徹底十字架的精神的生活
Thiat-té Si̍p-jī-kè ê cheng-sîn ê Seng-oa̍h
文獻資訊
| 項目 | 資料 |
|---|---|
| 作者 | 蕭樂善 Siau Lo̍k-siān |
| 卷期 | 台灣教會公報 |
| 卷期 | 第630號 |
| 日期 | 1937/9 |
| 頁數 | 22 |
白話字（原文數位化）
Thiat-té Si̍p-jī-kè ê cheng-sîn ê Seng-oa̍h
Siau Lo̍k-siān
1937年9月630期 22
Kàu-hoē put-sî kóng-khí si̍p-jī-kè, chha-put-to m̄-bat chi̍t lé-pài bô thiaⁿ kìⁿ si̍p-jī-kè saⁿ jī. Che sī tio̍h. Chóng-sī lán sī kan-ta ēng choè Ki-tok-kàu ê kì-hō nā-tiāⁿ, án-ni sī khang-khang. Lán chin ióng-kám the̍h khí si̍p-jī-kè; chóng-sī lán khah bô hó-táⁿ chiong Si̍p-jī-kè the̍h lâi khǹg tī lán ê seng-oa̍h. Lán ū chi̍t ê chin chhut-miâ ê khoat-tiám, chiū-sī hó-táⁿ hoah chìn, toā siaⁿ thoân Chú ê Si̍p-jī-kè; chóng-sī lóng bô khoàⁿ-kìⁿ i ū si̍p-jī-kè ê cheng-sîn ê seng-oa̍h. Á-sī nā thiaⁿ-kìⁿ hi-seng, hōng-hiàn, tio̍h pàng-sak ka-kī, ēng chheng-khì ê sim tè Chú chiū khoàⁿ-kìⁿ teh kiu, ná kiu. Nā bô kan-sia̍p goá ê seng-oa̍h, goá chiū hó-táⁿ thoân si̍p-jī-kè ; chóng-sī nā kan-sia̍p tio̍h i ê seng-oa̍h chha-put-to soà cháu. Che cháiⁿ-iūⁿ oē thang kiò choè sio̍k si̍p-jī-kè ê lâng? Siông-siông khoàⁿ-kìⁿ tē-it chhut-la̍t, tē-it toā siaⁿ thoân Chú ê oē , tē-it uî-hoán Sèng-keng ê kà-sī, kap Sèng-keng ê cheng-sîn chha chin hn̄g. Tuì le̍k-sú lâi khoàⁿ , lán kiám bô khoàⁿ-kìⁿ jia̍t-sim thoân Chú ê si̍p-jī-kè ê lâng chin-si̍t pàng-sak ka-kī kap toē-siōng-tek bêng-lī, uī-tio̍h Hok-im lâi hōng-hiàn. In-uī sī kan-ta thoân si̍p-jī-kè nā-tiāⁿ, in iā kam-goān uī-tio̍h só͘ thoân ê si̍p-jī-kè lâi sún-sit it-chhè, koh uī-tio̍h in só͘ thoân ê si̍p-jī-kè lâi sí, Lán ū chit khoán cheng-sîn á bô?
Lán m̄-sī kan-ta thoân tō-lí jia̍t-sim; che sī khah khoài, khah bô chek-jīm ê kang. Lán tio̍h chai, lán iā tio̍h chiàu-kò͘ Hok-im hō͘ i ū la̍t, oē khiā-chāi, tî-hông sè-kan-tek iàu-sò͘ chham-chhap tī Hok-im ê lāi-bīn. Kin-á-ji̍t lán kiám bô khoàⁿ-kìⁿ ū chin-choē sè-sio̍k tek iàu-sò͘ kiáu-kiáu tī kàu-hoē-lāi. Nā-sī bô chek-jīm ê lâng khoàⁿ che bô iàu-kín, chóng-sī nā kám-kak chek-jīm, ài kò͘-siú sûn-chuī ê Hok-im, i tek-khak hiàn-sin lâi cheng-chiàn, bô siū khoân-kéng, pêng-iú-chêng só͘ chi-phoè, put-kò ài Hok-im chiū-sī.
Lán nā-sī thang thiat-té-tek ēng si̍p-jī-kè ê cheng-sîn lâi seng-oa̍h, kàu tó-uī, á-sī put-lūn chhòng sím-mi̍h, ēng Siōng-tè choè tiong-sim , i só͘ choè ê kang tek-khak choē-choē tek-choē Siōng-tè , iā ta̍k hāng tek-khak boē cheng-kong. Bô ēng Siōng-tè choè tiong-sim ê kî-tó, á-sī kóng Sèng-keng ê oē boē thang sìn-iōng, put-kò sī chi̍t khoán ê chhiú-toāⁿ jî-í. Kin-á-ji̍t ū pit-iàu kó-jiân oē Si̍p-jī-kè ê cheng-sîn lâi seng-oa̍h, lâi choè-kang.
漢羅（Ùi原文改寫）
徹底十字架的精神的生活
蕭樂善
1937年9月630期 22
教會不時講起十字架，差不多毋捌一禮拜無聽見十字架三字。這是著。總是咱是干焦用做基督教的記號nā-tiāⁿ，按呢是空空。咱真勇敢提起十字架；總是咱較無好膽將十字架提來囥佇咱的生活。咱有一个真出名的缺點，就是好膽喝進，大聲傳主的十字架；總是攏無看見伊有十字架的精神的生活。抑是若聽見犧牲，奉獻，著放拺家己，用清氣的心綴主就看見咧勼，那勼。若無干涉我的生活，我就好膽傳十字架；總是若干涉著伊的生活差不多紲走。這怎樣會通叫做屬十字架的人？常常看見第一出力，第一大聲傳主的話，第一違反聖經的教示，佮聖經的精神差真遠。對歷史來看，咱敢無看見熱心傳主的十字架的人真實放拺家己佮地上tek名利，為著福音來奉獻。因為是干焦傳十字架nā-tiān，in也甘願為著所傳的十字架來損失一切，閣為著in所傳的十字架來死，咱有這款精神抑無？
咱毋是干焦傳道理熱心；這是較快，較無責任的工。咱著知，咱也著照顧福音予伊有力，會徛在，持防世間tek要素參插佇福音的內面。今仔日咱敢無看見有真濟世俗tek要素攪攪佇教會內。若是無責任的人看這無要緊，總是若感覺責任，愛顧守純粹的福音，伊的確獻身來爭戰，無受環境，朋友情所支配，不過愛福音就是。
咱若是通徹底tek用十字架的精神來生活，到佗位，抑是不論創甚物，用上帝做中心，伊所做的工的確濟濟得罪上帝，也逐項的確袂精工。無用上帝做中心的祈禱，抑是講聖經的話袂通信用，不過是一款的手段而已。今仔日有必要果然會十字架的精神來生活，來做工。