改革主義的信仰
Kái-kek chú-gī ê sìn-gióng
文獻資訊
| 項目 | 資料 |
|---|---|
| 作者 | 蔡受恩 Chhoà Siū-un |
| 卷期 | 台灣教會公報 |
| 卷期 | 第631號 |
| 日期 | 1937/10 |
| 頁數 | 24-25 |
白話字（原文數位化）
Kái-kek chú-gī ê sìn-gióng
Chhoà Siū-un
1937年10月631期 24-25
Tâi-oân Tiúⁿ-ló Kàu-hoēê sìn-gióng, sī khiā tī chèng-thóng-tek hok-im chú-gī ê sìn-gióng; chóng-sī hiān-si̍t kiaⁿ-liáu bô ū sì-chiàⁿ ê lāi-iông. Tī téng hō Keh Hô-lia̍t Sian-siⁿ só͘ lūn “Sìn-gióng”, iā ū kóng-khí hiān-chāi it-poaⁿ teh sìn-gióng ê lāi-iông chin ū chha-biū. Si̍t-chāi kim-ji̍t Kàu-hoē ê sìn-gióng chin ū thang hoán-séng ê só͘-chāi. Sìn-gióng nā bô toan-chiàⁿ, chiū kàu-hoē chhin-chhiūⁿ khí tī soa-thô͘; hit ê sìn-gióng-chiá iā m̄-sī Siōng-tè--ê, iā hit ê kàu-hoē sī sio̍k lâng--ê. Che lóng-sī tuì tī ka-kī tiong-sim ê to͘-ha̍p chú-gī, to̍k-sian[sic] chú-gī ê kiat-kó.
Chit khoán ê kàu-hoē, beh thài oē hoat-tián. Tī-chia ài hoán-séng. Nā-sī án-ni lán ê sìn-gióng tuì sím-mi̍h tēng-chún lâi kiám-thó? Chí-ū tio̍h tò-tńg tī Sèng-chheh lâi gióng-bōng Ki-tok, chiah oē tēng-chún lán ê sìn-gióng sī toan-chiàⁿ.
Chī-chuī tē-it ū tiong-si̍t tī Sèng-chheh ê sìn-gióng? Sù-tô͘ sî-tāi í-āu ê St. Augastime(アウガスチン), chit lâng chin ū tiong-si̍t tī Sèng-chheh, lâi kó͘-bú Ki-tok ê sìn-gióng. Tī hit tiong-kan ū chin choē īⁿ-toan ê sìn-gióng, lâi kheng-sī Ki-tok ê choa̍t-tuì-sèng, só͘-í tī-chia ū siⁿ-chhut sìn-gióng ê lūn-cheng. Luthur(ルツター)ê chong-kàu kái-kek, Calvin(カルヴイン)ê Sîn-ha̍k kàu-lí, sìn-gióng kàu-lí ê kiàn-siat. Chit ê kiàn-siat, kiù-kèng sī thê-chhiòng chú-tiuⁿ tio̍h tò-tńg tī Sèng-chheh lâi niá-siū Siōng-tè só͘ sù ê un-tián, lâi kiat-chiâⁿ ê sìn-gióng. Chit ê Calvin(カルヴイン)ê sìn-gióng, chiū-sī kái-kek-tek sìn-gióng. Kun-tè i ê cheng-sîn tui-kiû Sèng-chheh, ho̍k-chiông chit ê sī Siōng-tè ê koân-ui ê bēng-lēng, khé-sī ê oē; chiah ê lâng só͘ chú-tiuⁿ ê sìn-gióng, kiò-choè kái-kek chú-gī ê sìn-gióng.
Lán ê kàu-hoē ê sìn-gióng chin tio̍h kiám-thó ê só͘-chāi, só͘-í tī-chia bô m̄-sī tio̍h tuì chit ê kái-kek chú-gī ê sìn-gióng, lāi-iông lâi chài gîm-bī, chiah oē thang tit-tio̍h toan-chiàⁿ, tò-tńg-lâi kàu tī ēng Sèng-chheh choè tiong-sim, só͘ ko-kú ê Ki-tok choè sìn-gióng ê tuì-siōng, iā chiah oē chai sìn-gióng choè-ko ê bo̍k-tek.
Chit ê kái-kek chú-gī, thang kóng sī カルヴインchú-gī. Chóng-sī chit ê chú-gī bô tú sī カルヴインchoân-pō͘ ê chú-tiuⁿ, iā tuì chit hong-bīn thang siūⁿ カルヴインiā m̄-sī カルヴイン chú-gī ê chhòng-sí-chiá. Chit ê カルヴイン chú-gī, sī ルツター chú-gī phài ê lâng kā in hō ê miâ. Thang siūⁿ khí kàu アウガスチン, Pó-lô koh khí-khì Sian-ti Í-sài-a. Chóng-sī chit ê カルヴイン chú-gī ê sìn-gióng, kiù-kèng sī Sèng-chheh ê sìn-gióng. Só͘-í lán thang tēng-chún chit ê chí-chiam, lâi kiám-thó lán hiān-chāi ê sìn-gióng lāi-iông.
Kun-tèカルヴインchú-gī ê sìn-gióng, lāi-iông ê lâng tāi-khài ū chi̍t-ek nn̄g chheng bān, pí ルツター phài ê lâng khah ke nn̄g pē. Hoān-uî chin khoah, tuì hit ê カルヴイン ê chong-kàu kái-kek, pún-toē Suī-se khí, Hoat-lân-se, Eng-kok, Au-chiu, Bí-kok; sè-kài siū-tio̍h カルヴインê kám-hoà chin chhim.
Lūn chit ê kái-kek chú-gī sìn-gióng ê kun-pún iàu-sò͘ sī sím-mi̍h? Ū lâng teh kóng bô chit ê カルヴインchú-gī ê sìn-gióng lāi-iông; iā ū lâng kóng カルヴインsī ルツター ê hō͘-kè-chiá. I bô to̍k-li̍p ê sìn-gióng thé-hē, m̄-kú lán tio̍h chāi カルヴインchú-gī sī chú-tiuⁿ Siōng-tè ê choa̍t-tuì-tek chûn-chāi ê koan-liām. Chin ko-tiāu Siōng-tè ê si̍t-chāi-sèng, lâi sián-bêng I ê siōng, chit khoán to̍k-te̍k ê sìn-gióng thé-hē.
カルヴインchú-gī ê ha̍k-chiá teh gián-kiù chi̍t ê sìn-gióng thé-hē, lóng chi̍p-tiong tī Sîn ê koan-liām. Chhin-chhiūⁿ カイバ(A. Kuyper), ウーフイールド(B. B. Warfield) só͘ le̍k-soat ê Siōng-tè ê chú-koân. シユワイツアー(A. Schweitzer) chú-tiuⁿ--ê, sī tuì Siōng-tè choa̍t-tuì sìn-khò ê sim-chêng. ヘツベー(H. Heppe) chú-tiuⁿ Siōng-tè ê chhòng-chō kap sio̍k-choē koan-liām. iā ū lâng le̍k-soat Siōng-tè ê ū-tēng. Sui sī án-ni ū thóng-it ê iàu-sò͘, chiū-sī Siōng-tè ê koan-liām, chin ū sián-bêng Sèng-chheh ê chin-lí koan-hē; chit ê Siōng-tè ê pún-chit.
カール,ホール(Karl Hael) iā ū kóng “カルヴインê tē-it toā Sîn-ha̍k-tek oa̍h-tāng, chiū-sī khǹg tī Siōng-tè ê koan-liām”.Nā-sī khoàⁿ カルヴインchú-gī ê sìn-gióng kò-pe̍k lāi-iông chiū chin bêng-pe̍k. 1545 nî ê ゼネsìn-gióng kò-pe̍k; koh 10 nî āu ê エムヂンliáu-āu, iáu ū 4,5 pái ê sìn-gióng būn-tap teh chhián-bêng sìn-gióng lāi-iông. 1647 nî ê ウエストミンンスター(Westminster) ê būn-ta̍p No 1. “Lâng chú-iàu ê bo̍k-tek sī sím-mi̍h? Chiū-sī êng-kng Siōng-tè, hō͘ I bû-hān ê boán-chiok”.
Hián-bêng Siōng-tè ê êng-kng sī jîn-luī ê kiù-ke̍k ū bo̍k-tek. Keh Hô-lia̍t--sī ê “sìn-gióng” III iā ū kóng-bêng. Choē-jîn tuì sìn-gióng lâi hoê-ho̍k kap chō-bu̍t-chiá ê jîn-keh-tek kau-sia̍p lâi hián-bêng I ê êng-kng. カルヴインchú-gī ê khí-thâu ê te̍k-sek, chiū-sī chú-tiuⁿ lâng tuì Ki-tok ê sio̍k-hoê liáu-āu bô kiû ka-kī ê lī-ek, chí-ū uī-tio̍h Siōng-tè ê êng-kng lâi oa̍h; le̍k-soat chit khoán sī jîn-seng choè ko ê bo̍k-tek.
カルヴインsó͘ tù ê “Ki-tok-kàu goân-lí” só͘ le̍k-soat ê sìn-gióng lāi-iông, toā kòng-hiàn tī sè-kài ê Ki-tok-kàu, iā-sī choè ブロテスタントchú-gī ê ki-chhó͘. Lāi-tiong só͘ lūn ê Siōng-tè, choē-jîn kiù-sio̍k kap Kàu-hoē chiah ê kàu-lí, tī-chia ū thóng-it tī chit ê su-sióng, chiū-sī chì-sèng ê chhòng-chō-chiá Siōng-tè. カルヴインsi̍t-chāi sī tuì Ki-tok lâi tiàm tī Siōng-tè, koh-oa̍h tī Siōng-tè Sèng-chheh êlāi-bīn ê Sîn-ha̍k-chiá.
漢羅（Ùi原文改寫）
改革主義的信仰
蔡受恩
1937年10月631期 24-25
台灣長老教會的信仰，是徛佇正統tek福音主義的信仰；總是現實驚了無有四正的內容。佇等號郭和烈先生所論「信仰」，也有講起現在一般咧信仰的內容真有差謬。實在今日教會的信仰真有通反省的所在。信仰若無端正，就到會親像起佇沙土；彼个信仰者也毋是上帝--的，也彼个教會是屬人--的。這攏是對佇家己中心的都合主義，獨善主義的結果。
這款的教會，欲thài會發展。佇遮愛反省。若是按呢咱的信仰對甚物定準來檢討？只有著倒轉佇聖冊來仰望基督，才會定準咱的信仰是端正。
Chī-chuī第一有忠實佇聖冊的信仰？使徒時代以後的St. Augastime(アウガスチン)，這人真有忠實佇聖冊，來鼓舞基督的信仰。佇彼中間有真濟異端的信仰，來輕視基督的絕對性，所以佇遮有生出信仰的論爭。Luthur(ルツター)的宗教改革，Calvin(カルヴイン)的神學教理，信仰教理的建設。這个建設，究竟是提倡主張著倒轉佇聖冊來領受上帝所賜的恩典，來結成的信仰。這个Calvin(カルヴイン)的信仰，就是改革tek信仰。跟綴伊的精神追求聖冊，服從這个是上帝的權威的命令，啟示的話；遮的人所主張的信仰，叫做改革主義的信仰。
咱的教會的信仰真著檢討的所在，所以佇遮無毋是著對這个改革主義的信仰，內容來再吟味，才會通得著端正，倒轉來到佇用聖冊做中心，所高舉的基督做信仰的對象，也才會知信仰最高的目的。
這个改革主義，通講是カルヴイン主義。總是這个主義無拄是カルヴイン全部的主張，也對這方面通想カルヴイン也毋是カルヴイン主義的創始者。這个カルヴイン主義，是ルツター主義派的人共in號的名。通想起到アウガスチン，保羅閣起去先知以賽亞。總是這个カルヴイン主義的信仰，究竟是聖冊的信仰。所以咱通定準這个指針，來檢討咱現在的信仰內容。
跟綴カルヴイン主義的信仰，內容的人大概有一億兩千萬，比ルツター派的人較加兩倍。範圍真闊，對彼个カルヴイン的宗教改革，本地瑞西起，法蘭西，英國，歐洲，美國；世界受著カルヴイン的感化真深。
論這个改革主義信仰的根本要素是甚物？有人咧講無這个カルヴイン主義的信仰內容；也有人講カルヴイン是ルツター的後繼者。伊無獨立的信仰體系，毋過咱著在カルヴイン主義是主張上帝的絕對tek存在的觀念。真高調上帝的實在性，來鮮明伊的像，這款獨特的信仰體系。
カルヴイン主義的學者咧研究一个信仰體系，攏集中佇神的觀念。親像カイバ(A. Kuyper)，ウーフイールド(B. B. Warfield)所歷說的上帝的主權。シユワイツアー(A. Schweitzer)主張--的，是對上帝絕對信靠的心情。ヘツベー(H. Heppe)主張上帝的創造佮贖罪觀念。也有人歷說上帝的預定。雖是按呢有統一的要素，就是上帝的觀念，真有鮮明聖冊的真理關係；這个上帝的本質。
カール，ホール(Karl Hael)也有講「カルヴイン的第一大神學tek活動，就是囥佇上帝的觀念」。若是看カルヴイン主義的信仰告白內容就真明白。1545年的ゼネ信仰告白；閣10年後的エムヂン了後，猶有4，5擺的信仰問答咧闡明信仰內容。1647年的ウエストミンンスター(Westminster)的問答No 1。「人主要的目的是甚物？就是榮光上帝，予伊無限的滿足」。
顯明上帝的榮光是人類的究極有目的。郭和烈--氏的「信仰」III也有講明。罪人對信仰來回復佮造物者的人格tek交涉來顯明伊的榮光。カルヴイン主義的起頭的特色，就是主張人對基督的贖回了後無求家己的利益，只有為著上帝的榮光來活；歷說這款是人生最高的目的。
カルヴイン所著的「基督教原理」所歷說的信仰內容，大貢獻佇世界的基督教，也是做ブロテスタント主義的基礎。內中所論的上帝，罪人救贖佮教會遮的教理，佇遮有統一佇這个思想，就是至聖的創造者上帝。カルヴイン實在是對基督來踮佇上帝，閣活佇上帝聖冊的內面的神學者。