李Bêng-tē長老的小傳
Lí Bêng-tē Tiúⁿ-ló ê Sió-toān
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 台灣教會公報/芥菜子 |
| 卷期 | 第599卷 |
| 日期 | 1935/2 |
| 頁數 | 29 |
白話字（原文數位化）
Lí Bêng-tē Tiúⁿ-ló ê Sió-toān
1935.02 tē 599 koàn p.29
Koà-chhài-chí tē 109 hō
(Tân Chheng-gī)
Lí Tiúⁿ-ló sī Choân-chiu ê lâng. I lâi tī Báng-kah choè kim-á-tiàm, ū lâi thiaⁿ tō-lí. 1900 nî ū niá soé-lé, sī Kai Bo̍k-su kā i niá soé-lé, āu-lâi ū choè chip-sū. Kàu 1905 nî ū seng choè Tiúⁿ-ló. I siông-siông hù Sió-hoē, Tiong-hoē, Tāi-hoē, iā kuí-nā pái khì Tâi-lâm. 1934 nî 12 ge̍h 6 ji̍t pia̍t-sè, án-ni thâu kàu bé, choè Tiúⁿ-ló 29 nî. Lí Tiúⁿ-ló tuì pài Siōng-tè khí, chin jia̍t-sim, hán-tit bô kàu pài-tn̂g choè lé-pài, i lâi lé-pài, sî-kan chin chún.
1904 nî, chiū-sī 31 nî chêng, i ū thê-chhiòng kàu-hoē tio̍h to̍k-li̍p. I chiū kap chèng tiúⁿ-ló, chip-sū chham-siông, hit-tia̍p Pak-pō͘ iáu-bē ū Tiong-hoē. I kap chèng tióng-chip, khì Tām-suí kap Hoâ Bo̍k-su, Gô͘ Bo̍k-su chham-siông, in chin hoaⁿ-hí, chiū thoè in pín Ka-ná-tāi ê Bú-hoē, chún in siat Tiong-hoē tī Pak-pō͘. Bú-hoē ū chún, chiū tēng hit nî 10 ge̍h 4 ji̍t, tī Tām-suí Sîn Ha̍k-hāu khui Pak-pō͘ ê Tiong-hoē, tuì hit-tia̍p khí, chiū kéng kuí-nā lâng lâi khó kàu-su. Kàu 1906 nî 4 ge̍h 3 ji̍t, Báng-kah Kàu-hoē chiū thâu-chi̍t uī to̍k-li̍p chhiáⁿ bo̍k-su. Kàu chit-tia̍p bo̍k-su iáu tī-teh. I-keng keng-kè 29 nî kú, chit ê sī Lí Tiúⁿ-ló ê kó͘-chhui. Taⁿ i í-keng bô tī sè-kan, Báng-kah ê Kàu-hoē tio̍h siàu-liām i. Taⁿ i í-keng kè-óng, Lí Tiúⁿ-ló-niû tī 10 ge̍h 29 ji̍t iā kè-óng, nn̄g ê pîⁿ-pîⁿ 69 hè. Hu-hū chin hô-bo̍k, Lí Tiúⁿ-ló-niû chin un-sûn, m̄-bat thiaⁿ-kìⁿ i kap lâng oan-ke, nn̄g ê choè-tīn tńg-khì, chin ū hok-khì. Taⁿ i ū chi̍t ê hāu-siⁿ, í-keng kè-óng, ū chi̍t ê sim-pū iáu tī-teh. Koh ū chi̍t ê toā-sun, hiān-sî tī Tām-suí Tiong-o̍h teh tha̍k-chheh, iáu ū 3 ê cha-bó͘-sun, i ê ka-cho̍k lóng ū lâi lé-pài, chhiáⁿ tāi-ke thoè in kî-tó.
漢羅（Ùi原文改寫）
李Bêng-tē長老的小傳
1935.02 第599卷 p.29
芥菜子第109 hō
(陳清義)
李長老是泉州的人。伊來佇艋舺做金仔店，有來聽道理。1900年有領洗禮，是偕牧師共伊領洗禮，後--來有做執事。到1905年有升做長老。伊常常赴小會、中會、大會，也幾若擺去台南。1934年12月6日別世，按呢頭到尾做長老29年。李長老對拜上帝起，真熱心，罕得無到拜堂做禮拜，伊來禮拜，時間真準。
1904年，就是31年前，伊有提倡教會著獨立。伊就佮眾長老、執事參詳，彼霎北部猶未有中會。伊佮眾長執，去淡水佮華牧師、吳牧師參詳，伊真歡喜，就替in稟加拿大的母會，準in設中會佇北部。母會有准，就定彼年10 月4 日，佇淡水神學校開北部中會，對彼霎起，就揀幾若人來考教師。到1906年4月3 日，艋舺教會就頭1位獨立請牧師。到這霎牧師猶佇--leh。已經經過29年久，這个是李長老的鼓吹。今伊已經無佇世間，艋舺的教會著數念--伊。今伊已經過往，李長老娘佇 10 月29 日也過往，兩个平平69歲。夫婦真和睦，李長老娘真溫純，毋捌聽見伊佮人冤家，兩个做陣轉--去，真有福氣。今伊有1个後生，已經過往，有1个新婦猶佇--leh。Koh 有1个大孫，現時淡水中學teh讀冊，猶有3个查某孫，伊的家族攏有來禮拜，請大家替in祈禱。