聖書研究會
Sèng-su Gián-kiù-hoē
文獻資訊
| 項目 | 資料 |
|---|---|
| 作者 | 吳清鎰 Gô͘ Chheng-ek |
| 卷期 | 台灣教會公報 |
| 卷期 | 第625號 |
| 日期 | 1937/4 |
| 頁數 | 25 |
白話字（原文數位化）
Sèng-su Gián-kiù-hoē
Gô͘ Chheng-ek
1937年4月625期 25
Lūn Sèng-su ê gián-kiù, bô-lūn sī kàu-chit-chiá á-sī pêng sìn-tô͘, thang kóng sī hui-siông ê iàu-kín sū, sī lêng-tek ê bí-niû. Sui-jiân muí lé-pài oē thang tuì thiaⁿ soat-kàu lâi tit-tio̍h chhián-bêng Sèng-keng ê tō-lí, iáu-kú Sèng-keng ê cho͘-chit-tek gián-kiù, kap tī tâng-sî lâi thiaⁿ-kìⁿ kuí-nā lâng ê soat-bêng, koh ke-thiⁿ tuì ka-kī ê seng-oa̍h, ka-kī ê chai-bat lâi koé-seh, sī chin oē ke pang-chān lán bat Sèng-keng. M̄-nā án-ni , nā ū chi̍t-ê it-tēng ê sî-kan, ū chi̍t-ê sió-thoân thang saⁿ-kap gián-kiù , sī hō͘ lán khah ū chhù-bī, bô siūⁿ siān. In-uī lūn gián-kiù Sèng-keng , ka-kī chi̍t lâng ia̍h oē , chóng-sī siông-siông oē sit-lo̍h ki-hoē, boē kè-sio̍k. Lūn kàu-chit-chiá tiong-sim ê Sèng-keng gián-kiù-hoē sī koh-khah iàu-kín. Sui-jiân sī khiā tâi-téng put-sî teh kái-soat Sèng-keng , sī teh kà-sī pa̍t-lâng, iáu-kú tio̍h koh-khah àⁿ hī-khang lâi thiaⁿ pa̍t-lâng ê kái-sek. In-uī Sèng Sîn kiám-chhái beh tāi-seng khui-khé pa̍t-lâng ê sim, beh keng-kè pa̍t-lâng ê soat-bêng lâi hō͘ lán bat. ia̍h ū-sî tuì lán lâi hō͘ pa̍t-lâng bat, só͘-í ta̍k-pái tī gián-kiù-hoē ê sî, ū-sî pa̍t-lâng beh pang-chān lán, ia̍h ū-sî lán beh pang-chān pa̍t-lâng, tāi-ke saⁿ pang-chān, lâi lí-kái Sèng-keng. Lūn kàu-chit ê Sèng-keng gián-kiù-hoē, ta̍k-pái Thoân-kàu-su Chóng-hoē ū chióng-lē, phah-sǹg ta̍k-khu káⁿ lóng ū teh si̍t-hêng. Kin-nî Tâi-pak khu ê hong-hoat ū sió-khoá oāⁿ khoán. Muí ge̍h nn̄g hoê, chiū-sī tē-it kap tē-saⁿ ê pài-sì ē-po͘, chóng-sī muí-ge̍h ê tē-it pài-sì sī tuì ngó͘-chiân 9 tiám khí, tiûⁿ-só͘ sī chiàu to͘-ha̍p lâi koat-tēng: Chiaⁿ ge̍h tī Siang-liân . Jī ge̍h tī Báng-kah. Saⁿ ge̍h tī Sin-tiàm. Sì ge̍h beh tī Toā-tiū-tiâⁿ. Ngó͘-chiân tiong ū Sèng-keng ê gián-kiù kap thiaⁿ sè-kài kàu-hoē ê siau-sit, á-sī su-chheh ê siāu-kài. āu-lâi siú Sèng-chhan. Ē-po͘-sî ū Sîn-ha̍k ê káng-ián, kap chō-tâm-hoē. àm-sî ū te̍k-pia̍t ê káng-ián-hoē.
漢羅（Ùi原文改寫）
聖書研究會
吳清鎰
1937年4月625期 25
論聖書的研究，無論是教職者抑是平信徒，通講是非常的要緊事，是靈tek的米糧。雖然每禮拜會通對聽說教來得著闡明聖經的道理，猶過聖經的組織tek研究，佮佇同時來聽見幾若人的說明，閣加添對家己的生活，家己的知識來解說，是真會加幫贊咱捌聖經。毋若按呢，若有一个一定的時間，有一个小團通相佮研究，是予咱較有趣味，無想siān。因為論研究聖經，家己一人亦會，總是常常會失落機會，袂繼屬。論教職者中心的聖經研究會是閣較要緊。雖然是徛台頂不時咧 解說聖經，是咧教示別人，猶過著閣較俯耳孔來聽別人的解釋。因為聖神檢采欲代先開啟別人的心，欲經過別人的說明來予咱捌。亦有時對咱來予別人捌，所以逐擺佇研究會的時，有時別人欲幫贊咱，亦有時咱欲幫贊別人，大家相幫贊，來理解聖經。論教職的聖經研究會，逐擺傳教師總會有獎勵，拍算逐區敢攏有咧實行。今年台北區的方法有小可換款。每月兩回，就是第一佮第三的拜四下晡，總是每月的第一拜四是對午前9點起，場所是照都合來決定：正月佇雙連。二月佇艋舺。三月佇新店。四月欲佇大稻埕。午前中有聖經的研究佮聽世界教會的消息，抑是書冊的紹介。後來守聖餐。下晡時有神學的講演，佮座談會。暗時有特別的講演會。