長執的使命
Tióng Chip ê Sù-bēng
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第628號 |
| 日期 | 1937/7 |
| 頁數 | 1-2 |
白話字（原文數位化）
Tióng Chip ê Sù-bēng
1937年7月628期 1-2
I. Chun-tiōng koh giâm-siú Sèng-ji̍t ê lé-pài.
Tióng Chip uī-tio̍h tī sìn-gióng-tek beh chò chèng sìn-tô͘ ê bô͘-hoān, thâu-chi̍t-hāng tio̍h chun-tiōng koh giâm-siú Sèng-ji̍t ê lé-pài. Chū-jiân Sèng-ji̍t í-goā ê chi̍p-hoē, iā tio̍h koan-sim; chóng-sī te̍k-pia̍t tī Sèng-ji̍t ê lé-pài tio̍h ài chhut-se̍k. Nā bô tio̍h tong-ti̍t ê Tióng Chip, khah-hó tio̍h chē chìn-chêng, thè Bo̍k-su kî-tó, kiû Sèng Sîn pang-chān.
II. Ū kèng-khiân ê chong-kàu keng-giām.
Sî-sî ài tha̍k Sèng-keng kap kî-tó. Tio̍h ka-kī kéng-séng, m̄-thang lia̍h-chò lán chò tng-chit--ê, sī chit ê í-keng chut-gia̍p ê sìn-chiá lah. Sèng-keng ê gián-kiù-hoē , á-sī chó-thian ê kî-tó-hoē, tio̍h poah-kang chhut-se̍k.
III. Chīn-la̍t thoân tō-lí.
Khiok m̄-sī kóng tio̍h tam-tng chhin-chhiūⁿ Thoân-kàu-su hit khoán ê jīm-bū. Tī lí ê chit-gia̍p á-sī kau-poê pêng-iú, ē thang chò kò-jîn thoân-tō ê kang-tiâⁿ. Chong lí ê ka-têng chò thoân-tō-só͘ á Chú-ji̍t-o̍h ê kàu-sek, sī chin hó ê lī-iōng.
IV. Kàu-hoē ê hoē-gī tio̍h ài chhut-se̍k.
Pâi-tû bān-poaⁿ ê chó͘-tòng lâi hù hoē-gī, tâng-sim pān-lí kàu-hoē ê chèng-sū-gia̍p. Hoē-gī-tiong tio̍h ū hia̍p-tiāu(協調) ê sim, m̄-thang kò͘-chip ka-kī ê ì-kiàn. Tio̍h ēng kî-tó, thàn Siōng-tè ê chí-ì lâi gī-sū. Bêng-ū-sim kap to̍k-chhâi-io̍k(獨裁慾) tio̍h ài phah-sí, sêng-sim sêng-ì, uī-tio̍h kàu-hoē lâi hōng-sū.
V. Sî-siông uī-tio̍h Thoân-kàu-su lêng-tek chhiong-si̍t ê hong-bīn lâi kè-e̍k.
Ū-sî tio̍h pī-pān tú-hó ê chheh, hō͘ Thoân-kàu-su thang gián-kiù. Ū-sî tio̍h hō͘ i thang siu-ióng ê ki-hoē. Ū-sî tio̍h siat-hoat hō͘ i ê seng-khu thang khì chēng-ióng. Tuì i ê ka-têng , iā tio̍h hō͘ i bián ū sím-mi̍h khoà-lū lâi chó͘-tòng tī thoân-kàu ê kang.
VI. Lí-kái kàu-hoē kok hong-bīn ê oa̍h-tāng.
Tuì kàu-hoē ê Chú-ji̍t-o̍h, Hū-jîn-hoē, Chheng-liân-hoē, Pò͘-tō-tuī téng-téng hêng-sū(行事), tio̍h ài chhim-bat. Kàu-hoē sī chi̍t ê iú-ki-thé(有機体), uī-tio̍h ài khui-khoah Hok-im, kok ki-lêng(機能) tio̍h ài cha̍p-hun hoat-hui--i. Tióng Chip teh khoàⁿ Chú-ji̍t-o̍h ê Kàu-oân, á-sī kàu-hoē ê sàu-tè--ê……tio̍h lia̍h chò sī pêⁿ-pêⁿ iàu-kín.
VII. Tuì sìn-tô͘ tú-tio̍h khùn-lân ê sî, tio̍h kap Thoân-kàu-su hia̍p-le̍k khì chióng-lē kap oān-chō͘--in.
Ū sìn-tô͘ kóng, Kàu-hoē ê Jīm-chit-chiá, tī lán tú-tio̍h kan-khó͘ ê sî, m̄-bat lâi hóng-būn lán; kan-ta kàu beh tok-chhiok chîⁿ-hāng, á-sī tê-iân, chiah teh lâi.
漢羅（Ùi原文改寫）
長執的使命
1937年7月628期 1-2
I. 尊重閣嚴守聖日的禮拜。
長執為著佇信仰tek欲做眾信徒的模範，頭一項著尊重閣嚴守聖日的禮拜。自然聖日以外的集會，也著關心；總是特別佇聖日的禮拜著愛出席。若無著當值的長執，較好著坐進前，替牧師祈禱，求聖神幫贊。
II. 有敬虔的宗教經驗。
時時愛讀聖經佮祈禱。著家己警醒，毋通掠做咱做當職--的，是這个已經卒業的信者啦。聖經的研究會，抑是早天的祈禱會，著撥工出席。
III. 盡力傳道理。
卻毋是講著擔當親像傳教師彼款的任務。佇你的職業抑是交陪朋友，會通做個人傳道的工程。將你的家庭做傳道所抑主日學的教室，是真好的利用。
IV. 教會的會議著愛出席。
排除萬般的阻擋來赴會議，同心辨理教會的眾事業。會議中著有協調的心，毋通固執家己的意見。著用祈禱，趁上帝的旨意來議事。名譽心佮獨裁慾著愛拍死，誠心誠意，為著教會來奉仕。
V. 時常為著傳教師靈tek充實的方面來計畫。
有時著備辦拄好的冊，予傳教師通研究。有時著予伊通修養的機會。有時著設法予伊的身軀通去靜養。對伊的家庭，也著予伊免有甚物掛慮來阻擋佇傳教的工。
VI. 理解教會各方面的活動。
對教會的主日學，婦人會，青年會，佈道隊等等行事，著愛深捌。教會是一个有機体，為著愛開闊福音，各機能著愛十分發揮--伊。長執咧看主日學的教員，抑是教會的掃地--的……著掠做是平平要緊。
VII. 對信徒拄著困難的時，著佮傳教師協力去獎勵佮援助--in。
有信徒講，教會的任職者，佇咱拄著艱苦的時，毋捌來訪問咱；干焦到欲督促錢項，抑是題捐，才咧來。