偉人的名訓
Uí-jîn ê bêng-hùn
文獻資訊
| 項目 | 資料 |
|---|---|
| 作者 | 卓恆利 Toh Hêng-lī |
| 卷期 | 台灣教會公報/芥菜子 |
| 卷期 | 第624號 |
| 日期 | 1937/3 |
| 頁數 | 22-23 |
白話字（原文數位化）
Uí-jîn ê bêng-hùn
Toh Hêng-lī
1937年3月624期 22-23
スマイルスkóng, “Khoàⁿ-khin sió-khoá tāi-chì ê lâng, boē thang chiâⁿ-chò toā jîn-bu̍t”. án-ni thang chai, sui-jiân sī sió-khoá ê sū, iáu-kú m̄-thang khoàⁿ choè bô iàu-kín, in-uī kó͘-kim ê toā jîn-bu̍t bô m̄-sī tuì-tiōng soè-soè hāng ê sū.
西諺 kóng, “Siūⁿ ê sî-kan tio̍h khah kú, beh kóng ê oē tio̍h khah bān, chóng-sī it-tàn siūⁿ liáu kap kóng-chhut tio̍h m̄-thang koh tiû-tû iân-chhiân”. Nā sī sè-kan lâng choē-choē bô siūⁿ, suî-piān kóng, tì-kàu kóng kap só͘ kiâⁿ--ê choē-choē m̄-tio̍h poa̍h-tó.
ジヨンソンkóng, “Seng-khu nā-sī ū ti̍t, chiū hit ê seng-khu só͘ chiò ê iáⁿ bô khiau.” Taⁿ seng-khu chiū-sī chí-khí lâng ê sim-koaⁿ, iáⁿ sī phì-jū lâng ê hêng-uî. In-uī sim-koaⁿ nā chèng-ti̍t, chiū só͘ choè sī chèng-gī ióng-kám, sim-koaⁿ nā-sī lâ-sâm, só͘ choè sī kan-chà im-bô͘.
Koh-kóng, “Lâng nā-sī ài boé bô pit-iàu ê bu̍t-phín, chiū bô-kú oē boē kàu tī pit-iàu ê mi̍h-kiāⁿ”. Thang chai boé mi̍h-kiāⁿ m̄-thang tham sio̍k chhìn-chhái boé, só͘ tio̍h boé ū pit-iàu , ha̍p ēng chiah bô guî-hiám.
西諺 kóng, “Choan-it ê sim oē thang choè choē-choē hāng ê tāi-chì, nā khǹg choē-choē khoán ê sim-koaⁿ, chiū boē thang choè kàu chi̍t hāng ê sū.”, án-ni thang chai bô lūn choè sím-mi̍h , lóng tio̍h chi̍t-sim chi̍t-chì chiah choè ū tāi-chì, nā siūⁿ chia siūⁿ hia, kiat-kio̍k lóng choè bô poàⁿ hāng.
Koh kóng, “Lō͘ sui-jiân sī kūn, nā bô kiâⁿ sī boē kàu-uī, tāi-chì sui-jiân sī soè, nā bô choè iā sī boē chiâⁿ.” Só͘-í put-lūn sió sū, m̄-thang m̄ tín-tāng, khoàⁿ-khin m̄ khì choè.
エヂソンkóng, “Ū tek-hēng ê lâng khùn-bîn sī put-chí hó-khùn.” In-uī i ê sim-koaⁿ ū boán-chiok kap pêng-an tī-teh, bô hoân-ló, bô khoà-lū , bô oàn-hūn, bô siū-khì, suî-sî tó-lo̍h bîn-chhn̂g, suî-sî khùn, sī kàu-ke̍k ê hok-khì.
西諺 kóng, “Mi̍h-kiāⁿ sit-lo̍h , chiah chai hit ê kè-ta̍t”.
Koh kóng, “M̄-thang ǹg-bāng beh kái-piàn lán ê kéng-gū, tio̍h ǹg-bāng kái-piàn lán ê sim-koaⁿ”. In-uī sim-koaⁿ nā kái-piàn, chiū lán ê kéng-gū iā beh kái-piàn.
Koh kóng, “Thiaⁿ chi̍t hāng bat chi̍t hāng sī khah khoài, bat cha̍p-hāng sī khah oh”.
ソロモンkóng, “Tì-sek ê lâng sī tì-ì thiaⁿ, gōng ê lâng sī kan-ta ba̍uh kóng.”
漢羅（Ùi原文改寫）
偉人的名訓
卓恆利
1937年3月624期 22-23
スマイルス講，「看輕小可代誌的人，袂通成做大人物」。按呢通知，雖然是小可的事，猶過毋通看做無要緊，因為古今的大人物無毋是對重細細項的事。
西諺講，「想的時間著較久，欲講的話著較慢，總是一旦想了佮講出著毋通閣躊躇延延」。若是世間人濟濟無想，隨便講，致到講佮所行--的濟濟毋著跋倒。
ジヨンソン講，「身軀若是有直，就彼个身軀所照的影無曲。」Taⁿ身軀就是指起人的心肝，影是譬喻人的行為。因為心肝若正直，就所做是正義勇敢，心肝若是垃儳，所做是奸詐陰謀。
閣講，「人若是愛買無必要的物品，就無久會袂到佇必要的物件」。通知買物件毋通貪俗凊彩買，所著買有必要，合用才無危險。
西諺講，「專一的心會通做濟濟項的代誌，若囥濟濟款的心肝，就袂通做到一項的事。」，按呢通知無論做甚物，攏著一心一志才做有代誌，若想遮想遐，結局攏做無半項。
閣講，「路雖然是近，若無行是袂到位，代誌雖然是細，若無做也是袂成。」所以不論小事，毋通毋振動，看輕毋去做。
エヂソン講，「有德行的人睏眠是不止好睏。」因為伊的心肝有滿足佮平安佇咧，無煩惱，無掛慮，無怨恨，無受氣，隨時倒落眠床，隨時睏，是到極的福氣。
西諺講，「物件失落，才知彼个價值」。
閣講，「毋通向望欲改變咱的境遇，著向望改變咱的心肝」。因為心肝若改變，就咱的境遇也欲改變。
閣講，「聽一項捌一項是較快，捌十項是較僫」。
ソロモン講，「智識的人是致意聽，戇的人是干焦貿講。」