現代基督徒使命
Hiān-tāi Ki-tok-tô͘ Sù-bēng
文獻資訊
| 項目 | 資料 |
|---|---|
| 作者 | 主筆 Chú-pit |
| 卷期 | 台灣教會公報 |
| 卷期 | 第625號 |
| 日期 | 1937/4 |
| 頁數 | 1-4 |
白話字（原文數位化）
Hiān-tāi Ki-tok-tô͘ ê Sù-bēng
Chú-pit
1937年4月625期 1-4
Sù-bēng sī sím-mi̍h? Chiū-sī “Chi̍t ê lâng kám-kak i siū thok eng-kai khì chò ê kang-tiâⁿ”. Oāⁿ oē lâi kóng, Sù-bēng , chiū-sī lán eng-kai chīn ê Thian-chit(天職). Pí-phēng lâi kóng, chi̍t miâ kéng-chhat-koaⁿ i ê sù-bēng, chiū-sī î-chhî tī-an; chi̍t miâ peng i sù-bēng, chiū sī pó-hō͘ kok-kok; chi̍t miâ Thoân-kàu-chiá ê sù-bēng , sī pang-chān jîn-seng thoat-chhut choē ê khó͘-hái; chi̍t miâ kàu-io̍k-ka i ê sù-bēng , sī chō-chiū jîn-châi.
Lán ta̍k-lâng bē thang m̄-ài tam-tng sù-bēng tit. Iâ-so͘ siat Thâu-ke ēng gîn kau-tài I ê lô͘-po̍k ê phì-jū, ū-ê niá 5 chheng, ū-ê niá nn̄g chheng, ū-ê niá chi̍t chheng, kiò in khì chò seng-lí, chiū khì chhut-goā. Koè chin kú, chú-lâng tńg-lâi ê sî, 3 ê lô͘-po̍k lóng lâi pò-kò in ê sêng-chek. Niá 5 chheng kap nn̄g chheng--ê lóng ū chīn pún-hūn thàn têng-poē, tit-tio̍h chú-lâng ê o-ló. Hit ê niá chi̍t chheng--ê siū chú-lâng chiù-chó͘ soà hêng-hoa̍t--i. I kiám ū chò siáⁿ pháiⁿ? Khiok bô; chí-ū chiong hit chi̍t chheng tâi tī thô͘-lāi bô oa̍h-ēng--i. Che chiū-sī bô beh chīn I ê sù-bēng , soà siū chú-lâng chiù-chó͘ kóng sī pîn-toāⁿ koh bô lī-ek ê lô͘-po̍k, siū koáⁿ-chhut tī o͘-àm ê só͘-chāi, tī-hia thî-khàu kā-gê chhiat-chhí.
Iâ-so͘ ū chi̍t pái tuì Pek-tāi-nî beh khì Iâ-lō͘-sat-léng, tī lō͘-nih khoàⁿ-kìⁿ chi̍t[sic.] chi̍t châng bû-hoa-kó chhiū, tú-hó pak-tó͘ iau, chiū khì chhoē khoàⁿ ū koé-chí thang chia̍h bô? Kàu uī, chhoē bô, Iâ-so͘ chiū kā I chiù-chó͘; chhiū soà ko͘-tâ khì. Iâ-so͘ siáⁿ-sū kā chiù-chó͘? Bû-hoa-kó chhiū kiám ū chò siáⁿ pháiⁿ? iā m̄-sī in-uī I tī-hia tìn só͘-chāi hāi-tio̍h lâng. Kan-ta chi̍t hāng ê toā chhò-gō͘, chiū-sī bô chīn i kiat koé-chí ê sù-bēng.
Chhin-ài chèng hiaⁿ-ché ah! Lán tio̍h ài hū sù-bēng chiah ē ēng-tit. Tng tī chit ê sî-chūn, lán chò Ki-tok-tô͘ ê sù-bēng tàu-tí sī sím-mi̍h? Chiū-sī kái-chō jîn-sim, kiàn-chō jîn-keh. Kin-á-ji̍t sè-kài tē-it khó-lîn--ê sī sím-mi̍h? Chiū-sī jîn-sim hú-pāi, jîn-keh tuī-lo̍h. Thài-ē án-ni? Hit ê goân-in , chiū-sī lâng ê choē.
Bí-kok bó͘ koân-soaⁿ ū chi̍t châng chhiū , kóng ū 400 nî kú, keng-koè 14 pái hō͘ luî phah, í-ki̍p 400 nî kú siū hong-hō͘ sng-seh ê chhim-hāi, lóng bô sió-khoá sún-siong. āu-lâi hō͘ chi̍t boé sè-sè ê thâng lâi chia̍h, kèng-jiân ko͘-tâ khì. Choē-ok tuì jîn-luī ê lī-hāi, iā-sī án-ni. Taⁿ lán í-keng chai Ki-tok-tô͘ tē-it iàu-kín ê sù-bēng, chiū-sī kái-chō jîn-sim, kiàn-chō jîn-keh. Taⁿ tio̍h siūⁿ, beh cháiⁿ-iūⁿ lâi chīn chit ê sù-bēng? Goá hó-táⁿ kóng, iáu-boē kái-chō pa̍t-lâng, tio̍h tāi-seng kái-chō lí ka-tī. Oāⁿ oē lâi kóng, ài chīn lán ê sù-bēng, tio̍h tāi-seng tuì lán pún-sin khí-chhiú. Tio̍h tāi-seng kái-chō ka-tī, chiah ē thang kái-chō pa̍t-lâng.
Lâng nā m̄-bat jī, beh thài ē kà lâng tha̍k-chheh? Nā m̄-bat im-ga̍k , thài ē kà lâng chhiùⁿ-koa? Nā m̄-bat lō͘, beh thài ē kā lâng chhoā lō͘? Pún-sin ê sim-koaⁿ sī hú-pāi, jîn-keh tuī-lo̍h, thài ē thang kái-chō pa̍t-lâng ê sim-koaⁿ, kiàn-chō pa̍t-lâng ê jîn-keh leh?
Sè-kài choè-toā ê jîn-sim kái-chō-ka chiū-sī Iâ-so͘ Ki-tok. I ài chheng-khì lâng, I ka-kī tāi-seng chiâⁿ-chò Sèng-kiat ê lâng; I ài kà lâng khiam-pi, I chiū tāi-seng kā ha̍k-seng sé kha. I ài kà lâng tio̍h ho̍k-sāi hiaⁿ-tī, I ka-tī tāi-seng chò lâng ê chhe-ēng. I ài kà lâng tio̍h ū hi-seng ê cheng-sîn, I chiū tāi-seng uī-tio̍h lâng sí tī Si̍p-jī-kè téng.
Tō͘-lia̍p-su-to bat tuì chi̍t ê jia̍t-sim siā-hoē ê ūn-tōng-ka ê chheng-liân kóng, “Chheng-liân ah, Lí uī-tio̍h sè-kài ū lâu chin-chē hoeh koāⁿ; chóng-sī tio̍h tāi-seng uī-tio̍h lí ka-tī lâu koá[sic.]; lí nā ǹg-bāng chi̍t ê koh-khah hó ê sè-kài, lí ka-tī eng-kai tio̍h chò chi̍t ê tē-it hó ê lâng; tû-hui chiong Thian-kok tāi-seng si̍t-hiān tī lí ê sim-lāi, lí bē-ē hō͘ Thian-kok tī sè-kài si̍t-hiān--ê. ài kái-chō siā-hoē , tio̍h seng kái-chō ka-tī.”
Taⁿ beh cháiⁿ-iūⁿ lâi kái-chō ka-tī ê sim, kiàn-chō ka-tī ê jîn-keh leh? Tuì chi̍t ê hú-pāi ê jîn-sim, kái-chō chò chi̍t ê oân-choân chheng-khì ê jîn-sim; tuì chi̍t ê tuī-lo̍h ê jîn-keh, kái-chō chò chi̍t ê ko-siōng ê jîn-keh; chit hō tāi-chì, Ki-tok-kàu kiò-chò têng-thâu-siⁿ. Só͘-í lán nā kó-jiân ē bêng-pe̍k chi̍t ê lâng cháiⁿ-iūⁿ chiah ē têng-thâu-siⁿ; chiū ē thang bêng-pe̍k jîn-sim cháiⁿ-iūⁿ kái-chō, jîn-keh cháiⁿ-iūⁿ thê-koân.
Chiàu Ki-tok-kàu ê tō-lí ,lâng nā ài tit-tio̍h têng-thâu-siⁿ, tio̍h ū nn̄g hong-bīn ê khuì-la̍t lâi ha̍p-chok, chiah ē sêng-kong. Chi̍t-hong-bīn, chiū-sī Siōng-tè ê khuì-la̍t ; koh chi̍t-hong-bīn, chiū-sī lâng ê khuì-la̍t.
(1) Lūn Sîn ê hong-bīn, chhiáⁿ lâi saⁿ-kap siūⁿ:-
Ki-tok-kàu sìn ú-tiū-kan ū chi̍t uī chin Sîn. Chit uī chin Sîn , tuì lán ê keng-giām kap Ki-tok ê khé-sī, chiū ē thang khoàⁿ-chhut ū nn̄g khoán ê Sîn-keh(神格)tī-teh. Chiū-sī Sèng-kiat kap Thiàⁿ. In-uī I sī chiâu-chn̂g Sèng-kiat, só͘-í oàn-hīn choē-ok ; in-uī I sī Thiàⁿ, só͘-í thiàⁿ sè-kan lâng chhin-chhiūⁿ kiáⁿ chi̍t-iūⁿ; m̄-ài lâng ta̍h-ji̍p choē-ok pìⁿ chò choē-ok ê lô͘-lē. Só͘-í I chin koan-sim tī sè-kan lâng , ná bo̍k-chiá teh chhoē sit-lo̍h ê iûⁿ, chhin-chhiūⁿ lāu-pē thèng-hāu hòng-tōng-chú hoê ka. Lâng nā beh chò chi̍t ê têng-thâu-siⁿ ê lâng, nā m̄-sī tuì Siōng-tè pang-chān, bô lâng chò ê kàu. Khoàⁿ Pó-lô Sian-siⁿ ê keng-giām chiū chai(Lô-má 7:14-19, 24-25).
Ū lâng teh siūⁿ , beh thài ē chai ū chi̍t uī chin Sîn Siōng-tè, iū-koh ē pang-chān goá? Lia̍t-uī ! Che sī chi̍t ê chin kî-biāu ê būn-tê. Só͘-í Ki-tok-kàu sī chin kî-biāu ê chong-kàu. In-uī chit ê būn-tê , bē thang ēng giân-gú ,á-sī tì-sek lâi soat-bêng kàu chheng-chhó. Chit ê būn-tê , sī koan-hē tī lán kò-jîn ê keng-giām . Chí-ū si̍t-chè keng-giām , chiah ē bêng-pe̍k kàu hit ê thiat-tí. Nā bô chit khoán ê keng-giām, chiū bô lūn lán cháiⁿ-iūⁿ gián-kiù , cháiⁿ-iūⁿ thó-lūn, kàu-boé iā bē thang bêng-pe̍k loē-tiong ê si̍t-chāi.
Pí-phēng pē-bó tuì kiáⁿ-jî ê ài-chêng, Lí nā mn̄g pē-bó kap kiáⁿ-jî-tiong ê ài-chêng sī sím-mi̍h? Goá sui-jiân ē ēng chē-chē oē kā lí ké-soeh, pē-bó thiàⁿ kiáⁿ, sī kā I phō, kā I chim , iúⁿ-chhī, chiàu-kò͘, kàu-io̍k--i; chóng-sī che m̄-sī ài-chêng ê si̍t-chāi. Bô lūn goá cháiⁿ-iūⁿ ké-soeh , lóng bē-ē chiong ài-chêng ê si̍t-chāi, oân-choân hián-bêng chhut-lâi. Só͘-í bêng-pe̍k hit ê ài-chêng , sī tuì I ka-tī ê keng-giām. Chiū-sī thèng-hāu lí ka-tī ū kiáⁿ-jî, lí chiū ē chai kàu chheng-chheng chó͘-chó͘. Á-sī chhin-chhiūⁿ chhut-sì chiū chheⁿ-mê--ê, I m̄-bat khoàⁿ-kìⁿ ji̍t-thâu, chhut-chāi lí cháiⁿ-iūⁿ kā soat-bêng, i to thiaⁿ bē hiáu-tit. Chí-ū chi̍t hoat, chiū-sī hō͘ i ba̍k-chiu kng, hō͘ i chhin-sin khì keng-giām.
Chhin-chhiūⁿ án-ni, lán ài khì keng-giām. Siōng-tè ê la̍t, ē pang-chān lán, iā-sī bô pa̍t hoat. Chí-ū chhin-sin, chìn-ji̍p chi̍t khoán keng-giām. Chiū-sī lán chit-bīn , tio̍h kian-sim koat-ì beh tui-kiû têng-thâu-seⁿ, jiân-āu chiong chiah ê sū, sêng-si̍t kau-thok Siōng-tè, sî-khek chhin-kīn I, kap I kau-thong , sî-khek chiap-siū I ê khuì-la̍t, sêng-siū I ê kà-sī. Goá hó-táⁿ kóng bián loā-kú, tī lí ê sin-chiūⁿ beh tit-tio̍h chi̍t chióng sîn-pì-la̍t. Pó-lô ū chit khoán keng-giām , só͘-í bē kiâⁿ hó ê kū Pó-lô, pìⁿ-chò ē kiâⁿ hó ê sin Pó-lô. Ò-kó͘-sū-teng in-uī ū chit khoán keng-giām, chiū tuì chi̍t ê toā choē-ok thâu, pìⁿ-chò kàu-hoē ê thiāu-chio̍h. Lō͘-tek-má-teng in-uī ū chit khoán ê keng-giām, chiū tuì chi̍t ê hō͘ choē sok-pa̍k ê thòng-khó͘ ê sim-chêng, pìⁿ-chò chi̍t ê chū-iû khoài-lo̍k ê jîn-seng. Lia̍t-uī! Lán nā kó-jiân ē tit chìn kàu chit khoán Siōng-tè khuì-la̍t pang-chān ê keng-giām , lán iā ē tit-tio̍h chit khoán keng-giām ê kiat-kó.
Lia̍t-uī thiàⁿ kok, thiàⁿ kàn[sic.]-hoē ê hiaⁿ-ché ah! Lán sî-sî khek-khek oá-khò chit uī chin Sîn , I sī lán ê Thiⁿ Pē, tio̍h tuì I lâi tui-kiû têng-thâu-seⁿ. Lán pún-sin kó-jiân têng-thâu-seⁿ, chiū ē kái-chō jîn-sim , kiàn-chō jîn-keh, lâi oân-sêng lán kin-á-ji̍t thâu-chêng ê sù-bēng.
(II) Lūn lâng chit hong-bīn, chhiáⁿ koh lâi siūⁿ khoàⁿ:-
Chit ê lâng ài tit-tio̍h têng-thâu-siⁿ, m̄-nā tio̍h tit-tio̍h Siōng-tè ê khuì-la̍t ê pang-chān; koh chi̍t bīn lán ka-tī tio̍h kap Sîn ha̍p-chok. Ū nn̄g bīn tī-teh:
(1) Hoán-hoé(siau-ke̍k-tek).
(2) Sìn-gióng(chek-ke̍k-tek).
Līn[sic.] Hoán-hoé sī siáⁿ ì-sù? Chiū-sī sim ê kái-piàn, á-sī sim-koaⁿ ê choán-hiòng.
Hoán-hoé tio̍h ū 3 hāng:
a) Chai-choē.
b) Tuì choē, piáu-sī pi-siong thòng-hīn ê thài-tō͘.
c) Koat-ì tû-khì choē.
Lō͘-ka 15 chiuⁿ só͘ kì hit ê hòng-tōng-chú, sī án-ni:
(1) I chai choē (17 chat “I chhéⁿ-gō͘”).
(2) I tuì choē piáu-sī pi-siong thòng-hūn(18 chat “Goá ū tek-choē thiⁿ kap tī lí ê bīn-chêng, taⁿ liáu-āu bē kham-tit chheng chò lí ê kiáⁿ”).
(3) Koat-ì tû-khì choē(20 chat “Khí-lâi khì chhoē I ê lāu-pē”).
Ò-kó͘-sū-teng iā sī án-ni. Lán ài kái-chō ka-tī, tû kiû Siōng-tè ê khuì-la̍t lâi pang-chān í-goā, tē-it iàu-kín tio̍h tui-kiû hoán-hoé. Lán ta̍k lâng tī Siōng-tè ê bīn-chêng, tio̍h ka-tī hoán-séng, kàu ē chai lán sī chi̍t ê choē-jîn, tuì lán koh ē koat-ì tû-khì choē, chiong lán ê kū-goá(舊我) kap Ki-tok tèng tī Si̍p-jī-kè.
Lūn sìn-gióng sī sím-mi̍h ì-sù? Sìn-gióng chiū-sī lán lâng oa̍h-miā-tiong chi̍t tiâu sin ê oa̍h-lō͘, kìⁿ-nā chìn-ji̍p--ê ē tit-kiù(Hān 3:16). Só͘-í sìn-gióng chiū-sī sìn-khò, i-nāi, kau-thok ê ì-sù. Chiū-sī í-keng chai Ki-tok sī lán ê Kiù-chú:
(1) Tuì chi̍t hong-bīn , chiū-sī lán tio̍h chiong lán ê choân-sin,
choân-sim choân-hù ê oa̍h-miā, oân-oân choân-choân bô tiâu-kiāⁿ kau-thok sìn-nāi I. Hō͘ lán it-chhè ê seng-oa̍h lóng hō͘ I koán-hat. Hoān-sū thiaⁿ I ê chí-hui, hoān-sū thàn I ê bēng-lēng, I ài lán chò ê sū, lán chiah chò; I m̄-ài lán chò ê sū, lán m̄-thang chò. Hoān-sū thàn I ê chí-ì lâi kiâⁿ.
(2) Koh tuì chi̍t hong-bīn lâi khoàⁿ, chiū-sī oân-choân chiap-siū
Iâ-so͘ chò lán it-chhè ê Kiù-chú. Chiong I ê kàu-hùn chò lán it-seng ê hoat-chek(法則); chiong I ê seng-oa̍h, chò lán ê seng-oa̍h; chiong I ê sim, chò lán ê sim; chiong I ê bo̍k-tek, chò lán bo̍k-tek. Hō͘ lán ê seng-oa̍h kap I ê seng-oa̍h tông-hoà. Lán tī I ê lāi-bīn, I tī lán ê lāi-bīn. Ná Pó-lô Sian-siⁿ kóng, “Goá iáu-kú teh oa̍h, m̄-sī iû-goân goá, chiū-sī Ki-tok tiàm tī goá teh oa̍h”
Lán nā ū chit khoán ê sìn-gióng, m̄-bián kiaⁿ lán bē têng-thâu-siⁿ, iā m̄-bián kiaⁿ lán bē tit-tio̍h kiù.
Lia̍t-uī , lán kin-á-ji̍t chò Ki-tok-tô͘ tē-it toā ê sù-bēng, chiū-sī Kái-chō jîn-sim.
Lán ài Kái-chō pa̍t lâng ê sim, tio̍h tuì Kái-chō ka-tī ê sim khí-chhiú. ài hō͘ pa̍t lâng têng-thâu-siⁿ, lán ka-tī tio̍h ài seng têng-thâu-siⁿ.
Lán ka-tī nā têng-thâu-siⁿ, chiū thang kái-chō pa̍t lâng ê sim-koaⁿ. Hō͘ choân kok-bîn ê jîn-sim lóng kái-chō, bô ū su-sim, bô ū choē-ok , pìⁿ-chò sin-sin ê lâng, chhiong-moá Ki-tok hi-seng, hōng-sū, thiàⁿ lâng, thiàⁿ kok ê cheng-sîn. Che chiū-sī lán hiān-tāi Ki-tok-tô͘ tē-it toā ê sù-bēng.
漢羅（Ùi原文改寫）
現代基督徒的使命
主筆
1937年4月625期 1-4
使命是甚物？就是「一个人感覺伊受託應該去做的工程」。換話來講，使命，就是咱應該盡的天職。比並來講，一名警察官伊的使命，就是維持治安；一名兵伊使命，就是保護各國；一名傳教者的使命，是幫贊人生脫出罪的苦海；一名教育家伊的使命，是造就人才。
咱逐人袂通毋愛擔當使命得。耶穌設頭家用銀交代伊的奴僕的譬喻，有的領5千，有的領兩千，有的領一千，叫in去做生理，就去出外。過真久，主人轉來的時，3个奴僕攏來報告in的成績。領5千佮兩千--的攏有盡本份趁重倍，得著主人的呵咾。彼个領一千--的受主人咒詛紲刑罰--伊。伊敢有做啥歹？卻無；只有將彼一千埋佇土內無活用-伊。這就是無欲盡伊的使命，紲受主人咒詛講是貧惰閣無利益的奴僕，受趕出佇烏暗的所在，佇遐啼哭咬牙切齒。
耶穌有一擺對伯大尼欲去耶路撒冷，佇路裡看見一叢無花果樹，拄好腹肚枵，就去揣看有果子通食無？到位，揣無，耶穌就共伊咒詛；樹紲枯焦去。耶穌啥事共咒詛？無花果樹敢有做啥歹？也毋是因為伊佇遐鎮所在害著人。干焦一項的大錯誤，就是無盡伊結果子的使命。
親愛眾兄姊啊！咱著愛負使命才會用得。當佇這个時陣，咱做基督徒的使命到底是甚物？就是改造人心，建造人格。今仔日世界第一可憐--的是甚物？就是人心腐敗，人格墮落。thài會按呢？彼个原因，就是人的罪。
美國某高山有一叢樹，講有400年久，經過14擺予雷拍，以及400年久受風雨霜雪的侵害，攏無小可損傷。後來予一尾細細的蟲來食，竟然枯焦去。罪惡對人類的厲害，也是按呢。Taⁿ咱已經知基督徒第一要緊的使命，就是改造人心，建造人格。Taⁿ著想，欲怎樣來盡這个使命？我好膽講，猶未改造別人，著代先改造你家己。換話來講，愛盡咱的使命，著代先對咱本身起手。著代先改造家己，才會通改造別人。
人若毋捌字，欲thài會教人讀冊？若毋捌音樂，thài會教人唱歌？若毋捌路，欲thài會共人chhoā路？本身的心肝是腐敗，人格墮落，thài會通改造別人的心肝，建造別人的人格咧？
世界最大的人心改造家就是耶穌基督。伊愛清氣人，伊家己代先成做聖潔的人；伊愛教人謙卑，伊就代先共學生洗跤。伊愛教人著服侍兄弟，伊家己代先做人的差用。伊愛教人著有犧牲的精神，伊就代先為著人死佇十字架頂。
Tō͘-lia̍p-su-to捌對一个熱心社會的運動家的青年講，「青年啊，你為著世界有流真濟血汗；總是著代先為著你家己流汗；你若向望一个閣較好的世界，你家己應該著做一个第一好的人；除非將天國代先實現佇你的心內，你袂會予天國佇世界實現--的。愛改造社會，著先改造家己。」
Taⁿ欲怎樣來改造家己的心，建造家己的人格咧？對一个腐敗的人心，改造做一个完全清氣的人心；對一个墮落的人格，改造做一个高尚的人格；這號代誌，基督教叫做重頭生。所以咱若果然會明白一个人怎樣才會重頭生；就會通明白人心怎樣改造，人格怎樣提懸。
照基督教的道理，人若愛得著重頭生，著有兩方面的氣力來合作，才會成功。一方面，就是上帝的氣力；閣一方面，就是人的氣力。
(1) 論神的方面，請來相佮想：-
基督教信宇宙間有一位真神。這位真神，對咱的經驗佮基督的啟示，就會通看出有兩款的神格佇咧。就是聖潔佮疼。因為伊是齊全聖潔，所以怨恨罪惡；因為伊是疼，所以疼世間人親像囝一樣；毋愛人踏入罪惡變做罪惡的奴隸。所以伊真關心佇世間人，若牧者咧揣失落的羊，親像老爸聽候放蕩子回家。人若欲做一个重頭生的人，若毋是對上帝幫贊，無人做的到。看保羅先生的經驗就知(羅馬7：14-19，24-25)。
有人咧想，欲thài會知有一位真神上帝，又閣會幫贊我？列位！這是一个真奇妙的問題。所以基督教是真奇妙的宗教。因為這个問題，袂通用言語，抑是智識來說明到清楚。這个問題，是關係佇咱個人的經驗。只有實際經驗，才會明白到彼个徹底。若無這款的經驗，就無論咱怎樣研究，怎樣討論，到尾也袂通明白內中的實在。
比並爸母對囝兒的愛情，你若問爸母佮囝兒中的愛情是甚物？我雖然會用濟濟話 共你解說，爸母疼囝，是共伊抱，共伊唚，養飼，照顧，教育--伊；總是這毋是愛情的實在。無論我怎樣解說，攏袂會將愛情的實在，完全顯明出來。所以明白彼个愛情，是對伊家己的經驗。就是聽候你家己有囝兒，你就會知到清清楚楚。抑是親像出世就青盲--的，伊毋捌看見日頭，出在你怎樣共說明，伊都聽袂曉得。只有一法，就是予伊目睭光，予伊親身去經驗。
親像按呢，咱愛去經驗。上帝的力，會幫贊咱，也是無別法。只有親身，進入一款經驗。就是咱這面，著堅心決意欲追求重頭生，然後將遮的事，誠實交託上帝，時刻親近伊，佮伊交通，時刻接受伊的氣力，承受伊的教示。我好膽講免偌久，佇你的身上欲得著一種神秘力。保羅有這款經驗，所以袂行好的舊保羅，變做會行好的新保羅。Ò-kó͘-sū-teng因為有這款經驗，就對一个大罪惡頭，變做教會的柱石。路得馬丁因為有這款的經驗，就對一个予罪束縛的痛苦的心情，變做一个自由快樂的人生。列位！咱若果然會得進到這款上帝氣力幫贊的經驗，咱也會得著這款經驗的結果。
列位疼國，疼教會的兄姊啊！咱時時刻刻倚靠這位真神，伊是咱的天父，著對伊來追求重頭生。咱本身果然重頭生，就會改造人心，建造人格，來完成咱今仔日頭前的使命。
(II)論人這方面，請閣來想看：-
這个人愛得著重頭生，毋但著得著上帝的氣力的幫贊；閣一面咱家己著佮神合作。有兩面佇咧：
(1) 反悔(消極的)。
(2) 信仰(積極的)。
論反悔是啥意思？就是心的改變，抑是心肝的轉向。
反悔著有3項：
a) 知罪。
b) 對罪，表示悲傷痛恨的態度。
c) 決意除去罪。
路加15章所記彼个放蕩子，是按呢：
(1) 伊知罪(17節「伊醒悟」)。
(2) 伊對罪表示悲傷痛恨(18節「我有得罪天佮佇你的面前，taⁿ了後袂堪得稱做你的囝」)。
(3) 決意除去罪(20節「起來去揣伊的老爸」)。
Ò-kó͘-sū-teng也是按呢。咱愛改造家己，除求上帝的氣力來幫贊以外，第一要緊著追求反悔。咱逐人佇上帝的面前，著家己反省，到會知咱是一个罪人，對咱閣會決意除去罪，將咱的舊我佮基督釘佇十字架。
論信仰是甚物意思？信仰就是咱人活命中一條新的活路，見若進入--的會得救(翰 3：16)。所以信仰就是信靠，依賴，交託的意思。就是已經知基督是咱的救主：
(1) 對一方面，就是咱著將咱的全身，
全心全副的活命，完完全全無條件交託信賴伊。予咱一切的生活攏予伊管轄。凡事聽伊的指揮，凡事趁伊的命令，伊愛咱做的事，咱才做；伊毋愛咱做的事，咱毋通做。凡事趁伊的旨意來行。
(2) 閣對一方面來看，就是完全接受
耶穌做咱一切的救主。將伊的教訓做咱一生的法則；將伊的生活，做咱的生活；將伊的心，做咱的心；將伊的目的，做咱目的。予咱的生活佮伊的生活同化。咱佇伊的內面，伊佇咱的內面。若保羅先生講，「我猶過咧活，毋是猶原我，就是基督踮佇我咧活」
咱若有這款的信仰，毋免驚咱袂重頭生，也毋免驚咱袂得著救。
列位，咱今仔日做基督徒第一大的使命，就是改造人心。
咱愛改造別人的心，著對改造家己的心起手。愛予別人重頭生，咱家己著愛先重頭生。
咱家己若重頭生，就通改造別人的心肝。予全國民的人心攏改造，無有私心，無有罪惡，變做新新的人，充滿基督犧牲，奉仕，疼人，疼國的精神。這就是咱現代基督徒第一大的使命。