欲就會，毋就袂
Beh chiū oē, m̄ chiū boē
文獻資訊
| 項目 | 資料 |
|---|---|
| 作者 | 林清廉 Lîm Chheng-liâm |
| 卷期 | 台灣教會公報/芥菜子 |
| 卷期 | 第597卷 |
| 日期 | 1934/12 |
| 頁數 | 29 |
白話字（原文數位化）
Beh chiū oē, m̄ chiū boē
(Lîm Chheng-liâm)
- 12, no. 597, pp. 29
Koan-im-soaⁿ Kàu-hoē, í-chêng m̄-bat chhut Lú Soan-tō-hoē ê iân-kim. Kin-nî 11 ge̍h 11 ji̍t lé-pài soah, goá chiū khui-chhuì kā in toê khoàⁿ, liâm-piⁿ chiū toê cha̍p goā kho͘. Chiông-tiong teh toê ê sî, ū kuí-nā-ê ta-po͘ lâng tī-teh, (in-uī in ê hū-jîn-lâng bô lâi). Chi̍t ê chiū kóng, “Goá chhut chi̍t kho͘ gûn, siá goá ê hū-jîn-lâng ê miâ”. Koh chi̍t-ê iā-sī án-ni kóng, che si̍t-chāi chin-chiàⁿ thang choè bô͘-hoān.
Ta-po͘-lâng thoè in ê hū-jîn-lâng, lâi hiàn Lú Soan-tō-hoē ê iân-kim. Che chiū-sī hián-bêng in lāi-tiong ū ài-chêng tī-teh. Nā ū lâng thoè i ê lāu-bú lâi hiàn-kim, iā-sī piáu-bêng i ê hàu-gī.
Suī-huī ê sin hoē-iú teh chún-pī beh siat Káng-gī-só͘ iáu-boē chiâⁿ, chiū í-keng ū cha̍p só͘ ê chí-bē ji̍p Lú Soan-tō-hoē. Chin-chiàⁿ sī “beh chiū oē, m̄ chiū boē.”
Taⁿ ǹg-bāng, iáu-bē bō͘-chi̍p Lú Soan-tō-hoē ê kàu-hoē, jīm-chit-chiá, tio̍h kín siat-hoat, bō͘-chi̍p khah choē lâng lâi ji̍p hoē, hō͘ Lú Soan-tō-hoē tuì mâ-nî khí, tit-tio̍h koh-khah toā khuì-la̍t, lâi keng-êng thian-kok ê sū. Bo̍h-tit êng-êng khiā teh the-sî, goá bô la̍t thang choè siáⁿ kang. Tâi-oân hiah choē lâng teh-beh tîm-lûn, Chú ái lí chān I kiù lâng, lí nā toê-iân Lú Soan-tō-hoē, koh chīn sim thoè Lú Soan-tō-hoē kî-tó, chiū-sī ū hūn tī hit ê kang, iā-sī chhun-chhiú saⁿ-kap kiù lâng.
漢羅（Ùi原文改寫）
欲就會，毋就袂
(林清廉)
- 12，no. 597，pp. 29
觀音山教會，以前毋捌出女宣道會的捐金。今年11月11日禮拜煞，我就開喙共in題看，連鞭就題十外箍。從中咧題的時，有幾若个查埔人佇咧，(因為in的婦人人無來)。一个就講，「我出一箍銀，寫我的婦人人的名」。閣一个也是按呢講，這實在真正通做模範。
查埔人替in的婦人人，來獻女宣道會的捐金。這就是顯明in內中有愛情佇咧。若有人替伊的老母來獻金，也是表明伊的孝誼。
Suī-huī的新會友咧準備欲設講議所猶未成，就已經有十所的姊妹入女宣道會。真正是「欲就會，毋就袂。」
今向望，猶未募集宣道會的教會，任職者，著緊設法，募集較濟人來入會，予女宣道會對明年起，得著閣較大氣力，來經營天國的事。莫得閒閒徛咧推辭，我無力通做啥工。台灣遐濟人咧欲沉淪，主愛你贊伊救人，你若題緣女宣道會，閣盡心替女宣道會祈禱，就是有份佇彼个工，也是伸手相佮救人。