強志壯膽
Kiông-chì Chòng-táⁿ
文獻資訊
| 項目 | 資料 |
|---|---|
| 作者 | 陳添旺 Tân Thiam-ōng |
| 卷期 | 台灣教會公報/芥菜子 |
| 卷期 | 第622號 |
| 日期 | 1937/1 |
| 頁數 | 30-31 |
白話字（原文數位化）
Kiông-chì Chòng-táⁿ
Tân Thiam-ōng siá
1937年1月622期 30-31
Chhiáⁿ tha̍k Iok-su-a thâu chiuⁿ.
Chit chiuⁿ ū kóng 4 pái kiông lín ê chì, chòng lín ê sim. Sin hoan-e̍k kóng, “ióng-kám chòng-táⁿ”. Che oē sím-mi̍h lâng kóng mah? Siáⁿ iân-kò͘ lâi chhut chit hō oē tī peh-sìⁿ kap thâu-lâng? Chiū-sī chīn-tiong ê Mô͘-se sí, peh-sìⁿ teh loé-chì, kiaⁿ-hiâⁿ, sit-táⁿ, só͘-í Iâ-hô-hoa hián-hiān hoan-hù Loán ê kiáⁿ Iok-su-a saⁿ pái, āu-lâi Iok-su-a hoan-hù peh-sìⁿ chi̍t pái , Lín tio̍h “ióng-kám chòng-táⁿ”, che sī tāi-seng siū hùn-sī, āu-lâi hùn-sī pa̍t-lâng.
Chit lāi-tiong ū 4 hāng thang saⁿ-kap siūⁿ:
-
Chí-tō-chiá sit-lo̍h. Mô͘-se choè chīn tiong ê lô͘-po̍k í-keng sí, i ê sù-bēng í-keng chīn, só͘ ài sìn-jīm ê m̄-chai siáⁿ lâng? Peh-sìⁿ chhin-chhiūⁿ bô chú ê khoán, só͘-í Iâ-hô-hoa giâm-giâm hoan-hù, ài ióng-kám chòng-táⁿ.
-
Bîn-sim iô-tāng. Khoàⁿ in ê chú-kong í-keng sí, chèng peh-sìⁿ sit-táⁿ kiaⁿ-hiâⁿ, só͘-í Iâ-hô-hoa pī-pān hō͘-kè-chiá Iok-su-a lâi soà-chiap, chhiat-ì kiò in m̄-bián kiaⁿ.
-
Chiân-tô͘ ê guî-hiám .Khoàⁿ-tio̍h Iok-tàn-hô hiah-nih toā, oh-tit kè-khì hit pêng, kai-chài choân-lêng ê Chú ēng koân kau-hù Iok-su-a , hō͘ hô-chuí pun-khui, chhin-chhiūⁿ kiâⁿ ta-toē, lâi kè-khì hit pêng hoāⁿ.
-
ài ta̍t bo̍k-tek toē. Chiū-sī èng-ún ê Ka-lâm toē, chin-chiàⁿ puî, m̄-kú siâⁿ kian-kò͘, khiā-khí ê peh-sìⁿ hiau-ióng, sui-sī ì-ài iā sī chin kiaⁿ. Só͘-í Iok-su-a hōng Siōng-tè ê bēng-lēng, kiò peh-sìⁿ sūn-thàn, nā uî-ke̍h, tio̍h sí choē, āu-lâi in chin-chiàⁿ sūn-thàn, se̍h-siâⁿ 7 ji̍t, āu-lâi ka-kī tó, muí-ji̍t chi̍t pái , tē 7 ji̍t ài se̍h 7 pái, kó-jiân èng-giām , lóng tó-hoāi.
Taⁿ lán ê kàu-hoē tī chhin-chhiūⁿ chit khoán ê sî-tāi, ài kiû Siōng-tè te̍k-soán chīn-tiong ê lô͘-po̍k lâi choè-kang, thang êng-hián I ê miâ.
Peh-sìⁿ teh iô-tāng ê sî, ài kiû Chú lâi pang-chān, m̄-bián kiaⁿ, I kap lán tī-teh.
Chiân-bīn sui-jiân ū chó͘-keh.
ài kiû Siōng-tè khui-lō͘ hō͘ lán kiâⁿ;
Kàu ta̍t lán ê bo̍k-tek toē.
Tit-tio̍h Chú só͘ èng-ún ê toā-hok.
Taⁿ saⁿ-nî ūn-tōng ê kang teh chìn-hêng, kiû Chú hián-hek giâm-giâm hoan-hù, hō͘ peh-sìⁿ hoaⁿ-hí uī-tio̍h Thian-kok lâi chìn-hêng, saⁿ-kap êng-kng kui tī choân-lêng ê Pē Siōng-tè. Sim só͘ goān.
漢羅（Ùi原文改寫）
強志壯膽
陳添旺寫
1937年1月622期 30-31
請讀約書亞頭章。
這章有講4擺強恁的志，壯恁的心。新翻譯講，「勇敢壯膽」。這會甚物人講mah？啥緣故來出這號會佇百姓佮頭人？就是盡忠的摩西死，百姓咧餒志，驚惶，失膽，所以耶和華顯現吩咐Loán的囝約書亞三擺，後來約書亞吩咐百姓一擺，恁著「勇敢壯膽」，這是代先受訓示，後來訓示別人。
這內中有4項通相佮想：
-
指導者失落。摩西做盡忠的奴僕已經死，伊的使命已經盡，所愛信任的毋知啥人？百姓親像無主的款，所以耶和華嚴嚴吩咐，愛勇敢壯膽。
-
民心搖動。看in的主公已經死，眾百姓失膽驚惶，所以耶和華備辦後繼者約書亞來紲接，切意叫in毋免驚。
-
前途的危險。看著約旦河遐爾大，僫得過去彼爿，佳哉全能的主用權交付約書亞，予河水分開，親像行乾地，來過去彼爿岸。
-
愛達目的地。就是應允的迦南地，真正肥，毋過城堅固，徛起的百姓驍勇，雖是意愛也是真驚。所以約書亞奉上帝的命令，叫百姓順趁，若違逆，著死罪，後來in真正順趁，踅城7日，後來家己倒，每日一擺，第7日愛踅7擺，果然應驗，攏倒壞。
Taⁿ咱的教會佇親像這款的時代，愛求上帝特選盡忠的奴僕來做工，通榮顯伊的名。
百姓咧搖動的時，愛求主來幫贊，毋免驚，伊佮咱佇咧。
面雖然有阻隔。
愛求上帝開路予咱行；
到達咱的目的地。
得著主所應允的大福。
Taⁿ三年運動的工咧進行，求主顯赫嚴嚴吩咐，予百姓歡喜為著天國來進行，相佮榮光歸佇全能的父上帝。心所願。