三年運動特記
Saⁿ nî ūn-tōng te̍k-kì
文獻資訊
| 項目 | 資料 |
|---|---|
| 作者 | 蕭樂善 Siau Lo̍k-siān |
| 卷期 | 台灣教會公報 |
| 卷期 | 第631號 |
| 日期 | 1937/10 |
| 頁數 | 4 |
白話字（原文數位化）
Saⁿ-nî ūn-tōng te̍k-kì
Siau Lo̍k-siān
1937年10月631期 27
- Sî-tāi ê lô-le̍k. Kàu-hoē beh ū kiān-choân ê hoat-ta̍t, tek-khak tio̍h tuì tha̍k, tuì gián-kiù. Chóng-sī kin-á-ji̍t ê kàu-hoē-oân put-chí khiàm-kheh gián-kiù-sim. Jia̍t-sim sī ài séng kang, séng huì-khì, séng siūⁿ ê jia̍t-sim, chit khoán ê jia̍t-sim tek-khak boē thiat-té, iā boē chìn-pō͘. Tuì hùn-heng ê jia̍t-sim , kàu kin-á-ji̍t siáⁿ-khoán? Í-keng léng-tām, iā ū-ê teh léng-tām, che m̄-sī léng, sī hoat-tián bô lō͘ ê jia̍t-sim. Lâng nā ū gián-kiù-sim, ài chìn-pō͘ ê sim, put-sî ū jia̍t-sim; iā i jia̍t-sim oē chìn-pō͘, oē khah si̍t-chāi. Lán kan-ta jia̍t-sim pò͘-tō, iā bô jia̍t-sim tī gián-kiù Sèng-keng, che sī kî-koài ê jia̍t-sim.
Kin-á-ji̍t lán tē-it ha̍h sî-tāi ê lô-le̍k, chiū-sī chēng-chēng chhiau-chhē Sèng-keng. Kiám-chhái lán chi̍t-sî boē thang ū toā ê gián-kiù-sim, iáu-kú iā tio̍h ná thoàn-liān, ta̍k-ê ū tha̍k kap siūⁿ ê la̍t, hō͘ lán ê sî-tāi kín ji̍p tī sin ê sî-tāi, chi̍t chân ê chìn-pō͘.
- (1) Pún-pō͘ só͘ teh pī-pān ê “Thong-sìn Sèng-keng ha̍k-hāu” iáu-boē piān. Bô kú oē kià hō͘ kok khu.
(2) Kok khu ê thong-sìn-oân, chhiáⁿ chiong siau-sit pò-kò Pún-pō͘.
(3) Kok khu ê koè-kè nā iáu-bē kià só͘ hū-tam--ê, chhiáⁿ koáⁿ-kín kià hō͘ Suī-hong Toh Hêng-lī--sī. Koh chi̍t-pái pài-thok.
(4) In-uī hông-oē ê kang, tāi-ke khah bô êng, chhiáⁿ chióng-lē Sèng-keng gián-kiù, kò-jîn thoân-tō kap bûn-su thoân-tō.
漢羅（Ùi原文改寫）
三年運動特記
蕭樂善
1937年10月631期 27
- 時代的勞碌。教會欲有健全的發達，的確著對讀，對研究。總是今仔日的教會員不止欠缺研究心。熱心是愛省工，省費氣，省想的熱心，這款的熱心的確袂徹底，也袂進步。對奮興的熱心，到今仔日啥款？已經冷淡，也有的咧冷淡，這毋是冷，是發展無路的熱心。人若有研究心，愛進步的心，不時有熱心；也伊熱心會進步，會較實在。咱干焦熱心佈道，也無熱心佇研究聖經，這是奇怪的熱心。
今仔日咱第一合時代的勞碌，就是靜靜搜揣聖經。檢采咱一時袂通有大的研究心，猶過也著那鍛鍊，逐个有讀佮想的力，予咱的時代緊入佇新的時代，一層的進步。
- (1)本部所咧備辦的「通訊聖經學校」猶未便。無久會寄予各區。
(2)各區的通訊員，請將消息報告本部。
(3)各區的會計若猶未寄所負擔--的，請趕緊寄予瑞芳卓恒利--是。閣一擺拜託。
(4)因為防衛的工，大家較無閒，請獎勵聖經研究，個人傳道佮文書傳道。