路得記的研究
Lō͘-tek-kì ê Gián-kiù
文獻資訊
| 項目 | 資料 |
|---|---|
| 作者 | 雪峰逸嵐 Soat-hong Iat-lâm |
| 卷期 | 台灣教會公報 |
| 卷期 | 第630號 |
| 日期 | 1937/9 |
| 頁數 | 3-5 |
白話字（原文數位化）
Lō͘-tek-kì ê Gián-kiù
Soat-hong ia̍t-lâm
(Chiap 8 goe̍h tē 6 bīn)
1937年9月630期 3-5
- Sèng Sîn ê ín-chhoā.
5─7 chat: “Pho-a-su mn̄g koah-be̍h ê thâu-lâng……tuì chá-khí kàu taⁿ tiāⁿ-tiāⁿ toà chia, chí-ū hioh tī chhù-lāi tiap-á-kú”. O-ló Chú, Lō͘-tek tiàm tī pêng-an ê be̍h-hn̂g chò-kang, koh tit-tio̍h sím-mi̍h? Chiū-sī tit-tio̍h Sèng Sîn ê chù-ì(khoàⁿ-kò͘). Pho-a-su kàu hn̂g-nih kap kang-lâng chhéng-an í-āu ; thâu chi̍t-ē chù-ba̍k, chiū-sī Lō͘-tek, thang chai lâng in-khîn chò-kang, Sèng Sîn chiū beh khoàⁿ-kò͘--lán, liâm-piⁿ mn̄g, che sī chī-chuī ê cha-bó͘-kiáⁿ? Kám-siā Chú, chīn-tiong ê kang-thâu, chò tiong-si̍t ê pò-kò: (1) Chit ê sī Mô͘-ap ê cha-bó͘ gín-ná; (2) toè Ná-o-bí tò-lâi--ê; (3) i kóng, chhiáⁿ lí chún goá khioh be̍h-seh tī koah-be̍h--ê ê āu-bīn……(4) i chiū lâi, tuì chá kàu taⁿ tiāⁿ-tiāⁿ tī-chia……chit chām ê pò-kò, put-chí ū kè-ta̍t. Chiū-sī kóng, chit ê sui-sī hn̄g-hn̄g ê goā-pang ê cha-bó͘-gín-ná; iáu-kú chin khiam-pi, kam-goān toè sàn-hiong ê Ná-o-bí lâi kàu-chia. Kin-ná-ji̍t lâi iā put-chí ū lé-sò͘, só͘ kóng ê oē chin ū lé-gî, m̄-nā án-ni, koh iā chin in-khîn chò-kang lâi khioh, lóng bô siáⁿ thêng-khùn. Chhin-ài ê hiaⁿ-tī chí-moē! tī-chia ū saⁿ hāng thang hō͘ lán o̍h. Chiū-sī (1) tio̍h khiam-pi; (2) siú lé-gî (tō-tek), chiū-sī ū hó ê phín-hēng; (3) koh tio̍h khîn-khîn chò-kang, nā án-ni m̄-bián lán ka-tī phín-phóng; Siōng-tè ê Sîn ta̍k-sî teh kàm-chhat, beh chiong lán ê kiâⁿ-chò lâi pâi tī Siōng-tè ê bīn-chêng, lán nā tit-tio̍h Sèng Sîn jīn-bat lán, koh oē tit-tio̍h an-uì.
8─9 chat: “Pho-a-su kā Lō͘-tek kóng, goá ê cha-bó͘-kiáⁿ ah!!……Nā chhuì-ta thang lim siàu-liân lâng só͘ chhiūⁿ ê chuí”. Pho-a-su kā Lō͘-tek kóng kuí-hāng: (1) Bo̍h-tit lī-khui chia khì pa̍t khu hn̂g khioh. (2) Tio̍h kap goá chiah ê lú-pī chò-tīn. (3) Goá í-keng hoan-hù siàu-liân lâng m̄-thang khi-hū lí, kha̍p-tio̍h lí. (4) Nā chhuì-ta thang lim tê-koàn ê chuí. Chit-chām ê lêng-thêng, thang khoàⁿ-chhut só͘ kóng (1) Bo̍h-tit khì pa̍t khu hn̂g khioh, chiū-sī ài lán éng-oán tiàm tī Chú ê lāi-bīn chò kang tit-tio̍h bí-niû, tek-khak m̄-thang khì pa̍t-uī khioh īⁿ-toan siâ-kàu ê bí-niû, chiū-sī tio̍h khîn-khîn gián-kiù Sèng-keng ê chin-tō, m̄-thang hō͘ pa̍t khoán ê siâ-soat (ké sian-ti, ké ki-tok), só͘ ín-iú. (2) Tio̍h kap goá ê lú-pī choè-tīn, chiū-sī Chú sêng-jīn lán kap I ê lô͘-po̍k siāng-lia̍t, chiū-sī thang oân-choân chiâⁿ-chò Chú ê lô͘-po̍k lah, lán nā si̍t-chāi chò Chú ê lô͘-po̍k, sī chin pêng-an bô khoà-lū lah. Lō͘-tek tit-tio̍h chit khoán ê an-uì, i ê sim loā pêng-an ah!!(3) Goá í-keng sī goā-kok lú-chú, lâng só͘ khoàⁿ-khin--ê, bô iàu-kín, goá í-keng thè lí bô khoà-lū, bô kiaⁿ-hiâⁿ, chiū-sī bô lâng káⁿ khi-hū lí lah, lí thang an-sim. Só͘-í thang chai, nā m̄-sī ū Chú ê ì-sù, chiū bô lâng ê kha̍p--tio̍h lán. (4) iū-koh lí nā chhuì-ta sî, Sèng Sîn chhin-chhiūⁿ oa̍h-chuí beh chhiong-moá lí, hō͘ lí cheng-sîn sóng-khoài. Chhin-ài ê hiaⁿ-tī chí-moē!!lán nā khîn-khîn chò-kang, gián-kiù Sèng-keng, Chú beh an-uì lán ; chí-sī lán bat chin-lí, bô hō͘ siâ-soat só͘ iô-tāng, iā beh jīn lán chò I ê lô͘-po̍k, koh hō͘ lán pêng-an bô kiaⁿ-hiâⁿ, koh ēng hong-hù ê in-tián bô hān-liōng ê Sèng Sîn, hō͘ lán cheng-sîn sóng-khoài. O-ló Chú . Bô-hān-liōng ê thiàⁿ-thàng kap ín-chhoā, Lō͘-tek tit-tio̍h chit khoán ê kéng-gū cháiⁿ-iūⁿ?
10 chat: “I chiū phak tī tē-nih pài i kóng, Goá sī goā-kok lâng, cháiⁿ-iūⁿ ē tit-tio̍h lí ê in-chêng……? Lō͘-tek ê hoaⁿ-hí kàu kám-kek, i tit-tio̍h Chú ê in-sù bô kiau-ngō͘, hoán-tńg khiam-pi phak tī tē-nih pài--i kóng, Lí bô khoàⁿ-khin goá sī goā-kok lâng, lâi lí ê hn̂g kā lí sńg-tn̄g, hoán-tńg ēng in-tián lâi khoàⁿ-kò͘ goá kàu án-ni ah!! Chhin-ài ê hiaⁿ-tī chí-moē!! Lán ná chhin-kīn Chú, ná ē tit-tio̍h Chú ê an-uì kap siúⁿ-sù, chóng-sī lán tio̍h khiam-pi lâi sêng-siū, khó-sioh ū lâng tit-tio̍h Sîn ê siúⁿ-sù, hoán-tńg khí kiau-ngō͘, chū-ko, che sī chin khó-liân, tit-tio̍h Sèng Sîn ê khoàⁿ-kò͘, lán tio̍h ná khiam-pi, chhin-chhiūⁿ Lō͘-tek lâi phak tī Chú ê kha-ē, chiū ē ná tit-tio̍h Sèng Sîn ê thiàⁿ-thàng, ná káng-kiù lo̍h-khì, chiū ná chai.”
11 chat: “Pho-a-su kóng, tuì lí ê tiōng-hu sí liáu-āu, lí só͘ khoán-thāi ta-ke ê sū……lâng lóng ū kā goá kóng-bêng lah.” Tuì chit kù thang khoàⁿ-chhut Pho-a-su m̄-nā hó-gia̍h nā-tiāⁿ, iā sī ū sè-le̍k ê lâng, só͘-í hoān-sū lóng ū lâng khì kā i kóng lah; Lō͘-tek iáu tī Mô͘-ap ê sū, i iā ē chai, sí tiōng-hu, ū hàu ta-ke, jím-nāi siū-khó͘ toè ta-ke lâi, kàu chheⁿ-so͘ ê só͘-chāi, i lóng chai lah. Chhin-ài ê hiaⁿ-tī chí-moē!! Lán tī sè-sio̍k siū Mô͘-kuí pé-pa̍k ê sî, Siōng-tè í-keng bat--lán, lán keng-kè ta̍k-hāng ê khó͘-thàng, iu-chhiû, pi-ài[sic], Siōng-tè lóng chai-iáⁿ, só͘-í lán tio̍h thun-lún jím-nāi, chiū Sèng Sîn beh chi̍t-pō͘ chi̍t-pō͘ lâi ín-chhoā kà-sī--lán, an-uì--lán; m̄-nā án-ni, iā beh kā lán chiok-hok.
12 chat: Pho-a-su koh kóng, “Goān Iâ-hô-hoa pò-tap lí ê só͘ chò, lí lâi hioh tī Iâ-hô-hoa Siōng-tè ê si̍t-ē, goān lí tit-tio̍h I ê toā siúⁿ-sù”. Lō͘-tek m̄-nā tit-tio̍h an-uì, koh tit-tio̍h chiok-hok kóng, “Goān Iâ-hô-hoa pò-tap lí ê só͘ chò.” Thang chai lán nā chhin-kīn Chú, kiâⁿ Chú ê bēng-lēng, Siōng-tè ē pò-tap lán, iū-koh “tiàm tī Iâ-hô-hoa ê si̍t-ē, chiū ē tit-tio̍h I ê toā siúⁿ-sù”. Lán nā ta̍k chá-khí tha̍k Sèng-keng, chiū ê si̍t-ē, siū I ê siúⁿ-sù. Lâng tī sè-kan sui-jiân siū-khó͘, nā-sī ji̍p tī lêng-kài ê lāi-bīn, chiū lóng bē kì-tit kan-khó͘, lán nā chò kang kan-khó͘ ê sî, siông-siông lâi lim sio̍k lêng ê Bi̍t (Sèng-chheh), chiū ē siū an-uì, Chit chat iā sī tē-sì phiⁿ ê chiok-sû, tuì chit phiⁿ thang kà-sī lán chai: tiàm Siōng-tè ê si̍t-ē, chiū-sī(1) piáu-bêng lâng kap Siōng-tè ê koan-hē, chiū-sī lâng ē thang kīn-oá Siōng-tè. (2) Piáu-bêng lâng ē tit-tio̍h Siōng-tè ê thiàⁿ-thàng. (3) Piáu-bêng lâng ū siū Siōng-tè pó-hō͘, tì-ìm ê koân-lī, chhin-chhiūⁿ án-ni, lán nā tiàm tī Siōng-tè ê si̍t-ē, loā pêng-an ah? Lán koh siūⁿ chit phiⁿ ê chiok-sû, tī Lō͘-tek ū èng-giām á bô? Ū, chin toā ê èng-giām, kàu boé chiū chai. O-ló Chú! Chú ê oē lóng ē èng-giām--ê, só͘-í lán tio̍h kin-suî Chú.
13 chat: “Lō͘-tek kóng, Goá ê Chú chêng; goá sui-jiân boē pí-tit lú-pī ê chi̍t-ê, lí iáu-kú an-uì goá, tuì lí ê lú-pī kóng chiah nī chē thiàⁿ-thàng ê oē.” Chàn-bí Chú! Lō͘-tek ná siū o-ló, siū in-sù, siū chiok-hok; lóng bô kiau-ngō͘ chū-ko, sī ná khiam-pi, ná ka-kī kàng-kē, ná hián-chhut kám-siā ê oē, koh-khah khîn lâi khioh (goān tit-tio̍h in-tián tī lí ê bīn-chêng). Kam-goān toè ta-ke chò khit-chia̍h, lâi kiâⁿ siū lâng thí-chhiò ê lō͘, ko͘-toaⁿ ê lō͘, Kok-kok-thaⁿ ê lō͘, pi-chhám ê lō͘, sàn-hiong ê lō͘, m̄-goān kiâⁿ sè-kan ê lō͘, chū-iû ê lō͘, kiám-chhái siūⁿ i ê tang-sāi í-keng ta̍h-tio̍h hó tē-pō͘, kè-tio̍h hó-gia̍h ang lah. Nā sī i kam-goān chi̍t-pō͘ chi̍t-pō͘ lâi siū Sèng Sèng ê ín-chhoā, lâi moá-moá sêng-siū Sèng Sîn ê thiàⁿ-thàng, kî-û lóng bô poàⁿ-hāng. Chhin-ài ê hiaⁿ-tī chí-moē!! Kan-ta Thian-kok kap gī ū thang ǹg-bāng, ū thang hō͘ lán moá-chiok, kî-û lóng bô poàⁿ-hāng sio̍k sè, lóng bô thang hō͘ lán ǹg-bāng, kan-ta sio̍k Sîn ê in-sù ū thang hō͘ lán ǹg-bāng nā-tiāⁿ. Só͘-í lán iā tio̍h chi̍t-pō͘ chi̍t-pō͘ lâi siū Sèng Sîn ê ín-chhoā.
漢羅（Ùi原文改寫）
路得記的研究
雪風逸嵐
(接8月第6面)
1937年9月630期 3-5
- 聖神的引chhoā。
5─7節：「波阿斯問割麥的頭人……對早起到taⁿ定定蹛遮，只有歇佇厝內霎仔久」。呵咾主，路得踮佇平安的麥園做工，閣得著甚物？就是得著聖神的注意(看顧)。波阿斯到園裡佮工人請安以後；頭一下注目，就是路得，通知人殷勤做工，聖神就欲看顧--咱，連鞭問，這是chī-chuī的查某囝？感謝主，盡忠的工頭，做忠實的報告：(1)這个是摩押的查某囡仔；(2)綴拿俄米倒來--的；(3)伊講，請你准我抾麥屑佇割麥--的的後面……(4)伊就來，對早到taⁿ定定佇遮……這站的報告，不止有價值。就是講，這个雖是遠遠的外邦的查某囡仔；猶過真謙卑，甘願綴散凶的拿俄米來到遮。今仔日來也不止有禮數，所講的話真有禮儀，毋但按呢，閣也真殷勤做工來抾，攏無啥停睏。親愛的兄弟姊妹！佇遮有三項通予咱學。就是(1)著謙卑；(2)守禮儀(道德)，就是有好的品行；(3)閣著勤勤做工，若按呢毋免咱家己phín-phóng；上帝的神逐時咧鑑察，欲將咱的行做來排佇上帝的面前，咱若得著聖神認識咱，閣會得著安慰。
8─9節：「波阿斯共路得講，我的查某囝啊！！。。。。。。若喙焦通啉少年人所上的水」。波阿斯共路得講幾項：(1)莫得離開遮去別坵園抾。(2)著佮我遮的女婢做陣。(3)我已經吩咐少年人毋通欺負你，磕著你。(4)若喙焦通啉茶罐的水。這站的靈程，通看出所講(1)莫得去別坵園抾，就是愛咱永遠踮佇主的內面做工得著米糧，的確毋通去別位抾異端邪教的米糧，就是著勤勤研究聖經的真道，毋通予別款的邪說(假先知，假基督)，所引誘。(2)著佮我的女婢做陣，就是主承認咱佮伊的奴僕siāng列，就是通完全成做主的奴僕啦，咱若實在做主的奴僕，是真平安無掛慮啦。路得得著這款的安慰，伊的心偌平安啊！！(3)我已經是外國女子，人所看輕--的，無要緊，我已經替你無掛慮，無驚惶，就是無人敢欺負你啦，你通安心。所以通知，若毋是有主的意思，就無人的磕著咱。(4)又閣你若喙焦時，聖神親像活水欲充滿你，予你精神爽快。親愛的兄弟姊妹！！咱若勤勤做工，研究聖經，主欲安慰咱；指示咱捌真理，無予邪說所搖動，也欲認咱做伊的奴僕，閣予咱平安無驚惶，閣用豐富的恩典無限量的聖神，予咱精神爽快。呵咾主。無-限量的疼痛佮引chhoā，路得得著這款的境遇怎樣？
10節：「伊就仆佇地裡拜伊講，我是外國人，怎樣會得著你的恩情……？路得的歡喜到感激，伊得著主的恩賜無驕傲，反轉謙卑仆佇地裡拜--伊講，你無看輕我是外國人，來你的園共你損斷，反轉用恩典來看顧我到按呢啊！！親愛的兄弟姊妹！！咱那親近主，那會得著主的安慰佮賞賜，總是咱著謙卑來承受，可惜有人得著神的賞賜，反轉起驕傲，自高，這是真可憐，得著聖神的看顧，咱著那謙卑，親像路得來仆佇主的跤下，就會那得著聖神的疼痛，那講究落去，就那知。」
11節：「波阿斯講，對你的丈夫死了後，你所款待大家的事……人攏有共我講明啦。」對這句通看出波阿斯毋但好額nā-tiāⁿ，也是有勢力的人，所以凡事攏有人去共伊講啦；路得猶佇摩押的事，伊也會知，死丈夫，有孝大家，忍耐受苦綴大家來，到生疏的所在，伊攏知啦。親愛的兄弟姊妹！！咱佇世俗受魔鬼把縛的時，上帝已經捌--咱，咱經過逐項的苦痛，憂愁，悲哀，上帝攏知影，所以咱著吞忍忍耐，就聖神欲一步一步來引chhoā教示--咱，安慰--咱；毋但按呢，也欲共咱祝福。
12節：波阿斯閣講，「願耶和華報答你的所做，你來歇佇耶和華上帝的翼下，願你得著伊的大賞賜」。路得毋但得著安慰，閣得著祝福講，「願耶和華報答你的所做。」通知咱若親近主，行主的命令，上帝會報答咱，又閣「踮佇耶和華的翼下，就會得著伊的大賞賜」。咱若逐早起讀聖經，就的翼下，受伊的賞賜。人佇世間雖然受苦，若是入佇靈界的內面，就攏袂記得艱苦，咱若做工艱苦的時，常常來啉屬靈的蜜(聖冊)，就會受安慰，這節也是第四篇的祝詞，對這篇通教示咱知：踮上帝的翼下，就是(1)表明人佮上帝的關係，就是人會通近倚上帝。(2)表明人會得著上帝的疼痛。(3)表明人有受上帝保護，致蔭的權利，親像按呢，咱若踮佇上帝的翼下，偌平安啊？咱閣想這篇的祝詞，佇路得有應驗抑無？有，真大的應驗，到尾就知。呵咾主！主的話攏會應驗--的，所以咱著跟隨主。
13節：「路得講，我的主前；我雖然未比得女婢的一个，你猶過安慰我，對你的女婢講遮爾濟疼痛的話。」讚美主！路得那受呵咾，受恩賜，受祝福；攏無驕傲自高，是那謙卑，那家己降低，那顯出感謝的話，閣較勤來抾(願得著恩典佇你的面前)。甘願綴大家做乞食，來行受人恥笑的路，孤單的路，各各他的路，悲慘的路，散凶的路，毋願行世間的路，自由的路，檢采想伊的tang-sāi已經踏著好地步，嫁著好額翁啦。若是伊甘願一步一步來受聖聖的引chhoā，來滿滿承受聖神的疼痛，其餘攏無半項。親愛的兄弟姊妹！！干焦天國佮義有通向望，有通予咱滿足，其餘攏無半項屬世，攏無通予咱向望，干焦屬神的恩賜有通予咱向望nā-tiāⁿ。所以咱也著一步一步來受聖神的引chhoā。