雜錄
Chap3-lio̍k
文獻資訊
| 項目 | 資料 |
|---|---|
| 作者 | 黃俟命 N̂g Sū-bēng |
| 卷期 | 台灣教會公報 |
| 卷期 | 第624號 |
| 日期 | 1937/3 |
| 頁數 | 7-11 |
白話字（原文數位化）
Cha̍p-lio̍k
1937年3月624期 7-11
(N̂g Sū-bēng)
I. Soan-tō-hoē ê Siau-sit.
Lia̍t-uī thiàⁿ Chú ê hiaⁿ-tī chí-moē tông-kàm.
Lán muí-pái chē Chú ê toh, siàu-liām Chú ê liáu-āu chiū hiàn-kim lâi chò Soan-tō-hoē ê lō͘-ēng. Chú kóng, “Lín ê châi-pó tī-hia, lín ê sim iā beh tī-hia.” Goá ū thiaⁿ-kìⁿ chē-chē lâng kóng, “Soan-tō-hoē ū chò sím-mi̍h? Goán lóng m̄-chai”. Goá thiaⁿ chit-kù oē, ka-tī chin kiàn-siàu. Só͘-í tī kū-nî 12 goe̍h 28 hō, mō͘-hiám koè-khì Phêⁿ-ô͘(in-uī chit ê sî-kî koè-khì Phêⁿ-ô͘ chin bô lī-piān, ū-sî ē hō͘ hong-éng koaiⁿ-teh kuí-nā cha̍p-ji̍t). Kám-siā A-pa Pē Siōng-tè, ū chhoā goá koè-hái, kàu ta̍k-ê kàu-hoē lóng ū sûn--tio̍h, koh m̄-bián hō͘ hong-éng koaiⁿ--tio̍h, ta̍k só͘-chāi chiàu só͘ ū-tēng ê sî-ji̍t chiū chheng-chhó, kàu chiaⁿ-goe̍h 11 hō, chiū kàu Tâi-lâm hù Sin-lâu I-koán chi̍t chiu-nî ê Chiok-hō-hoē. Taⁿ goá chiong só͘ keng-koè ta̍k kàu-hoē choè-kīn ê kàu-sè, pò lia̍t-uī chai:-
- Hiā-tâng Kàu-hoē.
Thoân-tō-su: Hā Ú. Tiúⁿ-ló; Khó͘ Lêng-hûn, KHó͘ Niū. Chip-sū: Khó͘ Eńg-oán, Khó͘ Chō͘. Chú-ji̍t-o̍h Hāu-tiúⁿ: Khó͘ Eńg-oán. Kàu-oân 3-ê, ha̍k-seng 42-ê, muí lé-pài ū 40 miâ chhut-se̍k; toā-lâng lé-pài téng-po͘ 30 miâ, ē-po͘ 20 miâ. Hiàn-kim chi̍t nî ū 22 kho͘, chóng-sī ū chhut-goā lâi Tâi-lâm chò sū-gia̍p ê hiaⁿ-tī chí-moē, uī in ê kàu-hoē muí-nî ū chhut 170 kho͘ chò Thoân-tō sin-kim, tuì kin-nî khí, in hoaⁿ-hí chìn-pō͘ chhut 240 kho͘ lâi kau-tài Soan-tō-hoē. Tī Hiā-tâng ū niá sé-lé ê hoē-iú 30 miâ, siáu-jî 13 miâ. Kàu-sè ū chín-heng ê khì-siōng, 3 hāng:-
(1) Ū nn̄g ê cheng-sîn-pēⁿ--ê, chin siong-tiōng, kàu-hoē pek-chhiat thè i kî-tó, chiū hiah ê lâng, taⁿ ū chhēng saⁿ-á-khò͘, ē chia̍h-pn̄g, hiān-sî tiau-ióng-tiong.
(2) Ū chi̍t ê Kong-ha̍k-hāu ê Hùn-tō, sèⁿ Gô͘ miâ Siong-sai, hō͘ koaⁿ-thiaⁿ, siā-hoē, ka-cho̍k só͘ chun-kèng--ê, i in-uī ài siu-ióng phín-sèng, chō-chiū jîn-keh, ū tha̍k chē-chē siu-ióng ê chheh, kàu choè-kīn chiū koat-sim jīn Iâ-so͘ chò i ê Chú, uī-tio̍h chai i ê phín-sèng ū khoat-hām, bô Iâ-so͘ bē-thang ta̍t i ê bo̍k-tek. Chit pái ū niá sé-lé.
(3) Bī-sìn-chiá ê gín-á 20 goā lâng, in ê pē-bó sàng in lâi tha̍k Chú-ji̍t-o̍h. Khoàⁿ in ê gín-á lâi tha̍k Chú-ji̍t-o̍h liáu-āu, soà bē chhoh pháiⁿ-chhuì, chin hoaⁿ-hí.
Tī chit nn̄g nî kan, lâi mn̄g tō-lí--ê, ū 25 miâ, chiap-la̍p 4 miâ . Kiû-tō-chiá ū 5 miâ.
- Má-kong Kàu-hoē.
Thoân-tō-su N̂g Teng-ōng(4 goe̍h khí, Loā Jîn-sêng). Lú Thoân-tō: Tân Lí--sī Sò͘. Tiúⁿ-ló: Lí--sī Koai, LÍ Chheng-gī, Tè iāu-lû Chip-sū: Tân Khèng-chiong, Khó͘ Khûn. Chú-ji̍t-o̍h Hāu-tiúⁿ, Thoân-tō-su kiam-jīm; Kàu-oân ū 4 miâ, Chú-ji̍t-o̍h ha̍k-seng ū 35 miâ, chhut-se̍k ū 29 miâ. Toā-lâng lé-pài téng-ē-po͘ lóng ū 40 miâ í-siōng (che sī tuì kū-nî Sòng Phok-sū Hùn-heng-hoē liáu-āu.) Sin kiû-tō-chiá ū 5 hō͘, 13 lâng , muí lé-pài ê hiàn-kim ū 1.20 î-siōng[sic.] Lē-nî chhut Thoân-tō sin-kim 50 kho͘. Tuì 1937 nî khí, hoaⁿ-hí beh chhut 120 kho͘. Niá sé-lé ê sìn-tô͘ ū 30 miâ, siáu-jî ū 38 miâ, tiong-kan ū-ê poaⁿ--koè-lâi Tâi-oân, soà sit chong-chek. Chit ê kàu-hoē kīn-lâi iā ū khah oa̍h-tāng. Ū 3 hāng:-
(1) Hoat-tōng-ki tē-it oân ê chûn-tiúⁿ Ô͘ Theng hiaⁿ, nā kàu Má-kong, chiū chhut-la̍t pò͘-tō, lâu ba̍k-sái, kiû Siōng-tè tio̍h si-in tī Phêⁿ-ô͘ hái-sū ê peh-sèⁿ. Chit ê só͘-chò, hō͘ chē-chē ngē-sim ê lâng tio̍h hâng-ho̍k.
(2) Lú Thoân-tō, goân sī beh phài khì Hoe-the̍h, in-uī N̂g Teng-ōng Sian-siⁿ ngē bán-liû tī-hia chò-kang , hia ê lú-kài kuí-nā lâng tit-tio̍h toā lī-ek.
(3) Tè iāu-lû Tiúⁿ-ló, sī Má-kong-ke ê phêng-gī-oân, hō͘ chèng-lâng só͘ chun-kèng , chóng-sī i tong-sî sī phiau-póng i sī Ki-tok-tô͘. Kàu-hoē lāi, kàu-hoē goā chin ū lī-ek. Kî-thaⁿ ê hoē-iú iā chiām-chiām chai in chò Ki-tok-tô͘ ê pún-hūn. Ū Lí Moâi Tiúⁿ-ló ê kò͘-jîn tò-khì iā jia̍t-sim sìn Chú. Choè-kīn nn̄g pái mn̄g tō-lí, ū 17 lâng lâi mn̄g, chiap-la̍p 7 ê.
- Sai-sū, Tek-ko-oan.
Chia ū nn̄g kháu-chàu thiaⁿ tō-lí, le̍k-koè 30 goā nî, bô lâng poê-iúⁿ, bô lâng chiàu-kò͘, siū chē-chē khún-tio̍k kan-khó͘, í-keng keng-koè 3 tāi lâng chiap-soà lé-pài ta̍k lé-pài-ji̍t7 nn̄g kháu-chàu chò-hoé chū-chi̍p. In ê sè-kiáⁿ, ka-tī kà pe̍h-oē-jī, ū 4,5-ê ē tha̍k Sèng-keng. Niá sé-lé ê toā-lâng ū 5-ê ,sè-kiáⁿ 7-ê, nn̄g-ke ū 20 goā lâng. In iáu teh siàu-liām Sòng Bo̍k-su-niû chá-nî khì in hia kà pe̍h-oē-jī. Goá tī-hia kā in kiâⁿ sé-lé, siú Sèng-chhan.
- Hoe-the̍h ê Kàu-hoē.
Thoân-tō-su sī Tè Hōng-liân Tiúⁿ-ló. I lâi tī-chia kà Hàn-o̍h, chá-àm , lé-pài-ji̍t, chhoā chiah ê hoē-iú lé-pài. Tī chiah ê kàu-hoē tiong, lâm-lú ê chheng-liân tē-it bat tō-lí, kap gâu kî-tó--ê, sī tī-chia. Che goân-in , sī ta̍k-ji̍t, chá, àm, Tè Hong-liân Tiúⁿ-ló teh thoân tō-lí, teh kà kî-tó. Khó-sioh hū-jîn-lâng hiah ê chò lāu-bó--ê, bô lâng thang ín-chhoā. Tè Sian-siⁿ tī-chia chin hi-seng, iā chia ê lâng chin chun-kèng i. Chá-nî Ông Kang Tiúⁿ-ló ū khí chit keng pài-tn̂g, í-keng lóng pháiⁿ. Tī kū-nî tī Tâi-lâm Hùn-heng-hoē ê lō͘-boé-àm, te̍k-pia̍t uī-tio̍h chia ê hiàn-kim ū 240 kho͘, koh ū iú-chì-chiá ke-thiⁿ kàu 260 kho͘ , lâi chò chia khí pài-tn̂g ê lō͘-ēng. Taⁿ in ū khí chi̍t-keng chin suí, ē iông-ún-tit 130,140 lâng, kap siu-lí sió-chhù, kiōng khai 500 goā kho͘, ē hiah séng, sī Tè Tiúⁿ-ló kap i só͘ kà ê ha̍k-seng, chhut-la̍t chò kang, tit-tio̍h chio̍h-thâu chē-chē , kap bián chhiàⁿ sió-kang. Só͘-ū put-chiok--ê, ū tit-tio̍h Soan-kàu-su, Lú Soan-tō-hoē, kap lán Pō͘-hoē, í-ki̍p Tè Sian-siⁿ ê hiaⁿ-tī chek-sun, lâi tàu chhut-la̍t, tì-kàu tī put-chiok tiong, khiàm-khoeh tiong, tuì Tè Tiúⁿ-ló chi̍t lâng ê hi-seng, hō͘ tāi-ke seⁿ-khí saⁿ pang-chān ê sim, kàu ū kàu-gia̍h, chin iā kám-siā Siōng-tè. Tī che hái-sū tiong thang khoàⁿ-tio̍h uī Chú poē Si̍p-jī-kè ê hiaⁿ-tī, chin hoaⁿ-hí kàu-ke̍k.
Chit ê kàu-hoē chiân-tô͘ put-chí iú-bōng. Hiān-sî Tiúⁿ-ló Gân Hú; Chip-sū Ko Chhiòng, iā chin chhut-la̍t.
Nn̄g pái mn̄g tō-lí ū 38 lâng(Khah chē sī Tè Sian-siⁿ ê ha̍k-seng), ū chiap-la̍p 4 lâng, niá sé-lé ê toā-lâng chiah ū 14 lâng, siáu-jî 11 lâng. Chia ê hoē-iú khah chē chhut-goā tī Ko-hiông. Lé-pài-ji̍t phó͘-thong sī 20 goā lâng(Chú-ji̍t-o̍h bô chāi-lāi). Chú-ji̍t-o̍h iû-goân sī Tè Sian-siⁿ chi̍t lâng teh kà.
- Toā-sū Kàu-hoē Thoân-tō-su Khó͘ Ek-chhiau, kin-nî sin chut-gia̍p, chiàu-khoàⁿ put-chí ha̍p chiah ê hái-sū uī Chú chò-kang--ê. I lia̍h kan-khó͘, bô bûn-bêng ê seng-oa̍h chò moá-chiok, goān kap chiah ê kan-khó͘ ê peh-sìⁿ chò-hoé seng-oa̍h, chiong i ê hūn-gia̍h kap chiah ê lâng kong-ke ēng, ka-tī chin khek-kí. Chit ê hái-sū chha-put-to ū 5 chheng lâng teh toà, kīn-lâi kau-thong lī-piān: pí chá-chêng khah hó kéng-hóng. Sui-jiân sī án-ni, chiah ū 7,8 pah lâng ū thang chia̍h 3 tǹg nā-tiāⁿ. Kî-û phó͘-thong--ê sī kan-ta chia̍h nn̄g tǹg. Só͘ chò ê sū-gia̍p lóng sī thó-hái, nā tú-tio̍h chai-iong, sī choân-ke ê ta-po͘-lâng lóng bô--khì; tī piⁿ-á kuí-nā ê hái-sū lóng sī chhin-chhiūⁿ chit khoán ê seng-oa̍h. Phoà-pēⁿ bô chîⁿ, iā bô i-seng thang i-tī. Chit ê Sian-siⁿ khoàⁿ-tio̍h chit téng-hō ê khó͘-chêng, i chin kam-goān kap in tâng seng-oa̍h, lâi thoân Hok-im hō͘ in.
Lūn chia ê kàu-hoē sī tē-it chē-lâng--ê. In chêng muí-nî chhut sin-kim 140 kho͘. Taⁿ in ū oa̍h-tāng beh chhut 180 kho͘. Ū 3-ê Tiúⁿ-ló: Hā Thoân, Hā Sùn, koh chi̍t-ê lú Tiúⁿ-ló 4-ê Chip-sū. Chú-ji̍t-o̍h chin oa̍h-tāng. Goá khì, ū hù--tio̍h in teh Chiok Sèng-tàn, chin gâu pī-pān, só͘ chò ê chhut, kán koh bêng, chin ū hó ê kà-sī. Tâi-lâm Lū Chhun-tông kun khì tī-hia tàu oa̍h-tāng.
Chit nn̄g-pái tō-lí ū 17 lâng, chiap-la̍p 5 lâng. Niá sé-lé 50 goā lâng. Sī chin sàn chin kan-khó͘ ê seng-oa̍h. Chóng-sī lêng-sèng siōng chin ū hō͘-bōng.
Chhiáⁿ lia̍t-uī siông-siông thè chiah ê hái-sū tiong seng-oa̍h kan-khó͘ ê hiaⁿ-tī lâi kî-tó. Kàu chiah ê hái-sū tiong thiaⁿ-tio̍h lâng teh gîm-si o-ló Siōng-tè, pí tī toā to͘-hoē ê Sèng-koa-tuī, koh-khah siū kám-kek, hoaⁿ-hí lán ê A-pa Pē Siōng-tè kàu tī thiⁿ-piⁿ hái-kak to ū lâng teh chheng-chàn.
Tī-hia chò-kang ê lâng, pí tī lán chia khah ū hi-seng khek-kí, só͘-í lán tio̍h toā siàu-liām in.
II. Lâm Tāi Chú-ji̍t-o̍h.
Pō͘-hoē tī 1 goe̍h 4 hō chū-chi̍p gī-sū.
Gī-tiāⁿ:-
-
Kin-nî(12 nî-tō͘) beh khui Lâm-pō͘ Tāi-hoē Chú-ji̍t-o̍h Hāu-tiúⁿ hoē-gī. Chhiáⁿ kok Kàu-io̍k-pō͘ , siat-hoat kok Tiong-hoē lāi Hāu-tiúⁿ(tāi-piáu)4 miâ lâi chhut-se̍k.
-
Pe̍h-oē-jī kàu-kho-su: - Gī-tiāⁿ chhái-iōng王守勇牧師著[主 日 學讀 本] Chhiáⁿ kok Chú-ji̍t-o̍h tuì Kong-pò-siā chù-bûn.
Tuì Lâm Tāi kiàn-gī:-
-
Chú-ji̍t-o̍h Kàu-oân Khò-pún, kui Kong-pò-siā siat-hoat, m̄-bián hō͘ kok Tiong-hoē ke thiap Y48.00.
-
Chú-ji̍t-o̍h ēng Toā-pak koà-tô͘ kui Kong-pò-siā siat-hoat; in-uī khah lī-piān.
-
Chú-ji̍t-o̍h Pō͘-hoē-huì kè-sio̍k teng-siu, chi̍t nî chi̍t pái ê sū.
Pò-kò. Siat-kàu 70 chiu-nî kì-liām:-
- Chú-ji̍t-o̍h Kàu-oân 10 nî í-siōng khîn-sio̍k piáu-chiong(昭和十年止) chiàu ē-bīn:-
(1) Tâi-tiong Tiong-hoē lāi.
Chiong-hoà, Liân--sī Má-gio̍k 21 nî, Phoaⁿ Î-cheng 20 nî, Lí Thian-sióng 12 nî.
Tâi-tiong, Lâu Chhiū 20 nî.
Lo̍k-káng, N̂g Chia̍h-pô 17 nî.
Oân-lîm, Chhoà Kai-tit 17 nî, Tiuⁿ Hoé-chhiū 11 nî.
Lâm-tâu, Niû--sī Chàn-bí 16 nî, Gô͘--sī Siōng-jím 10 nî.
Bū-hong, Niû--sī Chàn-chiok 13 nî , N̂g--sī Siōng-hoa 10 nî.
Tiân-tiong, Tân Hoé-chong 13 nî.
Hô-bí, Chng--sī Hí-loân 13 nî, N̂g Sìn-tek 13 nî.
Jī-chuí, Tiuⁿ Thian-sàng 12 nî.
Chháu-tun, Loā Se 11 nî.
Soa-san, Hâu--sī Sò͘-ngô͘ 10 nî.
Kiōng 17 miâ.
(2) Ka-gī Tiong-hoē lāi.
Kiâm-chuí, Koeh Hiong 20 nî, Ô͘--sī Siâm 20 nî, Hoān Khiân-sùn 10 nî í-siōng, Koeh Kim-ki 10 nî í-siōng, Chhoà Suī 10 nî í-siōng.
Ka-gī , Ông--sī 16 nî.
Tang-āu-liâu, Chhoà Liān 10 nî í-siōng.
Lo̍k-moâ-sán, Khu Liân-hok 10 nî í-siōng.
Thô͘-khò͘, Lîm Poe 10 nî í-siōng.
(3) Tâi-lâm Tiong-hoē lāi.
Tâi-lâm , Hâu--sī Chheng-liân 29 nî, Ko--sī Siù-îⁿ 16 nî.
Sin-hoà, Lí Goân-sēng 20 nî.
An-pêng, Tiuⁿ--sī A-hó 19 nî.
Siān-hoà, Lîm--sī Loân 19 nî.
Téng-tiong-chiu, Khu Gī 18 nî, Gô͘ Chiau-seng 10 nî.
Ka-lí, So͘ Lîm 18 nî.
An-sūn, Gô͘ Chheng-liân 17 nî.
Kui-jîn, Lîm--sī Ba̍k-nî 17 nî, Koeh Khún 16 nî.
Soaⁿ-pà , Bo̍k Chuí-lêng 19 nî, Tè Bêng-tek 10 nî, Phiau--sī M̄ 11 nî, Lô Chiong-sin 13 nî, Lô Bûn-siông 13 nî.
Téng-soaⁿ-kha, Tè Khóng-bêng 17 nî, Siau--sī Suī-bín 13 nî, Go̍k Sian-hong 11 nî.
Chó-tìn , Toh Tek-chu 10 nî, Mái--sī Hoa 10 nî, Mái--sī Khoài 10 nî, Lí--sī Bí 10 nî, Mái Hui-tek 11 nî, N̂g Lâi 13 nî, Lô Chheng-êng 12 nî.
Sin-chhī, Bo̍k Chin-chu 12 nî.
Tang-mn̂g, Kéng--sī Suī-chu 13 nî.
Kong-á-nâ, N̂g--sī Siù-lân 10 nî.
(4) Ko-hiông Tiong-hoē lāi.
Hōng-soaⁿ, Au Sìn-tek 34 nî, Siau--sī lo 20 nî, Png--sī Siān 13 nî.
Bān-tan, Phêⁿ--sī Ho̍h-liân 30 nî, N̂g--sī Sèng-kim 20 nî.
Lâm-chú, Gô͘ Thian-sek 21 nî, Lîm--sī Choan 14 nî, Lîm--sī Iau-chu 14 nî.
Tang-káng, Ngó͘--sī Hēng 20 nî.
Kî-san. Lâu--sī Hiáng 17 nî, N̂g--sī Soat-lê 12 nî, Lí--sī Chuí-thoah 12 nî.
Pîn-tong, Gô͘ Khó-bián 18 nî, Ki--sī Âng-kam 15 nî, Gô͘--sī Chhong-gio̍k 17 nî, Lîm Chhim-hok 14 nî, Gô͘--sī Lân-hiong 13 nî, Chiu--sī Chhoā-tī 10 nî.
Ba̍k-sa, Ki Thian-huī 17 nî, Tè--sī Chhun-gio̍k 17 nî, Bo̍k Hoat-châi 12 nî, Mái Tiong-gī 10 nî, Báu Tiau-choân 12 nî.
Hái-po͘, Lí Boé 15 nî.
Lí-káng, N̂g Bān-hoat 11 nî.
Khe-chiu, Tân Uí 10 nî, Gô͘--sī Khêng-eng 10 nî.
Kau-phiâⁿ, Mái Khun-san 10 nî.
- Sèng-kù àm-liām siúⁿ.
Ū 9 keng kàu-hoē 32 miâ ha̍k-seng tit-tio̍h siúⁿ.
(a) 77 chat 7 miâ. (b) 57 chat 8 miâ. (c) 27 chat 17 miâ.
Thong-ti. Lâm Tāi Chú-ji̍t-o̍h pō͘-hoē-huì, boē kau ê kàu-hoē.
Chhiáⁿ tuì Chín-thè(臺灣振替) 4943 (ヨコヨミ) 岡山郡楠梓三九O南大主日學部會 kià lâi kau.
Lâm Tāi Chú-ji̍t-o̍h Pō͘-hoē.
Pō͘-tiúⁿ: Ông Siú-ióng.
Su-kì : Lîm Chiàu.
III. Tâi-oân ê Pa Khek-lé.
Tiong-o̍h ê Ha̍k-tiúⁿ Bān Eng-hoâ Bo̍k-su ū tù chi̍t pún chheh, teh lūn Pa Bo̍k-su tī Tâi-oân uī-tio̍h hok-im cháiⁿ-iūⁿ teh chò kang, iā siá-chhut tng-sî ê khoân-kéng. Sī Eng-kok oē; bûn suí koh chhián-hiān. Choá hó, koh chheh khin, ū 200 goā bīn. Chheh miâ Tâi-oân ê Pa Khek-lé(Barclay of Formosa). Kè-chîⁿ, 2 kho͘ poàⁿ.
漢羅（Ùi原文改寫）
雜錄
1937年3月624期 7-11
(黃俟命)
I. 宣道會的消息。
列位疼主的兄弟姊妹同鑒。
咱每擺坐主的桌，數念主的了後就獻金來做宣道會的路用。主講，「恁的財寶佇遐，恁的心也欲佇遐。」我有聽見濟濟人講，「宣道會有做甚物？阮攏毋知」。我聽這句話，家己真見笑。所以佇舊年12月28號，冒險過去澎湖(因為這个時期過去澎湖真無利便，有時會予風湧關咧幾若十日)。感謝阿爸爸上帝，有chhoā我過海，到逐个教會攏有巡--著，閣毋免予風湧關--著，逐所在照所預定的時日就清楚，到正月11號，就到台南赴新樓醫館一週年的祝賀會。Taⁿ我將所經過逐教會最近的教勢，報列位知：-
- 瓦硐教會。
傳道師：夏宇。長老；許靈魂，許Niū。執事：許永遠，許助。主日學校長：許永遠。教員3个，學生42个，每禮拜有40名出席；大人禮拜頂晡30名，下晡20名。獻金一年有22箍，總是有出外來台南做事業的兄弟姊妹，為in的教會每年有出170箍做傳道薪金，對今年起，in歡喜進步出240箍來交代宣道會。佇瓦硐有領洗禮的會友30名，小兒 13名。教勢有振興的氣象，3項：-
(1)有兩个精神病--的，真傷重，教會迫切替伊祈禱，就遐个人，taⁿ有穿衫仔褲，會食飯，現時調養中。
(2)有一个公學校的訓導，姓吳名Siong-sai，予官廳，社會，家族所尊敬--的，伊因為愛修養品性，造就人格，有讀濟濟修養的冊，到最近就決心認耶穌做伊的主，為著知伊的品性有缺陷，無耶穌袂通達伊的目的。這擺有領洗禮。
(3)未信者的囡仔20外人，in的爸母送in來讀主日學。看in的囡仔來讀主日學了後，紲袂chhoh歹喙，真歡喜。
佇這兩年間，來問道理--的，有25名，接納4名。求道者有5名。
- 馬公教會。
傳道師黃丁旺(4月起，Loā Jîn-sêng)。女傳道：陳李--氏素。長老：李--氏Koai，李清義，戴耀如執事：陳慶章，許Khûn。主日學校長，傳道師兼任；教員有4名，主日學學生有35名，出席有29名。大人禮拜頂下晡攏有40名以上(這是對舊年宋博士奮興會了後。) 新求道者有5戶，13人，每禮拜的獻金有1.20以上。例年出傳道薪金 50箍。對1937年起，歡喜欲出120箍。領洗禮的信徒有30名，小兒有38名，中間有的搬--過來台灣，紲失蹤跡。這个教會近來也有較活動。有3項：-
(1)發動機第一丸的船長胡Theng兄，若到馬公，就出力佈道，流目屎，求上帝著施恩佇澎湖海嶼的百姓。這个所做，予濟濟硬心的人著降服。
(2) 女傳道，原是欲派去花宅，因為黃丁旺先生硬挽留佇遐做工，遐的女界 幾若人得著大利益。
(3)戴耀如長老，是馬公家的評議員，予眾人所尊敬，總是伊當時是標榜伊是基督徒。教會內，教會外真有利益。其他的會友也漸漸知in做基督徒的本份。有李Moâi長老的故人倒去也熱心信主。最近兩擺問道理，有17人來問，接納7个。
- 西嶼，竹篙灣。
遮有兩口灶聽道理，歷過30外年，無人培養，無人照顧，受濟濟窘逐艱苦，已經經過3代人接紲禮拜逐禮拜日兩口灶做伙聚集。In的細囝，家己教白話字，有4，5个會讀聖經。領洗禮的大人有5个，細囝7个，兩家有20外人。In猶咧數念宋牧師娘早年去in遐教白話字。我佇遐共in行洗禮，守聖餐。
- 花宅的教會。
傳道師是戴Hōng-liân長老。伊來佇遮教漢學，早暗，禮拜日，chhoā遮的會友禮拜。佇遮的教會中，男女的青年第一捌道理，佮gâu祈禱--的，是佇遮。這原因，是逐日，早，暗，戴Hong-liân長老咧傳道理，咧教祈禱。可惜婦人人遐个做老母--的，無人通引chhoā。戴先生佇遮真犧牲，也遮的人真尊敬伊。早年王Kang長老有起這間拜堂，已經攏歹。佇舊年佇台南奮興會的路尾暗，特別為著遮的獻金有240箍，閣有有志者加添到260箍，來做遮起拜堂的路用。Taⁿ in有起一間真媠，會容允得130，140人，佮修理小厝，共開500外箍，會遐省，是戴長老佮伊所教的學生，出力做工，得著石頭濟濟，佮免倩小工。所有不足--的，有得著宣教師，女宣道會，佮咱部會，以及戴先生的兄弟叔孫，來鬥出力，致到佇不足中，欠缺中，對戴長老一人的犧牲，予大家生起相幫贊的心，到有夠額，真也感謝上帝。佇這海嶼中通看著為主背十字架的兄弟，真歡喜到極。
這个教會前途不止有望。現時長老頻Hú；執事高Chhiòng，也真出力。
兩擺問道理有38人(較濟是戴先生的學生)，有接納4人，領洗禮的大人才有14人，小兒 11人。遮的會友較濟出外佇高雄。禮拜日普通是20外人(主日學無在內)。主日學猶原是戴先生一人咧教。
- 大嶼教會傳道師許益超，今年新卒業，照看不止合遮个海嶼為主做工--的。伊掠艱苦，無文明的生活做滿足，願佮遮的艱苦的百姓做伙生活，將伊的份額佮遮的人公家用，家己真克己。這个海嶼差不多有5千人咧蹛，近來交通利便：比早前較好景況。雖然是按呢，才有7，8百人有通食3頓nā-tiāⁿ。其餘普通--的是干焦食兩頓。所做的事業攏是討海，若拄著災殃，是全家的查埔人攏無--去；佇邊仔幾若个海嶼攏是親像這款的生活。破病無錢，也無醫生通醫治。這个先生看著這等號的苦情，伊真甘願佮in同生活，來傳福音予in。
論遮的教會是第一濟人--的。In前每年出薪金 140箍。Taⁿ in有活動欲出180箍。有3个長老：夏傳，夏 Sùn，閣一个女長老4个執事。主日學真活動。我去，有赴--著in 咧祝聖誕，真gâu備辦，所做的齣，簡閣明，真有好的教示。台南呂Chhun-tông君去佇遐鬥活動。
這兩擺道理有17人，接納5人。領洗禮50外人。是真散真艱苦的生活。總是靈性上真有厚望。
請列位常常替遮的海嶼中生活艱苦的兄弟來祈禱。到遮个海嶼中聽著人咧吟詩呵咾上帝，比佇大都會的聖歌隊，閣較受感激，歡喜咱的阿爸爸上帝到佇天邊海角都有人咧稱讚。
佇遐做工的人，比佇咱遮較有犧牲克己，所以咱著大數念in。
II. 南大主日學。
部會佇1月4號聚集議士。
議定：-
-
今年(12年度)欲開南部大會主日學校長會議。請各教育部，設法各中會內校長(代表)4名來出席。
-
白話字教科書：-議定採用王守勇牧師著[主日學讀本]請各主日學對公報社注文。
對南大建議：-
-
主日學教員課本，歸公報社設法，毋免予各中會加貼Y48.00。
-
主日學用大幅掛圖歸公報社設法；因為較利便。
-
主日學部會費繼續徵收，一年一擺的事。
報告。設教70週年記念：-
- 主日學教員10年以上勤続表彰(昭和十年止)照下面：-
(1)台中中會內。
彰化，連--氏馬玉21年，潘Î-cheng 20年，李Thian-sióng 12年。
台中，劉樹20年。
鹿港，黃Chia̍h-pô 17年。
員林，蔡Kai-tit 17年，張火樹11年。
南投，梁--氏讚美16年，吳--氏Siōng-jím 10年。
霧峰，梁--氏Chàn-chiok 13年，黃--氏Siōng-hoa 10年。
田中，陳Hoé-chong 13年。
和美，莊--氏Hí-loân 13年，黃信德13年。
二水，張天送12年。
草屯，賴Se 11年。
Soa-san，侯--氏素娥10年。
共17名。
(2) 嘉義中會內。
鹹水，郭Hiong 20年，胡--氏Siām 20年，范Khiân-sùn 10年以上，郭金枝10年以上，蔡Suī 10年以上。
嘉義，王--氏16年。
東後寮，蔡Liān 10年以上。
Lo̍k-moâ-sán，邱連福10年以上。
土庫，林Poe 10年以上。
(3)台南中會內。
台南，侯--氏青蓮29年，高--氏Siù-îⁿ 16年。
新化，李Goân-sēng 20年。
安平，張--氏阿好19年。
善化，林--氏Loân 19年。
頂中洲，邱義18年，吳Chiau-seng 10年。
佳里，蘇Lîm 18年。
安順，吳Chheng-liân 17年。
歸仁，林--氏茉莉17年，郭Khún 16年。
Soaⁿ-pà ，穆Chuí-lêng 19年，戴明德10年，Phiau--氏毋11年，羅Chiong-sin 13年，羅Bûn-siông 13年。
頂山跤，戴孔明17年，蕭--氏瑞敏13年，Go̍k先鋒11年。
左鎮 ，卓Tek-chu 10年，Mái--氏Hoa 10年，Mái--氏快10年，李--氏Bí 10年，Mái Hui-tek 11年，黃Lâi 13年，羅Chheng-êng 12年。
新市，穆珍珠12年。
東門，Kéng--氏瑞珠13年。
岡仔林，黃--氏秀蘭10年。
(4)高雄中會內。
鳳山，歐信德34年，蕭--氏lo 20年，方--氏Siàn 13年。
萬丹，彭--氏Ho̍h-liân 30年，黃--氏聖金20年。
男子，吳 Thian-sek 21年，林--氏Choan 14年，林--氏Iau-chu 14年。
東港，Ngó͘--氏Hēng 20年。
旗山。劉--氏Hiáng 17年，黃--氏Soat-l的12年，李--氏Chuí-thoah 12年。
屏東，吳Khó-bián 18年，Ki--氏Âng-kam 15年，吳--氏Chhong-gio̍k 17年，林Chhim-hok 14年，吳--氏Lân-hiong 13年，周--氏Chhoā-tī 10年。
木柵，Ki Thian-huī 17年，戴--氏Chhun-gio̍k 17年，穆發財12年，Mái Tiong-gī 10年，Báu Tiau-choân 12年。
海埔，你Boé 15年。
里港，黃Bān-hoat 11年。
溪洲，陳Uí 10年，吳--氏Khêng-eng 10年。
溝坪，Mái Khun-san 10年。
- 聖句暗念賞。
有9間教會32名學生得著賞。
(a) 77節7名。(b) 57節8名。(c) 27節17名。
通知。南大主日學部會費，未交的教會。
請對振替(臺灣振替) 4943 (ヨコヨミ) 岡山郡楠梓三九○南大主日學部會寄來交。
南大主日學部會。
部長：王守勇。
書記：林照。
III. 台灣的巴克禮。
中學的學長萬Eng-hoâ牧師有著一本冊，咧論巴牧師佇台灣為著福音怎樣咧做工，也寫出當時的環境。是英國話；文媠閣淺現。紙好，閣冊輕，有200外面。冊名台灣的巴克禮(Barclay of Formosa)。價錢，2箍半。