著同心替蘇Chín-hui先生對上帝求。Siāng彼時有接著屏東，萬丹，南投牧師的批，講in佮全教會欲替祈禱。閣南北真濟個人寫批講in欲極力替祈禱。閣全台青年會夏期學校佇台中，也同心替祈禱。劉忠堅牧師也佇台南淺外國宣教師同心替祈禱，對按呢較壯膽我的死。所以我就無對伊的婦人人講欲提衫來準備過身通穿。對信心來等候到今仔日，完全受主救出這个九死一生的死線，thái-thó會禁得阮的心佮喙恬恬，阮欲出大聲呵咾感謝主佮替阮祈禱的人。

(b)閣對入院退院，共86日間，遮久的中間，有對北到高雄州，疼阮的親成，朋友，兄弟，姊妹，到阮厝，抑是到病院去訪問，閣接著訪問慰安的批，有的寄對台中病院去，有的寄對敝舍來慰問。中間阮的心當紛亂的時，濟濟有分失，袂通一一寫批共大家答謝，所以借這站的報紙，表阮爸囝佮全家的誠心，共列位說謝。

閣深深望列位紲接替我的囝Chín-hui祈禱，予伊這擺的活，毋是為著家己來活，就是為著基督來活，才有意義(腓立比21：22)。因為伊家己栽佇大危險中，阿爹啊，我若袂好，你著照顧予勇，通牽我的囡仔；閣對上帝講，爸啊，你若欲予我離開世間，著較緊，因為我的艱苦擋袂牢；若欲予我活，我欲盡我的氣力，為你的教會做工。我這霎咧寫遮的，閣用實心表出對主感謝，對同情疼痛替阮祈禱的兄弟姊妹感謝。