活命

oa̍h-miā

文獻資訊

項目	資料
作者	主筆 Chú-pit
卷期	台灣教會公報
卷期	第624號
日期	1937/3
頁數	1-2

白話字（原文數位化）

oa̍h-miā

Chú-pit

1937年3月624期      1-2

oa̍h-miā , sī chin pó-poè , koh sī lâng-lâng só͘ ì-ài--ê. Sui-jiân chun-kuì chò kok-kun, hó-gia̍h ū sù-hái; chóng-sī it-tàn bô oa̍h-miā, chiū it-chhè kui tī o͘-iú lah! Só͘-í Chú Iâ-so͘ kóng, Lâng nā tit-tio̍h choân sè-kài, lâi sòng-sit i ê sìⁿ-miā ,ū sím-mi̍h lī-ek?

oa̍h-miā ê goân-thâu: Kho-ha̍k-ka kóng oa̍h-miā sī chū-jiân ū--ê. In-uī nā chiong chi̍t-tè ê thô͘-moê, khǹg tī hiā-phoè ê téng-bīn, bô kú ka-tī ē hoat chháu-á. Á-sī chiong chháu-á kap chuí khǹg tī kan-á-lāi, bô kú ē seⁿ chē-chē sè-sè ê thâng. M̄-kú lí nā chiong thô͘-moê koè sio, kan-á-lāi ê chuí koè kún, lí siūⁿ ē hoat chháu, seⁿ-thâng bē? Tek-khak bē. Khó-kiàn oa̍h-miā m̄-sī chū-jiân ka-tī ū--ê.

oa̍h-miā tī Tō ê lāi-bīn: Ki-tok sī lán ê oa̍h-miā. Chhì-khoàⁿ Ki-tok ê tō-lí , bô-lūn siáⁿ sî-tāi , thoân kàu bô-lūn sím-mi̍h tē-hng, put-sî siū Mô͘-kuí kap i ê pō͘-hā ê hoán-tuì , phò-hoāi , táⁿ-tó……Chóng-sī Ki-tok ê tō-lí ná chhin-chhiūⁿ phang-chháu, ná kā i teh, ná hián-chhut phang-bī; ná hoán-tuì, ná heng-ōng. Che sī siáⁿ in-toaⁿ? In-uī Chú ê tō-lí, ū oa̍h-miā tī-teh. Só͘-í Iâ-so͘ kóng, Koh-oa̍h kap oa̍h-miā sī chāi-tī Goá, sìn Goá ê lâng, sui-bóng sí, iáu-kú beh oa̍h.

Sio̍k Sîn ê oa̍h-miā: Lia̍t-uī hiaⁿ-ché ah! Lí jio̍k-thé ê oa̍h-miā , káⁿ chin hong-hù; chóng-sī sio̍k Sîn ê oa̍h-miā siáⁿ khoán leh? Chhiáⁿ tāi-ke chēng-chēng ka-kī séng-chhat lí sio̍k Sîn ê kú-tōng, sio̍k Sîn ê kau-poê, sio̍k Sîn ê khiàm-khoeh cháiⁿ-iūⁿ, chiū thang chai lah. Ū bó͘ Ki-tok-tô͘, nā chhiáⁿ i lâi hù chi̍p-hoē, i kóng, bô ì-sù. Nā chhiáⁿ i kî-tó, i kóng, bô ì-sù, bô lō͘-ēng. Chit khoán ê Ki-tok-tô͘, láu-si̍t lâi kóng, bô ū sio̍k Sîn ê oa̍h-miā tī-teh. Khiok ū chi̍t khoán Ki-tok-tô͘ sui-jiân ū hù chi̍p-hoē tha̍k Sèng-keng, kî-tó; m̄-kú chò-kang bô lêng-le̍k. Thài án-ni? In-uī in sī sio̍k tī lêng ê oa̍h-miā(靈命) po̍k-jio̍k(薄弱) ê Ki-tok-tô͘ . Ki-tok-tô͘ ah! Tng tī chit ê sin-nî , tī lí ê sìn-gióng seng-oa̍h, tek-khak tio̍h chin kín-tiong(緊張); iā tio̍h chhim-chai lí ū toā khiàm-ēng Ki-tok kap lí tī-teh. Kiat-liân tī I, chiah ū sio̍k Sîn ê oa̍h-miā.

Hong-hù ê oa̍h-miā: Beh tuì tó-lo̍h lâi tit-tio̍h Ki-tok só͘ ū hong-hù ê oa̍h-miā? Chhiáⁿ khoàⁿ Lô-má 11:17. Lán si̍t-chāi sī iá-kaⁿ-ná; Í-sek-lia̍t-lâng sī chin ê kaⁿ-ná. In-uī Í-sek-lia̍t-lâng khì-choa̍t Ki-tok, soà siū at-khí-lâi. Lán chit khoán iá-kaⁿ-ná, tit-tio̍h Siōng-tè te̍k-pia̍t ê in-sù, chiap tī kaⁿ-ná-chhiū nih, thoat-lī pún-sin kū ê kin-ki, chiap tī sin ê kin-ki , saⁿ-kap ū hūn tī kaⁿ-ná ê kin kap puî-chiap . Ha-leh-luh-iah! Chú só͘ siúⁿ-sù hong-hù ê oa̍h-miā.

Kî-biāu ê oa̍h-miā: Che Ki-tok ê oa̍h-miā , chin sī kî-biāu!!! Lán ài tit-tio̍h Ki-tok ê oa̍h-miā, it-tēng tio̍h chhin-chhiūⁿ chiap-chhiū ê khoán, thoat-lī kū ê choē-kin-it-chhè chêng-io̍k, khoà-lū, kan-chà, téng-téng , kū ê choē-kin-sèng, keng-koè pó͘-thâu kù-á ê siu-siah-Poē Si̍p-jī-kè thòng-khó͘ ê thoàn-liān: Sèng-kiat , jím-nāi, put-sî oá-khò Ki-tok, khîⁿ-tiâu Ki-tok; chiū ē tit-tio̍h Ki-tok ê oa̍h-miā , ná kú nā hong-hù. Ū hong-hù oa̍h-miā ê Ki-tok-tô͘ , i ta̍k-ji̍t ê seng-oa̍h siáⁿ khoán?

1. Choa̍t-tuì sêng-si̍t(絕對誠實).

2. Choa̍t-tuì chheng-khì-siùⁿ(絕對聖潔).

3. Choa̍t-tuì Thiàⁿ(絕對愛).

4. Choa̍t-tuì bô kò͘ ka-tī(絕對無私).

漢羅（Ùi原文改寫）

活命

主筆

1937年3月624期      1-2

活命，是真寶貝，閣是人人所意愛--的。雖然尊貴做國君，好額有四海；總是一旦無活命，就一切歸佇烏有啦！所以主耶穌講，人若得著全世界，來喪失伊的性命，有甚物利益？

活命的源頭：科學家講活命是自然有--的。因為若將一塊的土糜，囥佇瓦phoè的頂面，無久家己會發草仔。抑是將草仔佮水囥佇矸仔內，無久會生濟濟細細的蟲。毋過你若將土糜過燒，矸仔內的水過滾，你想會發草，生蟲袂？的確袂。可見活命毋是自然家己有--的。

活命佇道的內面：基督是咱的活命。試看基督的道理，無論啥時代，傳教無論甚物地方，不時受魔鬼佮伊的部下的反對，破壞，打倒……總是基督的道理那親像芳草，那共伊硩，那顯出芳味；那反對，那興旺。這是啥因端？因為主的道理，有活命佇咧。所以耶穌講，閣活佮活命是在佇我，信我的人，雖罔死，猶過欲活。

屬神的活命：列位兄姊啊！你肉體的活命，敢真豐富；總是屬神的活命啥款咧？請大家靜靜家己省察你屬神的舉動，屬神的交陪，屬神的欠缺怎樣，就通知啦。有某基督徒，若請伊來赴集會，伊講，無意思。若請伊祈禱，伊講，無意思，無路用。這款的基督徒，老實來講，無有屬神的活命佇咧。卻有一款基督徒雖然有赴集會讀聖經，祈禱；毋過做工無能力。Thài按呢？因為in是屬佇靈的活命(靈命)薄弱的基督徒。基督徒啊！當佇這个新年，佇你的信仰生活，的確著真緊張；也著深知你有大欠用基督佮你佇咧。結聯佇伊，才有屬神的活命。

豐富的活命：欲對佗落來得著基督所有豐富的活命？請看羅馬11：17。咱實在是野橄欖；以色列人是真的橄欖。因為以色列人棄絕基督，紲受遏起來。咱這款野橄欖，得著上帝特別的恩賜，接佇橄欖樹裡，脫離本身舊的根枝，接佇新的根枝，相佮有份佇橄欖的根佮肥汁。Ha-leh-luh-iah！主所賞賜豐富的活命。

奇妙的活命：這基督的活命，真是奇妙！！！咱愛得著基督的活命，一定著親像接樹的款，脫離舊的罪根-一切情慾，掛慮，奸詐，等等，舊的罪根性，經過斧頭鋸仔的修削-背十字架痛苦的鍛鍊：聖潔，忍耐，不時倚靠基督，擒牢基督；就會得著基督的活命，那久若豐富。有豐富活命的基督徒，伊逐日的生活啥款？

1. 絕對誠實。

2. 絕對清氣性(絕對聖潔)。

3. 絕對疼(絕對愛)。

4. 絕對無顧家己(絕對無私)。