有益的逸話
Iú-ek ê e̍k-oā
文獻資訊
| 項目 | 資料 |
|---|---|
| 作者 | 柯設偕 Koa Siat-kai |
| 卷期 | 台灣教會公報 |
| 卷期 | 第624號 |
| 日期 | 1937/3 |
| 頁數 | 28 |
白話字（原文數位化）
Iú-ek ê e̍k-oā
Tio̍h khoàⁿ nn̄g-bīn
1937.03 Tē 624 Hō p.28
Koà-chhài-chí tē 134 Hō
(Koa Siat-kai)
Chāi chá tī bó͘ só͘-chāi ê lō͘-tiong, ū nn̄g ê kî-sū saⁿ tn̄g, chi̍t-ê tuì hit pêng lâi, chi̍t-ê tuì chit pêng khì.
Hit nn̄g ê kî-sū tú-tú saⁿ-tn̄g tī chi̍t-châng chhiū-kha, iā hit châng chhiū ū tiàu chi̍t ê tún tī-teh.
Tuì hit pêng lâi ê kî-sū khoàⁿ-tio̍h hit ê tún chiū kóng, “Chit ê sī kim--ê.” Tuì chit pêng khì ê kî-sū iā khoàⁿ-tio̍h hit ê tún chiū kóng, “Chit ê sī gûn--ê.”
Chi̍t-ê kóng sī kim--ê, chi̍t-ê kóng sī gûn--ê.
Tuì án-ni hit nn̄g ê kî-sū, soà saⁿ-chìⁿ, m̄-jīn su, m̄ saⁿ-niū, ná chìⁿ ná jia̍t, ná chìⁿ ná siū-khì, kàu āu-lâi soà saⁿ-thâi, iā nn̄g-ê lóng sí tī hit ê tún ê ē-kha !
Chin khó-lîn ! hit nn̄g ê kî-sū, saⁿ-chìⁿ, soà saⁿ-thâi, sí ti7 in só͘ teh saⁿ-chìⁿ ê tún ê ē-kha !
Hit ê tún, chi̍t pêng sī kim--ê, chi̍t pêng sī gûn--ê.
Hit nn̄g ê kî-sū, chhut-la̍t chú-tiuⁿ in ka-kī só͘ khoàⁿ--ê, lóng bô saⁿ niū, long2 m̄ jīn-su, khiok kó͘ lâng ū i chi̍t pêng ê lí.
Khó-sioh, in bô chun-tiōng pa̍t-lâng ê chú-tiuⁿ, bô chham-khó pa̍t-lâng ê só͘-khoàⁿ--ê, tì-kàu tú-tio̍h chit khoán ê saⁿ-chiⁿ.
It-poaⁿ ê lâng ū-sî chhut-la̍t chú-tiuⁿ in ka-kī ê só͘-khoàⁿ--ê, só͘-siūⁿ--ê, khiok sī hó; chóng-sī iā tio̍h oā hiáu thé-thiap pa̍t-lâng ê chú-tiuⁿ, chiong pa̍t-lâng ê ì-kiàn, lâi chham-khó,chiah oā saⁿ lī-ek.
Tī sè-kan, khah-siông lâng saⁿ-chiⁿ boē soah, si7 in-ui7 in chhin-chhiūⁿ hit nn̄g ê kî-sū, khoàⁿ tún ê chi̍t pêng, lia̍h choè chin tio̍h; boē kì-tit iáu ū chi̍t pêng tī-teh.
Tio̍h khoàⁿ nn̄g bīn, chiah oē chiâu-chn̂g.
ǹg-bāng lán tāi-ke, bô-lūn koan-hē tī sím-mi̍h sū, oē ēng saⁿ chun-tiōng, saⁿ thé-thiap, saⁿ lí-kái ê cheng-sîn, lâi chú-tiuⁿ, chham-siông, saⁿ lī-ek, lâi êng-kng Siōng-chú ê miâ.
漢羅（Ùi原文改寫）
有益的逸話
著看兩面
1937.03 第624號 p.28
芥菜子第134號
(柯設偕)
在早佇某所在的路中，有兩个騎士相tn̄g，一个對彼爿來，一个對這爿去。
彼兩个騎士抵抵tn̄g 佇一欉樹跤，也彼欉樹有吊一个盾佇--teh 。
對彼爿來的騎士看著彼个盾就講：「這个是金--的。」對這爿去彼个騎士也看著彼个盾就講：「這个是銀--的。」
一个講是金--的，一个講是銀--的。
對按呢彼兩个騎士，紲相諍，毋認輸，毋相讓，那諍那熱，那諍那受氣，到後來紲相刣，也兩个攏死佇彼个盾的下跤。
真可憐！彼兩个騎士，相諍，紲相刣 ，死佇in所相諍的盾的下跤！
彼个盾，一爿是金--的，一爿是銀--的。
彼兩个騎士，出力主張in家己所看--的，攏無相讓，攏毋認輸，卻各人有伊一爿的理。
可惜，in無尊重別人的主張，無參考別人的所看--的，致到拄著這款的相爭 。
一般的人有時出力主張in家己的所看--的，所想--的，卻是好；總--是也著會曉體貼別人的主張，將別人的意見，來參考，才會相利益。
佇世間，較常人相爭袂煞，是因為in親像彼兩个騎士，看盾的一爿，掠做真著，袂記得猶有一爿佇--teh 。
著看兩面，才會齊全。
向望咱逐家，無論關係佇甚物事，會用相尊重，相體貼，相理解的精神，來主張、參詳、相利益，來榮光上主的名。