故李德長老的小傳
Kò͘ Lí Tek Tiúⁿ-ló ê Sió-toān
文獻資訊
| 項目 | 資料 |
|---|---|
| 作者 | 謝福元 Siā Hok-goân |
| 卷期 | 台灣教會公報 |
| 卷期 | 第624號 |
| 日期 | 1937/3 |
| 頁數 | 28 |
白話字（原文數位化）
Kò͘ Lí Tek Tiúⁿ-ló ê Sió-toān
1937.03 tē 624 hō p.28-29
Koà-chhài-chí tē 134 hō
(Siā Hok-goân)
Kò͘ Lí Tek Tiúⁿ-ló sī Kò͘ Lí Kiong Sian-siⁿ ê tē-jī kiáⁿ, Chú-āu 1878 nî chiaⁿ-goe̍h 4 ji̍t chhut-sì tī Siā-á Lūn-á-téng. Siāng hit nî Lūn-á-téng ê pài-tn̂g tī 4 goe̍h 14 ji̍t iā chhut-sì. Tī Chú-āu 1936 nî 12 goe̍h 7 ji̍t, ngó͘-chiân 5 tiám, chiū siū Chú ê sèng-tiàu lī-khui sè-kan, hióng-siū 59 hè.
Tī 1888 nî, Lí Tiúⁿ-ló 10 hè ê sî, chiū tuì Tân En̂g-hui Bo̍k-su siū soé-lé, āu-lâi chiap-la̍p Sèng-chhan. Tuì soè-hàn ê sî siū ka-têng ê chong-kàu kàu-io̍k, só͘-í tī it-seng chin thiàⁿ-thàng Siōng-tè ê sèng-hoē.
Hiān-sî, i ū lâu saⁿ uī kong-chú kap saⁿ uī ê chhian-kim. Lūn-khí i ê gâu liāu-lí ka-têng, á-sī thiàⁿ Siōng-tè ê sèng-hoē, toā-toā choè hiān-tāi ê Ki-tok-tô͘ ê bô͘-hoān.
Tióng-lâm Chìn-seng Sian-siⁿ, ū chut-gia̍p Su-hoān ha̍k-hāu, chiū siū jīm-bēng choè Kong-ha̍k-hāu ê Sian-siⁿ, iā bat choè kàu-hoē ê chip-sū, hiān-sî hong-chit tī Lī-te̍k-kán Kong-ha̍k-hāu.
Sì-lâm Í-lo̍k hiaⁿ, ū chut-gia̍p Tâi-pak jī-tiong, soà-chiap jip Ko-téng ha̍k-hāu, in-uī sin-thé loán-jio̍k ê iân-kò͘, chiū thè-hāu, tī ka-têng teh pang-chān ka-sū.
Gō͘-lâm Ngá-kok hiaⁿ, ū chut-gia̍p Gî-lân Lông-lîm ha̍k-hāu, chiū hùn-hoat ài uī Chú choè kang, ji̍p Tâi-pak Sîn Ha̍k-hāu.
Tióng-lú Sim-chû chí, ū pit-gia̍p Tām-chuí Lú Ha̍k-iⁿ, āu-lâi chhut-kè Tê-siong kong-hoē lí-sū, Báng-kah Chhoà Thian-chù Chip-sū, hiān-chāi ū saⁿ-uī kong-chú lóng ji̍p tiong-téng ha̍k-hāu.
Sam-lú Chhun-chí, ū pit-gia̍p Tām-chuí Lú Ha̍k-iⁿ, chiū ū ji̍p Tâi-pak Pīⁿ-īⁿ Chō͘-sán-hū káng-si̍p-só͘, pit-gia̍p liáu-āu, chiū kè hiān-ha̍k Ko-hiông chiu ki-su Tân Chuí-seng Sian-siⁿ, iā hiān-chāi khai-gia̍p Sán-pô tī Kong-hiông-chhī, put-chí siū it-poaⁿ ê sán-ka hoan-gêng.
Sì-lú Chhiu-lân chí, pit-gia̍p Tâi-pak Tē-saⁿ ko-lú Su-hoān-kho, chiū jīm-bēng choè Kong ha̍k-hāu ê Sian-siⁿ, āu-lâi chiū chhut-kè tī hiān-jīm Gî-lân Bo̍k-su Tīⁿ Chhong-kok Sian-siⁿ.
Lí Tek Tiúⁿ-ló it-seng chīn-la̍t tī chú-lú ê kàu-io̍k, put-sî i ê lô-khó͘, tuì siàu-liân chiū khûn-khûn choè kang, iā put-chí chiat-khiām, put-lūn cháiⁿ-iūⁿ sī ài i ê kiáⁿ-jî tit-tio̍h kàu-io̍k thang lâi lī-ek siā-hoē, í-ki̍p Siōng-tè ê sèng-kok.
Tī Chú-āu 1924 nî 3 goe̍h 30 ji̍t, siū hoē-iú ê kong-kú, siat-li̍p choè Saⁿ-kak-po͘ kàu-hoē ê Tiúⁿ-ló, le̍k-jīm choē-choē nî, iā bat siū-phài choè Tāi-gī Tiúⁿ-ló, put-chí uī-tio̍h kàu-hoē lâi hi-seng.
Lí Tiúⁿ-ló put-chí hó-táⁿ kan-chèng Chú ê Hok-im, lâi chhián-bêng tō-lí, iā put-chí choē pái kap lâng piān-lūn. Ū chi̍t pái kap chi̍t ê Chin Iâ-so͘-kàu ê lâng piān-lūn, in-uī i siông-siông beh lai5 ín-iu2 in ê ke. Só͘-í kóng Siōng-tè sī chi̍t ê, Ki-tok sī chi̍t ê, mih-sái kóng lín ê chiah sī chin, goán ê sī ké--ê, to̍k-to̍k tio̍h siūⁿ, goá sī Siōng-tè ê kiaⁿ2 á m̄-sī ? Tio̍h si̍t-chāi lán ê choē ū hō͘ Chú ê pó-huih lâi soé-chheng choè iàu-kín. iā tuì Siōng Chú tio̍h ū kèng-khiân. I ta̍k ji̍t khûn-khûn choè kang, nā kàu Siōng-tè ê sèng-ji̍t, chiū tek-khak hioh-khùn, na7 m̄-sī tú-tio̍h ke̍k toā ê chó͘-tòng, tek-khak kàu pài-tn̂g. Sui-jiân sin-thé tuì khah chá chiū ū chit ê uī-pīⁿ, iáu-kú choè kang, á-sī ho̍k-sāi Siōng Chú bô làng. Ū kuí-nā pái uī-thiàⁿ, iáu-kú kàu pài-tn̂g, iā chēng-chēng thiaⁿ tō-lí. Ta̍k pái lóng khah chá kàu pài-tn̂g, chiū tī-hia hian-khui Sèng-chheh lâi tha̍k.
Tī 1936 nî 12 goe̍h 6 ji̍t ê sèng-ji̍t iáu-kú kàu pài-tn̂g, tī hit ê-hng iáu teh kóng kin-ê-hng beh ū ka-têng lé-pài, chiū-sī láu tau, kàu hit àm tāi-iok chi̍t tiám cheng ê sî, ū khah kan-khó͘, chiū ai 2, 3 siaⁿ khah toā siaⁿ, chiū tuì i ê hū-jîn-lâng kóng, goá hiān-sî chin kan-khó͘, goá ê thiàⁿ ū thiu thàu kah-chiah sim khì, iā Tiúⁿ-ló-niû chiū chīn só͘ oē ê lâi kā i chiàu-kò͘, i chiū kî-tó, “Chú Iâ-so͘ ah ! Goá hiān-sî ê sin-thé thàng-thiàⁿkàu-ke̍k, nā-sī Lí ê chí-ì, kiû Lí hō͘ goá an-jiân lī-khui chit ê kan-khó͘ ê sè-kan. Chú ah ! Kiû Lí tio̍h chiap-la̍p goá ê lêng-hûn……” āu lâi chiū khah hó. Kàu ngó͘-chiân 5 tiám, chiū siū Chú ê sèng-tiàu, khoàⁿ i ê bīn-iông bô chi̍t-sut-á ê iu-khó͘, chin chhiò-iông iā bô sit-sek.
Tī 12 ge̍h 10 ji̍t ngó͘-chiân 9 tiám-poàⁿ, tuì Tân Khoe-chùn Bo̍k-su ê su-sek, tī ka-kī ê chhù kú-hêng sēng-tāi ê kò-pia̍t-sek. Hoē-chiòng tāi-iok oá 200 miâ, ta̍k lâng bo5 m̄ uī-tio̍h i ê sí lâi ai-siong. Si̍t-chāi Lí Tek Tiúⁿ-ló put-lūn tuì lāi, tuì goā lóng hō͘ lâng o-ló. Sit-lo̍h Lí Tek Tiúⁿ-ló, sī chhin-chhiūⁿ sit-lo̍h kàu-hoē tiōng-iàu ê niû-thiāu.
Goān Siōng Chú pang-chān i ê uî-cho̍k, éng kap in bô lî, lâi an-ui3 in
漢羅（Ùi原文改寫）
故李德長老的小傳
1937.03 第624號 p.28-29
芥菜子第134號
(謝福元)
故李德長老是故李恭先生的第2子，主後1878年正月4日出世佇社仔崙仔頂，像彼年崙仔頂的拜堂佇4月1日也出世。佇主後1936年12月7日，午前5點，就受主的聖召離開世間，享受59歲。
佇1888年，李長老10歲的時，就對陳榮輝牧師受洗禮，後來接納聖餐。對細漢的時受家庭的宗教教育，所以佇一生真疼痛上帝的聖會。
現時，伊有留3位公子佮3位的千金。論起伊的gâu料理家庭，抑是疼上帝的聖會，大大做現代的基督徒的模範。
長男進聲先生，有卒業師範學校，就受任命做公學校的先生，也捌做教會的執事，現時奉職佇利澤簡公學校。
四男以諾兄，有卒業台北二中，紲接入高等學校，因為身體軟弱的緣故，就退校，佇家庭teh幫贊家事。
五男雅各兄，有卒業宜蘭農林學校，就奮發愛為主做工，入台北神學校。
長女心慈姊，有畢業淡水女學院，後來出嫁茶商公會理事萬華蔡天註執事，現在有三位公子攏入中等學校。
三女春姊，有畢業淡水女學院，就有入台北病院助產婦講習所，畢業了後，就嫁現學高雄州技師陳水生先生，也現在開業產婆高雄市，不止受一般的產家歡迎。
四女秋蘭姊，畢業台北第三高女師範科，就任命做公學校的先生，後來就出嫁佇現任宜蘭牧師鄭蒼國先生。
李德長老一生盡力佇子女的教育，不時伊的勞苦，對少年就勤勤做工，也不止節儉，不論怎樣是愛伊的囝兒得著教育通來利益社會，以及上帝的聖國。
佇主後1924年3月30日，受會友公舉，設立做三角埔教會的長老，歷任濟濟年，也捌受派做代議長老，不止為著教會來犧牲。
李長老不止好膽干證主的福音，來闡明道理，也不止濟擺佮人辯論。有一擺佮一個真耶穌教的人辯論，因為伊常常欲來引誘in的家。所以講上帝是一個，基督是一個，mih使講恁的才是真，阮的是假的，獨獨著想，我是上帝的子抑毋是？著實在咱的罪有予主的寶血來洗清最要緊。也對上主著有敬虔，伊逐日勤勤做工，若到上帝的聖日，就的確歇睏，若毋是抵著極大的阻擋，的確到拜堂。雖然身體對 較早就有這的胃病，猶久做工，抑是服事上主無làng。有幾若擺胃痛，猶過到拜堂，也靜靜聽道理。逐擺攏較早到拜堂，就佇遐掀開聖冊來讀。
佇1936年12月6日的生日猶過到拜堂，佇彼e昏猶teh講今e昏欲有家庭禮拜，就是咱兜，到彼暗大約一點鐘的時，有較艱苦，就哀2、3聲較大聲，就對伊的婦人人講，我現時真艱苦，我的痛有抽透胛脊心去，也長老娘就盡所會的來共伊照顧，伊就祈禱：「主耶穌ah！我現時的身體疼痛到極，若是你的旨意，求你予我安然離開這的艱苦的世間，主ah！求你著接納我的靈魂……」後來就較好。到午前5點，就受主的聖召，看伊的面容無一屑仔的憂苦，真笑容也無失色。
佇12月10日午前9點半，對陳溪圳牧師的司式，佇家己的厝舉行盛大的告別式。會眾大約倚200名，逐人無毋為著伊的死來哀傷。實在李德長老不論對內、對外予人呵咾，失落李德長老，是親像失落教會重要的樑柱。
願上主幫贊伊的遺族，永佮in無離，來安慰in。