三年運動特記
Saⁿ nî ūn-tōng te̍k-kì
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報/芥菜子 |
| 卷期 | 第624號 |
| 日期 | 1937/3 |
| 頁數 | 23-24 |
白話字（原文數位化）
Saⁿ nî ūn-tōng te̍k-kì
S.L.S.
1937年3月624期 23-24
- Chú-tiuⁿ:
Hiah kú ê le̍k-sú ê kàu-hoē, eng-kai tio̍h chhut choē-choē jîn-bu̍t, á-sī sìn-gióng ê ióng-chiá, á-sī choē-choē tiong-si̍t ê sìn-tô͘; chóng-sī che sī chin hi-hán. uī-tio̍h án-ni kàu-hoē loán-jio̍k; m̄-sī jîn-sò͘ chió, chîⁿ chió ê bô la̍t. Che sī chin[sic.] tuì sìn-gióng ê khoat-hām só͘ tì ê kiat-kó. Kin-á-ji̍t tuì chit hong-bīn ê chìn-pō͘ sī chin iàu-kín.
Tī Ki-tok ê sìn-gióng sī ài hiòng-chêng ê sìn-gióng, m̄-sī kiaⁿ sí ê sìn-gióng. Iâ-so͘ ǹg Si̍p-jī-kè teh hiòng-chêng hit khoán ê cheng-sîn tio̍h choè lán ê cheng-sîn. I lâi sè-kan m̄-sī kiaⁿ sí, ài cháu; nā án-ni, I lâi sī bô bo̍k-tek. Sìn-tô͘ khí-thâu kiám-chhái uī-tio̍h ka-kī ê tit-kiù, á-sī lī-ek lâi sìn; chóng-sī m̄-sī thang put-sî uī-tio̍h án-ni lâi seng-oa̍h ,tio̍h chìn-pō͘ kàu bô kiaⁿ sím-mi̍h chó͘-tòng, á-sī guî-hiám, tī Hok-im choè ióng-chiá, che chiah sī si̍t-chāi sìn.
Kàu taⁿ lán cháiⁿ-iūⁿ teh keng-êng lán ê sìn-gióng seng-oa̍h? Cháiⁿ-iūⁿ lán ê sìn-gióng kuí cha̍p nî kú, iû-goân sī loán-jio̍k, bô sím-mi̍h chìn-pō͘; cháiⁿ-iūⁿ boē hiáu thoân-pò Hok-im. Che sī tuì lán ê sim-koaⁿ siuⁿ soè. Lán nā kan-ta ǹg-bāng ài tit-tio̍h chí-tō, lâi lé-pài, lâi kî-tó-hoē , lâi Sèng-keng-hoē, lán bô khǹg ǹg-bāng ài tit-tio̍h chí-tō, lâi lé-pài, lâi kî-tó-hoē, lâi Sèng-keng-hoē, lán bô khǹg ǹg-bāng ài chí-tō pa̍t-lâng. Put-koán oē, boē, iàu-kín lán tio̍h ū chit khoán ê sim-chì. Koh-khah boē ê lâng, i iā tuì só͘ ū ê chū-boē ū só͘ tit, thang chí-tō pa̍t lâng. Lán nā chiàu lán só͘ tit-tio̍h tām-po̍h, á-sī só͘ keng-giām ê chek-sî chí-tō pa̍t lâng, án-ni chiū kàu-gia̍h, i ê sìn-gióng beh ná ke-thiⁿ khuì-la̍t. Chóng-sī m̄-thang chū-ko, lia̍h ka-kī só͘ bat ê oân-choân.
Sìn-tô͘ tuì Ki-tok ê chí-tō sī chin iàu-kín; chóng-sī Ki-tok iû-goân ài lán chīn só͘ oē chí-tō pa̍t lâng. Che sī in-uī ài lán ū chìn-pō͘ tī sìn-gióng. Lâng nā put-sî kan-ta ǹg-bāng lâng pang-chān, ǹg-bāng lâng chí-tō, hit ê lâng put-sî sī loán-jio̍k ê lâng, sī bô chì-khì ê lâng. Siōng-tè m̄ ài I ê kiáⁿ(sìn-tô͘) choè hit khoán bô chì-khì ê kiáⁿ, sī ài lán choè ū ióng-khì, kap Siōng-tè saⁿ-kap kiâⁿ.
Kin-á-ji̍t kàu-hoē put-chí khiàm-kheh pêng sìn-tô͘ ê thoân-tō-chiá. Chiū-sī sìn-tô͘ niá-siū thoân hok-im ê chek-jīm, chīn khuì-la̍t lâi chún-pī choè thoân hok-im ê kang. Chit khoán ê lâng jú choē, kàu-hoē beh chìn-tián chiū khoài. Chóng-sī m̄-thang siuⁿ chhìn-chhái. Nā siuⁿ chhìn-chhái, m̄-nā boē lī-ek kàu-hoē, ū-sî hāi tio̍h kàu-hoē. Koh thoân-kàu-chiá sui-bóng ū niá chîⁿ, iā tio̍h chûn choè pêng-sìn-tô͘ ê thoân-tō-chiá ê sim-chì lâi choè kang, tio̍h uī-tio̍h thoân hok-im lâi niá chîⁿ, m̄-thang uī-tio̍h niá chîⁿ chiah teh thoân Hok-im.
Chêng lán siūⁿ Thoân-tō-kio̍k chhut chîⁿ, chhut sian-siⁿ ê só͘-huì, iā goá chhut kang lâi lé-pài, taⁿ hit ê sî-tāi í-keng kè khì lah. Kin-á-ji̍t lán chai kàu-hoē ê chek-sêng sī lán ta̍k ê sìn-tô͘ ê, lán ài ka-kī kè-oē hō͘ kàu-hoē khiā-chāi. M̄-nā kò͘ ka-kī ê kàu-hoē, soà ài khan-sêng chi̍t keng, á-sī nn̄g keng kàu to̍k-li̍p. Kin-á-ji̍t lán tek-khak tio̍h ū chit khoán ê cheng-sîn. Kò͘ ka-kī sī chū-bia̍t ê lō͘. Kiû Siōng-tè oāⁿ-sin ta̍k ê sìn-tô͘ ê cheng-sîn.
- Kang-chok:
Chiàu Sam-ūn sî-pò só͘ kóng, Nî-thâu te̍k-pia̍t chi̍p-hoē. 16─28, Sin-tek kap Tāi-kah khu, goá kap Tīⁿ Chhong-kok Sian-siⁿ ū chhut-tiûⁿ. Chit nn̄g uī í-goā lóng ū chin hó ê chū-hoē. Sui-bóng sī lé-pài-ji̍t í-goā ê chū-hoē; iáu-kú tāi-ke chin chéng-chê lâi hù, ū-ê tuì kuí-nā phò͘ lō͘ lâi , kàu-gia̍h thang kám-tōng lâng. Bo̍k-tek sī sìn-gióng lâi chhut-hoat. Chit nn̄g khu liáu ū, soà lâi Thô-hn̂g khu 4,5 uī. Gî-lân khu sī 19─24, Siau An-ki Sian-siⁿ chhut-tiûⁿ. Kok kàu-hoē tāi-ke put-chí hia̍p-hô, ài saⁿ-kap chhut-la̍t tui-chhē Siōng-tè, iā chín-heng Siōng-tè ê kok. Tâi-pak khu iû-goân ū choē-choē uī ū khui.
漢羅（Ùi原文改寫）
三年運動特記
S. L. S.
1937年3月624期 23-24
- 主張：
遐久的歷史的教會，應該著出濟濟人物，抑是信仰的勇者，抑是濟濟忠實的信徒；總是這是真稀罕。為著按呢教會軟弱；毋是人數少，錢少的無力。這是針對信仰的缺陷所致的結果。今仔日對這方面的進步是真要緊。
佇基督的信仰是愛向前的信仰，毋是驚死的信仰。耶穌向十字架咧向前彼款的精神著做咱的精神。伊來世間毋是驚死，愛走；若按呢，伊來是無目的。信徒起頭檢采為著家己的得救，抑是利益來信；總是毋是通不時為著按呢來生活，著進步到無驚甚物阻擋，抑是危險，佇福音做勇者，這才是實在信。
到taⁿ咱怎樣咧經營咱的信仰生活？怎樣咱的信仰幾十年久，猶原是軟弱，無甚物進步；怎樣未曉傳報福音。這是對咱的心肝傷細。咱若干焦向望愛得著指導，來禮拜，來祈禱會，來聖經會，咱無勸向望愛得著指導，來禮拜，來祈禱會，來聖經會，咱無勸向望愛指導別人。不管會，未，要緊咱著有這款的心志。閣較袂的人，伊也對所有的自袂有所得，通指導別人。咱若照咱所得著淡薄，抑是所經驗的即時指導別人，按呢就到額，伊的信仰欲那加添氣力。總是毋通自高，掠家己所捌的完全。
信徒對基督的指導是真要緊；總是基督猶原愛咱盡所會指導別人。這是因為愛咱有進步佇信仰。人若不時干焦向望人幫贊，向望人指導，彼个人不時是軟弱的人，是無志氣的人。上帝毋愛伊的囝(信徒)做彼款無志氣的囝，是愛咱做有勇氣，佮上帝相佮行。
今仔日教會不止欠缺平信徒的傳道者。就是信徒領受傳福音的責任，盡氣力來準備做傳福音的工。這款的人愈濟，教會欲進展就快。總是毋通傷凊彩。若傷凊彩，毋但未利益教會，有時害著教會。閣傳教者雖罔有領錢，也著存做平信徒的傳道者的心志來做工，著為著傳福音來領錢，毋通為著領錢才咧傳福音。
前咱想傳道局出錢，出先生的所費，也我出工來禮拜，taⁿ彼个時代已經過去啦。今仔日咱知教會的責成是咱逐个信徒的，咱愛家己計畫予教會徛在。毋但顧家己的教會，紲愛牽成一間，抑是兩間到獨立。今仔日咱的確著有這款的精神。顧家己是自滅的路。求上帝換新逐个信徒的精神。
- 工作：
照三運時報所講，年頭特別集會。16─28，新竹佮大甲區，我佮鄭Chhong-kok先生有出場。這兩位以外攏有真好的聚會。雖罔是禮拜日以外的聚會；猶過大家真整齊來赴，有的對幾若舖路來，夠額通感動人。目的是信仰來出發。這兩區了有，紲來桃園區 4，5位。宜蘭區是19─24，蕭安居先生出場。各教會大家不止協和，愛相佮出力追揣上帝，也振興上帝的國。台北區猶原有濟濟位有開。