樂山園訪問記
Ngāu-san-oân Hóng-būn-kì
文獻資訊
| 項目 | 資料 |
|---|---|
| 作者 | 吳清鎰 Gô͘ Chheng-ek |
| 卷期 | 台灣教會公報/芥菜子 |
| 卷期 | 第623號 |
| 日期 | 1937/2 |
| 頁數 | 25 |
白話字（原文數位化）
Ngāu-san-oân Hóng-būn-kì
Gô͘ Chheng-ek
1937年2月623期 25
Phí-jîn tī kū-nî 12 ge̍h 15 ji̍t , kap Tân , Siau, Tiuⁿ , saⁿ-uī Sian-siⁿ tuì Tâi-pak chē バス khì hóng-būn Pat-lí-chng Nāi-pīⁿ-īⁿ Ngāu-san-oân. Hit chá-khí Tâi-pak ê hō͘ put-chí toā, chóng-sī Pat-lí-chng chin hó thiⁿ koh sio-joa̍h . Kiâⁿ-lō͘ ê sî tuì hn̄g-hn̄g chiū khoàⁿ-tio̍h Ngāu-san-oân ê choân-kéng chin-chiàⁿ bí-lē hó kéng-tì. Têng hn̂g chhiⁿ-chhuì ê hoe-ba̍k chéng-tùn chin sù-sī. Tit-tio̍h Tân Sian-siⁿ chhin-chhiūⁿ àn-nāi kiàn-ha̍k. Oân-lāi lóng sī kūn-tāi-tek ê siat-pī. Ta̍k hāng chheng-khì koh hó-sè. Oân-lāi ê hoān-chiá la̍k-ji̍t un-khûn choè-kang choh chhài-hn̂g, tē 7 ji̍t an-hioh siú lé-pài, tit-tio̍h Bo̍k-su ê lêng-tek chai-poê hó kà-sī. Chhin-chhiūⁿ án-ni, in muí-ji̍t ê seng-oa̍h put-chí ū chhù-bī, ta̍k lâng lóng sī kám-un kap hoaⁿ-hí. Hiān-sî hoān-chiá chóng-sò͘ 58 , lāi-tiong lú-chú 15 ê. Tī 12 ge̍h 26 ji̍t , goán tit-tio̍h Oân-tiúⁿ Tè I-seng ê chiau-thāi, koh chi̍t-pái khì hóng-būn in, hù in Sèng-tàn ê Chiok-hō-hoē. In só͘ choè ê chhut-thâu chin ū te̍k-sek koh chhù-bī. Ū “Pek-lī-hêng ê hòng-sàng, iā ūソロモンông ê sím-phoàⁿ, kap Í-sū-thiap ê sèng-ke̍k.” Tāi-ke khoàⁿ-liáu put-chí siū kám-kek. Kám-siā Siōng-tè , ū siúⁿ-sù chit khoán ê ki-koan, thang siu-iông chiah ê khó-lîn ê hiaⁿ-tī, hō͘ in thang tit-tio̍h pí siā-hoē phó͘-thong khah hó ê seng-oa̍h, m̄-nā án-ni, koh ia̍h ū Chú ê Hok-im kàu tī in, thang chhoā in ji̍p éng-oán kap Chú khiā-khí ê hó seng-oa̍h.
Choè-āu soà pò lán chai Ngāu-san-oân ê Oân-tiúⁿ Tè I-seng, kin-nî beh tńg-khì chó͘-ke hioh-khùn, chóng-sī ū só͘ siàu-liām ê Gô͘ Bo̍k-su-niû kap Gô͘ Ko͘-niû beh lâi. Goān Siōng-tè chiok-hok beh khì kap beh lâi--ê, ia̍h toā si-un tī Ngāu-san-oân ê téng-bīn.
漢羅（Ùi原文改寫）
樂山園訪問記
吳清鎰
1937年2月623期 25
鄙人佇舊年12月15日，佮陳，蕭，張，三位先生對台北坐バス去訪問八里庄癩病院樂山園。彼早起台北的雨不止大，總是八里庄真好天閣燒熱。行路的時對遠遠就看著樂山園的全景真正美麗好景緻。Têng園青翠的花木整頓真四序。得著陳先生親像案內見學。園內攏是近代tek的設備。逐項清氣閣好勢。園內的患者六日慇勤做工作菜園，第7日安歇守禮拜，得著牧師的靈tek栽培好教示。親像按呢，in每日的生活不止有趣味，逐人攏是感恩佮歡喜。現時患者總數58 ，內中女子15个。佇12月26日，阮得著園長戴醫生的招待，閣一擺去訪問in，赴in聖誕的祝賀會。In所做的齣頭真有特色閣趣味。有「伯利恆的放送，也有ソロモン王的審判，佮Í-sū-thiap的聖劇。」大家看了不止受感激。感謝上帝，有賞賜這款的機關，通收容遮的可憐的兄弟，予in通得著比社會普通較好的生活，毋但按呢，閣亦有主的福音到佇in，通chhoā in入永遠佮主徛起的好生活。
最後紲報咱知樂山園的園長戴醫生，今年欲轉去祖家歇睏，總是有所數念的 吳牧師娘佮吳姑娘欲來。願上帝祝福欲去佮欲來--的，亦大施恩佇樂山園的頂面。