故梁阿海長老
Kò͘ Niû A-hái Tiúⁿ-ló
文獻資訊
| 項目 | 資料 |
|---|---|
| 作者 | 高端莊 Ko Toan-chong |
| 卷期 | 台灣教會公報 |
| 卷期 | 第606卷 |
| 日期 | 1935/9 |
| 頁數 | 29 |
白話字（原文數位化）
Kò͘ Niû A-hái Tiúⁿ-ló
1935.09 tē 606 koàn p.29-30
Koà-chhài-chí tē 116 hō
(Ko Toan-chong)
Niû Tiúⁿ-ló tī A. D. 1872 nî chhut-sì tī Sin-tek chiu ē ê Pak-pō͘ chng. 1902 nî tuì Gô͘ Ui-liâm Bo̍k-su siū soé-lé; 30 nî chêng choân ka-cho̍k chiū poaⁿ-soá lâi tī Hoe-liân-káng keng-lông, ti̍t-chiap kàn-chiap tàu kiàn-siat kàu-hoē tī Hoe-liân-káng. 1918 nî siū kéng, tng pún-hoē ê tiúⁿ-ló; keng-kè kuí-nā jīm, kàu tī kin-ná-ji̍t.
I ū 5 ê hiaⁿ-tī, 3 ê sió-bē, tāi-ke sī jia̍t-sim ê sìn-tô͘, I ê hiaⁿ-tī lóng bat tng-chit tī pún-hoē. Hiān-sî ka-cho̍k ū 80 goā-ê, sui-jiân sī toā ka-cho̍k, chóng-sī tāi-ke chin hia̍p-hô, chhin-chhiūⁿ chi̍t ê sió siā-hoē, koh iā-sī choè pún-hoē ê toā khuì-la̍t.
I ê lēng sian-hū sī Pak-pō͘ Kàu-hoē chho͘-tāi jia̍t-sim ê tiúⁿ-ló, I ê uî-cho̍k oē-thang kè-sio̍k tī kàu-hoē-lāi teh oa̍h- tāng, toè in sī toā-lâng suí ê kha-pō͘, si̍t-chāi sī chin hi-hán.
A-hái Tiúⁿ-ló ū 11 ê kiáⁿ, lāi-goā sun ū 20 goā-ê, ū-ê choè I-seng, iā chi̍t-ê sī hiān-jīm ê chip-sū, kiam choè Chú-ji̍t-o̍h ê hāu-tiúⁿ, koh-chài ū tit-tio̍h Bûn-ha̍k-sū ê ha̍k-uī. Í-goā ū-ê kàu tiong-téng ha̍k-hāu, choē-choē sī choè siā-hoē tiong ê iú-le̍k-chiá, sǹg chin siong-tong ê ka-têng.
I pêng-sò͘ sī chin ióng-kiāⁿ ê lâng khí-thâu sī tuì sió-khoá ê pīⁿ khí-in, bô phah-sǹg pīⁿ-sè piàn-hoà hiah kín, koh-chài hoat-seng ha̍p-pēng-chèng; sui-jiân tiúⁿ-ló-niû kap I kiáⁿ, choan cheng-sîn bô khùn, bô chia̍h lâi kò͘ I, thâu-bé ji̍p-īⁿ ge̍h-goā ji̍t. Nā-sī Siōng-chú ê chí-Ì tī 6 ge̍h 20 ji̍t, soah I sè-kan ê kang, hióng-siū 63 hè, hit ji̍t ê hoē-chòng-chiá ū 400 goā-ê.
I tī tē-chiūⁿ ū kuí-nā hāng thang siàu-liām I :--
1.Tī pīⁿ-tiong gâu thé-thiap khàn-hō͘ lâng: M̄-bat hián-chhut kan-khó͘, só͘ hián-chhut sī hoaⁿ-hí ê bīn; siông-siông tuì kò͘ ê lâng kóng, I ê sim chin pêng-an chin chū-iû.
-
Cheng-sîn kiat-liân Chú: Tī pīⁿ-tiong ài lâng kap I gîm-si, kî-tó; kuí-nā pái kàu tī chin guî-hiám, iā oē chhut-siaⁿ kap lâng gîm-si, tang-sim kap lâng kî-tó. Che bô m̄-sī tuì ū kiat-liân tī Chú, chiah oē thang khoàⁿ-chhut chit-khoán.
-
I ê choè lâng: Sī un-jiû, hô-pêng, jîn-ài, tuì ka-têng sī khîn-khiām, kut-la̍t, phoh-si̍t. Tī ka-têng m̄-bat siⁿ-chhut put-hô ê siaⁿ. Tī siā-hoē tiong sī sìn-si̍t, hō͘ lâng kiò-choè sèng-jîn. Kàu ta̍k só͘-chāi lâng hoan-hêng I, chun-kèng i.
-
Tuì kàu-hoē: Sī khoàⁿ choè I ê sìⁿ-miā. Kàu-hoē-lāi khah kan-khó͘, khah hā-chiān ê kang, I hoaⁿ-hí choè kàu chiu-chì; nā ū song-hí sū, I sī kap lâng tông-chêng kàu thàu boé. Koh chin ū chek-jīm-kám tī kàu-hoē ê sū-bū, he̍k-sī Jīm-chit-hoē, á-sī Sió-hoē, Í-ki̍p lé-pài-ji̍t, tû-khì phoà-pīⁿ á-sī chhut-goā, m̄-bat khoat-se̍k. Ta̍k lé-pài-ji̍t chá-chá chiū khoàⁿ-tio̍h I chhiò-iông ê bīn lâi teh ín-chhoā lâng, hō͘ lâng ke-thiⁿ kèng-khiân thang ho̍k-sāi Siōng-tè. Lé-pài soah, sī kap lâng tâm-lūn sìn-gióng seng-oa̍h ê sū. Siōng-chhiáⁿ tī pīⁿ-chhn̂g iáu the liām, I nā hó, beh kín lâi siu-lí kàu-hoē ê lî-pa; án-ni thang khoàⁿ-chhut I ê choân cheng-sîn sī tiàm tī kàu-hoē seng-oa̍h. Koh-chài lé-pài chá-khí chá-chá chiū chio choân-ke lâi lé-pài; tuì kè-sin tē-it kiò-khí Tiúⁿ-ló-niû ê pi-khó͘--ê, chiū-sī I kóng, Taⁿ bô thang koh thiaⁿ I ta̍k lé-pài chá-khí teh chio toā-sè khì lé-pài ê siaⁿ-lah.
5.Tuì thoân-kàu-chiá: Gâu thé-thiap, gâu thiàⁿ-thàng; m̄-nā m̄-bat kóng thoân-tō-chiá ê sī-hui, iā m̄-bat thiaⁿ I kóng pa̍t lâng ê pháiⁿ. I bat tuì bó͘ bo̍k-su kóng chi̍t kù oē, “Lūn lâng ê hó goá chiū chai, beh kóng lâng ê pháiⁿ, goá sī boē hiáu.” Si̍t-chāi thang o-ló, thang chun-kèng. Chóng kóng, I it-seng ū chīn kàu-hoē ê chit-bū kap jîn-seng ê sù-bēng.
Niû Tiúⁿ-ló sī chò goán pún-hoē ê toathīau-chio̍h, chò ka-têng ê tiōng-sim jîn-bu̍t, chò siā-hoē ê toā ki kng-teng; si̍t-chāi sit-lo̍h chi̍t ki toā-ki chhiú-kut. Chóng-sī tuì I pún-sin sī thang kā I hoaⁿ-hí, in-uī I Í-keng cheng-chiàn hó e 5cheng-chiàn, Í-keng chīn pháu-cháu ê lō͘-chām, Í-keng siú só͘ sìn ê tō-lí.
Niû Tiúⁿ-ló ah ! Thang kóng lí uī-tio̍h kàu-hoē ū hi-seng-tek ê sí, tuì lí ê sí, beh chō-chiū Hoe-liân-káng kàu-hoē chin ê ki-chhó͘; goán iā sìn lí beh tī thiⁿ-téng lâi thè lí chá tī tē-chiūⁿ ê kàu-hoē kî-tó; iā tuì lí ê sí, beh kà-sī goán khah oē lí-kái kàu-hoē ê chin Ì-gì; goán iā beh ló͘-le̍k, ēng lí ê sìn-gióng lâi ióng-chòng; lí oē thang choè sìn-gióng ê sèng-lī-chiá, ǹg thiⁿ-nih ê Ka-lâm-toē chhiùⁿ tek-sèng ê koa kui thiⁿ kìⁿ Thiⁿ Pē, thang kā lí kiong-hí ! Goán iā beh toè lí ê sìn-gióng hiòng-chêng bô soah; goán iā sìn lí siông-siông teh choè goán ê Tiúⁿ-ló kap goán saⁿ-kap tī-teh.
漢羅（Ùi原文改寫）
故梁阿海長老
1935.09 第606卷 p.29-30
芥菜子第116號
(高端莊)
梁長老佇A. D. 1872年出世佇新竹州下的北埔庄。1902 年對吳威廉牧師受洗禮；30年前全家族就搬徙來佇花蓮港耕農，直接、間接鬥建設教會佇花蓮港。1918年受揀，當本會的長老；經過幾若任，到佇今仔日。
伊有5个兄弟，3个小妹，大家是熱心的信徒，伊的兄弟攏捌當職佇本會。現時家族有80外个，雖然是大家族，總--是大家真協和，親像1个小社會，閣也是做本會的大氣力。
伊的令先父是北埔教會初代熱心的長老，伊的遺族會通繼續佇教會內teh 活動，綴in 序大人媠的跤步，實在是真稀罕。
阿海長老有11个子，內外孫有20外个，有的做醫生，也1个是現任的執事，兼做主日學的校長，閣再有得著文學士的學位。以外有的到中等學校，濟濟是做社會中的有力者，算真相當的家庭。
伊平素是真勇健的人，起頭是對小可的病起因，無扑算病勢變化遐緊，閣再發生合併症；雖然長老娘佮伊子；專精神無睏、無食來顧--伊，頭尾入院月外日。若是上主的旨意佇6月20日，煞伊世間的工，享壽63歲，彼日的會葬者有400外个。
伊佇地上有幾若項通數念伊:--
-
佇病中gâu体貼艱苦人：毋捌顯出艱苦，所顯出是歡喜的面；常常對顧的人講，伊的心真平安真自由。
-
精神結連主：佇病中愛人佮伊吟詩、祈禱，幾若擺到佇真危險，也會出聲佮人吟詩，同心佮人祈禱。這無毋是對有結連佇主，才會通看出這款。
-
伊的做人：是溫柔、和平、仁愛，對家庭是勤儉、kut力、樸實。佇家庭毋捌生出不和的聲。佇社會中是信實，予人叫做聖人。到逐所在人歡迎--伊、尊敬--伊。
-
對教會：是看做伊的姓名。教會內較艱苦、較下賤的工，伊歡喜做到週至；若有喪喜事，伊是佮人同情到透尾。閣真有責任感佇教會的事務，或是任職會、抑是小會以及禮拜日，除去破病抑是出外，毋捌缺席。逐禮拜日早早就看著伊笑容的面來teh引chhoā--人，予人加添敬虔通服事上帝。禮拜煞，是佮人談論信仰生活的事。尚且佇病床猶teh唸，伊若好，欲緊來修理教會的籬笆；按呢通看出伊的全精神是踮 佇教會生活。閣再禮拜早起早早就招全家來禮拜，對過身第一叫起長老娘的悲苦--的。就是伊講，今無通閣聽伊逐禮拜早起teh 招大細去禮拜的聲--lah。
-
對傳教者：Gâu体貼、gâu疼痛；毋若毋捌講傳道者的是非，也毋捌聽伊講別人歹。伊捌對某牧師講1句話：「論人的好我就知，欲講人的歹，我是袂曉。」實在通呵咾、通尊敬。總講，伊一生有盡教會的職務佮人生的使命。
梁長老是做阮本會的大柱石，做家庭的中心人物，做社會的大支光燈。實在失落1支大支手骨。總--是對伊本身是通共 伊歡喜，因為伊已經征戰好的征戰，已經盡跑走的路站，已經守所信的道理。
梁長老--ah！通講你為著教會有犧牲tek的死，對你的死，欲造就花蓮港教會真的基礎；阮也信你欲佇天頂來替你早佇地上的教會祈禱；也對你的死，欲教示阮較會理解教會的真意義；阮也欲努力、用你的信仰來勇壯；你會通做信仰的勝利者，向天裡的迦南地唱得勝的歌歸天見天父，通共你恭喜！阮也欲綴你的信仰向前無煞；阮也信你常常teh做阮的長老佮阮相佮 佇--leh。