論教會功業的由來
Lūn kàu-hoē kong-gia̍p ê iû-lâi
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第597卷 |
| 日期 | 1934/12 |
| 頁數 | 18-19 |
白話字（原文數位化）
Lūn kàu-hoē kong-gia̍p ê iû-lâi
- 12, no. 597, pp. 18-19
Kū Ka-gī thiaⁿ Táⁿ-niau Lâm-pó, ū sèⁿ Lâu ê kong-gia̍p, hit ê gia̍p-chú sī Lâu Gio̍k-kong, ū thó͘-tē tī Toā-lūn-iûⁿ. Tī Toā-lūn-chng ū Lâu Gio̍k-kong ê phài-hā Lâu Chhàu-hiàn, Lâu Lâu-pa̍k tī-teh. Tè-kok léng Tâi liáu-āu, ū khan-toīng kàu Toā-lūn, ū chhâ-chhut Lâu Gio̍k-kong ê phài-hā bô la̍p Toā-lūn-iûⁿ, Lūn-á-kng ê tē-cho͘, tì-kàu koaⁿ-thiaⁿ ū kā i bē. Hit-sî ū kiò Lâu Bān-chheng tio̍h bé, chóng-sī Bān-chheng bô ài. Nā-sī koaⁿ-thiaⁿ ū chài-saⁿ kiò i bé, āu-lâi bô ta-oâ ū kā i bé. Bé liáu-āu, ū iú-le̍k-chiá chhut-lâi ké-chò hit tè thó͘-tē ê siông-sio̍k-chiá[sic.], ài beh toa̍t hit tè tē. Khoàⁿ chit ê sè-bīn hit khoán, chiū kap i ê sió-tī Bān-kiàm chham-siông. I ê sió-tī kā i kóng, Nā-sī án-ni, chiong chit tè tē lâi hiàn hō͘ Táu-la̍k Kàu-hoē. Bān-chheng ū hoaⁿ-hí, chiū suî-sî khì pài-tn̂g chhoē Lîm Io̍k-kî Sian-siⁿ; in nn̄g lâng siat-hoat hit tè tē, kap thó hō͘ lâng siu--khì ê cho͘-chhek. Tī 1904 nî 9 goe̍h 7 ji̍t, ū teng-kì chò Táu-la̍k Kàu-hoē ê kong-gia̍p, kah-sò͘ sī 3 kah 6 lî. Kàu-hoē ū thok Lâu Bān-kiàm koán-lí, hit ê siū-ek lóng chò kàu-hē ê keng-siông-huì.
(Thāi-sio̍k).
漢羅（Ùi原文改寫）
論教會功業的由來
1934.12，no.597，pp.18-19
舊嘉義廳打貓南堡，有姓劉的功業，彼个業主是劉玉公，有土地佇大崙洋。佇大崙庄有劉玉公的派下劉Chhàu-hiàn，劉Lâu-pa̍k佇teh。帝國領台了後，有勘丈到大崙，有查出劉玉公的派下無納大崙洋，崙仔崗的地租，致到官廳有共伊賣。彼時有叫劉萬清著買，總是萬清無愛。若是官廳有再三叫伊買，後來無ta何有共伊買。買了後，有有力者出來假做彼塊土地的相續者，愛欲奪彼塊地。看這个勢面彼款，就佮伊的小弟萬劍參詳。伊的小弟共伊講，若是按呢，將這塊地來獻予斗六教會。萬清有歡喜，就隨時去拜堂揣林育奇先生；in兩人設法彼塊地，佮討予人收--去的租粟。佇1904年9月7日，有登記做斗六教會的功業，甲數是3甲 6釐。教會有託劉萬劍管理，彼个收益攏做教會的經常費。
(待續)。