記念瑞穗第一代的信徒
Kì-liām Suī-huī Tē-it tāi ê Sìn-tô͘
文獻資訊
| 項目 | 資料 |
|---|---|
| 作者 | 吳榮祥 Gô͘ En̂g-siông |
| 卷期 | 台灣教會公報/芥菜子 |
| 卷期 | 第616卷 |
| 日期 | 1936/7 |
| 頁數 | 29 |
白話字（原文數位化）
Kì-liām Suī-huī Tē-it tāi ê Sìn-tô͘
Kò͘ Tiuⁿ Thô͘-kui hiaⁿ
1936.07 tē 616 hō p.29
Koà-chhài-chí 126 hō
(Gô͘ En̂g-siông)
Só͘ siàu-liām ê Thô͘-kui hiaⁿ, tī Bûn-san-kūn toē-hng chhut-sì, sī Hok-kiàn-jîn, chit-gia̍p sī lông-gia̍p kap cha̍p-hoè, choè piáⁿ ê seng-lí. Jī-cha̍p-it hoè ê sî, kap Lí--si7 ÎN chí kiat-hun. In sī ho̍k-sāi cha̍p-sîn kàu, ū choán-ki lâi Suī-huī-chhoan 38 nî kú, tī Chiau-hô 9 nî 2 ge̍h tiong, thiaⁿ-tio̍h Ki-tok-kàu, hoaⁿ-hí lâi sìn Chú Iâ-so͘, pek-chhiat kî-tó, i ê kha ū siⁿ lia̍p-á 33 nî kú, tit Chú ê un-tián oân-choân hó. Chiau-hô 9 nî 8 ge̍h 12 ji̍t, in ang-bó͘ kap Lîm--sī Phín chí, N̂g Pún-lâi hiaⁿ, N̂g--sī Chhun-hoe chí, Tân Sûn-suî hiaⁿ, 6 lâng choè-tīn khì Gio̍k-lí kàu-hoē niá soé-lé. ài ū chi̍t ê só͘-chāi thang ho̍k-sāi Siōng-tè, chiū chiong i ê toā-thiaⁿ hiàn choè chi̍p-hoē-só͘; N̂g Pún-lâi hiaⁿ ê chhù, hiàn 3 keng choè siok-sià, ū kap pa̍t-uī î-ki khì hia toà ê Ki-tok-tô͘ chham-siông, lâi pín-chhéng Thoân-tō-kio̍k phài chi̍t ê sian-siⁿ tī-hia thoân Hok-im.
Lūn Káng-gī-só͘, siok-sià, cha̍p-huì, in beh hū-tam. Tī Chiau-hô 10 nî 4 ge̍h 3 ji̍t, Thoân-tō-kio̍k bēng-lēng siáu-seng khì tiàm hia thoân Ho̍k-im, Thô͘-kui hiaⁿ in ang-bó͘, kap í-goā ê sìn-tô͘, siông-siông tuì kò-jîn chèng-bêng tō-lí, lâi sìn Chú--ê ū ná ke-thiⁿ. Thô͘-kui hiaⁿ, Lí--si7 ÎN chí, N̂g Pún-lâi hiaⁿ, bat tú-tio̍h pek-hāi, ū siū-siong, iā bô sit-chì, ióng-kám sìn-khò Ki-tok, khì-sak siâ-kàu, uī-tio̍h Sèng-hoē ài hō͘ i hoat-tián, hoaⁿ-hí chhut chîⁿ, chhut kang, tàu kó͘-bú. Tī Chiau-hô 10 nî 11 ge̍h 14 àm khí, ló-ek-hiat pīⁿ, 15 ji̍t ē-po͘ 6 tiám kui thian, bīn-iông hó khoàⁿ, 18 ji̍t ē-po͘ nn̄g-tiám choè kò-pia̍t-sek.
漢羅（Ùi原文改寫）
記念瑞穗第一代的信徒
故張塗圭兄
1936.07 第616號 p.29
芥菜子126號
(吳榮祥)
所數念的塗圭兄，佇文山郡地方出世。是福建人，職業是農業佮雜貨、做餅的生理。21歲的時佮李--氏圓姊結婚。In是服事雜神教，有轉居來瑞穗村38年久，佇昭和9 年2月中，聽著基督教，歡喜來信主耶穌，迫切祈禱，伊的跤有生粒仔33年久，得主的恩典完全好。昭和9年8月12 日，in翁某佮林--氏品姊、黃本來兄、黃--氏春花姊、陳純隨兄，6人做陣去玉里教會領洗禮。愛有1个所在通服事上帝，就將伊的大廳獻做集會所；黃本來兄的厝獻3間做宿舍，有佮別位以及去遐蹛的基督徒參詳，來稟請傳道局派1个先生佇遐傳福音。
論講議所、宿舍、雜費，in欲負擔。佇昭和10年4月3 日，傳道局命令小生去踮遐傳福音，塗圭兄in翁某佮以外的信徒，常常對個人証明道理，來信主--的有那加添。Thô͘-kui兄、李氏圓姊、黃本來兄，捌拄著迫害，有受傷，也無失志，勇敢信託基督，棄拺邪教，為著聖會愛予伊發展，歡喜出錢、出工鬥鼓舞。佇昭和10年11月14 暗起，腦溢血病，15日e晡6點歸天，面容好看，18日e晡2點做告別式。