人敢偷提上帝的物mah？

Lâng kiám thau-the̍h Siōng-tè ê mi̍h mah?

文獻資訊

項目	資料
作者	孫雅各 Sun Ngá-kok
卷期	台灣教會公報/芥菜子
卷期	第628號
日期	1937/7
頁數	21-23

白話字（原文數位化）

Lâng kiám thau-the̍h Siōng-tè ê mi̍h mah?

Sun Ngá-kok

1937年7月628期 21-23

Lín kèng-jiân thau-the̍h Goá ê mi̍h……chiū-sī tī eng-kai la̍p ê cha̍p-hūn-chi̍t kap lé-mi̍h(Má-la̍h-ki 3:8).

Lâng nā thau-the̍h pa̍t lâng ê mi̍h, I sī chha̍t-á. ia̍h lâng chū-jiân bô chun-kèng hit khoán ê lâng. I sī chha-put-to tē-it hā-chiān ê lâng. Lán sêng-jîn I ê só͘ choè m̄-tio̍h, in-uī I thau-the̍h lâng ê mi̍h. Nā-sī lâng thau-the̍h Siōng-tè ê mi̍h sím-mi̍h khoán? Má-la̍h-ki ū kóng lâng thau-the̍h Siōng-tè ê mi̍h. Chiū-sī lâng, in-uī tham-sim, eng-kai tio̍h hō͘ Siōng-tè-ê bô hō͘ I, chit-ê nā chiàu Má-la̍h-ki só͘ kóng, chiū-sī thau-the̍h I ê mi̍h. Lâng só͘ eng-kai tio̍h hō͘ I-ê sī sím-mi̍h? Sèng-keng choē-choē só͘-chāi ū kì-bêng tio̍h hiàn 10 hūn-chi̍t í-siōng. “Eng-kai la̍p ê 10 hūn-chi̍t kap lé-mi̍h”. Lé-mi̍h sī cha̍p-hūn-chi̍t í-goā. Tī Kū-iok sî-tāi, Iû-thài lâng ū sêng-jīn chit-ê sī eng-kai. In put-chí soè-jī si̍t-hêng chit ê hoat-tō͘. āu-lâi tī Sin-iok sî-tāi sìn-chiá m̄-nā hiàn 10 hūn-chi̍t; in hiàn choân-pō͘ só͘ ū ê mi̍h hō͘ Siōng-tè. “In-uī kìⁿ ū chhân-hn̂g chhù-the̍h ê, lóng boē I, toà in só͘ boē ê gûn hē tī Sù-tô͘ ê kha-ē”(Sù-tô͘ Hēng-toān 4:34).

Lâng toà tī un-tián ê sî-tāi, tiāⁿ-tio̍h tio̍h khah-iâⁿ Lu̍t-hoat sî-tāi ê lâng. Tek-khak bô lâng oē kóng, lán tī Hok-im sî-tāi ê lâng khah-su Lu̍t-hoat sî-tāi ê lâng.

Iâ-so͘ ê kà-sī ê tiong-kan put-chí ū kóng-khí lâng kap chîⁿ, á-sī bu̍t-chit ê koan-hē. I ê phì-jū mā sī ū choē-choē koan-hē chit hāng. Chhin-chhiūⁿ gōng hó-gia̍h lâng ê phì-jū, á-sī chú-lâng kap I ê lô͘-po̍k sǹg-siàu ê phì-jū, á-sī hó-gia̍h siàu-liân ê koaⁿ lâi mn̄g Iâ-so͘ lūn éng-seng ê sū, á-sī chiú-koáⁿ ê hū-jîn-lâng ê hiàn-kim tī Sèng-tiān téng, lóng sī iàu-kín ê kà-sī, thang chí-sī lán choè I ê ha̍k-seng ê lâng.

Tuì gián-kiù Sèng-keng koan-hē lán kap bu̍t-chit ê koan-hē, lán thang bêng-pe̍k kuí-nā hāng:

Lán tio̍h sêng-jīn lán só͘ ū ê mi̍h, lóng sī Siōng-tè ê mi̍h. I kan-ta ū chioh lán ēng. Lán tio̍h put-chí kám-siā I sī gia̍p-chú.
Lán tī boa̍t-ji̍t tio̍h ēng choân-pō͘ só͘ ēng ê, kap Siōng-tè sǹg-siàu chheng-chhó.
Lán tio̍h sêng-jīn lán ta̍k nî só͘ thàn--ê, tio̍h te̍k-pia̍t hiàn chi̍t-pō͘-hūn thang pang-chān I ê Sèng-kok ê kang. Chi̍t pō͘-hūn chiàu Sèng-keng bêng-bêng ê kà-sī, chiū-sī 10 hūn-chi̍t í-siōng. Chit hāng nā bô si̍t-hêng, chiū-sī “thau-the̍h Siōng-tè ê mi̍h”.

Kin-á-ji̍t tī lán ê kàu-hoē-lāi, lán put-chí ū thiaⁿ-kìⁿ bu̍t-chit ê tāi-chì, ū choē-choē kè-e̍k, lán lóng bô thang si̍t-hêng, in-uī só͘-huì put-chiok. Chîⁿ ê put-chiok put-chí ū chó͘-tòng lán ê kang. Cháiⁿ-iūⁿ án-ni? Cháiⁿ-iūⁿ Siōng-tè ê kok ê kang, oē hiah-nih oh-tit lâi si̍t-hêng? Sè-kan ê mi̍h lóng sī I ê, I sī siōng hó-gia̍h! Chóng-sī lán m̄ sêng-jīn I choè Chú-Lán ū “Thau-the̍h I ê mi̍h”, kiám m̄-sī ū iáⁿ?

Ho̍k-sāi Siōng-tè m̄-sī kan-ta ēng chhuì, gîm-si, kî-tó, á-sī thiaⁿ tō-lí, ia̍h lé-pài-ji̍t chip-sū phâng-poâⁿ ê sî, hiàn-chi̍t-lia̍p âng-âng ê lé-mi̍h tī poâⁿ-téng nā-tiāⁿ. Lâng nā iáu-bē o̍h hiàn-kim ê hoat-tō͘, i iáu-bē bat ho̍k-sāi Siōng-tè ê hok-khì. Lâng eng-kai tio̍h ēng chin chhù-sū ê hoat-tō͘ hiàn-kim. Tio̍h chit ê phō͘-á thang siá i ê siu-ji̍p kim, ia̍h i ê hiàn-kim, m̄-thang chhìn-chhái, m̄-thang khah-su la̍p koaⁿ-thiaⁿ ê sè ê chhù-sū. Goá khak-sìn, nā-sī ta̍k ê sìn-chiá oē si̍t-hêng hiàn 10 hūn-chi̍t hō͘ kàu-hoē, lán oē tit-tio̍h ē-kha chit 3 hāng ê kiat-kó:-

Lán kàu-hoē ê sìn-gióng seng-oa̍h oē ke chin oa̍h-tāng. Hiàn-kim kap lâng ê jia̍t-sim chin ū saⁿ koan-hē. Hit ê kiat-kó, chiū-sī cheng-sîn-tek ê kak-chhíⁿ.
Chit ê hoat-tō͘ nā si̍t-hêng, oē kái-koat lán kàu-hoē-lāi lóng-chóng bu̍t-chit ê būn-toê. Tâi-oân Kàu-hoē oē suî-sî to̍k-li̍p. Lán hiān-sî sī sòng-hiong ê kàu-hoē, lán nā-sī bô si̍t-hêng Sèng-keng hiàn-kim ê hoat-tō͘, chiū lán ê kàu-hoē beh éng-oán choè sòng-hiong ê kàu-hoē. Sòng-hiong kàu-hoē, m̄-nā bu̍t-chit sòng-hiong, chóng-sī iû-goân sī sîn-lêng keng-giām-siōng ê sòng-hiong! Chit nn̄g hāng ū saⁿ koan-liân ê koan-hē. Goá bat kap choē-choē hiàn 10 hūn-chi̍t ê lâng kóng-oē, ia̍h in lóng choè siāng khoán ê kan-chèng, in si̍t-hêng chit ê hoat-tō͘, m̄-sī kan-ta lī-ek Siōng-tè ê kok, sī toā lī-ek in pún-sin, hō͘ in khah jia̍t-sim, khah tì-ì Siōng-tè ê kok ê sū. Lán nā-sī thàn Siōng-tè ê kà-sī, tiāⁿ-tio̍h lán khah ū hok-khì.
Ta̍k lâng, ta̍k só͘-chāi, nā-sī si̍t-hêng 10 hūn-chi̍t hiàn-kim ê hoat-tō͘, sè-kài oē kín kui tī Chú. Cháiⁿ-iūⁿ Siōng-tè kok ê chìn-pō͘ oē hiah bān? In-uī kàu-hoē put-chí sòng-hiong; bô chîⁿ thang choè poàⁿ hāng. Lán sī bô tì-ì sè-kài kui tī Chú á m̄-sī? Sū-si̍t m̄-sī! Lán ê hiàn-kim ū hián-chhut lán ê cheng-sîn bêng-bêng. Lán sī chhin-chhiūⁿ hit ê siàu-liân ê koaⁿ lâi chhē Iâ-so͘, nā-sī m̄-bián hiàn i ê mi̍h, i hoaⁿ-hí tè Iâ-so͘. Chóng-sī nā-sī tio̍h hiàn i ê kim, i bô ài choè Iâ-so͘ ê ha̍k-seng. Lán tì-ì ka-kī ê sêng-kong, ka-kī ê ‘hok-khì’, pí hō͘ sè-kài kui tī Chú khah kè-thâu, chin khó-lîn.

Lán ê Bú-hoē m̄-sī chin toā ê kàu-hoē. Tī Ka-ná-tāi m̄-sī ū chin choē keng bô to̍k-li̍p ê kàu-hoē, tio̍h siū Thoân-tō-kio̍k ê pó͘-chō͘. iáu-kú in ta̍k nî m̄-nā pó͘-chō͘ hiah choē iūⁿ tī hit pêng, in iû-goân ū kià pó͘-chō͘ kim kàu Tâi-oân thang pó͘-chō͘ lán. Cháiⁿ-iūⁿ oē án-ni? Sī in-uī ū chin choē lâng tī hit pêng chin gâu hiàn-kim. Tī Bú-hoē m̄-sī ta̍k ê sìn-chiá hiàn 10 hūn-chi̍t; iáu-kú ū chin choē, ia̍h sī tuì in si̍t-hêng chit khoán ê hiàn-kim hoat. Lán toà Tâi-oân ê sìn-chiá tek-khak m̄-thang khah-su in, m̄-thang hō͘ in pí lán khah tì-ì lán ka-kī ê kàu-hoē. Lán thiàⁿ ka-kī ka-têng lāi ê lâng, kiám thang khah-su pa̍t uī ê lâng thiàⁿ lán? Lán m̄-thang su in ê hiàn-kim. In uī-tio̍h lán ê kàu-hoē(in m̄-bat khoàⁿ-kìⁿ ê) nā hiàn 10 hūn chi̍t, lán uī-tio̍h ka-kī ê kàu-hoē tio̍h hiàn loā-choē?

Lán ka-kī ê kàu-hoē tio̍h kó͘-bú hō͘ i kín to̍k-li̍p ū chi̍t keng Tiúⁿ-ló Kàu-hoē. Chóng-sī m̄-nā án-ni, tio̍h koh pang-chān soè keng kàu-hoē. Tī Se-iûⁿ ū chi̍t keng Tiúⁿ-ló Kàu-hoē, ū koh siat 11 keng kàu-hoē tī hit chhī-lāi, ia̍h m̄-bat siū Thoân-tō-kio̍k ê pó͘-chō͘. M̄-nā án-ni, in ū hiàn chin-choē chîⁿ pang-chān Soan-tō-hoē, in mā tam-tng 2, 3 ê Soan-kàu-su ê só͘-huì. Koh chit keng kàu-hoē, ū chhe 50 ê Soan-kàu-su khì pa̍t kok thoân tō-lí, ia̍h só͘-huì choân-pō͘ ka-kī hū-tam! Kàu-hoē ēng sím-mi̍h hoat-tō͘ lâi choè hiah toā ê sū-gia̍p? Kan-ta chi̍t kù oē, oē soat-bêng chit hāng: In khah choē chim-chiok si̍t-hêng hiàn 10 hūn chi̍t!

Lán tāi-ke ū ki-hoē thang kap Siōng-tè saⁿ-kap choè kang, chiām-chiām hō͘ sè-kài kui tī I. Lán ū sî bô thang ka-kī khì thoân, chóng-sī thang tuì hiàn-kim lâi ū hūn tī hit ê kang. Tī Tâi-oân 100 lâng ê tiong-kan ū chi̍t ê sìn-chiá, lán ū chin toā iàu-kín ê kang tī-chia thang choè. Lán m̄-thang ǹg-bāng pa̍t lâng oē thoè lán choè chit ê kang, á-sī hū-tam hit ê só͘-huì. Chit ê chiū-sī lán toà Tâi-oân ê lâng ê ki-hoē kap te̍k-koân, ia̍h sī lán ê hok-khì.