教界的期待
Kàu-kài ê Kî-thāi
文獻資訊
| 項目 | 資料 |
|---|---|
| 作者 | 主筆 Chú-pit |
| 卷期 | 台灣教會公報 |
| 卷期 | 第623號 |
| 日期 | 1937/2 |
| 頁數 | 1-3 |
白話字（原文數位化）
Kàu-kài ê Kî-thāi
Chú-pit
1937年2月623期 1-3
Pún Jī-goe̍h, sī Kàu-hoē chèng-tī ki-koan gī-hoē ê sî-kî; te̍k-pia̍t tī 3 goe̍h ū Lâm-pō͘ Tāi-hoē kap Tâi-oân Tāi-hoē choè-ko ki-koan ê chio-chi̍p. Tng tī chit ê hui-siông sî, ū hui-siông ê hoē-gī, ǹg-bāng ū hui-siông ê hāu-kó. Ah! tī chit ê 1937 nî , sī choân sìn-tô͘ tio̍h ǹg chiân-chìn(前進 Hui-li̍p-pí 3:13, 14) ê bo̍k-phiau lâi ló͘-le̍k, chiah bô ko͘-hū Ki-tok tī Si̍p-jī-kè thè lán sí ê in-chêng. Phí-jîn tuì Tâi-oân Kàu-kài ê Kî-thāi pài pâi-lia̍t kuí-hāng chò lia̍t-uī thiàⁿ Chú ê hiaⁿ-ché chham-khó:─
-
Kî-tó chín-khí(祈禱振起). Bô-lūn siáⁿ lâng lóng chai, nā bô kî-tó , i ê sìn-gióng seng-oa̍h bē thang chhiong-si̍t sêng-tióng. Chóng-sī hō͘ lán toā tio̍h kiaⁿ--ê, chiū-sī chē-chē Ki-tok-tô͘ bô teh kî-tó. Só͘-í Kî-tó-hoē bē oa̍h-tāng, sī bô thang kî-koài. Siat-sú i nā kó-chin khak-sìn ū chi̍t-uī si̍t-si̍t chāi-chāi ê Siōng-tè tī-teh, chū-jiân ài kî-tó , ài kau-poê Siōng-tè. ǹg-bāng tuì chit-tia̍p khí, tāi-ke thiat-tí-tek sìn-gióng choân-lêng, choân-tì ê Siōng-tè, bô-lūn kong-su ê kî-tó , lóng hoaⁿ-hí si̍t-hêng.
-
Ka-têng Lé-pài ê lē-hêng(家拜勵行).Chiàu 1935 nî tō͘ Lâm-pō͘ ê thóng-kè, chóng hō͘ sò͘ sī 5576, Ka-têng Lé-pài chiah ū 2498; án-ni khah lím chi̍t-poàⁿ. Toā hi-bōng choân-thé ê sìn-tô͘, kin-nî khí, lē-hêng Ka-têng Lé-pài; ta̍k-ê chiâⁿ-chò chin-kiàm(真劍) ê Ki-tok-tô͘.
-
Sìn-tô͘ chi̍t-sim tâng thé(信徒一心同体). Chhiau-oa̍t tī tóng-phài chhin-se, ló͘-le̍k tī kàu-hoē ê hoat-tián; che sī choân sìn-tô͘ ê pún-hūn. Khó-sioh hiān-tāi ê kàu-hoē, bô-lūn Thoân-kàu-ka á-sī hoē-iú , lóng ū tóng-phài hē-thóng ê liām-thâu, koân-lī ê tò͘-cheng, tì-kàu liân-luī Kàu-kài chiân-tô͘ ám-tām[sic.]. Goān lán tāi-ke tī chit ê hui-siông sî, ēng thoân-kiat it-tì ê sim, lâi heng-khí Chú ê Sèng kok.
-
Sù-tô͘-tek ê thoân-tō(使徒的傳道). Hiān-tāi ê Kàu-kài, lâi pí-kàu chho͘-tāi kàu-hoē ê chong-kàu-su-siúⁿ, cho͘-chit hêng-thài(組織型態) sī iâⁿ bān-poē. Chóng-sī lūn Kàu-hoē ê oa̍h-miā-soàⁿ, chiū-sī Thoân-tō ê cheng-sîn khì-phek(氣魄) sī chám-jiân hi-po̍h ; che sī lán bē thang kā i hó͘-tēng(否定) tit--ê.
Chho͘-tāi Sù-tô͘ in teh thoân-tō, lūn chhiú-toāⁿ hong-hoat sī khah bô lia̍h-chò iàu-kín; in lóng sī chiàu Siōng-tè só͘ ín-chhoā teh chò-kang; kan-ta ēng sìn-gióng toā-táⁿ sut-ti̍t teh soan-thoân Hok-im. Khoàⁿ Sù-tô͘ Hēng-toān só͘ kì, chiū chai in teh thoân-tō lóng sī “ Thàn Sèng Sîn só͘ chí-sī ê īⁿ-siōng.”
Lán tī ngiâ-chih chit ê sin-nî, tuì thoân-tō chit-bīn , bo̍h-tit khoàⁿ-tāng hong-hoat, tio̍h chí-ū choan-it oá-khò Siōng-tè ê khuì-la̍t lâi chò lán thoân-tō î-it ê hong-hoat(唯一方法).
- Châi-chèng būn-tê(財政問題). Nā ū hoāⁿ-tio̍h kàu-hoē châi-bū-pō͘--ê, lóng kám-kak kàu-hoē châi-bū chin khùn-hoa̍t. Muí nî kan-ta tuì Eng-kok Bó-hoē pó͘-chō͘ Thoân-tō-sin-kim, iáu 6500 kho͘. Chin-chiàⁿ oân-choân to̍k-li̍p ê kàu-hoē iáu chió. Chû-siān-hoē ê iân-hāng bô chìn-pō͘. Thang chai, hoē-iú tuì hiàn-kim ê cheng-sîn iáu toā-toā léng-tām, bô bêng-pe̍k tī teh. Si̍t-hêng 10 hūn-chi̍t ê hiàn-kim , sī bô koè-thâu, iā m̄-sī tāng-tàⁿ. Choè-kīn tī Loē-tē ū chi̍t keng kàu-hoē, chí-ū 200 miâ ê hoē-iú, chóng-sī in muí goe̍h ê hiàn-kim sī chheng-goā kho͘. Kí-khí chi̍t kò-goe̍h ê lē:
Goe̍h-iok hiàn-kim 615.45
Sèng-ji̍t hiàn-kim 164.29
Hiàn-kim siuⁿ 10.27
Te̍k-pia̍t hiàn-kim 201.92
Chí-tēng hiàn-kim 26.06
Sin-nî te̍k-pia̍t chi̍p-hoē hiàn-kim 9.00
Kè-kiōng 1026.99
Chin ê kàu-hoē, bô khiàm bu̍t-chit, hoán-tńg ū chhun(Hān 6:13).
-
Hêng-chèng ki-kò͘ būn-tê(行政機構問題). Kīn-lâi tī Loē-tē, Ji̍t-pún Ki-tok Kàu-hoē, Bí-í-bí kàu-hoē, Cho͘-ha̍p kàu-hoē, lóng ū teh siūⁿ hêng-chèng ki-kò͘ tio̍h kái-chèng. Ū chi̍t ji̍t Lâm-pō͘ Kàu-hoē iā ē kám-kak-tio̍h hit ê pit-iàu. Kí si̍t-lē lâi kóng, hiān-chāi tiong-iong ê chek-jīm siuⁿ tāng, têng-têng tha̍h-tha̍h ê ki-koan, chin bô sim-sek. Kan-tan pān sū-bū, soà hut-lio̍k tī thoân-tō (Thài 28:19). Ta̍k kàu-hoē nā ē to̍k-li̍p, ta̍k ê kàu-hoē nā ē chīn gī-bū, che chiah sī lí-sióng ê kàu-hoē.
-
Sîn Ha̍k-hāu būn-tê(神學校問題). Tī kū-nî 11 goe̍h boé, Tâi-oân Tāi-hoē siū phài ê pō͘-hoē, ū chū-chi̍p gī-lūn Lâm Pak Sîn Ha̍k-hāu tio̍h ha̍p-it. Hi-bōng 1938 nî ē-tit si̍t-hiān. Chiàu sì-uî ê phêng-phoàⁿ kā i chóng-ha̍p khí-lâi, lóng sī kóng, ……Thèng-hāu 3 goe̍h boé ê Tāi-hoē chiū ê kái-koat.
Í-siōng hit khoán ha̍p-it ê sū, khah m̄-sī tī phí-jîn ài kóng ê hoān-uî. Phí-jîn só͘ ài kóng--ê, chiū-sī: Bô-lūn tī sè-kan ê sū-gia̍p, á-sī Siōng-tè kok ê sū-gia̍p , toā-pō͘-hūn i ê ūn-miā, sī khoàⁿ hit ê teh oa̍h-tāng ê jîn-bu̍t sī siáⁿ khoán, lâi koat-tēng--i. Chhin-chhiūⁿ án-ni , Tâi-oân Ki-tok Tiúⁿ-ló Kàu-hoē ê chiong-lâi kap hiān-chāi Sîn Ha̍k-hāu ê kàu-io̍k sī siáⁿ khoán , ū toā koan-hē tī-teh. Lán choân-thé ê kàu-hoē, koè-khì tuì Sîn Ha̍k-hāu ê kàu-io̍k ū loā-chē ê chīn-la̍t? Hit ê siāng hián-bêng--ê, kiám m̄-sī muí-nî chhut Sîn Ha̍k-hāu-huì chí-ū 709 kho͘(1935 nî tō͘--ê) nā-tiāⁿ. án-ni ū kàu-gia̍h bô? Ē thang piáu-bêng lán chin koan-sim tī kàu-hoē ê chiân-tô͘ bē?
-
Sûn-kàu ê kak-ngō͘(殉教覺悟). Kok-ka ê thóng-chè, chèng-tī keng-chè su-siúⁿ, sìn-kàu chū-iû……Ū chi̍t ji̍t sìn-tô͘ nā tú-tio̍h toā ê thiau-chiàn(挑戰) á-sī khún-tio̍k lí ū kak-gō͘ beh uī-tio̍h Ki-tok lâi hi-seng bô? (Thài 5:11). Chit-tia̍p ê kàu-hoē á-sī sìn-tô͘, lóng-sī kap choē-ok teh thò-hia̍p, si̍t-chāi sī má-má hu-hu ê kàu-hoē kap sìn-tô͘.
-
Liông-sim seng-oa̍h(良心生活). Lán khoàⁿ lán ê liông-sim , pí miâ-siaⁿ, tē-uī, ka-tī ê sèⁿ-miā cháiⁿ-iūⁿ? Liông-sim seng-oa̍h, sī choè-ko ê tō-tek.
Iâ-so͘ kóng, Kóng-oē sī, chiū-sī , m̄-sī, chiū m̄-sī(Thài 5:37). Pó-lô kóng, Goá siông-siông chûn bô khui-hū ê liông-sim (Hēng-toān 24:16).
- Thiàⁿ ê thiat-tí(愛之徹底). Bô-lūn tī kò-jîn, tī siā-hoē ài tit-tio̍h bêng-lóng(明朗) ê hēng-hok, lóng tio̍h si̍t-hêng Thiàⁿ ê thiat-tí. Che sī Hiān-tāi ê Hok-im. Hō-chhoan Sian-siⁿ choè-kīn ê káng-ián ū kóng: “Ki-tok-kàu, sī Si̍p-jī-kè Thiàⁿ ê ūn-tōng, lâng ê sim-koaⁿ, sêng-siū Siōng-tè ê ì-sek, ài kiù sè-kan ū-choē khoat-tiám ê lâng, hit khoán Thiàⁿ ê ūn-tāng: tû-khì Si̍p-jī-kè , bô chin ê chong-kàu”.
Loē-tē Ki-tok-kàu bó͘ Thok-jî-só͘(托兒所) lo̍k-sêng-sek ê sî, ū chi̍t uī bô pài Siōng-tè ê sin-sū só͘ tha̍k ê chiok-sû án-ni kóng: “ Ki-tok-kàu só͘ khí hiah-nih suí ê kiàn-tiok-bu̍t tī goán to bô siáⁿ lī-ek, goán só͘ kî-thāi--ê, chí-ū sī Thiàⁿ ê hêng-uî.”
漢羅（Ùi原文改寫）
教界的期待
主筆
1937年2月623期 1-3
本二月，是教會政治機關議會的時期；特別佇3月有南部大會佮台灣大會最高機關的招集。當佇這个非常時，有非常的會議，向望有非常的效果。啊！佇這个1937年，是全信徒著向前進(前進 腓立比3：13，14)的目標來努力，才無辜負基督佇十字架替咱死的恩情。鄙人對台灣教界的期待拜排列幾項做列位疼主的兄姊參考：─
-
祈禱振起。無論啥人攏知，若無祈禱，伊的信仰生活袂通充實成長。總是予咱大著驚--的，就是濟濟基督徒無teh祈禱。所以祈禱會袂活動，是無通奇怪。設使伊若果真確信有一位實實在在的上帝佇teh，自然愛祈禱，愛交陪上帝。向望對這霎起，大家徹底的信仰全能，全智的上帝，無論公私的祈禱，攏歡喜實行。
-
家庭禮拜的勵行 (家拜勵行)。照1935年度南部的統計，總戶數是5576，家庭禮拜才有2498；按呢較臨一半。大希望全體的信徒，今年起，勵行家庭禮拜；逐个成做真劍的基督徒。
-
信徒一心同體。超越佇黨派親疏，努力佇教會的發展；這是全信徒的本份。可惜現代的教會，無論傳教家抑是會友，攏有黨派系統的念頭，權利的鬥爭，致到連累教界前途黯淡。願咱大家佇這个非常時，用團結一致的心，來興起主的聖國。
-
使徒tik的傳道(使徒的傳道)。現代的教界，來比較初代教會的宗教思想，組織型態是贏萬倍。總是論教會的活命線，就是傳道的精神氣魄是嶄然稀薄；這是咱袂通共伊否定得--的。
初代使徒in teh傳道，論手段方法是較無掠做要緊；in攏是照上帝所引chhoā teh做工；干焦用信仰大膽率直teh宣傳福音。看使徒行傳所記，就知in teh傳道攏是「趁聖神所指示的異象。」
咱佇迎接這个新年，對傳道這面，莫得看重方法，著只有專一倚靠上帝的氣力來做咱傳道唯一的方法。
- 財政問題。若有按著教會財務部--的，攏感覺教會財務真困乏。每年干焦對英國母會補助傳道薪金，猶6500箍。真正完全獨立的教會猶少。慈善會的捐項無進步。通知，會友對獻金的精神猶大大冷淡，無明白佇teh。實行10份一的獻金，是無過頭，也毋是重擔。最近佇內地有一間教會，只有200名的會友，總是in每月的獻金是千外箍。舉起一個月的例：
月約獻金615.45
聖日獻金164.29
獻金箱 10.27
特別獻金201.92
指定獻金26.06
新年特別集會獻金9.00
計共1026.99
真的教會，無欠物質，反轉有賰(翰 6：13)。
-
行政機構問題。近來佇內地，日本基督教會，美以美教會，組合教會，攏有teh想行政機構著改正。有一日南部教會也會感覺著彼个必要。舉實例來講，現在中央的責任傷重，重重疊疊的機關，真無心適。干焦辦事務，紲忽略佇傳道（太28:19）。逐教會若會獨立，逐个教會若會盡義務，這才是理想的教會。
-
神學校問題。佇舊年11月尾，台灣大會受派的部會，有聚集議論南北神學校著合一。希望1938年會得實現。照四圍的評判共伊總合起來，攏是講，……聽候3月尾的大會就的解決。
以上彼款合一的事，較毋是佇鄙人愛講的範圍。鄙人所愛講--的，就是：無論佇世間的事業，抑是上帝國的事業，大部份伊的運命，是看彼个teh活動的人物是啥款，來決定--伊。親像按呢，台灣基督長老教會的將來佮現在神學校的教育是啥款，有大關係佇teh。咱全體的教會，過去對神學校的教育有偌濟的盡力？彼个siāng顯明--的，敢毋是每年出神學校費只有709箍(1935年度--的) nā-tiāⁿ。按呢有夠額無？會通表明咱真關心佇教會的前途袂？
-
殉教的覺悟(殉教覺悟)。國家的統制，政治經濟思想，信教自由……有一日信徒若拄著大的挑戰抑是窘逐你有覺悟欲為著基督來犧牲無？(太5：11)。這霎的教會抑是信徒，攏是佮罪惡teh妥協，實在是馬馬虎虎的教會佮信徒。
-
良心生活。咱看咱的良心，比名聲，地位，家己的性命怎樣？良心生活，是最高的道德。
耶穌講，講話是，就是，毋是，就毋是(太5：37)。保羅講，我常常存無虧負的良心(行傳24：16)。
- 疼的徹底(愛之徹底)。無論佇個人，佇社會愛得著明朗的幸福，攏著實行疼的徹底。這是現代的福音。賀川先生最近的講演有講：「基督教，是十字架疼的運動，人的心肝，承受上帝的意識，愛救世間有罪缺點的人，彼款疼的運動：除去十字架，無真的宗教」。
內地基督教某托兒所落成式的時，有一位無拜上帝的紳士所讀的祝詞按呢講：「基督教所起遐爾媠的建築物佇阮都無啥利益，阮所期待--的，只有是疼的行為。」