樂山院
Lo̍k-seng-īⁿ
文獻資訊
| 項目 | 資料 |
|---|---|
| 作者 | 吳清鎰 Gô͘ Chheng-ek |
| 卷期 | 台灣教會公報 |
| 卷期 | 第631號 |
| 日期 | 1937/10 |
| 頁數 | 30 |
白話字（原文數位化）
Lo̍k-seng-īⁿ
Gô͘ Chheng-ek
1937年10月631期 30
Lia̍t-uī hiaⁿ-chí! Ngāu-san-oân ê siau-sit, lán tī pún-pò siông-siông bat tha̍k-tio̍h. Chóng-sī Lo̍k-seng-īⁿ lán khah m̄ se̍k-sāi. Lo̍k-seng-īⁿ chiū-sī koaⁿ-siat ê Nāi-pīⁿ-īⁿ. Chia só͘ siu-iông ê hoān-chiá lâm-lú chóng-sò͘, hiān-sî sì-pah sì-cha̍p miâ. Tuì 5,6 nî chêng khai-siat í-lâi, Tân Khoe-chùn Bo̍k-su ū siông-siông khì hia thoân tō-lí, chóng-sī tuì kin-nî 4 goe̍h í-lâi, ū N̂g La̍k-tiám Thoân-tō-su choan-bū tī-hia choè Chú ê kang, lâi thiaⁿ ê lâng ū-sî chhit-poeh cha̍p, chóng-sī saⁿ-chiap-soà lâi thiaⁿ ê lâng ia̍h ū saⁿ-sì cha̍p lâng. Tī 9 ge̍h 5 ji̍t, Siang-liân ê Sió-hoē chū-chi̍p tī Lo̍k-seng-īⁿ, ū 13 ê nāi hoān-chiá lâi mn̄g tō-lí, ta̍k ê tō-lí put-chí bêng, koh in tī īⁿ-lāi ê seng-oa̍h ia̍h put-chí hó bô͘-iūⁿ, si̍t-chāi oē-kham-tit choè Chú ê ha̍k-seng, só͘-í ū lóng-chóng kā in chiap-la̍p, kiâⁿ soé-lé, soà siú Sèng-chhan. Hoān-chiá ê tiong-kan, ū-ê tuì í-chêng í-keng sìn tō-lí, koh i-seng chit-oân, khàn-hō͘-hū ia̍h ū-ê sī sìn-chiá. Hit-ji̍t poê-chhan-chiá chóng-kiōng 29 miâ(4 miâ sī lâng-kheh). án-ni sǹg-sī siong-tong ê siàu-gia̍h, ǹg-bāng chiah ê oē choè kàⁿ-bú, chiām-chiām khóng-khoah Siōng-tè ê kok tī hit tiong-kan. In tuì tī hiān-sî, kiám-chhái thang kóng sī choa̍t-bāng, chóng-sī ín-chhoā in lâi sìn Chú tit kiù; tī chi̍t-chūn tit-tio̍h an-uì, koh tī pa̍t-ji̍t thang tit-tio̍h pò-siúⁿ, sī lán tāi-ke só͘ ū hūn ê chek-sêng.
Goān lán tāi-ke toā-toā koan-sim tī chit hō te̍k-sû ê thoân-tō. Goān Siōng-tè toā-toā si-un siúⁿ-sù hok-khì moá-moá tī in tiong-kan.
漢羅（Ùi原文改寫）
樂生院
吳清鎰
1937年10月631期 30
列位兄姊！樂山園的消息，咱佇本報常常捌讀著。總是樂生院咱較毋熟似。樂生院就是官設的癩病院。遮所收容的患者男女總數，現時四百四十名。對5，6年前khai-設以來，陳溪圳牧師有常常去遐傳道理，總是對今年4月以來，有黃六點傳道師專務佇遐做主的工，來聽的人有時七八十，總是相接紲來聽的人亦有三四十人。佇9月5日，雙連的小會聚集佇樂生院，有13个癩患者來問道理，逐个道理不止明，閣in佇院內的生活亦不止好模樣，實在會堪得做主的學生，所以有攏總共in接納，行洗禮，紲守聖餐。患者的中間，有的對以前已經信道理，閣醫生職員，看護婦亦有的是信者。彼日陪餐者總共29名(4名是人客)。按呢算是相當的數額，向望遮的會做酵母，漸漸曠闊上帝的國佇彼中間。In對佇現時，檢采通講是絕望，總是引chhoā in來信主得救；佇一陣得著安慰，閣佇別日通得著報賞，是咱大家所有份的責成。
願咱大家大大關心佇這號特殊的傳道。願上帝大大施恩賞賜福氣滿滿佇in中間。