信的人有神跡綴伊
Sìn ê lâng ū sîn-jiah tè i
文獻資訊
| 項目 | 資料 |
|---|---|
| 作者 | 葉金木 Ia̍p Kim-bo̍k |
| 卷期 | 台灣教會公報/芥菜子 |
| 卷期 | 第597卷 |
| 日期 | 1934/12 |
| 頁數 | 24-25 |
白話字（原文數位化）
Sìn ê lâng ū sîn-jiah tè i
(Má-thài 16 chiuⁿ 17 chat)
(Ia̍p Kim-bo̍k)
(Chiap 11 goe̍h 23 bīn)
- 12, no. 597, pp. 24-25
Tī 4 nî chêng, ū chi̍t-uī hiaⁿ-tī Ia̍p Sim-tong Sian-siⁿ, kap ke-lāi ê lâng lóng kiōng 15 lâng lâi sìn tō-lí, chin jia̍t-sim, chóng-sī chhì-liān saⁿ-soà kàu. Sìn tō-lí āu bô kú, i ū chhoā chi̍t-ê sim-pū siⁿ sun, chóng-sī ū tú-tio̍h sán-āu jia̍t, hui-siông ê guî-hiám, ū ji̍p choan-bûn sán-khó[sic.] pīⁿ-īⁿ; chiàu i-seng khoàⁿ, sī chin oh-tit ê pīⁿ, chóng-sī i kap sian-siⁿ-niû mî-ji̍t khún-chhiat kî-tó. Goá kap tióng-chip, hoē-iú iā ta̍k ji̍t khì thoè i kî-tó, āu-lâi kó-jiân tit-tio̍h Chú ê lîn-bín, lâi jiâu i ê oa̍h-miā. āu-lâi ū chi̍t-ê soè-hàn cha-bó͘-kiáⁿ 2 hè, ū tú-tio̍h phoà-pīⁿ, hui-siông ê siong-tiōng, chiàu in khoàⁿ, sī bô ǹg-bāng, Ia̍p Sim-tong Sian-siⁿ ū chhiáⁿ goá tio̍h khì thoè i kî-tó, goá ū ēng tō-lí an-uì in, kóng lâng boē-oē, Siōng-tè bô m̄ oē; tuì hit-tia̍p liáu-āu, khoàⁿ ū tām-po̍h ǹg-bāng ê khoán, chiū khì ji̍p Koe-lâng pīⁿ-īⁿ, i-seng iā-sī khoàⁿ guî-hiám ê khoán. Goá ū chio chiah ê tióng-chip thoè i pek-chhiat kî-tó, tuì án-ni chiū chiām-chiām ná hó, bô kú chiū thoè īⁿ.
Koh chi̍t pái, chi̍t-ê ta-po͘-kiáⁿ ū tú-tio̍h tiòng-ní-iām chin siong-tiōng, khì ji̍p Koe-lâng pīⁿ-īⁿ, chiàu i-seng kóng tio̍h chhiú-su̍t, in chin khoà-lū, nā chhiú-su̍t, tio̍h khai chin-choē chîⁿ, koh tio̍h chin kú chiah oē hó, m̄-kú i-seng kóng nā bô chhiú-su̍t, boē hó, koh ū sìⁿ-miā ê koan-hē; hit-tia̍p in chin khoà-lū, chiū chhiáⁿ goán khì thoè i kî-tó. Ū chi̍t ji̍t, i-seng kap khàn-hō͘-hū kóng tek-khak tio̍h chhiú-su̍t, chiah oē ēng-tit; in chiū kóng, kàu kè[sic.]-ji̍t nā bô khah hó, chiah chhiú-su̍t. Tī hit àm, Ia̍p Sian-siⁿ kap Sian-siⁿ-niû chin pek-chhiat kî-tó, thin beh kng, chiū piat lâng chhut--lâi. I-seng kóng, Taⁿ bián chhiú-su̍t, boē iàu-kín, koh bô joā-kú, chiū hó thoè-īⁿ. Si̍t-chāi sī toā ê sîn-jiah, hō͘ lán thang chai Chú Iâ-so͘ só͘ èng-ún--ê, tek-khak beh chiâⁿ, só͘-í lán ê sìn-gióng sī tē-it iàu-kín. Ngá-kok-su 5 chiuⁿ 15 chat: Ū sìn ê kî-tó, beh kiù phoà-pīⁿ ê lâng, Chú beh hō͘ i khí-lâi, i nā ū choē, beh sià-bián i.
(Thāi-sio̍k).
漢羅（Ùi原文改寫）
信的人有神跡綴伊
(馬太16章17節)
(葉金木)
(接11月23面)
1934.12，no.597，pp.24-25
佇4年前，有一位兄弟葉心東先生，佮家內的人攏共15人來信道理，真熱心，總是試煉相紲到。信道理後無久，伊有娶一个新婦生孫，總是有拄著產後熱，非常的危險，有入專門產科病院；照醫生看，是真僫得的病，總是伊佮先生娘暝日懇切祈禱。我佮長執，會友也逐日去替伊祈禱，後來果然得著主的憐憫，來饒伊的活命。後來有一个細漢查某囝2歲，有拄著破病，非常的傷重，照in看，是無向望，葉Sim-tong先生有請我著去替伊祈禱，我有用道理安慰in，講人袂會，上帝無毋會；對彼霎了後，看有淡薄向望的款，就去入雞籠病院，醫生也是看危險的款。我有招遮的長執替伊迫切祈禱，對按呢就漸漸那好，無久就退院。
閣一擺，一个查埔囝有拄著中耳炎真傷重，去入雞籠病院，照醫生講著手術，in真掛慮，若手術，著開真濟錢，閣著真久才會好，毋久醫生講若無手術，袂好，閣有性命的關係；彼霎in真掛慮，就請阮去替伊祈禱。有一日，醫生佮看護婦講的確著手術，才會用得；in就講，到隔日若無較好，才手術。佇彼暗，葉先生佮先生娘真迫切祈禱，天欲光，就煏膿出--來。醫生講，今免手術，袂要緊，閣無偌久，就好退院。實在是大的神跡，予咱通知主耶穌所應允--的，的確欲成，所以咱的信仰是第一要緊。雅各書5章15節：有信的祈禱，欲救破病的人，主欲予伊起來，伊若有罪，欲赦免伊。
(待續)。