傳道的精神
Thoân-tō ê Cheng-sîn
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第627號 |
| 日期 | 1937/6 |
| 頁數 | 1-2 |
白話字（原文數位化）
Thoân-tō ê Cheng-sîn
1937年6月627期 1-2
“Goá thoân I, ēng ta̍k-iūⁿ ê tì-huī khó͘-khǹg ta̍k lâng, kà-sī ta̍k lâng beh hiàn ta̍k lâng tiàm tī Ki-tok lâi oân-choân. uī-tio̍h chit-ê, goá tio̍h-boâ, chiàu I chhut-la̍t kiâⁿ tī goá lāi-bīn ê kong-iōng lâi cheng-chiàn”(Ko-lô-se 1:28,29).
Kīn-lâi ta̍k Kàu-hoē Sìn-tô͘, tuì pò͘-tō ê kang-chok put-chí jia̍t, che chin hó. Chóng-sī tio̍h ē kì-tit, che nā kan-ta chhut tī lâng ê oa̍h-tāng, kiat-kio̍k chiū bô sím-mi̍h hāu-kó tī-teh. Só͘-í phí-jîn chhim-chhim ǹg-bāng Lia̍t-uī, chiong chá Pó-lô Sian-siⁿ jia̍t-lia̍t ê Thoân-tō cheng-sîn, toā ho̍k-heng tī lán ê tiong-kan.
•I. Thoân-tō ê Tê-ba̍k.
“Goán thoân I” : “I”, chiū-sī teh chí téng-bīn 27 chat, “Chiū-sī Ki-tok tiàm tī lín, chò êng-kng ê ǹg-bāng--ê”. Sui-jiân toā soan-thoân chhim-hn̄g ê kàu-lí, ko-kiat ê lûn-lí tō-tek-hùn(道德訓), iā bē thang kiù lâng ê lêng-hûn. Lán só͘ tio̍h thoân--ê, chí-ū sī Ki-tok pún-sin. Chóng-sī m̄-sī kan-ta ēng chhuì thoân nā-tiāⁿ, tio̍h hó-táⁿ chhin-chhiūⁿ Pí-tek Sian-siⁿ kan-chèng tiàm tī goá lāi-bīn ê Ki-tok, toā siaⁿ kóng, “Kim-gîn goá lóng bô, to̍k-to̍k goá só͘ ū-ê hō͘ lí”.
iū-koh tio̍h chai, lán nā hun-lī, chiū hō͘ Mô͘-kuí ū phāng thang ji̍p. Tāi-ke tio̍h hia̍p-le̍k; in-uī hia̍p-le̍k, sī put-sî toā tek-sèng ê pì-koat. Lán nā ū khiam-pi kap saⁿ-thiàⁿ, chiah ē it-tì.
•II. Thoân-tō ê Hong-hoat.
“ēng ta̍k-iūⁿ ê tì-huī khó͘-khǹg ta̍k lâng, kà-sī ta̍k lâng”.
In-uī ài hō͘ bī-sìn-chiá hoán-hoé lâi sìn Chú, lán tio̍h chhut-la̍t khó͘-khǹg--in. Chóng-sī kan-ta khó͘-khǹg sī bô kàu-gia̍h, tio̍h kà-sī in chai Siōng-tè ê kong-gī kap jîn-ài. M̄-nā tio̍h tuì tāi-chiòng(大眾) thoân-tō, tuì kò-jîn kò-jîn[sic] sī koh-khah iàu-kín. Tio̍h oá-khò Sèng Sîn, lán chiah ē ēng ta̍k-iūⁿ ê tì-huī khó͘-khǹg kap kà-sī.
III. Thoân-tō ê Bo̍k-tek.
“Beh hiàn ta̍k lâng tiàm tī Ki-tok lâi oân-choân”.
Lán chhut-la̍t thoân-tō ê bo̍k-tek, m̄-sī in-uī ài kiàn-siat toā keng kàu-hoē. Á-sī ū-sî khoàⁿ-tio̍h chē-chē lâng koat-sim, lán chiū chin tek-ì. Lán tio̍h chhim-chhim kiaⁿ-hiâⁿ, kàu Ki-tok chài-lîm ê sî, lán kó-jiân ū ín-chhoā loā-chē lâng, hō͘ in chiâⁿ-sèng, bô thang hiâm, thang khiā tī Chú ê bīn-chêng(1:22).
IV. Thoân-tō ê ló͘-le̍k.
“uī-tio̍h chit-ê goá tio̍h-boâ”.
Pó-lô Sian-siⁿ uī-tio̍h thoân-kàu ê kang, mî-ji̍t in-khîn piàⁿ-miā. Chhiáⁿ khoàⁿ 2 Ko-lîm-to 11:23─29, chiū chai,bô lūn jio̍k-thé kap cheng-sîn lóng siū chin toā ê thòng-khó͘. I si̍t-chāi kap Ki-tok saⁿ-kap poē Si̍p-jī-kè.
V. Thoân-tō ê goân-tōng-la̍t.
“Chiàu I chhut-la̍t kiâⁿ tī goá lāi-bīn ê kong-iōng lâi cheng-chiàn”
Pó-lô Sian-siⁿ hiah chhut-la̍t teh kap Mô͘-kuí cheng-chiàn, sui-jiân ū-sî kám-kak chin kan-khó͘ koh ià-siān; iáu-kú sî-sî toā sèng-lī. Thài ē án-ni? In-uī Ki-tok put-sî kap i tī-teh. Ki-tok m̄-nā chò i chiong-lâi êng-kng ê ǹg-bāng--ê, iā-sī chò i tī tē-chiūⁿ toā oa̍h-tāng ê goân-tōng-la̍t.
漢羅（Ùi原文改寫）
傳道的精神
1937年6月627期 1-2
「我傳伊，用逐樣的智慧苦勸逐人，教示逐人欲獻逐人踮佇基督來完全。為著這个，我著磨，照伊出力行佇我內面的功用來爭戰」(歌羅西1：28，29)。
近來逐教會信徒，對佈道的工作不止熱，這真好。總是著會記得，這若干焦出佇人的活動，結局就無甚物效果佇咧。所以鄙人深深向望列位，將早保羅先生熱烈的傳道精神，大復興佇咱的中間。
I. 傳道的題目。
「阮傳伊」：「伊」，就是咧指頂面27節，「就是基督踮佇恁，做榮光的向望--的」。雖然大宣傳深遠的教理，高潔的倫理道德訓，也袂通救人的靈魂。咱所著傳--的，只有是基督本身。總是毋是干焦用喙傳nā-tiāⁿ，著好膽親像彼得先生干證踮佇我內面的基督，大聲講，「金銀我攏無，獨獨我所有-的雨你」。
又閣著知，咱若分離，就予魔鬼有縫通入。大家著協力；因為協力，是不時大得勝的祕訣。咱若有謙卑佮相疼，才會一致。
II. 傳道的方法。
「用逐樣的智慧苦勸逐人，教示逐人」。
因為愛予未信者反悔來信主，咱著出力苦勸--in。總是干焦苦勸是無夠額，著教示in知上帝的公義佮仁愛。毋但著對大眾傳道，對個人個人是閣較要緊。著倚靠聖神，咱才會用逐樣的智慧苦勸佮教示。
III. 傳道的目的。
「欲獻逐人踮佇基督來完全」。
咱出力傳道的目的，毋是因為愛建設大間教會。抑是有時看著濟濟人決心，咱就真得意。咱著深深驚惶，到基督再臨的時，咱果然有引chhoā偌濟人，予in成聖，無通嫌，通徛佇主的面前(1：22)。
IV. 傳道的努力。
「為著這个我著磨」。
保羅先生為著傳教的工，暝日殷勤拚命。請看2哥林多11：23─29，就知，無論肉體佮精神攏受真大的痛苦。伊實在佮基督相佮背十字架。
V. 傳道的原動力。
「照伊出力行佇我內面的功用來爭戰」
保羅先生遐出力咧佮魔鬼爭戰，雖然有時感覺真艱苦閣厭siān；猶過時時大勝利。thài會按呢？因為基督不時佮伊佇咧。基督毋但做伊將來榮光的向望--的，也是做伊佇地上大活動的原動力。