數念故林Lîn長老
Siàu-liām Kò͘ Lîm Lîn Tiúⁿ-ló
文獻資訊
| 項目 | 資料 |
|---|---|
| 作者 | 鄭鐵 Tīⁿ Thih |
| 卷期 | 台灣教會公報/芥菜子 |
| 卷期 | 第604卷 |
| 日期 | 1935/7 |
| 頁數 | 30 |
白話字（原文數位化）
Siàu-liām Kò͘ Lîm Lîn Tiúⁿ-ló
1935.07 tē 604 koàn p.30
Koà-chhài-chí tē 114 hō
(Tīⁿ Thih)
Lîm Lîn Tiúⁿ-ló sī Lí-lāng Kàu-hoē-oân Lîm Su-siong hiaⁿ ê lāu-pē. Khoàⁿ kiáⁿ-jî ê jia̍t-sim kap sìn-tek, chiū chai lāu-pē ê sìn-tek kap jia̍t-sim, thang siàu-liām lâi kui êng-kng Chú Siōng-tè.
Tī 3 ge̍h 7 ji̍t, i ê tē-saⁿ kiáⁿ Lîm Su-khé kun kap Phoaⁿ--sī Goa̍t-kim lú-sū beh kú-hêng kiat-hun-sek. Kin-nî tú sī i 61 hoè, sūn chit ê kî-hoē i ê kiáⁿ beh kā i chiok-siū. Put-hēng tī boē hióng-siū siang-hí ê chêng chhe-sì, àm-chhia khì Gio̍k-lí boé-pān, hit-àm tī lí-koán khí-pīⁿ, (náu-ek-hiat.) Kàu thiⁿ-kng chhe-gō͘ chá-khí 8 tiám, khoàⁿ-tio̍h Tiúⁿ-ló niû kap i ê kiáⁿ ê sî, an-sim éng-bîn hó-khùn, hióng-siū 61 hoè. 3 ge̍h chhe 6 ē-po͘ 2 tiám, tī i ê chhù kú-hêng kò-pia̍t-sek; hù-sek ê lâng ū 200 chó-iū.
Nā-sī kóng-khí Lîm Lîn Tiúⁿ-ló, chiū Lâm-pō͘ khah lāu ê sian-siⁿ á-sī bo̍k-su, lóng bat--i. In-uī i 18 hoè ê sî lī-khui pún-hiuⁿ khì Táu-la̍k, hit-sî kap Lâu Bān-kiàm Tiúⁿ-ló, Gô͘ Lo̍k Tiúⁿ-ló choè pêng-iú; tuì án-ni jia̍t-sim ho̍k-sāi Siōng-tè. Tī 22 hoè ê sî, siū kú-chiàn tha̍k Sîn-ha̍k. Tī 26 hoè chhut-lâi thoân Chú ê Hok-im. Tī 32 hoè ê sî, tú-tio̍h Sian-siⁿ-niû kè-óng; koh ū 3 ê kiáⁿ, cha-bó͘-kiáⁿ, put-tek-í tio̍h sî Thoân-tō ê kang, lâi Tang-pō͘ toà tī Bān-jîn-po͘; tī-hia koh tit-tio̍h hiān-sî ê Tiúⁿ-ló-niû. I ū 7-ê kiáⁿ 4-ê cha-bó͘-kiáⁿ; lūn i ê kiáⁿ-jî tī Bān-jîn-po͘ sī thang o-ló ê bô͘-hoān chheng-liân, tē-it toā ka-cho̍k koh jia̍t-sim. Chú kóng, “Pháiⁿ-chhiū boē-oē kiat hó ké-chí.” Si̍t-chāi, khoàⁿ i ê kiáⁿ-jî chiū thang siàu-liām Lîm Tiúⁿ-ló ê sìn-tek kap jia̍t-sim.
漢羅（Ùi原文改寫）
數念故林Lîn長老
1935.07 第604卷 p.30
芥菜子第114號
(鄭鐵)
林Lîn長老是里lāng教會員林書襄兄的老父。看囝兒的熱心佮信德，就知老父的信德佮熱心，通數念來歸榮光主上帝。
佇3月7日，伊的第3囝林書啟君佮潘--氏月金女士欲舉行結婚式。今年拄是伊61歲，順這个機會伊的囝欲共伊祝壽。不幸佇未享受雙喜的前初4，暗車去玉里買辦，彼暗佇旅館起病 (腦溢血)。到天光初5早起 8點，看著長老娘佮伊的囝的時，安心永眠好睏，享壽61歲。3月初6 e晡2點，佇伊的厝舉行告別式；赴式的人有200左右。
若是講起林Lîn長老，就南部較老的先生抑是牧師攏捌--伊。因為伊18 歲的時離開本鄉去斗六，彼時佮劉Bān-kiàm長老，吳Lo̍k長老做朋友；對按呢熱心服事上帝。佇22歲的時，受舉薦讀神學。佇26歲出來傳主的福音。佇32歲的時，拄著先生娘過往；閣有3个囝、查某囝，不得已著辭傳道的工，來東部蹛佇萬人埔；佇遐閣得著現時的長老娘。伊有7个囝、4个查某囝；論伊的囝兒佇萬人埔是通呵咾的模範青年，第一大家族閣熱心。主講：「歹樹袂會結好果囝。」實在看伊的囝兒就通數念林長老的信德佮熱心。